Dioni 6
6
Yesumi daoseni ki komea alinu enda alisaya ei
(Madiu 14:13-21; Maka 6:30-44; Luka 9:10-17)
1Go angelenu lomare monde rungulupa piri Galili ipa mone reena wala paisaya. (Go ipa bi mendare Daipiriasi lisimiya.) 2Wenaali andapumi Yesumi mo yainya ae wenaali yainya ma-epeada ara wele kongapu waru pisaya einu andisimiya eina Yesu raluma pamisimiya. 3Yesuri su wili mandaa opasiaoma puma nipuna kou nane raluaisimiya alinu rapu pirisimiya. 4Ande Isaraelimi mandu rangala pae wenaalinuna Pasopa enda pambape naare lombae pupa popape naare epolame-ainya pisaya. 5Yesumi leeme leeme puma andomare mo wenaali raayo ipisimiya ei andomare Pilipi para lalore, Go wenaali raayore endare anana adoamere enda a para kambaminyayapae, lisaya.
6Pilipimi dea ei pangolame lora pisaya. Yesumi nipuna pula kone wi eiri ambala kone siamba ara lisaya.
7Pilipimi nipuna angele yango liada ara lalore, Go wenaali raayome enda enge engepusi nenayare palawa kiri kambape eiri muni ali ria ki laapopu ana na-pilia, lisaya.
8-9Nipuna kou nane raluaisaya ali mendare Saimono Pidana ame Andurumi lalore, Go aya naki mendame palawa kiri supu pange repali laapo pange siambayapare go wenaali raayomere anana nape-na-dea, lisaya.
10Yesumi nimu para lalore, Wenaali raayo pirinyao pirinya dapae, lisaya. Noma waru opea lena pirisimiya. Go eina wenaali raayo pirisimiyapare wenaali raayo pirinyalomare alinu komea yarepemare ki komeapu daoseni rupa pirisimiya. 11Yesumi ande palawa kiri mumare Gode para ranae angele lomare mo pirisimiya wenaali para rali rali paisaya. Monde repali laapo pange gurupa rali rali paisaya. Gupuma mo wenaali raayome nimuna kone pi rupa muma mea nala pisimiya. 12Wenaali raayo enda noma romba aoma pirinya Yesumi nipuna kou nane raluaisimiya alinu para lalore, Monde enda purupilinu meala arare popolomasinu menda na-winya dapape, lisaya. 13Go lisayanda mo wenaalimiri ande palawa kiri supu misimiya ali raayome noma winya, lisimiya. Enda purupilinu raayo muma mandali nu mandisimiyapare ki laapo pereyoma angena laapo mandali nu ma-rumbiaisimiya.
14Mo wenaalinuri Yesumi go para wele kongapu waru pisaya ei andoma lalore, Go aliri ande suna epola pea ora Godena poropedi aliyanae, lisimiya. 15Mo wenaalimiri go para le Yesu kupi rengepe minyuma nimuna kini ali ainya doameya kone wisimiyapare Yesumi andomare nipuna kunumasi wala perekeyoma mo su wili paranu wala paisaya.
Yesu ipa mandaa angena paisaya ei
(Madiu 14:22-33; Maka 6:45-52)
16-17Gaepame nane gaele parare Yesu nipuna kou nane raluaisimiya alinuri no rungulu pa piri ipa lee para kolopinyaomare kawaso para pua piruma Kapeneame ree anda nane polame mo ipa runa rungula paisimiya. Gupuma rimbalisayapare Yesuri mo alinu para ambe na-opapala paisaya. 18Gupula ainyare pokiki waru andaai ipula ara ipa momogo waru opasiaisaya.
19Mo kou nane raluaisimiya alinumi andalu ipa kouna dali awari paisimiya rupare mendane ki pereyoma o mendane ki komea pereyoma mendane kina komea kilomida mandana paisimiyapare Yesuri kawaso para epolame ipa mandaame angena ipula-ainya andomare paalame waru komisimiya. 20Yesumi nimu para lalore, Paalame na-komalepape. Gore niae, lisaya. 21Mo alinumi Yesuri mo kawaso rupara pida epena, kone wisimiya. Gupuma monde kawasore nimuna pirapale pola kone wisimiya lena wangepu opapala paisimiya.
Wenaali raayome Yesu pamu aisa pisimiya ei
22Gupuma yapi kepelisayandare ande minyapalaoma paisimiya wenaalimiri mo kawaso komea siande lo ambala kone wisimiya. Mo kou nane raluaisimiya alinuri Yesu nimu rapu mendaa para na-piri pa nimuna komea paisimiya ei pange kone wisimiya. 23Kawaso menda parare Daipiriasi ree anda nane aoma ipuma ande Realimi ranae angele loma mo wenaali raayo para enda rali rali paisaya ipa ree para le wala opapala ipisimiya. 24Wenaali raayome Yesu na-aisaya ei pange nipuna kou nane raluaisimiya alinu na-aisimiya ei andoma mo kawaso naini piruma Kapeneame ree anda nane Yesu aisa pula paisimiya.
