Die Woord van God vir Elke BehoefteVoorbeeld

GEEN GROTER LIEFDE

Hoe wonderbaarlik is die liefde wat die Vader aan ons bewys het!

Níks verskaf groter lewensvreugde as die wete dat God ons liefdevolle Vader is nie. Nogtans het baie mense, ook hulle wat Christen gelowiges is, nog nie hierdie onbeskryflike vreugde ervaar nie. Baie is deur hulle aardse vaders seergemaak en gevolglik verplaas hulle hulle persoonlike ervarings van wat vaderskap behels op God die Vader. God word dan as ‘n aardse vader beskou – ‘n afwesige ouer en iemand wat jou in die steek laat. Ander het ‘n voorstelling van God as ‘n afsydige en wraaksugtige Vader. Vergeleke met Jesus se voorstelling van die Vader, is nie een van hierdie voorstellings akkuraat nie. Jesus het gekom om die wonderbaarlike liefde van die Vader bekend te maak. Ja, God is die Koning. Ja, God is die Here. Ja, God is die Regter. Hy is egter by uitstek die Vader wat die aardse weeskinders so innig liefgehad het dat Hy sy enigste Seun gestuur het om slawe tot seuns en weeskinders tot erfgename te maak. Van alle seëninge is hiérdie die grootste – die besef dat daar géén groter Vader as God is nie. Indien jy nie ‘n goeie aardse vader gehad het nie, besef die volgende: jy het ‘n volmaakte Vader in die hemel wat ook vir jóú sy wonderbaarlike liefde deur Jesus bewys het.

GEBED

Vader, ek dank U dat U nie afsydig is nie, maar by ons betrokke is. Help my om terwyl ek hierdie oordenkings lees, ‘n groter intimiteit met U te geniet. In die Naam van Jesus. Amen.