GÉNESIS 4
4
Caín huan iicni Abel
1Huan Adán cochqui ihuaya isihua, huan isihua conecuic huan quitlacatilti se oquichpil catli quitocaxti Caín. (Caín quinequi quiijtos “nijpixtoc”.) Quej nopa quitocaxti pampa Eva quiijto: “Ica itlapalehuil TOTECO nijpixtoc se tlacatl.”
2Huan teipa Eva quitlacatilti seyoc oquichpil catli quitocaxtlali Abel.
Huan quema nopa ome moscaltijque, Abel quinmocuitlahui borregojme, huan Caín miltequitqui. 3Huan se tonal Caín quihualiquili TOTECO se tlacajcahualistli catli quipixcatoya. 4Huan Abel nojquiya quihualiquili TOTECO sequin borregojme catli más tomahuaque huan catli achtihui tlacatque. Huan quinmicti huan quimacac TOTECO. Huan TOTECO quicualitac Abel ica itlacajcahualis huan quiseli. 5Pero ica Caín huan itlacajcahualis amo quicualitac. Yeca Caín cualanqui miyac huan fiero tlachixtinenqui.
6Huajca TOTECO quiilhui Caín: “¿Para tlen ticualani huan fiero titlachixtinemi? 7¿Amo tijmati sintla tijchihuas catli cuali, nimitzselis huan tipaquis? Pero sintla amo tijchihua catli cuali, mitztlanis tlajtlacoli. Nopa tlajtlacoli eltoc quen se tecuani catli mitzchiya mocalteno huan quinequi mitztlanis, pero monequi ta xijtlanis ya.”
8Huan panoc se ome tonali huan Caín quinotztejqui iicni Abel huan quiilhui:
―Ma tiyaca cuatitla.
Huan quema ajsitoj cuatitla, Caín quihuilanqui iicni Abel huan quimicti. 9Huajca TOTECO quitlatzintoquili Caín:
―¿Canque itztoc moicni Abel?
Huan Caín quinanquili:
―Amo nijmati na. Amo notequi para nijmocuitlahuis noicni.
10Huan TOTECO quiilhui:
―¿Para tlen tijchijtoc ya ni? Tijmicti moicni huan ieso tijtoyajtoc ipan tlali. Huan ama eltoc quen ieso nechtlajtlanía chicahuac ma nimitztlatzacuilti. 11Huajca ama, por catli tijchijtoc, nimitztelchihuas. Ayacmo huelis titequitis ipan tlali pampa tijnenpolojtoc ica ieso moicni. 12Huan masque titlatojtocas, ayacmo tleno tiqueliltis. Monequi san tinentinemis campa hueli ipan tlaltipactli huan amo cana tijpiyas para timochantlalis.
13Huajca Caín quinanquili TOTECO:
―Nelchicahuac ni tlatzacuiltili huan amo huelis niquijiyohuis. 14Ama techtojtoca huejca tlen ni tlali huan ayacmo huelis nimitznechcahuis ta. Nielis se ninejnenquetl campa hueli tlali huan amo huelis nimosiyajquetzas. Quej ni aqui hueli nechpantis, nechmictis.
15Pero TOTECO quinanquili:
―¡Amo! Sintla acajya mitzmictis, nijtlatzacuiltis chicome huelta más para nijcuepilis.
Huajca TOTECO quitlalili Caín se tlanextilijcayotl para nochi quiiximatisquíaj para yaya huan amo quimictisquíaj. 16Huan Caín quistejqui campa ihuaya camanaltiyaya TOTECO huan yajqui itztoti ipan se tlali itoca Nod catli mocahua imelac Edén para campa hualquisa tonati.
Iixhuihua Caín
17Huan Caín ihuaya cochqui isihua, huan yaya conecuic huan quitlacatilti se oquichpil catli itoca Enoc. Teipa Caín quichijqui se altepetl huan quitocaxti nopa altepetl Enoc quen itoca icone. 18Huan Enoc motlacachijqui huan elqui itata Irad. Huan teipa Irad moscalti huan elqui itata Mehujael. Huan teipa Mehujael motlacachijqui huan elqui itata Metusael. Huan Metusael moscalti huan elqui itata Lamec.
19Huan Lamec quinpixqui ome isihuajhua; se itoca Ada huan ne seyoc Zila. 20Huan Ada quitlacatilti Jabal. Huan Jabal motlacachijqui huan elqui inintata masehualme catli mocajque ipan calme tlen yoyomitl huan quinxinajchohuayayaj huan quiniscaltiyayaj tlapiyalme. 21Huan Jabal quipixqui se iicni catli itoca Jubal. Huan Jubal moscalti huan quiyoliti tlapitzali huan nopa tlatzotzonali catli itoca arpa. Huan yaya elqui inintata masehualme catli tlatzotzonaj. 22Huan Zila, nopa seyoc isihua Lamec, quitlacatilti se oquichpil catli itoca Tubal Caín catli elqui se teposchijquetl. Huan Tubal Caín quitejtzonqui nopa tepostli catli itoca bronce huan catli itoca hierro huan ica nopa tepostli quisencahuayaya miyac tlamantli. Huan Tubal Caín quipixqui se isihua icni catli itoca Naama.
23Huan se tonal Lamec quinilhui iome sihuajhua Ada huan Zila:
“Xijtlacaquilica cuali catli nimechilhuis.
Nijmicti se tlacatl pampa nechcoco.
Huan elqui se telpocatl catli nechmaquilijtoya.
24Sintla se acajya quichihuilisquía se tlenijqui Caín,
quiselisquía se tlatzacuiltilistli chicome huelta más chicahuac.
Pero sintla se acajya nechcuepilisquía catli nijchijtoc na, niLamec,
monequisquía quiselis se tlatzacuiltili catli amo san chicome hueltas,
pero se catli elis tlahuel onpano más chicahuac.”
Adán, Eva huan ininconehua
25Huan Adán cochqui ihuaya isihua, huan isihua sempa conepixqui huan quitlacatilti seyoc oquichpil catli quitocaxti Set. (Set quinequi quiijtos “nechmacatoc”.) Quej nopa quitocaxti pampa quiijto: “Toteco Dios nechmacatoc seyoc conetl ipatlaca Abel catli Caín quimicti.”
26Huan quema Set motlacachijqui, quipixqui se icone catli quitocaxti Enós. Huajca ipan nopa tonali tlacame pejque quihueyichihuaj TOTECO san sejco.
Currently Selected:
GÉNESIS 4: nhwW
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2005, Wycliffe Bible Translators, Inc. All rights reserved