GÉNESIS 5
5
Iteipan ixhuihua Adán
1Ya ni inintoca iteipan ixhuihua Adán:
Quema Toteco Dios quinchijqui masehualme, quinsencajqui quen ya itlachiyalis. 2Quinsencajqui tlacame huan sihuame huan ipan nopa tonal quema quinchijqui, quintiochijqui huan quintocaxti “masehualme”.
3Huan quema Adán quipixqui 130 xihuitl, tlacatqui icone catli elqui quen ya huan san se inintlachiyalis huan quitocaxti Set. 4Huan quema ya tlacajtoya Set, Adán noja itztoya seyoc 800 xihuitl huan quinpixqui más iconehua, tlacame huan sihuame. 5Huan mijqui Adán quema quipixqui 930 xihuitl.
6Huan Set quipiyayaya 105 xihuitl quema tlacatqui icone, Enós. 7Teipa Set noja itztoya seyoc 807 xihuitl huan noja quinpixqui sequinoc iconehua, tlacame huan sihuame. 8Huan mijqui Set quema quipixqui 912 xihuitl.
9Huan Enós quipiyayaya 90 xihuitl quema tlacatqui icone, Cainán. 10Teipa Enós noja itztoya seyoc 815 xihuitl huan noja quinpixqui más iconehua, tlacame huan sihuame. 11Huan Enós mijqui quema quipixqui 905 xihuitl.
12Huan Cainán quipiyayaya 70 xihuitl quema tlacatqui icone, Mahalaleel. 13Teipa Cainán itztoya seyoc 840 xihuitl huan noja quinpixqui más iconehua, tlacame huan sihuame. 14Huan Cainán mijqui quema quipixqui 910 xihuitl.
15Huan Mahalaleel quipiyayaya 65 xihuitl quema tlacatqui icone, Jared. 16Teipa Mahalaleel itztoya seyoc 830 xihuitl huan noja quinpixqui más iconehua, tlacame huan sihuame. 17Huan mijqui Mahalaleel quema quipixqui 895 xihuitl.
18Huan Jared quipiyayaya 162 xihuitl quema tlacatqui icone, Enoc. 19Teipa, Jared itztoya seyoc 800 xihuitl más huan noja quinpixqui más iconehua, tlacame huan sihuame. 20Huajca nochi xihuitl catli itztoya Jared quiaxiti 962 xihuitl huan huajca mijqui.
21Huan Enoc quipiyayaya 65 xihuitl quema tlacatqui icone, Matusalén. 22Huan Enoc nochipa quichijqui ipaquilis Toteco Dios. Huan teipa quema Matusalén ya tlacajtoya, Enoc itztoya seyoc 300 xihuitl más huan noja quinpixqui sequinoc iconehua, tlacame huan sihuame. 23Huajca ica nochi Enoc quiaxiti 365 xihuitl. 24Huan pampa Enoc nochipa nejnentoya quen Toteco Dios ipaquilis, se tonal polijqui pampa Toteco Dios quihuicac.
25Huan Matusalén quipiyayaya 187 xihuitl quema tlacatqui icone catli quitocaxti Lamec. 26Huan teipa Matusalén itztoya seyoc 782 xihuitl más huan noja quinpixqui más iconehua, tlacame huan sihuame. 27Huajca ica nochi Matusalén quiaxiti 969 xihuitl huan huajca mijqui.
28Lamec quipiyayaya 182 xihuitl quema tlacatqui icone, 29huan quitocaxti Noé. (Noé quinequi quiijtos “techyoltlalis”.) Quej nopa quitocaxti pampa quiijto: “TOTECO quitelchijqui ni tlali, huan monequi titequitise tlahuel chicahuac para titlaeliltise, pero ni conetl techyoltlalis.”
30Huan teipa quema Noé ya tlacajtoya, Lamec noja itztoya seyoc 595 xihuitl huan noja quinpixqui más iconehua, tlacame huan sihuame. 31Huajca nochi xihuitl catli itztoya Lamec quiaxiti 777 huan huajca mijqui.
32Huan Noé quipiyayaya 500 xihuitl quema tlacatque iconehua, Sem, Cam huan Jafet.
Currently Selected:
GÉNESIS 5: nhwW
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2005, Wycliffe Bible Translators, Inc. All rights reserved