Die Woord van God vir Elke BehoefteVoorbeeld

ONS WARE IDENTITEIT

“… en julle sal vir My seuns en dogters wees ...” (2 Korintiërs 6:18).

Elke goeie pa het ‘n droom vir sy kinders. In die vorige oordenking het ons van ‘n gedeelte van God se droom vir ons bewus geword: “ … Ek sal vir julle ‘n Vader wees …” (2 Korintiërs 6:18). Dit was God se plan nog voor die grondlegging van die wêreld. Daar is egter méér. God begeer nie net dat ons sy ware identiteit ken nie; Hy begeer ook dat ons óns ware identiteit moet ken. As God ons Vader is, wat is ons status dan voor God? Wanneer ons kies om volgelinge te wees van sy Seun, Jesus Christus, ís ons sy seuns en dogters. Daar is géén groter vreugde as die wete dat God die Vader is na wie ons almal gesmag het, en om as sy aangenome seuns en dogters ons in dié voorreg te verlustig nie. Dit is sy droom vir ons lewens. Kom ons maak dit ons vernaamste doel om (as erfgename) uit die oorvloed te leef wat die Vader, verhewe bo almal, aan ons as seuns en dogters skenk. Kom ons maak dit ons lewensdoel om vir ons hemelse Vader die béste seuns en dogters moontlik te wees. Dit is die Vader se droom vir ons lewens. Kom ons maak dit ook ons droom!

GEBED

Dierbare Vader, dankie dat U my geroep het om u aangenome kind te wees. Help my om my identiteit in hierdie wonderlike eer te vind. In die Naam van Jesus. Amen.