मत्ती 7
7
कर्पिन्त दोष बीगु
लूक ६:३७-३८,४१,४२
1 “मेपिन्त दोष बी मते, अले छिमित नं दोष बी मखु। 2छाय्धाःसा गथे छिमिसं मेपिन्त दोष बिल, अथे हे छिमित नं दोष बी। गुलि छिमिसं कर्पिन्त बिल, उलि हे छिमित नं बी।#मर्क ४:२४
3 “छिमि किजाया मिखाय् च्वंगु धू खंम्हय्सिनं थःगु मिखाय् च्वंगु सुपः छाय् मखन? 4थःगु मिखाय् सुपः दुहां वनाच्वंगु मखंम्हय्सिनं छिमि किजाया मिखाय् धू दुहां वनाच्वंगु खँय् छाय् वास्ता याः जुइ माल? 5थःगु हे मिखाय् च्वंगु सुपः मखंम्हय्सिनं छिमि किजाया मिखाय् च्वंगु धू लिकयाबी धकाः गथे धाये फइ? हे निपाः ख्वाःपाः दुपिं, न्हापां थःगु मिखाय् च्वंगु सुपः निं लिका। अले तिनि कर्पिनिगु मिखाय् च्वंगु धू खंकाः लिकाये फइ।
6 “च्वखगु चिज खिचायात बी मते, अथे याःसा वं छिमित हे न्याः वइ। फाया न्ह्यःने मोती वान्छ्वया बी मते, अथे याःसा वं थुकियात न्हुत्तु न्हुयाबी।
फ्वँ, मा अले सःती
लूक ११:९-१३
7 “फ्वँ, अले छिमित बी, माला स्व, अले छिमिसं लुइके फइ, सः ब्यु, अले लुखा चाय्काबी। 8छाय्धाःसा फ्वंपिन्त बी, माला स्वःपिन्सं लुइकी, अले सः ब्यूम्हय्सित चाय्काबी।
9 “अज्याःम्ह सु बौ दइ? सुनां काय्नं मरि फ्वनीबलय् ल्वहं बी? 10अथे हे न्या फ्वनीबलय् सर्प बी? 11मभिंपिं जुयाः नं छिमिसं थः मस्तय्त भिंगु भिंगु बी सः धाःसा स्वर्गय् च्वनादीम्ह बाःनं जक थःके फ्वंम्हय्सित झन भिंगु बियामदी ला?
12 “छिमित मेपिन्सं छु याःसा यः छिमिसं नं इमित अथे हे या। थ्व हे खँ व्यवस्था व अगमवक्तातय्सं स्यना थकूगु खः। #
लूक ६:३१
निपु लँ
लूक १३:२४
13 “चिब्यागु ध्वाखां दुहां हुँ, छाय्धाःसा नरकय् वनीगु ध्वाखा तब्या, अले लँ तब्या जुइ। वने अःपुगुलिं थ्व ध्वाखां दुहां वनीपिं यक्व दइ। 14जीवनयागु ध्वाखा धाःसा चिब्या, अले लँ चिब्या। उकिं थनं जुइपिं मनूत यक्व दइ मखु।
सिमा व फल
लूक ६:४३-४४
15 “फताहा अगमवक्तात खनाः होश या, छाय्धाःसा थुपिं फैचायागु ख्वाःपालं पुया वइ। दुनें धाःसा थुपिं ग्यानापुपिं गुँखिचा थें जुइ। 16थुमिगु ज्या स्वयाः छिमिसं थुमित म्हसीके फइ। कंझालय् दाख सइ मखु। अथे हे कंमाय् यःमरि सइ मखु। 17भिंगु सिमाय् भिंगु हे फल सइ। अथे हे मभिंगु सिमाय् मभिंगु हे फल सइ। 18भिंगु सिमाय् मभिंगु फल गुबलें सइ मखु। अथे हे मभिंगु सिमाय् भिंगु फल गुबलें सइ मखु। 19अय्जूगुलिं भिंगु फल मसःगु सिमायात पालाः छ्वय्काछ्वइ।#मत्ती ३:१०; लूक ३:९ 20थुकथं इमिगु ज्यां हे इपिं भिं ला कि मभिं धकाः सीके फइ।#मत्ती १२:३३
जिं छिमित गुबलें हे म्हमस्यू
लूक १३:२५-२७
21 “जितः ‘प्रभु, प्रभु’ जक धयाजुइपिं मनूत परमेश्वरयागु राज्यय् दुहां वने फइ मखु। स्वर्गय् च्वनादीम्ह जिमि बाःयात लय्तायेक ज्या याना जूपिं जक वय्कःयागु राज्यय् दुहां वने फइ। 22न्याय याइखुन्हु यक्वसिनं जितः थथे धाइ – ‘प्रभु, प्रभु, छिगु नामं जिमिसं अगमवाणी कना मवया ला? छिगु हे नामं भूत दुबिना च्वंपिं मनूतय्त लाय्का मवया ला? अले छिगु हे नामं यक्व हे अजू चायापुगु ज्या मयाना ला?’ 23जिं इमित थथे लिसः बी – जिं छिमित म्ह हे मस्यू। मभिंगु ज्याखँ यानाजुइपिं, छिपिं फुक्कं जिथासं तापाक्क हुँ।#भज ६:८
छेँ दय्कीपिं निम्ह मनू
लूक ६:४७-४९
24 “अय्जूगुलिं जिगु वचन न्यनाः उकथं हे याइम्ह मनू ल्वहं दुथाय् छेँ दनीम्ह बुद्धि दुम्ह मनू थें खः। 25वं छेँ दय्के धुंकाः तसकं वा वयाः बाः वल। हानं तसकं फय् वयाः वयागु छेँय् कल। अय्नं ल्वहंयागु बल्लाःगु जगय् दनातःगुलिं वयागु छेँ मदुन। 26अथे हे जिगु वचन न्यनाः नं उकथं मयाइम्ह मनू फि दुथाय् छेँ दय्कीम्ह मूर्ख मनू थें खः। 27वं छेँ दय्के धुंकाः तसकं वा वयाः बाः वल। हानं तसकं फय् वयाः वयागु छेँय् कल। अले वयागु छेँ दुनावन।”
28अन च्वंपिं मनूत फुक्कं येशूं धयादीगु थ्व खँ न्यनाः छक्क जुल। 29छाय्धाःसा वय्कलं इमि शास्त्रीतय्सं थें मखु, बरु अधिकार दुम्ह मनुखं थें स्यनादिल।#मर्क १:२२; लूक ४:३२
Tans Gekies:
मत्ती 7: NEW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 Nepal Bible Society, Newa Christian
Literature Center and Wycliffe Bible Translators, Inc.