Baroma 4
4
Mutala wa Abrahama
1Cwale, lu ka bulela sifi ka kukw'a luna Abrahama? U fumani sika mañi? 2Haiba Abrahama n'a ezizwe ya lukile ki Mulimu ka misebezi y'a ezize, fo n'a ka ba ni s'a n'a ka itumba ka sona. Kono h'a koni ku itumba fapil'a Mulimu. 3#Sim 15.6; Magal 3.6 Kaniti ku ñozwi kuli, “Abrahama u lumezi ku Mulimu, mi kabakala tumelo ya hae, Mulimu a mu bala kuli u lukile.” 4Mutu ya sebeza u fumana mupuzo. Mupuzo wo, ha u na ku balwa kuli ki mpo, kono ili s'a fumani mutu ka musebezi wa hae. 5Haili ka mutu ya beya tumelo ya hae ku Mulimu ya utwela baezalibi butuku, Mulimu u hupula tumelo ya hae isiñi misebezi, mi u mu talima a li ya lukile. 6Se, ki sona s'a n'a talusa Davida ha n'a bulela ka za litohonolo la mutu ya ka amuhelwa ki Mulimu, ili ya lukile, kwand'a misebezi ya hae, ha n' a ize,
7 #
Lipi 32.1-2
“Ba na ni litohonolo
ba ba swalezwi milatu ya bona ki Mulimu,
ba ba kwahelezwi libi za bona!
8U na ni litohonolo mutu
ya si ke a bulukelwa
libi za hae ki Mulimu!”
9Kana litohonolo l'a bulela Davida ki la ba ba ile kwa mupato feela? Batili! Ki la bona kaufela ni ba ba si ka ya kwa mupato. Lu se lu bulezi ka se si ñozwi kuli, “Abrahama a lumela ku Mulimu, mi kabakala tumelo ya hae Mulimu a mu bala kuli u lukile.” 10Ze, li ezahalile lili? Kana ne li pili, kamba mwamulaho, Abrahama ha s'a ile kwa mupato? I ne li pili, isiñi mwamulaho. 11#Sim 17.10 A ya kwa mupato mwamulaho, mi ku ya kwa hae kwa mupato koo, ne li sisupo sa kuli Abrahama n'a balilwe ki Mulimu kuli n'a lukile, pili a si ka ya kwa mupato. Cwalehe, ka moya, Abrahama ki mushemi wa ba ba lumela ku Mulimu kaufela, mi ba amuhelwa ki yena kuli ba lukile, niha ba si ka ya kwa mupato. 12Hape, u sa li mushemi wa ba ba ile kwa mupato, isiñi kabakala taba yeo ya kuli ba ile kwa mupato, kono kabakala kuli ba pila bupilo bwa tumelo bo bu swana ni bw'a n'a pilile mushemi wa luna Abrahama, pili a si ka ya kwa mupato.
Sepiso ya Mulimu ye fumanwa ka tumelo
13 #
Sim 17.4-6; 22.17-18; Magal 3.29 Mulimu n'a sepisize Abrahama ni baikulu ba hae kuli lifasi li ta ba la bona. Sepiso yeo i n'e ezizwe, isiñi kabakala kuli Abrahama n'a buluka Mulao, kono kakuli n'a lumezi ku Mulimu, mi kabakaleo a mu nga kuli u lukile. 14#Magal 3.18 Haiba s'a sepisa Mulimu si na ni ku fiwa ba ba buluka Mulao, fohe tumelo ya mutu ha i na se i talusa, mi sepiso ya Mulimu ha i na tuso. 15Mulao u tisa buhali bwa Mulimu. Kono ku si na mulao, ha ku na kashwau ka ona ni hanyinyani.
16 #
Magal 3.7
Kamukwaocwalo, sepiso i tisizwe ki tumelo, kuli i be mpo feela ye zwa ku Mulimu. Ki mpo ye fiwa baikulu kamukana ba Abrahama, isiñi feela ba ba buluka Mulao, kono ni bona ba ba lumela sina mw'a lumelezi Abrahama. Abrahama ki mushemi wa luna kaufela ka moya. 17#Sim 17.5 Sina mo ku ñolezwi kuli, “Ni ku ezize ndat'a mishobo ye miñata.” Cwale sepiso yeo, Mulimu u i talima kuli ki ye nde, yena Mulimu ya lumezwi ki Abrahama, Mulimu ya zusa ba ba shwile, mi ya tahisa ze ne li li siyo ka taelo ya hae. 18#Sim 15.5 Abrahama a lumela, mi a sepa fo ne ku si na sepo, mi cwalo a ba “mushemi wa mishobo-shobo ye miñata,” sina mw'a n'a bulelezwi ki Mulimu, ha kutwi, “Baikulyowe ba ta ba ba bañata inge linaleli za kwahalimu.” 19#Sim 17.17 N'a s'a na ni lilimo ze bata ku ba mwanda, kono tumelo ya hae ha i si ka fokola h'a ikupula ka bucembele bwa hae, ni kuli n'a s'a shwile, mi hape Sara n'a s'a hulile.
20Tumelo ya hae ha i si ka fela, mi hape h'a si ka bilaezwa ki sepiso ya Mulimu. Tumelo ya hae ya mu matafaza, mi a lumba Mulimu. 21N'a sepile luli kuli Mulimu n'a ta kona ku eza s'a sepisize. 22Kikabakaleo “Abrahama h'a ezizwe ya lukile ki Mulimu” ka tumelo ya hae. 23Kono manzwi ao a li, “U ezizwe ya lukile” h'a si ka ñolelwa yena feela a nosi. 24A ñolezwi ni luna cwalo ba ba swanezi ku eziwa ba ba lukile, luna ba ba lumela ku yena ya zusize Jesu, Mulen'a luna, kwa bafu. 25#Isa 53.4-5 U bulailwe kabakala libi za luna, mi u zuselizwe kuli lu kone ku kutisana ni Mulimu ka ku luka.
Currently Selected:
Baroma 4: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.