मत्ती 8
8
कोह्रियात लाय्कादीगु
मर्क १:४०-४५; लूक ५:१२-१६
1येशू पहाडं क्वहां झाय्वं ग्वाः ग्वाः मनूत वय्कः नाप वन। 2अबलय् हे छम्ह कोह्रिम्ह मनुखं वयाः वय्कःयात भागियानाः थथे धाल – “प्रभु, छिं यय्कादीसा जितः शुद्ध यानादी फु।”
3अले वय्कलं वयात थियाः धयादिल – “छ शुद्ध जुइमा।” थुलि धाय्वं हे व कोह्रि ल्वचं शुद्ध जुल। 4अले वय्कलं वयात धयादिल – “न्यँ, थ्व खँ सुयातं कने मते। पुजाहारीतय्थाय् वनाः छं थःगु ल्वय् लाःगु क्यँ। अले फुक्कसितं सीकेत व्यवस्थाय् च्वया तः थें माःकथं छाय्छी या।” #लेवी १४:१-३२
रोमी कप्तानया च्यःयात लाय्कादीगु
लूक ७:१-१०
5येशू कफर्नहुमय् झाःबलय् छम्ह रोमी कप्तानं वयाः वय्कःयात थथे बिन्ति यात – 6“प्रभु, जिम्ह छम्ह च्यःयात पक्षवातं कयाः तसकं हे सास्ती जुयाच्वन।”
7वय्कलं धयादिल – “जि वयाः वयात लाय्काबी।”
8अले वं धाल – “प्रभु, जिगु छेँय् दुहां झायेत छितः मल्वः। छिं धया जक दीसां जिम्ह च्यः लायावनी। 9जिगु क्वय् सिपाइँत दुसां जिगु च्वय्नं तःधंपिं मनूत दु। जिं सिपाइँतय्त ‘वा’ धाःसा इपिं वइ। अले ‘हुँ’ धाःसा वनी। अथे हे दासयात ‘थथे या’ धाःसा वं अथे हे याइ।”
10वय्कलं थ्व खँ न्यनाः अजू चायाः वय्कः नाप वःपिं मनूतय्त थथे धयादिल – “जिं छिमित धात्थें धाये – जिं थपाय्सकं विश्वास याइम्ह मनू ला इस्राएलय् हे नं मखना। 11जिं छिमित धाये – पुर्ब व पच्छिमं यक्व हे मनूत वयाः अब्राहाम, इसहाक व याकूबपिं नाप स्वर्गयागु राज्यय् च्वनी।#लूक १३:२९ 12राज्यय् थ्याःपिं मनूतय्त धाःसा पिने तसकं खिउँसे च्वंथाय् वान्छ्वया हइ। अले इपिं अन ख्व जक ख्वयाः वा न्ह्ययाच्वनी।”#मत्ती २२:१३; २५:३०; लूक १३:२८
13अले वय्कलं व कप्तानयात धयादिल – “छेँय् हुँ छ, छं विश्वास याःथें हे जुइमा।” अबलय् हे वया च्यः लन।
उसाँय् मदुपिन्त लाय्कादीगु
मर्क १:२९-३४; लूक ४:३८-४१
14छन्हु येशू पत्रुसयागु छेँय् झाल। उबलय् पत्रुसया ससःमां तसकं ज्वर वय्काः लासाय् ग्वारातुलाच्वन। 15वय्कलं वयागु ल्हाः थियादिल। अले वयागु ज्वर क्वलाना वन। अले वं दनाः वय्कःपिन्त नके त्वंके याः जुल।
16बहनी जूबलय् मनूतय्सं भूत दुबिना च्वंपिं तःम्हय्सित हे वय्कःयाथाय् हल। म्हुतुं जक नवानाः येशूं भूत दुबिना च्वंपिन्त लाय्कादिल, अले हानं म्हंमफुपिन्त नं लाय्कादिल। 17यशैया अगमवक्तां धयाथकूगु खँ पूवंकेत वय्कलं थथे यानादीगु खः –
“प्रभु थःम्हय्सिनं हे झीगु ल्वय्ली
फुक्कं लिकयाः यंकादिल।”#यशै ५३:४
येशूया चेला जुइपिं मनूत
लूक ९:५७-६२
