मत्ती 6
6
मसीक दान बीगु खँ
1 “होश या, मनूतय्त क्यने थें यानाः जक छिमिसं भिंगु ज्या याये मते। मनूतय्त क्यने थें जक भिंगु ज्या यात धाःसा स्वर्गय् च्वनादीम्ह परमेश्वर बाःनं छिमित छुं हे सिरपाः बियादी मखु। #
मत्ती २३:५
2सुयातं छुं बीबलय् जिं थथे बिया धकाः नाय्खिं च्वय्का जुइ मते। थथे ला निपाः ख्वाःपाः दुपिन्सं जक धर्मशास्त्र स्यनीगु छेँय् व लँय् लँय् वनाः मनूतय्सं तःधं धाय्केत धयाजुइ। जिं छिमित खःगु खँ धाये – इमिसं काये माःगु सिरपाः काये धुंकूगु दु। 3सुयातं छुं बीबलय् जव ल्हातं याःगु खव ल्हातं मसीमा। 4बीबलय् सुनानं मसीक बीगु या, अले थथे मसीक ब्यूगु खंकादीम्ह परमेश्वर बाःनं छिमित सिरपाः बियादी।
प्रार्थना यायेगु खँ
लूक ११:१-४
5 “प्रार्थना यायेबलय् छिमिसं क्यने थें जक याये मते। निपाः ख्वाःपाः दुपिन्सं जक मेपिन्सं खनेमा धकाः धर्मशास्त्र स्यनीगु छेँय् व लँय् हे दनाः प्रार्थना याना जुइ। जिं छिमित खःगु खँ धाये – इमिसं काये माःगु सिरपाः काये धुंकूगु दु। #
लूक १८:१०-१४
6प्रार्थना यायेबलय् छिमिसं क्वथाय् च्वनाः खापा तिनाः खने मदुम्ह परमेश्वर बाःयात प्रार्थना या। थथे सुं मदुथाय् वनाः याःगु प्रार्थना खंकादीम्ह परमेश्वर बाःनं छिमित सिरपाः बियादी।
7 “प्रार्थना यायेबलय् छिमिसं परमेश्वरयात म्हमस्यूपिन्सं थें म्वाःमदुगु हालाः ताःहाकय्क याये मते। थुकथं याःगु प्रार्थना जक परमेश्वरं न्यनादी धयागु इमिगु धापू खः। 8इमिसं थें छिमिसं याना जुइ मते। वय्कःयाके फ्वने न्ह्यः हे छिमित माःगु खँ परमेश्वर बाःनं स्यू। 9छिमिसं थथे प्रार्थना या –
“‘हे झीम्ह स्वर्गय् च्वनादीम्ह परमेश्वर बाः,
छिगु नां पवित्र जुइमा।
10 छिगु राज्य वयेमा,
छिगु इच्छा स्वर्गय् थें हे,
थ्व पृथ्वीइ नं पूवनेमा।
11 जिमित न्हिच्छिया मरि,
थौं जिमित बियादिसँ,
12 अले जिमिगु अपराध क्षमा यानादिसँ,
गथे जिमिसं नं जिमि अपराधीतय्त
क्षमा यानाबियागु दु।
13 जिमित परिक्षाय् लाकादी मते,
बरु दुष्टपाखें बचय् यानादिसँ
छाय्धाःसा राज्य व पराक्रम व महिमा
सदां सर्वदां छिगु हे खः, आमेन।’
14 “थःत मभिं याःपिन्त छिमिसं क्षमा याःसा छिमित नं स्वर्गय् च्वनादीम्ह परमेश्वर बाःनं क्षमा यानादी। #
मर्क ११:२५-२६
15मखु, छिमित मभिं याःपिन्त छिमिसं क्षमा मब्यू धयागु जूसा छिमिगु पाप नं परमेश्वर बाःनं क्षमा यानादी मखु।
अपसं च्वनेगु खँ
16 “अपसं च्वनेबलय् छिमिसं निपाः ख्वाःपाः दुपिन्सं थें ख्वाः खिउँका च्वनेगु याये मते। अपसं च्वनागु धकाः क्यनेत इमिसं थःगु ख्वाः खिउँका जुइ। जिं धात्थें धयाच्वना – इमिसं काये माःगु सिरपाः काये धुंकूगु दु। 17बरु छं अपसं च्वनेबलय् ख्वाः सिलाः छेनय् चिकं तया च्वँ। 18अले छ अपसं च्वनाच्वंगु मनूतय्सं मखु, बरु खने मदुम्ह परमेश्वर बाःनं खंकादी। अले वय्कलं छन्त सिरपाः बियादी।
