Baroma 8
8
Mulumeli u zamaiswa ki Moya wa Mulimu
1Cwale ha ku sa na katulo ye yemezi ba ba inzi ku Jesu Kreste. 2Kakuli mulao wa Moya o' lu fa bupilo, ka kopano ye lu na ni yona ni Jesu Kreste, u lu lukuluzi kwa mulao wa sibi ni lifu. 3Mulimu u ezize seo Mulao wa Mushe n'o sa koni ku si eza, kakuli n'o fokoliswa ki litakazo za mubili. U atuzi sibi se si busa mubili ka ku luma Mwan'a hae, ya tile ka sibupeho se si swana ni sa mutu ya tezi sibi, ku t'o felisa sibi. 4Mulimu u ezize cwalo kuli luna ba ba pila ka Moya, isiñi ka litakazo za mubili, lu kone ku buluka litaelo ze kenile za Mulao. 5Kakuli minahano ya ba ba pila ka ku latelela litakazo za bona i tomilwe fa lika ze latwa ki mubili. Kono bona ba ba pila ka Moya, ba tomile minahano ya bona fa lika za Moya. 6Ku pila ka ze batwa ki mubili ku isa kwa lifu. Kono ku pila ka ze batwa ki Moya ku isa kwa bupilo ni kozo. 7Kakuli ba ba bilaela ka ze batwa ki mubili ki lila za Mulimu. Ha ba ipeyi kwatas'a mulao wa Mulimu, mane ha ba koni ku ipeya ku ona. 8Ba ba ya ka litakazo za mibili ya bona ha ba koni ku tabisa Mulimu.
9Mina, ha mu pili mo mu bulelelwa ki litakazo za mibili ya mina. Mu pila mo mu bulelelwa ki Moya, haiba luli Moya wa Mulimu u ku mina. Mutu kaufela ya si na Moya wa Kreste ha si wa hae. 10Kono haiba Kreste u pila ku mina, mibili ya mina niha i ka shwa kabakala sibi, mioya ya mina yona ya pila kakuli mu ezizwe ba ba lukile fapil'a Mulimu. 11#1 Bakor 3.16 Haiba Moya wa Mulimu, ya zusize Jesu kwa bafu, u ku mina, yena yo ya zusize Kreste kwa bafu u ta fa cwalo bupilo ni ku yona mibili ya mina ye shwa, ka Moya wa hae o' inzi ku mina.
12Cwalehe banabahesu, lu na ni sikoloti, kono isiñi kwa mubili wa luna kuli lu pile ka litakazo za ona. 13Kakuli ha mu pila ka ku latelela litakazo za mubili wa mina, mu ta shwa. Haiba mu tuhelelela likezo ze maswe za mina, ka tuso ya Moya, mu ta pila. 14Ba ba zamaiswa ki Moya wa Mulimu kaufel'a bona ki bana ba Mulimu. 15#Magal 4.5-7 #Mar 14.36; Magal 4.6 Kakuli Moya o mu amuhezi, ha si moya o' mi kenya mwa butanga kuli mu kutele hape mwa sabo. Ki Moya o' mi eza bana ba Mulimu, ili ona Moya o' lu lumeleza ku biza Mulimu, lu li, “Ndate!” 16Ki ona Moya wa Mulimu kasibili o' pakela mioya ya luna kuli lu bana ba Mulimu. 17Mi ha lu li bana ba hae, lu ta ca ni luna lifa leo Mulimu a li sepisize batu ba hae, mi lu ta li ca hamoho ni Kreste. Kakuli haiba lu nyanda ni yena, hape lu ta ca bulena ni yena.