Yesumi Niri wenaali para endoaya ei aloaya Enda mandana, lisaya ei
25Mo wenaalimiri Yesuri monde rungulu pa piri ipa ree nane aisaya ei andomare nipu para lalore, Waloale Alio, go parare andepele ipuma paepae, lisimiya.
26Yesumi nimuna angele yango liada ara lalore, Nimi para ora angele lalo, lisaya. Ande wele kongapu pi einu pawande ei kone suma ni na-aisa puma epeme. Ande enda noma romba arimi dea eina kone siala ara ni aisa puma ipulumiae, lisaya. 27Ambala pereda pea enda mulame pupudengi andapu na-nalepape. Pa suala pea enda mulame kone waru suma pupudengi nalepape. Go eiri ora endoaya ei naare raayona pa sualia. Apa Godeme Alina Si Naki ma-ainyale Simi, go endare nimi para ma-gilia, lisaya.
28Go lisayanda mo wenaalimi Yesu para angaa meala ara lalore, Godena pea einu pulamere naame ake au pilimapae, lisimiya.
29Yesumi nimuna angele yango liada ara lalore, Godemere nimimi gurupa ao-palialiminyaya kone pea lomare Gode nipumi rapaya ali para kone rulaliminyaya kone pea, lisaya.
30Mo alinumi nipuna angele yango liada ara lalore, Naame nee para kone rulamonoyare wele kongapu menda naame andamonoyare ai pilipae, lisimiya. Neeme ake pilipae, lisimiya. 31Naana apa kasuanumiri monde weambi pia lena arare ande mana enda lea enda nala puaisimiya. Ande Godena angele wia bukame lea rupa,
Nipumi enda nenaya Godena Aya Lena
ara alainyaisaya, lea loma lisimiya.
32Yesumi mo wenaali para lalore, Nimi para ora angele lalo, lisaya. Mosesimi nimi para enda gisayapare nipumiri mo endare Godena Aya Lena aoma na-gisaya. Na Apame nipuna Aya Lena aoma ora enda nimi para guaya, lisaya. 33Gonde Godeme giala endare, go alimiri Godena Aya Lena minyapalaoma kolopinyaoma ipumare su wenaali para endoaya ei adeae, lisaya.
34Mo alinumi Yesu para lalore, Andaa Alio, gupi endare naa para naare raayona guapeae, lisimiya.
35Yesumi mo alinu para lalore, Niri wenaalinu para endoaya ei aloaya Enda mandana. Wenaalinumi suna enda noma epe rupa ao-paluaeme rupa ali apimi gonde ora enda neleandare endoaya ei milimi, lisaya. Ali apimi ni para ipuma kone rulaliandare reame pa na-komelea. Gurupa ali apimi ni para kone rulaliandare ipa nalame na-komelea, lisaya. 36Neme nimi para lawapare nimimi niri andomale kone na-rulademe, lisaya. 37Na Apame ni para giala wenaali raayore ora ni para epelea. Go eina ali apimi ni para epeleandare neme ora na-ralu dua, lisaya. 38Akepeandare nemere so Godena Aya Lena aoma kolopinyaoma ipuma na kone pea ei pulame na-epe. Ni rapaya Godena kone pea ei pulame epawa, lisaya. 39Ni rapaya Godena kone pea eiri go au panoya rapaya. Nipumi ni para gea wenaaliri komeasinda neme ma-alu pape-na-ya. Ande pereda pea dinare neme wenaali raayo wala ma-rekanoya rapaya, lisaya. 40Na Apame kone pea eiri gurupa. Nipuna Naki andoma nipu para kone rulademe wenaali raayore endoaya ei minya kone wia. Gupuma monde pereda pea dina pange neme mo wenaali wala ma-rekalua, lisaya.
41Niri Godena Aya Lena aoma kolopinyao epawa enda mandana, lo Yesumi go angele lisayanda mo alinumi pangoma nipu para rono pangoma dudu loma angele lisimiya. 42Go eina mo alinumi lalore, Go aliri Yesuae, Diosepana naki aya. Apa ama laapore ambala andema. Akepeanda, Niri songo Godena Aya Lena aoma kolopinyao epawa, dapae, lisimiya.
43Yesumi nimuna angele yango liada ara lalore, Nimimi dudu loma dame angelere gialepape, lisaya.
44Ali mendare ni para epolameyare pakama epape-na-ya. Ni rapaya Apame ali menda ni para epenaya yola mea epeleandare ni para ora epelea. Gupuma go aliri monde pereda pea dinare neme pa ma-rekalua, lisaya.
45Monde Godena poropedi alinumi wape pi eiri gurupa.
Godeme wenaali raayo mongerialia, lo wape pea.
Ali menda apimi ande Apana angele pangoma pange na Apame nipu para mongeriaoma ni para ipula, lisaya.
46Ali komea mendame na Apa ora andea pi na-lalo. Ali komea mendame na Apa na-andeapare Gode lapo aoma go epa aya alimi komea ande Apa andea, lisaya. 47Nimi para ora angele lalo. Ni para kone rulada aliri endoma ao-aya, lisaya. 48Niri Enda mandana. Wenaalinumi suna enda noma epe rupa ao-paluaeme rupa neme wenaalinu para endoaya ei adoa, lisaya. 49Nimina apa kasuanumiri monde weambi pia lena ara mana enda lea enda nisimiyapare komisimiya. 50Gupisimiyapare so Godena Aya Lena aoma kolopinyaoma epea endare rando menda. Ali apimi go enda neleandare na-komelea, lisaya.
