JosuaVoorbeeld

Lees: Josua 21:1-3; 2 Kronieke 17:7-9; Nehemia 8:7-8; Psalm 119:27

SOAP: Psalm 119:27

Vir verdere nalees: Josua 21:4-12

Hoofstuk 21 beskryf die verdeling van die stede vir die Leviete vanuit die gebied van die ander stamme. Die Leviete was verspreid dwarsoor die land om die mense die Wet te leer en om ‘n goddelike invloed op die res van die stamme te hê. 

Die Levietiese priesterskap het begin met Aäron, Moses se ouer broer (Eksodus 28:1-3). Aäron se afstammelinge het gedien as priesters in Israel. Hulle bediening was in die Tabernakel, en later in die Tempel, hoofsaaklik as bemiddelaars tussen mens en God. Die Levietiese priesters het die verantwoordelikheid gedra om die offerandes, soos vereis deur die Wet van Moses, te offer.

Die verantwoordelikheid van die Leviete om die Wet aan die res van die stamme te leer, is oorgedra van die Leviete na hulle wat glo in Jesus Christus. Ons word geroep om ‘n goddelike invloed op die wêreld rondom ons te hê. In 1 Petrus 2:9 lees ons dat ons ‘n koninklike priesterskap is en dat ons geroep word om die uitsonderlikheid van Jesus te verkondig. As Christene het ons vandag ook die verantwoordelikheid wat die Leviete gehad het, en ons word geroep om daardie plig te vervul.

Maar dit is net moontlik as ons die Woord van God verstaan, daagliks daaroor mediteer en maniere vind om dit wat ons lees, toe te pas en dit elke dag uit te leef. Dit is hoe die lig van Jesus deur ons skyn. 

Hemelse Vader, U het ons geroep om anders te wees. U het ons geroep om u Woord te versprei en om ‘n heilige invloed op ander te hê. Help my om u Woord daagliks in my te dra en daaroor te mediteer. Maar, bowenal Here, help my om so te leef dat ander u lig deur my lewe kan sien.

In Jesus se naam.

Amen.