Heg betekenis aan jou werkVoorbeeld

God Gebruik Ons Werk Vir Sy Doeleindes

Na baie jare van beproewings, het Josef se drome goeie vrugte afgewerp. Die farao het nie net die hele Egipte se werksaamhede aan Josef toevertrou nie, sy broers het na hom gekom om voedsel te soek toe die hongersnood hulle getref het en het voor Josef gebuig, alhoewel hulle nie dadelik geweet het dat dit hy was nie. Dit was God se bedoeling om die sewe jaar van oorvloed en sewe jaar van hongersnood te gebruik om sy volk na Egipte te lei waar hulle hul toevlug sou neem. God het die omstandighede gebruik om Josef voor te berei om sy plan uit te voer.

Toe Jakob gesterf het, was Josef se broers bevrees dat hy uiteindelik sy wraak sou neem. Tog het Josef op God se doel bly fokus en so gereageer: "Julle wou my kwaad aandoen, maar God wou daarmee goed doen [...] vir die redding van baie lewens"(Genesis 50:20). Josef het net 'n klein gedeelte gesien van hoe hy by God se groter plan ingepas het. Eendag sal Josef presies sien hoeveel lewens hy help red het. 

Jakobus 1:2-3 sê: "My broers, julle moet baie bly wees wanneer allerlei beproewings oor julle kom, want, soos julle weet, as julle geloof die toets deurstaan het, stel dit julle in staat om te volhard." Wanneer ons in tye van beproewing getrou is, maak ons die deur oop vir God om wonderlike dinge deur ons te doen. Dit is belangrik om te vertrou dat God ons werk kan en sal gebruik om ons karakters te bou, ons te versterk en uiteindelik resultate te lewer wat ons nooit anders sou bereik het nie. 

Wanneer ons op Christus gefokus bly, kan ons die vertroue hê dat God ons werk op groter maniere gebruik as wat ons kan dink. Ons mag dalk sien hoe God ons werk in die groter prentjie gebruik, soos Josef gesien het. Eendag sal ons almal sien watter rol ons getrouheid in God se plan gespeel het. 

Daag jouself uit om toe te laat dat God jou deur moeilike omstandighede louter en die betekenis van jou werk vir sy doel en sy heerlikheid verhoog.

Gebed

Vader, ek weet dat U altyd in en deur my lewe aan die werk is. Help my om altyd 'n ewige perspektief te behou op die werk wat ek elke dag doen. Vermeerder my geloof. Gee my wysheid in my werk, sodat alles wat ek doen gebruik kan word vir u doeleindes. In die Naam van Jesus. Amen.

Vir Verdere Ondersoek

Kyk na ander werksplek oordenkings van Workmatters.