Dioni 7
7
Yesu nipuna amenumi Yesu repara kone na-rulaisimiya ei
1Gupisaya dina werepe nanere, Isaraelimi mandu rangala pae alinumi nipu duame kone wisimiyanda Yesuri Diudia andasu nane pamulame kone na-wi, mo Galili andasu nane komea pamuaisaya.
2Ande Isaraelimi mandu rangala pae wenaalina Pokala Anda Paranu Aisimiya Eina Enda Pambola Pisimiya Naare repara ipisaya. 3Go eina Yesuna amenumi nipu para lalore, Nena kou nane raluaisimiya alinumi nena pili einu andenayare go para giaoma mo Diudia andasu nane pope, lisimiya. 4Ali mendame nipuna koneme wenaali raayome nena pi ei andena kone wiliandare gore kundiripu ara pape-na-ya. Go aunu pi auri neeme pange wenaali raayona lee wilina ara pape, lisimiya.
5(Yesu nipuna amenumiri nipu para kone na-rulaisimiya eina, go lisimiya.)
6Yesumi mo alinu para lalore, Na naare ambe na-epeapare nimina eiri naare raayo ipuaya, lisaya. 7Su wenaali raayome nimi para ora gipia kone siape-na-yapare neme nimuna pimi einu koae einu loma loaya eina, ni para rono pangoma gipia kone wimi, lisaya.
8Nimiri monde enda pambola peme lena pulupa. Go peapare niri na naare ambe na-epea eina, ni ambe na-pola, lisaya. 9Go angele lomare Yesuri Galili andasu na-minyapalae pa aisaya.
Enda pambisimiya ei Yesumi andola popisaya ei
10Nipuna amenu ambala enda pambisimiya einu andolame paisimiya einu kou nanere Yesu nipu pange penameyao na-pe, kundiripu paisaya. 11Mo Isaraelimi mandu rangala pae alinumiri ande enda pambisimiya lena ara Yesu aisa pula ara angaa meala ara lalore, Yesuri a para ayapae, lisimiya.
12Mo wenaali raayome Yesu para angele lala ara pini pini angelenu lisimiya. Mendane wenaalimiri nipuri ora epe aliae, lisimiyapare mendane wenaalimiri Dia, loma Wenaali para pereke pereke angele loaya aliae, lisimiya. 13Go lisimiyapare wenaali raayome mo Isaraelimi mandu rangala pae alinuna kalu alinu para paalame komala ara ali komea mendame Yesu para angele doameya penameyao na-lisimiya.
14Ande enda pambisimiya ei ruparare Yesumi mo Gode para alinau puaisimiya andaa anda para pua ara angele walisaya. 15Mo Isaraelimi mandu rangala pae alinumi rungula mealo pambala ara lalore, Go aliri sukulu na-pi aliyapare waru andoma kone wi eiri akipuma peapae, lisimiya.
16Yesumi nimuna angele yango liada ara lalore, Go walalo eiri neme kone suma na ei na-walalopare ni rapaya Gode nipuna angelenu ora waladoae, lisaya.
17Ali apimi Godena kone pea au pulame kone suma nipuna pumi piliandare gore go au pia alimiri neme go walalo eiri Godena ei walado ei pange o na kone suma walalo ei pange andawilia, lisaya. 18Ali apimi nipuna kone suma angele deandare gore nipuna bi gole minyasiada. Go peapare ali apimi nipuna bi na-minyasiae nipu rapaya alina bi ma-minyasialuame piliandare gore go aliri pereke pereke au pia ali dia. Ora au pia aliae, lisaya. 19Ande angele wi einuri Mosesimi nimi para na-la giapae. Go peapare nimi para ali komeame ande angele wi einu pangala ara na-pia. Ni lu komaluame akepeanda rapalemepae, lisaya.
20Mo wenaali raayome Yesuna angele yango liada ara lalore, Nena do rupara koae remo pirana. Apimi nee lu komaluame piapae, lisimiya.
21Yesumi nimuna angele yango liada ara lalore, Nemere andaa au komea pawande eina nimi raayore rungula mealo pambamende, lisaya. 22Mosesimi nimina nakisinu para yongale runguli au pipape, loma lisaya eina, mo koro piri naarenare naki menda para yongale runguli au pilimiae. Mosesimi lisaya eina lawapare Mosesimi go au pena na-kini pu misaya. Nimina ambala apa kasuanumi kini pu misimiya ei, lisaya. 23Mosesimi walisaya angele wi einuri na-rungulaliminyayanda koro pia naarenare nimimi naki menda para yongale runguli au puaeme. Go einare neme pange koro piri naarena ali komea ora ma-epearipu eina, akepeanda ni para rono pangalemepae, lisaya. 24Ora leeme andala ara komea kone na-wi. Rendepona au pea eina, kone sialepape, lisaya.
Mo ali Kerisoyapae lo lora pisimiya ei
25Diurusaleme ree anda wenaali menda parame lalore, Ande duame rapaleme aliri goyapae.
26Andalepa. Nipumi wenaalina lee wilina ara angele dapare nipu para ali mendame angele na-da. Naana kalu alinumi kone sialore, Go aliri ora Keriso kone sialemepae. 27Go ali aoma epea para naame kone sialemapare ande Keriso epeleandare nipuna aoma epea para mendame kone siape-na-ya, lisimiya.
