Dioni 5
5
Bedesada ipa para Yesumi ali menda ma-endaisaya ei
1Go au pinyaloma kou nanere mo Isaraelimi mandu rangala pae wenaalimi yainya pulameya enda misimiya naare ipisaya dinare Yesu Diurusaleme ree anda nane paisaya.
2Mo Diurusaleme ree anda para ande Sipisipinuna Pora Gape nembo para rungulupa piri ipa lee wisaya. Iburu angele lomare mo ipa biri Bedesada, lisimiya. Go ipa reparare ipa paduameanda pirala pisimiya anda supu aisaya. 3Go andanu parare yainya komisimiya wenaali waru aisimiya. Lee rumbu pi wenaali pange ange koae wenaali pange ki ange na-rindapea wenaali pange go para aisimiya. [Go wenaali raayomere monde ipamere lewa lewa pinyaya, andere-ala pisimiya. 4Go einaya pisimiya. Koro mendana eindiolome epa kolopinyaoma monde ipa waraoma relepolaisaya. Gupuma werepe nanere ali menda apimi mo ipa para ririna ambala kolopinyaoma ande yainya pambe alina yainya randalaisaya.] 5Go para aisaya ali mendare nipuna yainya aisaya kuni gipare ali ria komea pereyoma mendane ki laapopu pereyoma mendane ange komea pange angena repopu kuni gipa ambala perelisaya.
6Yesumi go para puma monde ali palie wi ei andomare nipuna yainya ao pa winya kuni gipa waru andapu perelisaya ei pange kone wisaya. Go eina nipumi mo ali para lalore, Nena konemere nena yainya randalena kone sialepae, lisaya. 7Mo yainya ao pa wisaya alimi Yesuna angele yango liada ara lalore, Realio, mo ipa ma-rapanoyare go naarenare ni ma-minyasiaoma ipa para karu pope ali menda dia, lisaya. Go eina ninale pu piduandare mendame ni werepe nane ma-yaoma popelea, lisaya.
8Yesumi nipu para lalore, Rekoma nena yapara ma-ripinyuma puae, lisaya. 9Go gole monde aliri epe do aoma rekoma yapara ma-ripinyuma ange yoko aoma paisaya. Go au pisaya eiri Isaraelimi mandu rangala pae wenaalinuna koro piri naarena pisaya. 10Go einare mo Isaraelimi mandu rangala pae wenaalinuna kalu alinumi mo yainya randalaisaya ali para lalore, Go koro pia naarenare nena yapara ma-ripinyuma pu laya eiri naana Isaraelimi mandu rangala pae wenaalinuna Rudule Angele wi ei rungulala ara pili, lisimiya.
11Mo alimi nimuna angele yango liada ara lalore, Na yainya randalaripa alimi ni para nena yapara ma-ripinyuma nena ange yoko aoma puae, la, lisaya.
12-13Mo Isaraelimi mandu rangala pae wenaalinuna kalu alinumi nipu para lalore, Nee para nena yapara ma-ripinya puae la aliri apiyapa lisimiyapare mo yainya ma-epeaisaya alimi Yesu na-andisaya. Go einaya na-andisaya. Wenaali raayo go para mombelisimiyanda Yesu ambala paisaya.
14Werepe nane mo Gode para alinau puaisimiya andaa anda rupara Yesumi ande ali andasuma Ialore, Ambiare neere epe do alele koae au menda wala na-pape, lisaya. Nee para kendame kome au andaai menda epapa-na-ya laloae, lisaya.
15Go lisaya ei pangoma ande alimiri go para gioma pumare mo Isaraelimi mandu rangala pae alinu para Ialore, Na yainya ma-epearipa aliri Yesuae, lisaya.
16Isaraelimi mandu rangala pae wenaalinuna koro piri naarena Yesumi mo alina yainya ma-epeaisaya eina mo Isaraelimi mandu rangala pae wenaalinuna kalu alinumi Yesu rendaa adoame, go dina kinipu alisimiya.
17Go eina Yesumi nimuna angele yango liada ara lalore, Na Apame naare raayona wenaalinu rambamuao-aya. Gupuaya eina neme pange wenaalinu rambamuao-ayo, lisaya.
18Go lisaya ei pangomare mo Isaraelimi mandu rangala pae wenaalinuna kalu alinumi Yesu duame rono pangisimiya ei andalisaya. Go einayanda pisimiya, Yesumi ande Isaraelimi mandu rangala pae wenaalinuna koro piri naarena angele wi einu rungulumare nipumi lalore, Godere ora nina Apa aya lisaya eina pange Gode mandana ayo, loma lisaya.
Godena Nakina wele kongapu wi ei walisaya ei
19Go eina Yesumi nimuna angele yango liada ara lalore, Nimi para ora angele Ialo, lisaya. Ande Godena Nakimi nipunale kone suma au menda pape-na-ya. Nipuna Apame pea ei andoma puaya. Ande Apame puaya rupare ande nipuna Nakimi pange puaya, lisaya.
