Baroma 9
9
Mulimu ni sicaba s'a iketezi
1Se ni bulela ki niti. Ni wa Kreste, mi ha ni pumi. Lizwalo la ka, le li buswa ki Moya o Kenile, li ni pakela kuli ha ni buleli buhata. 2Maswabi a ka ki a matuna, mi ku na ni butuku bo bu sa feli mwa pilu ya ka. 3Kabakala batu bahesu, ba nama ya ka ni mali a ka, kabakala bona, ne ni ka lakaza kuli kambe ki na ya ka kutiwa ki Mulimu ni ku kauhanywa ni Kreste. 4#Mut 4.22 Ki batu ba ba ketilwe ki Mulimu. U ba ezize bana ba hae, mi a ikabela ni bona kanya ya hae. U itamile bulikani ni bona, mi a ba fa Mulao. Ba na ni bulapeli bwa niti. Ba amuhezi lisepiso za Mulimu. 5Ba simuluhile ku baikale ba batuna, mi Kreste h'a pepilwe a li mutu, ni yena ki wa lona lusika lo lwa bona. Mulimu, ya busa kai ni kai, a lumbekwe kuya kuile! Amen.
6Ha ni buleli kuli sepiso ya Mulimu ha i si ka ezahala, kakuli ha si batu kaufela ba Isilaele ba ba ketilwe ki Mulimu. 7#Sim 21.12 Nihaili baikulu ba Abrahama ha si bana ba Mulimu kaufel'a bona. Mulimu n'a ize ku Abrahama, “Ki baikulu ba Isaka feela ba ba ka balwa kuli ki ba hao.” 8Taluso fo kikuli bana ba ba ipepezwi feela ha si bana ba Mulimu, haisi bona bana ba ba pepilwe ka sepiso ya Mulimu, ki bona baikulu ba niti. 9#Sim 18.10 Kakuli sepiso ya Mulimu i ezizwe ka manzwi a, “Ni ta kuta ka nako ye swanela, mi Sara u ta ba ni mwana.”
10Mi ha ku feleli fo, kakuli bana ba babeli ba Rebeka ne ba na ni ndat'a bona, yena Isaka, kukw'a luna. 11Kono bana bao ba bashimani ba si ka pepwa kale, mi ba si na se sinde kapa se si maswe se ba ezize, mulelo wa Mulimu h'a keta batu wa bonahala. 12#Sim 25.23 Ku keta kwa hae ku itingile ka pizo y'a ba bizize ka yona, isiñi ka likezo za bona. Cwale ku bonisa kuli u ya hande-nde ka mulelo wo Mulimu u bulelezi Rebeka, a li, “Yo muhulu u ta sebeleza yo munyinyani.” 13#Mala 1.2-3 Sina mo ku ñolezwi, “Ni ketile Jakobo, kono ni hanile Isau.”
14Cwale lu ka liñi? Kuli Mulimu u na ni ketululo? Batili ni hanyinyani! 15#Mut 33.19 Kakuli n'a ize ku Mushe, “Ni ta ba ni sishemo ku ye ni bata ku shemuba, mi ni ta ba ni makeke ku ye ni bata ku sa utwisa butuku.” 16Cwale ha ku si ka itinga ku s'a bata mutu kapa s'a eza, kono ku itingile feela fa sishemo sa Mulimu. 17#Mut 9.16 Mwa Mañolo, Mulimu n'a ize ku Faro: “Ni ku ezize mulena ka mulelo wo feela, ili kuli maata a ka a bonahale ka wena, ni kuli libizo la ka li zibahale mwa lifasi kamukana.” 18Cwalehe, Mulimu u na ni sishemo ku b'a bata ku shemuba, mu u tatafaza pilu ya mutu mw'a latela kaufela.
Buhali ni sishemo sa Mulimu
19Mwendi yo muñwi wa mina a ka li ku na, “Haiba ku cwalo, Mulimu u sa bata cwañi mulatu ku mutu? Kakuli ki mañi ya ka kona ku hanyeza tato ya Mulimu?” 20#Isa 29.16; 45.9; But 12.12 Wena mutu, u mañi kuli u alabane ni Mulimu? Kana piza ya lizupa i ka buza ya i bupile kuli, “Kiñi ha u ni bupile cwana?” 21#But 15.7; Litu 33.13 Mubupi wa lipiza u na ni tukelo ya ku sebelisa lizupa mw'a latela. Fa siñomoto si li siñwi sa lizupa u kona ku bupa lipiza ze peli, ili ye tula ni ye cipile.
22 #
But 12.20, 21 Cwale, mu sa na ni ku bulela lifi bakeñisa Mulimu? U batile ku bonisa buhali bwa hae, ni ku zibahaza maata a hae. Kono, u bile ni buiswalo ni pilu-telele ku ba ba ne ba lukela ku eziwa ka buhali ni ba ba ne ba swanela ku pyatiwa. 23Hape, u itatezi ku bonisa butuna bwa kanya ya hae ye lu sululezwi, luna ba ba filwe sishemo sa hae, luna ba ba bupezwi kale ku amuhela kanya ya hae. 24Kakuli ki luna b'a bizize, isiñi kwa Majuda feela kono ni ku balicaba. 25#Hos 2.23 Mane ki sona s'a bulela mwa buka ya Hosea, h'a li,
“Batu be ne si ba sicaba sa ka,
ni ta ba biza ‘Batu ba ka’.
Mi sicaba se ne ni sa lati,
ni ta si biza ‘Mulatiwa wa ka.’
26 #
Hos 1.10
Mi hona mwa sibaka mo,
mo ne ba bulelezwi kuli,
‘Ha mu batu ba ka,’
hona mo ki mona mo ba ta bizwa
bana ba Mulimu ya pila.”
27 #
Isa 10.22-23
Ni yena Isaya u huwelelize ka Isilaele, a li, “Batu ba Isilaele niha ba ta ba ba bañata sina mushabati wa fa likamba la liwate, ku ta piliswa ba sikai feela. 28Kakuli Mulena u tuha a atulela batu ba lifasi kamukana.” 29#Isa 1.9 Ku swana ni mw'a n'a bulelezi Isaya pili, ha n'a ize, “Kabe Mulena ya Maata Kaufela n'a si ka lu siyela baikulu, kabe lu fetuhile sina Sodoma, mi lwa swana ni Gomora.”
Isilaele ni Litaba ze Nde
30Cwale lu ka liñi? Lu ka li balicaba ba ba ne ba sa bati ku kutisana ni Mulimu, ba ezizwe ba ba lukile fapil'a hae ka tumelo. 31Kono batu ba ba ne ba ketilwe, mi ba ba ne ba bata mulao o' ka ba eza ba ba lukile fapil'a Mulimu, ha ba si ka u fumana. 32Mi kikabakalañi? Kakuli ne ba sa bati ku tabisa Mulimu ka tumelo ya bona. Ne ba hupula ku mu tabisa feela ka misebezi. Ba sitatalile fa “Licwe le li sitatalisa.” 33#Isa 28.16 Licwe leo li bulelwa mwa Mañolo, h'a li,
“A mu bone, ni beya mwa Sione licwe
le li ta sitatalisa batu,
licwe le li ta ba wisa.
Kono ya ta lumela ku lona
h'a na ku swaba.”
Currently Selected:
Baroma 9: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.