28-29Yesumi mo Gode repara alinau puaisimiya andaa anda rupara ara angele walala ara wi loma lalore, Niri ora kone sialemepae loma ni aoma epe lena pange kone sialemepae. Ninale kone suma na-epawa. Go peapare ni rapaya Gode ora aya. Go Gode nimimi kone na-sialemepare nipu rapu aoma epawa eina pange nipumi ni rapaya eina pange neme go Godere ora kone wi, lisaya.
30Go lisayanda nipu pa ripinyulame pisimiyapare nipuna naare ambe diayanda ali mendame nipu na-ripinilisimiya.
31Wenaali waru andapumi Yesu para kone rulada ara Ialore, Ande Keriso epeleandare go alina wele kongapu pea einu angulaliapae, lisimiya.
Endali ripinyi alinumi Yesu minyaya rapaisimiya ei
32Mo wenaalimi Yesu para go pini pini loma angele lisimiya eina mo Parisi alinumi pangoma mo Gode repara alinau puaisimiya alinuna kalu alinu rapu aperaoma Yesu pa ripinyula penaya, endali ripinyi alinu rapaisimiya. 33Yesumi lalore, Nimi rapu ongesinda aomare werepere ni rapaya Gode para wala pola, lisaya. 34Nimimi ni aisa pula pemepare ni na-andawilimi. Ni ayo lena nimi epape-na-ya, lisaya.
35Mo Isaraelimi mandu rangala pae alinumi nimuna nimuna lalore, One la, mone la pula ara lalore, A para pua aluameya dapae, lisimiya. Gupuma nipu anda siape-na-ya eiri akipumapae. Ande Giriki andasu nane aeme ree andanu para polame dapae. Go paranu ara Isaraelimi mandu rangala pae wenaalinu menda para pange Giriki andasu nane aoma wenaalinu para wadeapae, lisimiya. 36Yesu nipumi lalore, Ni anda sulame aisa pula pemepare ni na-andawilimi loma lalore, Gurupa. Ni ala pola pea lenare nimimiri epapena-ya loma lea eiri akepeanda lapae, lisimiya.
Waru opoma endape ipa epola pea ei
37Monde enda pamboma pereyaisimiya naarere ora nimuna kone andapu wi naare aisaya. Go naarena Yesumi rekoma ara angele puri paloma lalore, Ali apimi ipa nala piliandare ni para epa nena, lisaya. 38Godena angele wia bukame lea eiri gurupa. Ali apimi ni para kone rulaliandare nipuna pu para piruma endoaya ipa waru opoma ipula ipula pidia, lea, lisaya. 39Yesumi go lisaya eiri Epe Yaakopi Sipiridi para lisaya. Nipu para kone rulao-aisimiya wenaalimi mo Epe Yaakopi Sipiridi werepe mulame ainya, lisaya. Go naarenare Yesumi nipuna ora ririna bi wi eina wele andaai ambe na-misayanda mo Epe Yaakopi Sipiridi ambe na-ipisaya.
Wenaalinumi angele rando rando lisimiya ei
40Mo mombema aisimiya wenaalinumi Yesumi go lisaya angele pangoma lalore, Go aliri ande Godena poropedi ali orayanae, lisimiya.
41Monde wenaalimi lalore, Nipuri ande Kerisoae, lisimiya. Go lisimiyapare wenaali menda parame lalore, Keriso epeleandare mo Galili nane aoma na-epelea, lisimiya. 42Mo Godena angele wia bukame lea eiri Kerisore Deipidi repaa ali arare Deipidi ao-aisaya ree anda para Bedeleeme ree anda para maidia, lisimiya.
43Go lisaya eina wenaalimi Yesu para kone rando rando siala ara ruma ruma puma rando randopu aisimiya.
44Mendane wenaalimiri Yesu pa ripinyulame kone wisimiyapare ali mendame nipu na-riminyisaya.
Isaraelimi mandu rangala pae kalu alinumi Yesu para kone na-rulaisimiya ei
45Gupisayandare mo endali ripinyi alinuri mo Gode repara alinau puaisimiya alinuna kalu alinu pange mo Parisi alinu rapu aisimiya lena wala perekeya paisimiyapare mo alinumi monde endali ripinyi alinu para lalore, Monde aliri akepeanda na-riminyuma na-karu ipulumipae, lisimiya.
46Mo endali ripinyi alinumi nimuna angele yango liada ara lalore, Ambala ririna ara pange go alimi da rupa mendame gupi angelenu na-lameya, lisimiya.
47Mo Parisi alinumi nimuna angele yango liada ara lalore, Nimi pange makiradepae, lisimiya. 48Naana kalu ali mendame pange Parisi ali mendame pange nipu para kone rulaoma pi ei dia, lisimiya. 49Go anda wenaaliri Mosesimi Godena Rudule Angelenu la alisaya ei na-pangaleme eina Godeme koyaluame kone ambala wisaya, lisimiya.
50-51Ande ambalande ririna Yesu andolame paisaya ali Nikodimasiri mo alinu rapu arare nimu para lalore, Naana Rudule Angele wi eimiri ali menda pakama angele yokanali pape-na-ya. Nipuna angele pangomare nipuna pi au ambala andasuma papere ana pea, lisaya. 52Mo alinumi nipu lu pambada ara lalore, Nee pange monde Galili andasu nane aoma epe aliyapae. Mo Godena angele wia buka yarepemare Godena poropedi ali mendare Galili andasu nane aoma epola pea ei na-andele, lisimiya.
Àwon tá yàn lọ́wọ́lọ́wọ́ báyìí:
Dioni 7: POLENT23
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
