Baroma 3
3
1Mi cwale se si beya Majuda kwapil'a ba bañwi ki sika mañi? Kamba tuso ya mupato ki ifi? 2Ki ye tuna kwa maneku kaufela! Kakuli Mulimu u file manzwi a hae ku bona Majuda pili. 3Ne ku ka ezwa cwañi, ha ne i ka ba kuli ba bañwi ba bona ha ba si ka sepahala? Kikuli Mulimu h'a na ku sepahala kakuli bona ha ba si ka sepahala, nji? 4#Lipi 51.4 Batili, ha ku cwalo! Mulimu u swanezi ku ba ni niti, batu kaufela niha ba ka ba mahata. Sina mo ku ñolezwi kuli,
“U swanezi ku bonahala u li ya lukile
mwa litaba z'o bulela,
ni kuli u showelele ya ku tamile litaba,
ha u zekiswa.”
5Kono haiba ku fosa kwa luna ku bonahaza ku luka kwa Mulimu, fohe lu ka liñi? Kana lu ka li Mulimu wa fosa kakuli u lu fa mulatu, nji? Ni bulela cwalo sina mo ba bulelela batu. 6Ku si ke kwa ba cwalo! Kakuli kambe Mulimu n'a si ka luka, n'a ta kona cwañi ku atula lifasi?
7Kono haiba ku tokwa niti kwa ka, ku tusa ku bonahaza hande niti ya Mulimu, mane ni ku ekeza kwa kanya ya hae, ni ka atulelwañi sina muezalibi? 8Cwale, kiñi ha lu sa li, “A lu ezeñi ze maswe, kuli ku tahe ze nde?” Batu ba bañwi, ka takazo ya ku sinya libizo la ka, ba ni tama litaba, ba li ni bulela cwalo! Katulo ya batu bao i ka ba swanela.
Ha ku na mutu ya lukile
9Cwalehe, kikuli luna Majuda lu fita batu ba bañwi? Ha ku cwalo ni hanyinyani! Ni se ni bonisize kuli Majuda ni balicaba ba swana. Kaufel'a bona ba mwatas'a maata a sibi. 10#Lipi 14.1-3; 53.1-3 Sina mo ku ñolezwi kuli,
“Ha ku na mutu, nihaili a li muñwi ya lukile.
11Ha ku na ya utwisisa,
kapa ya bata Mulimu.
12Batu kaufela ba fulalezi Mulimu.
Ba fetuhile ba ba maswe hamoho.
Ha ku na, nihaili a li muñwi,
ya eza se sinde.
13 #
Lipi 5.9; 140.3 Mumizo ya bona i swana ni libita
le li atami.
Ba puma ka malimi a bona.
Manzwi a bulaya,
sina buhazo bwa noha,
a zwa mwa milomo ya bona.
14 #
Lipi 10.7
Malimi a bona
a tezi matapa a maswe.
15 #
Isa 59.7-8
Ba bubebe kwa ku holofaza
ni ku bulaya.
16Kai ni kai ko ba ya
ba siya matota ni manyando.
17Ha ba si ka ziba nzila ya kozo.
18 #
Lipi 36.1
Ba pila ba sa sabi Mulimu.”
19Cwale lwa ziba hande kuli ze bulelwa mwa Mulao kaufela li bulelelwa bona ba ba pila mwatas'a Mulao, ili kuli buitatulo bu si ke bwa zwa mwa milomo ya batu, ni kuli lifasi kaufela li tiswe mwa katulo ya Mulimu. 20#Lipi 143.2; Magal 2.16 Ha ku na mutu ya ka bulelwa kuli u lukile fapil'a Mulimu kakuli u ezize se si batwa ki Mulao, batili. Tuso ya Mulao ki ku lemusa mutu kuli u ezize sibi.
Mutu mw'a pilisezwa ki Mulimu
21Kono cwale, Mulimu u lu bonisize mukwa w'a bata kuli batu ba kutisane ni yena ka ona. Mukwa wo, ha u na taba ni Mulao nihaiba Mulao ni bapolofita ba file bupaki bwa mukwa wo. 22#Magal 2.16 Mulimu u eza batu ku ba ba ba lukile ka ku lumela kwa bona ku Jesu Kreste. Mi u eza cwalo ku ba ba lumela ku Kreste kaufela. Ha ku na fapahano mwahal'a bona. 23Batu kaufela ba ezize sibi, mi kaufela bona se ba li kwahule ni ku pilisa kwa Mulimu. 24Kono ka mpo ya sishemo sa hae, batu kamukana ba kona ku fetuha ba ba lukile ka Jesu Kreste, ya ba lukulula. 25Jesu Kreste n'a ketilwe ki Mulimu ku ba sitabelo ka ku sulula mali a hae ku tisa kutisano ka tumelo. Ka mukwa wo, Mulimu u bonisa ku luka kwa hae. N'a bonisa ku luka kwa hae pili ka za nako ya kale niha n'a si ka fa koto bakeñisa libi ze ne ezahala kabakala pilu-telele ya hae. 26Mi u zibahaza ku luka kwa hae ni ka nako ya cwale ka ku bonisa patalaza kuli u lukile mi u swalela mañi ni mañi ya lumela ku Jesu Kreste.
27Cwalehe, batu ba ka itumba ka lifi hape? Ha ku na! Kabakalañi? Kakuli ba buluka Mulao? Batili, kono kakuli ba lumela. 28Luli lwa kolwa kuli mutu u ba ya lukile ku Mulimu kabakala tumelo ya hae, isiñi ka ku mamela feela se si laelwa ki Mulao. 29Kana Mulimu ki Mulimu wa Majuda feela, nji? Kikuli ha si Mulimu wa balicaba ni bona? Ee, ki wa balicaba ni bona. 30#Mul 6.4; Magal 3.20 Mulimu ki a li muñwi, mi u ta kondisa Majuda ka tumelo ya bona, ni balicaba cwalo ka tumelo ya bona. 31Cwale, kana ku talusa kuli lu se lu felisa Mulao ka tumelo? Batili, ni hanyinyani, mane kihona lu tiisa Mulao.
Currently Selected:
Baroma 3: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.