18येशूं थःगु जवंखवं यक्व मनूतय्त खनाः चेलातय्त समुद्र पारि वनेगु उजं बियादिल।
19वय्कः झायादीत्यंबलय् छम्ह शास्त्रीं वयाः थथे धाल – “गुरुजु, छि गन गन झाइ जि नं ल्यूल्यू वये।”
20वय्कलं लिसः बियादिल – “ध्वंतय् च्वनेत प्वाः दु, झंगःतय् च्वनेत स्वँ दु, मनूया काय्या धाःसा छ्यं दिकेत नं थाय् मदु।”
21मेम्ह छम्ह चेलां नं थथे धाल – “प्रभु, जितः जिमि अबुयागु सीम्ह निं थुने बियादिसँ।”
22वय्कलं वयात धयादिल – “सीम्हयात सीम्हय्सिनं हे थुनी। छ जि लिसे वा।”
ग्वःफय्यात दिकादीगु
मर्क ४:३५-४१; लूक ८:२२-२५
23येशू अनं नांचाय् च्वनाः झाल। चेलात नं वय्कः नाप हे वन। 24उबलय् हे आकाझाकां तसकं ग्यानापुक ग्वःफय् वल। लःयागु किसिद्वम्बलं नांचायात त्वपुइत्यन। वय्कः धाःसा द्यनाच्वन। 25चेलातय्सं वनाः वय्कःयात थनाः थथे धाल – “प्रभु, जिमित बचय् यानादिसँ। जिपिं लखय् दुनिन।”
26अले वय्कलं इमित धयादिल – “छिपिं छाय् अपाय्सकं ग्यानागु? छिमिसं जितः अज्जं क्वात्तुक विश्वास याये मफुनि ला?” थुलि धयाः वय्कलं दनाः ग्वःफय्यात व लःद्वम्बःयात हक्कादिल। अले ग्वःफय् दित, लःद्वम्बः नं दित।
27थ्व खनाः इपिं छक्क जुल। अले थथे धाल – “थ्व गज्याःम्ह मनू खः? समुद्र व फसंनापं थ्व मनूयागु खँ न्यं।”
भूत दुब्यूपिं निम्हय्सित लाय्कादीगु
मर्क ५:१-२०; लूक ८:२६-३९
28येशू समुद्र पारिइ गदरिनीतय्गु देशय् झायादीबलय् भूत दुबिना च्वंपिं निम्ह मनूतय्सं दिपं पिहां वयाः वय्कःयात नापलात। थुपिं तसकं हे ग्यानपुसे च्वंगुलिं अनं सुं हे मजू।
29वय्कःयात खनेवं हे इपिं थथे धकाः चिल्लाय् दनाः हाल – “हे परमेश्वरया काय्, छि जिमिथाय् छाय् झायागु? मत्यवं हे जिमित सजाँय बीत झायागु ला?”
30अन हे लिक्क छबथां फात नं ज्वया तःगु दु। 31भूततय्सं वय्कःयात थथे धकाः बिन्ति यात – “छिं जिमित पितिना हे दीगु जूसा थ्व फातय्के दुबीगु उजं बियादिसँ।”
32अले वय्कलं इमित धयादिल – “हुँ।” अले मनूतय्गु म्हं पिहां वनाः भूतत अन ज्वयातःपिं फातय्के दुबित। अले फात फुक्क ब्वाँय् वनाः भीरं क्वब्वात। अले समुद्रय् कुतुं वनाः सित।
33फा ज्वयाच्वंपिन्सं शहरय् वनाः अन जूगु खँ फुक्कं न्यंकल। भूत दुबिना च्वंपिन्त छु जूगु खः व नं न्यंकल। 34अले शहरय् च्वंपिं मनूत फुक्क वय्कःयात स्वः वल। इमिसं वय्कःयात अनं पिहां झासँ धकाः बिन्ति यात।
Tans Gekies:
मत्ती 8: NEW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 Nepal Bible Society, Newa Christian
Literature Center and Wycliffe Bible Translators, Inc.