Kanya ye taha
18 #
But 3.5, 6 Ni hupula kuli manyando a luna a nako ye h'a koni ku likanyezwa ni kanya yeo Mulimu u tuha a lu sinulela yona. 19Lifasi kaufela li libelezi ka lishuke le lituna nako yeo Mulimu a ta bonahaza bana ba hae. 20#Sim 3.17-19 Kakuli ze bupilwe ne li beilwe mwa puso ya buhata, isiñi ka ku lata kwa zona, kono kabakala kuli Mulimu n'a latile kuli ku be cwalo. Nihakulicwalo, sepo i teñi. 21Sepo yeo kikuli zazi le liñwi, Mulimu u ta lukulula lifasi mwa butanga bwa ku bola, li fumane tukuluho ye komokisa ya bana ba Mulimu. 22Lu ziba kuli mane ku t'o fita ku yona nako ye, ze bupilwe kaufela li tongiswa ki butuku, butuku bo bu swana ni bwa musali h'a pepa. 23#2 Bakor 5.2-4 Mi isiñi ze bupilwe feela, kono ni luna cwalo ba ba kalile ku fumana miselo ya pili ya Moya, lu tongela mwahali lu nze lu litezi ku lukululwa ki Mulimu ni ku ezwa bana ba hae. 24Cwale ka sepo lu pilisizwe. Kono sepo ye bonahala ha si sepo. Kakuli ki mañi ya ka sepa s'a bona? 25Kono ha lu sepa se lu sa boni, lu si libelela ka pilu-telele.
26Kamukwaoswana, ni ona Moya u t'o lu tusa mwa bufokoli bwa luna, kakuli ha lu zibi mo lu swanezi ku lapelela. Kono ona Moya kasibili u nz'o lu lapelela ku Mulimu ka sitongo se si sa konwi ku taluswa. 27Mi Mulimu ya bona se si mwa lipilu za batu, u ziba seo Moya u bata ku si kupa, kakuli Moya u lapelela balumeli sina mw'a latela Mulimu.
28Lu ziba kuli Mulimu, mwa linto kamukana, u sebelisana hande ni ba ba mu lata, ili bona b'a bizize ka mulelo wa hae. 29Kakuli bona b'a ketile pili ba si ka ba teñi kale, yena Mulimu, hape u ba beile kale kuli ba nge siswaniso sa Mwan'a hae, ili kuli Mwan'a hae a be wa pili mwahal'a banabahabo ba bañata. 30Mi cwale, b'a ketile bao, Mulimu hape u ba bizize. B'a bizize, u ba ezize ba ba lukile, mi b'a ezize ba ba lukile, u ba abezi hape kwa kanya ya hae.
Butuna bwa lilato la Mulimu
31Cwale lu ka liñi ka ze! Haiba Mulimu u kwa neku la luna, ki mañi ya ka lu lwanisa? 32H'a si ka hana ku lu fa Mwan'a hae, mane u mu file luna kaufela! Cwale, n'a ka hana cwañi ku lu fa lika kamukana hamoho ni Mwan'a hae? 33Ya ka zekisa ba ba ketilwe ki Mulimu ki mañi? H'a yo, kakuli ki yena Mulimu kasibili ya ize ha ba na mulatu! 34Ya ka ba atula cwale ki mañi? H'a yo, kakuli Jesu Kreste ki yena ya shwile, mane u zuhile kwa bafu, mi u inzi ku la bulyo la Mulimu, mi wa lu lapelela. 35Ki sika mañi cwale se si ka lu kauhanya ni lilato la Kreste? Kana i ka ba manyando, butata, ku zumiwa, tala, bunjebwe, kozi, kamba lifu? 36#Lipi 44.22 Sina mo ku ñolezwi kuli,
“Lu mwa kozi ya lifu lizazi kaufela
kabakala hao.
Lu eziwa sina lingu
ze y'o bulaiwa.”
37Batili, lu komelezi lika kamukana ka yena ya lu latile! 38Kakuli ni na ni niti kuli ha ku na se si ka lu kauhanya ni lilato la hae, niha i ka ba lifu kamba bupilo, niha i ka ba mangeloi kamba babusi ba bañwi ba kwa lihalimu ba ba na ni maata, niha i ka ba ze ezahala ka nako ye, kamba ze ka ezahala ka linako ze sa taha kaufela. 39Ha ku na se si fahalimw'a lifasi kamba kwatas'a lona, se si ta lu kauhanya ni lilato la Mulimu le li bonahalile ku luna ka Jesu Kreste Mulen'a luna.
Currently Selected:
Baroma 8: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.