51Niri so Godena Aya Lena aoma kolopinyaoma epe enda mandana. Go enda noaya eimiri wenaalinumi endoaya ei milimi, lisaya. Ali apimi go Godena Aya Lena epea enda neleandare endoma ao-alia. Gupuma mo ali para neme adape endare nina do mindile adoa. Go suna wenaali raayome endoaya ei minyaya na do mindi ora adoa, lisaya.
52Go para aeme Isaraelimi mandu rangala pae alinumi Yesuna angele pangoma nipuna angele para rono pangala ara nimuna nimunale ape lalolo pula ara lalore, Go alimiri nipuna do mindiri naame namonoyare akipuma giliapae, loma lora pisimiya.
53Yesumi nimu para lalore, Nimi para ora angele lalo, lisaya. Alina Si Naki nipuna do mindi pange nipuna wee pange na-nelemendare nimi parare endoaya ei ora na-milimi, lisaya. 54Ali apimi na do mindi pange na wee pange noayandare endoma ao-aya. Gupuma monde pereda pea dina, go aliri neme wala ma-rekalua, lisaya. 55Neme go lalo eiri go einaya lawa. Na do mindiri ora endae. Gupuma na wee pange ora ipae, lisaya. 56Wenaali apimi na do mindi pange na wee pange neleandare nipuri ni para alia. Gupiliandare ni pange nipu para alua, lisaya. 57Ande Apare endao-aya eina ree pange nipumiri ni ma-endao-aya. Go pea eina wenaali apimi ni neleandare neme go wena o ali ma-endoma ma-ao-alua. Ande Apamere ni go suna raparipa, lisaya. 58Go eina go eiri ande Godena Aya Lena aoma kolopinyaoma epea enda. Ande nimina apa kasuanumi nisaya enda rupa dia. Nimumi mana enda nisimiyapare wenaali raayo mandana werepe nane komisimiya. Gupisimiyapare wena o ali apimi go Godena Aya Lena aoma kolopinyaoma epea enda neleandare endoma ao-alia, lisaya.
59Go lea angelenuri Yesumi mo Kapeneame ree anda nane Godena angele kuruaeme anda para ara walisaya angelenuae.
Yesumi ora endoaya angelenu lisaya ei
60Nipuna kou nane raluaisimiya alinu waru andapumi go lisaya ei pangoma lalore, Go angelere kenda waru pi angeleae. Apirapome pangapeyapae, lisimiya.
61Mo kou nane raluaisimiya alinumi nipuna lisaya eina dudu lisimiya ei Yesumi kone sumare mo alinu para lalore, Go lalo angelena gi pia kone sialemepae, lisaya. 62Alina Si Nakiri ambala aoma epa nane wala perekeya polape ei andelemendare ake au pilimipae, lisaya. 63Godena Sipiridimi komea wenaalinu ma-endapeya. Wenaalinu nimuna gole wenaalinu menda ma-endape-na-ya. Neme nimi para angelenu lawa eimiri, Godena endoaya ei nimi para aloaya Sipiridiri, nimi para karu ma-epawa, lisaya. 64Go peapare nimi rapu ara ande alinu menda parame ni para kone na-rulademe, lisaya. (Nipu para kone na-rulala peme alinuri Yesumi ambalandele kone wisaya. Nipu liinyaya yanda rombape ali pange ambalande kone wisaya.)
65Nipumi wala lalore, Ande nimi para ambala lawande eiri go einaya lawa, lisaya. Ali menda api Apame ni repara na-yola muma giliandare gore go aliri ni para epape-na-dea, lisaya.
66Go lisayanda Yesuna kou nane raluaisimiya alinu waru andapumi Yesu giala puma nipu rapu wala na-pamuaisimiya.
67Go eina Yesumi ande nipuna kou nane raluaisimiya ki laapo pereyoma angena laapopu alinu para lalore, Nimimi pange ni giaoma pelemeyapae, lisaya.
68Saimono Pidame nipuna angele yango liada ara lalore, Realio, api para pomonoyapae. Nena angelenuri ma-endao-aya, lisaya. 69Neere Gode nipuna Yaakopi Ali ale eiri ambala andoma naame kone rulao-aema, lisaya.
70Yesumi nipuna angele yango liada ara lalore, Nimi ki laapo pereyoma angena laapopu alinuri neme yarepema meawapare nimi rapu aya ali komeare koae remona kalu ali aya, lisaya. 71Nipumi Saimono Isakariodina si Diudasi para lisaya. Diudasi nipuri ande ki laapo pereyoma angena laapopu alinu rapu aisimiya alimiri, werepe nane Yesu liinyaya yanda rombisaya.
Àwon tá yàn lọ́wọ́lọ́wọ́ báyìí:
Dioni 6: POLENT23
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
