Baroma 5
5
Kozo ni Mulimu
1Cwale, ha lu ezizwe ba ba lukile ka tumelo, lu mwa kozo ni Mulimu ka Mulen'a luna Jesu Kreste. 2Ka yena Jesu lu konile, ka tumelo, ku sutelela kwa sishemo sa Mulimu ko lu yemi ka nako ye. Mi lu tabile cwale, kabakala sepo ye lu na ni yona, ya ku y'o ina mwa kanya ya Mulimu. 3Mane, lu tabiswa ki manyando a luna, kakuli lu ziba kuli manyando a tisa mutundamenyi. 4Mutundamenyi u tisa maata a ku lwanisa miliko, mi maata ao a tisa sepo. 5Sepo ye, ha i tisi maswabi, kakuli Mulimu u sululezi lilato la hae mwa lipilu za luna ka Moya o Kenile, w'a lu file ona.
6Ha ne lu sa tokwa maata, Kreste u shwezi ba ba maswe, ka nako ye n'e tomilwe ki Mulimu. 7Ku tata kuli mutu n'a ka shwela ya lukile. Mwendi yo muñwi a ka swana a itiisa pilu ku shwela mutu yo munde. 8Kono Mulimu u lu bonisize fo li kuma lilato la hae, kakuli Kreste u lu shwezi ha ne lu sa li baezalibi! 9Ka lifu la hae, lu se lu li ba ba lukile cwale. Kabakaleo, ku bonahala kuli lu ka piliswa kwa buhali bwa Mulimu ka yena. 10Ne lu li lila za Mulimu, kono ka lifu la Mwan'a hae u lu kutiselize ku yena. Cwale, ha lu se lu li balikani ba Mulimu, ku bonahala hande kuli ka bupilo bwa Mwan'a hae lu ka piliswa!” 11Kono ha si zona zeo feela. Lwa nyakalala bakeñisa seo Mulimu a lu ezelize ka Mulen'a luna Jesu Kreste ya lu kutiseza ku yena.
Adama ni Kreste
12 #
Sim 3.6;
But 2.24
Sibi si tile mwa lifasi ka mutu a li muñwi, ili yena Adama, mi sibi seo si tisize lifu. Kabakaleo, lifu li yambile batu kaufela, kakuli ka yena kamukan'a bona ba ezize sibi. 13Sibi ne si se si li teñi mwa lifasi, mulao u si ka tomwa kale. Kono kakuli ne ku si na mulao, Mulimu n'a sa tami batu ka sibi. 14Nihakulicwalo, ku zwa ka nako ya Adama ku t'o fita fa nako ya Mushe, lifu li busize fahalimw'a batu kamukana, mane ni fahalimw'a ba ba ne ba si ka eza sibi ka mukwa o swana sina wa Adama, h'a si ka buluka mulao wa Mulimu.
Adama, n'e li siswaniso sa ya n'a ka taha. 15Kono sibeli sa bona ha ba swani. Mulatu wa Adama ha u koni ku likanyiswa ni mpo ya Mulimu. Ki niti kuli batu ba bañata ba shwile kabakala sibi sa mutu yani, a li muñwi. Kono sishemo sa Mulimu ki se situna ka ku fitisisa, ni mpo y'a file batu ba bañata ka mutu a li muñwi, yena Jesu Kreste, ni yona ki ye tuna ka ku fitisisa. 16Mi ku na ni fapahano mwahal'a mpo ya Mulimu ni sibi sa mutu a li muñwi. Mwamulaho a sibi si li siñwi sani, ku tile katulo ya kuli, “Foso i teñi.” Kono mwamulaho a libi ze ñata-ñata, ku tile mpo ya sishemo ya kuli, “Ha ku na foso!” 17Ki niti kuli ka sibi sa mutu a li muñwi lifu la kala ku busa, kabakala mutu yo a li muñwi feela. Kono, ka Jesu Kreste a nosi, lu fiwa hahulu ni ku fita! Batu kamukana ba ba bonisizwe ki Mulimu sishemo sa hae se situna, mi ba amuhezi mpo ya hae ya ku eziwa ba ba lukile, ba ta pila ka Kreste kuya kuile.
18Cwalehe, sibi si li siñwi ha si kenyize batu kaufela mwa mulatu, kamukwaoswana kezo i liñwi ye lukile i lukulula batu kaufela ni ku ba fa bupilo. 19Mi sina batu ba bañata ha ba bile baezalibi ka ku sa utwa kwa a li muñwi, kamukwaoswana ba bañata ba ta eziwa ba ba lukile fapil'a Mulimu, ka ku utwa kwa mutu a li muñwi.
20Mulao u tomilwe, mi lifoso cwale li bonahalile ka buñata. Kono mo ku fosa ku bile ko kuñata, sishemo sa Mulimu sona si bile se situna ku fita. 21Cwale sina sibi ha si busize ka lifu, sishemo sa Mulimu, ni sona cwalo, si busa ka ku lu konisa ku kutisana ni yena, si nze si lu isa kwa bupilo bo bu sa feli ka Jesu Kreste Mulen'a luna.
Currently Selected:
Baroma 5: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.