Hoop IsVoorbeeld

Hoop Is Die Beste Geskenk Wat Ons Kan Gee

Wat gebeur as jy 'n koppie vol maak met meer water as wat dit kan hou? Die water styg vinnig na bo, loop oor en vloei oor die rand.

Dieselfde ding wat met die koppie gebeur, kan met ons gebeur wanneer ons God toelaat om ons lewens met hoop te vul. Wanneer ons met hoop gevul is, loop dit oor en vloei dit oor in die lewens van die mense om ons.

Romeine 15:4 sê: "Alles wat vooraf in die Skrif opgeteken is, is tog opgeteken om ons te leer sodat ons deur die standvastigheid en bemoediging wat die Skrif ons gee, vol hoop kan wees."

God gebruik die Bybel om hoop in ons lewens te spreek, sodat ons dit met ander kan deel. Wanneer die beloftes van God ons fokuspunt word, styg hoop om ons harte te vul en diegene rondom ons te beïnvloed. Die heel beste geskenk wat ons aan ander kan gee wat miskien hoop kort, is om dit wat aan ons gegee is, toe te laat om oor te loop na hulle lewens.

Miskien is daar iemand wat jy ken wat in 'n tydperk is waar hoop kortkom. Daardie persoon mag dalk op die punt wees om handdoek in te gooi. As dit so is, moenie dat hierdie dag eindig sonder om na hom of haar uit te reik met hierdie boodskap van hoop nie. As iemand nie op sy eie hoop kan vind nie, laat hom toe om van jou hoop, wat God aan jou gegee het, te leen. Dit sal die beste geskenk wees wat jy kan gee.

Bid:

Jesus, baie dankie dat U my bron van hoop is. Ek bid dat die hoop wat U my gegee het, sal oorloop in die lewens van ander en dat ek sal aanhou om op U staat te maak gedurende die tye in my lewe wanneer ek hoop nodig het.

Oordink:

Is daar enigiemand van wie jy weet wat vandag hoop nodig het? Bid vir daardie persoon, vra vir God om hom of haar te bemoedig en hoop en vreugde te gee. Nadat jy gebid het, reik uit met 'n oproep of boodskap van bemoediging.