स्वर्गय् धन मुंकि
लूक १२:३३-३४
19 “थःगु निंतिं छिमिसं थ्व संसारय् धन-सम्पत्ति मुंके मते। थन मुंकूगु धन-सम्पत्ति खतं नइ, किलं नइ, अले खुं खुइ। #
याक ५:२-३
20बरु छिमिसं खतं मनइथाय्, किलं मनइथाय्, अले खुं मखुइथाय् स्वर्गय् धन-सम्पत्ति मुंकि। 21छिमिगु सम्पत्ति गन दु छिमिगु मन नं अन हे दइ।
मिखा म्हयागु जः
लूक ११:३४-३६
22 “मिखा हे म्हयागु जः खः। मिखा थीसा जक छिमिगु म्ह छम्हं थी। 23छिमिगु मिखा स्यंसा छिमिगु म्ह छम्हं हे खिउँसे च्वनी। उकिं छिमिके दुगु जः हे खिउँसे च्वंसा खिउँगु झन गुलि खिउँसे च्वनीगु जुइ।
24 “सुनानं निम्ह मालिकयागु सेवा याये फइ मखु, छाय्धाःसा वं छम्ह मालिकयात अप्वः यय्कूसा, मेम्ह मालिकयात यय्की मखु। वं छम्हय्सिनं धाःथें याःसा मेम्हय्सिनं धाःगु खँ न्यनी मखु। अथे हे छिमिसं परमेश्वर व धन निगूयां सेवा याये फइ मखु।
नयेत्वनेगुलिइ च्यूताः तये मते
लूक १२:२२-३१
25 “अय्जूगुलिं जिं धयाच्वना – नयेत्वनेगु व पुनेगुलिइ छिमिसं च्यूताः तये मते। छु, नयेगु स्वयाः प्राण तःधं मजू ला? पुनेगु स्वयाः शरीर तःधं मजू ला? 26झंगःपंक्षीतय्त स्व, इमिसं पुसा ह्वलाः सय्केगु ज्या नं मयाः, नसा मुंकेगु ज्या नं मयाः। अथेसां स्वर्गय् च्वनादीम्ह परमेश्वर बाःनं इमित नका तयादीगु दु। इपिं स्वयाः छिपिं तःधं मजू ला? 27छिपिं मध्ये धन्धा कयाः थःगु आयुलय् मेगु पलख जक नं तने फुम्ह सु दु?
28 “छु फी, छु पुने धकाः छिमिसं छाय् च्यूताः कयाः जुया? ह्वयाच्वंगु स्वांयात छकः स्व, इपिं गुकथं तःमा जुल? इमिसं ज्या नं याःगु मदु, कापः नं थाःगु मदु। 29अथेसां जिं धाये – उलिमछि धन-सम्पत्ति दुम्ह सोलोमन जुजु छफ्वः स्वां ति हे झःझः मधाः।#१ राज १०:४-७; २ इति ९:३-६ 30थौं बुयाः कन्हय् हे झ्वाः जुयावनीगु घाँय्यात ला परमेश्वरं थुलि समाः यानातयादी धाःसा वय्कलं छिमित पुनेत वसः बियामदी ला? विश्वास मगाःपिं, छिमिसं गथे क्वात्तुक विश्वास याये मफुगु?
31 “अय्जूगुलिं छिमिसं ‘छु नये, छु त्वने, अले छु पुने’ धकाः पीर काये मते। 32परमेश्वरयात म्हमस्यूपिं मनूतय्सं जक थथे पीर कयाच्वनी। छिमित छु छु माः धकाः स्वर्गय् च्वनादीम्ह छिमि परमेश्वर बाःनं फुक्क स्यू। 33न्हापां परमेश्वरयागु राज्य मा, वय्कलं धयादी थें च्वँ। अले वय्कलं छिमित माःगु फुक्क बियादी।
34 “कन्हय् जुइगु खँय् च्यूताः काये मते। कन्हय्यागु च्यूताः कन्हय् हे वइ। थौंयात थौंयागु हे कष्ट अप्वः।
Tans Gekies:
मत्ती 6: NEW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 Nepal Bible Society, Newa Christian
Literature Center and Wycliffe Bible Translators, Inc.