Die Terugkeer: Dit Is Nie Te Laat Nie En Jy Is Nooit Te Ver NieVoorbeeld

Jesus Is Genoeg

* Kyk na hierdie video met Afrikaanse onderskrifte deur "Watch on YouTube" te klik, dan op "YouTube Settings, Subtitles" en kies Afrikaans.

Ons lees baie verhale van mense wat struikelblokke suksesvol oorkom het as deel van hul proses om terug te keer. 'n Persoon gaan van siek tot gesond, van smart tot vreugde, van verlies tot wins. Hierdie verhale is kragtig en bemoedigend. Wat doen ons egter as 'n aardse terugkeer nie moontlik is nie? Wat doen ons as 'n geliefde gesterf het, 'n besigheid misluk, 'n egskeiding finaal is? Wat doen ons wanneer ons besef dat ons situasie nie in hierdie lewe opgelos sal word nie?

Ons kan na die verhaal van Elia en die weduwee gaan kyk in 1 Konings 17:8-24 vir 'n antwoord. Wanneer die verhaal begin, het Elia kamp opgeslaan aan die oostekant van die Jordaanrivier, langs die spruit Krit, waar God elke dag vir hom voorsien het. Mettertyd het God egter vir Elia gesê om na Sarfat te reis, waar 'n weduwee na hom sal omsien. Hierdie weduwee was nie ryk nie — ons kan dit dadelik uit die teks aflei. Sy het een seun gehad, en hul kos was ook gevaarlik min.

Die profeet het die weduwee gevind en haar gevra vir 'n bietjie water en 'n stukkie brood. "Wel hoekom nie," sê sy, of iets soortgelyks. Sy sê sy het "... net 'n handvol meel in die kruik en 'n bietjie olie in die erdekan. Ek maak nou maar 'n paar houtjies bymekaar en dan gaan ek vir my en my seuntjie iets klaarmaak om te eet. Daarna moet ons maar doodgaan." Wil jy die laaste van my kos hê? Hoekom nie? As ek dit vir jou gee, sal dit slegs die einde van ons ellende verhaas."

Was jy al ooit daar? Dat jy nie meer geweet het wat om te doen nie? Hoe onsinnig klink dit, dat wanneer ons op ons absolute laagste is, God iets van ons vra? Hy nooi ons om vir Hom die laaste maaltyd te gee. Weet jy wat daardie ete verteenwoordig? Dit is ons volle vertroue. Wanneer ons 'n absolute laagtepunt bereik het en op ons swakste is, roep Jesus ons om alles wat ons nog het aan Hom oor te gee. Hy nooi ons om ons laaste bietjie te gee, wat dit ook al mag wees. Wanneer ons ons laaste bietjie weggee, plaas ons ons volle vertroue in Hom.

In die weduwee se geval, toe sy gedoen het wat Elia vir haar gesê het om te doen, was daar elke dag kos vir Elia, haarself en haar seun. Die meel in die kruik was nie opgebruik nie, en die olie in die erdekan het nie minder geword nie. Sy het dit wat sy gehad het weggegee en sy het uiteindelik meer gehad.

Wanneer Jesus vir ons genoeg in ons lewens is, fokus ons op wat ons het, nie op wat ons nie het nie. Ons seën God en vloek hom nie. Ons kyk aandagtig na God en hardloop na Hom toe, nie weg van Hom af nie. Ons glo God en wantrou Hom nie, al verstaan ons nie ons omstandighede nie. Ons vra Hom om die deel van ons wat oorgebly het te neem en alles daarmee te doen wat Hy wil hê ons moet wees. Wanneer ons nie 'n terugkeer het nie, is die terugkeer juis dat Jesus vir ons genoeg is.

Reageer

Wat kan ons uit die weduwee se voorbeeld in hierdie verhaal leer oor hoe om God te vertrou met ons hulpbronne, deur alles wat ons het aan Hom te gee, en om in geloof verder te gaan?

Wanneer dit kom by die probleme wat jy in die gesig staar, hoe kan die feit wanneer jy alles wat jy het aan Jesus gee, jy deel word van God se oplossing?

Hoe het Jesus aan jou geopenbaar dat Hy 'n stewige fondament te midde van jou storm is? Hoe het Hy aan jou geopenbaar dat Hy genoeg is?