JosuaVoorbeeld

Lees: Josua 14:6-13

SOAP: Josua 14:12

Vir verdere nalees: Josua 14:1-5; 14-15; Josua 15

Hierdie is een van my gunsteling verhale in die boek van Josua. Onthou jy vir Kaleb? Hy was een van die twaalf verspieders wat Moses gestuur het. Van die twaalf was dit net hy en Josua wat met goeie nuus terug gerapporteer het. As gevolg daarvan, was hulle die enigste twee mans van daardie generasie wat in die beloofde land toegelaat is. 

Hierdie gebeure het plaasgevind toe Kaleb 40 jaar oud was. Van daardie dag af, het 45 jaar verby gegaan, Kaleb was 85 jaar oud toe hy die woorde van vandag se verse gespreek het. Hy was nie meer ‘n jong man nie! Toe hy gesê het: “Gee my nou asseblief die bergwêreld waarvan die Here daardie dag gepraat het.” het Kaleb aangedui dat hy nie gaan toelaat dat sy ouderdom hom gaan keer om die Here te dien nie.

Hy het gevra vir berge om te klim en reuse om te oorwin. Hy het die Here vertrou en geweet dat God met hom was. Wat ek die meeste van Kaleb bewonder is die feit dat hy nooit enige verskonings gevind het om nie sy deel te doen in God se koninkryk nie. Hy het nie gesê dat hy te oud of te moeg was nie. Hy het nie gesê dat die Enakiete goddelose reuse was nie. Hy het nie gesê dat die berg te groot was nie. Hy wou voortgaan met die werk wat vir hom gegee was.

Het jy enige verskonings wanneer dit kom by die dien van God? Kruip jy weg agter familie, werk, ‘n besige skedule, jou ouderdom of dalk iets anders? Ek bid dat Kaleb se voorbeeld jou vandag sal bemoedig om God met jou hele hart te dien.

Vader, vergewe my vir my verskonings. Vergewe my vir al die kere wat ek nie bereid was om U te dien nie en versterk my hart om my berg op te eis.

In Jesus se naam.

Amen