20Ande nipuna Apame nipunande Naki para pumi kone waru siala ara nipumi pea einu raayo ande nipuna Naki para waloaya. Nimi rungula mealo pambaliminyaya, nipumi werepe nane ora au andaainu gupi aunu werepe naneyaoma nipuna Naki para wadea, lisaya. 21Ande Apame komeme wenaali ma-endada rupa gurupare gore ande nipuna Nakimi pange nipuna kone suma wenaali ma-endao-aya, lisaya. 22Gupuma pange Apame menda para angele yokanali na-pilia. Nipuna Nakimi komea angele yokanali painya lea, lisaya. 23Wenaali raayome Apana angele lademe rupa nipuna Nakina angele pange go rupale lainyaya lea. Ali apimi nipuna Nakina bi na-minyasialiandare gore nipu rapaya Apana bi pange ora na-minyasiada, lisaya.
24Nimi para ora angele lalo. Ali apimi neme lalo angele pangomare ni rapaya Gode para pange kone rulaoma aliandare gore go alimiri endoaya ei muma ao-aya. Gupia aliri endoaya ei ambala muma ripinya aya eiyala ara angele yokanali pula pea para na-pelea, lisaya. 25Nimi para ora angele lalo. Naarele menda ipula. Go eina go naarelere ambala go epa aya. Komeme wenaaliri Gode nipuna Nakina angele koma pangeleme. Nipuna angele koma pangeleme wenaaliri endeleme, lisaya. 26Ande Apame ora nipu endoaya eina ree aya rupa, nipuna Naki pange nipunale endoaya eina ree aya rupa ainya lea, lisaya. 27Go eina nipuri Alina Si Naki ayandare nipuna Nakimi angele yokanali pala pea ali nipuna Apame ma-ainya lea, lisaya.
28Go einare nimimi kone rando rando na-sialepape. Ambala kome wenaali dapa peme ei raayomere nipuna angele koma pangola peme naare epola pea eina lawa. 29Monde wenaalimi pangomare nimuna dapa minyapaoma kama nane epeleme. Epe au puma komeme wenaaliri rekoma endoma alimi. Koae au puma komeme wenaaliri rekoma angele yokanali pula pea eiri, go dina pilimi, lisaya.
Yesuna aunu la alisimiya ei
30Neme nina kone suma au menda pape-na-ya. Godeme ni para la giala ei neme pangoma angele yokanali piae. Na kone pea ei pulame kone na-wi. Ni rapaya Apa Godena kone pea ei pulame kone sialo eina, neme angele yokanali pi eiri ora rendepona puayo, lisaya.
31Na pi eina neme ninale angele la doandare gore neme lalo eiri ora ree na-wilia. 32Gupula peapare neme pi eina mendame na angele ora ei loma la ada. Gupuma mo ni para da pea angelere ora ei dae kone sialo, lisaya. 33Nimimi Dioni para alinu menda para raparimiyapare nipumi nimi para ora au peme einare la alaya. 34Neme pi einu la ada pea ali meapere kone na-peapare nimimi endoaya ei mealiminyaya, go angele lala ara lalo, lisaya. 35Dioniri ande lamepa rupa kewo andiaripanda paa waru puaripa. Go eina nipuna paa pi ei para aluame nimimiri paana aluame kone siamende.
36Go papare nina aunu mendame la aloaya. Nina einu la aloaya eimi Dionimi la aloaisaya einumi angulaya. Na Apame neme panoya waleanda puayo aunuri gore ni ayo ei pange na Apame ni rapaya ei pange wenaali para penameyao walea, lisaya. 37Gupuma ni rapaya Gode na Apame pange nina angele lao-aya. Nipuna angele koma pange koro komenda na-pangeme. Nipuna lee wili pange koro mendame pange na-andeme, lisaya. 38Go eina nipumi rapaya ali para nimimi kone na-rulademe eina nipuna angelenuri nimi rupara na-wia. 39Endoaya ei andasulamere nimimi monde Godena angele wia buka para ree aisa pimiparere monde Godena angele wia bukanare nina angele lada ei wia, lisaya. 40Go peapare nimimiri endoaya ei mulame ni para epapere giademe.
41-42Wenaalimi na angele lainyaya na-aisa pipare nimiri ambala andalo. Gode para pumi yarame kome eiri nimina pu para na-wia, lisaya. 43Niri na Apana bina epepare nimimi ni na-lamu mealeme. Ali menda nipunale epeleandare nimimi gupi aliri lamu milimiae.
44Niminale menda mendana bi minyasiae aunu pulame raname komemepare ande komea aya Godeme nimina bi minyasiainyaya kone na-wimi. Go au peme eimiri ni repara kone rulao-aya eiri akepu pilimiyapae, lisaya.
45Neme na Apa para nimina koae einu wadoa kone na-sialepape. Ande nimina kone rulao-aeme ali Mosesi nipumi komeare nimina koae einu la adea, lisaya.
46Mosesimi lea angelenu ora ei loma kone rulala pameyalore gore na angele pange pangolapame. Mosesimi wape pisaya eiri ni para le pisaya eina lawa, lisaya. 47Gupula pamepare nipumi wape pisaya ei nimimi kone na-rulaeme eina, neme lalo angelenuri ora kone rulalimipae, lisaya.
Àwon tá yàn lọ́wọ́lọ́wọ́ báyìí:
Dioni 5: POLENT23
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
