San Lucas 22
22
Cutuꞌvéj yuve̱ Judas man Jesús a
1Dan me se da̱j doj ca̱nuû Chaꞌanj Pascuá chaꞌanj chá nij yuvii̱ israelitá rachrúún ne atúj levadura a. 2Ne̱ nanoꞌ nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, da̱j quiꞌya̱j nij soꞌ ne̱ cavi̱ꞌ yuve̱ Jesús a. ꞌO̱ se naꞌvej rá nij soꞌ ta̱ꞌaa riha̱a̱n nij soꞌ man Jesús cheꞌé se chuꞌviꞌ nij soꞌ niꞌya̱j nij soꞌ man nij yuvii̱ uno snana̱ soꞌ a.
3Dan me se catúj Síí Chre̱e nimán síí cuꞌna̱j Judas Iscariote, ne̱ soꞌ me se ꞌo̱ nij chuvi̱j nij síí tucuꞌyón snana̱ Jesús me soꞌ a. 4Ne̱ cavii soꞌ caꞌanj soꞌ, ne̱ caꞌmii soꞌ ga̱ nij xrej ata̱ suun noco̱o do̱ꞌ, ga̱ tanuu uun chij rihaan nij tanuu israelitá tumé nuvií do̱ꞌ, ga̱a ne̱ cataj soꞌ da̱j quiꞌya̱j soꞌ ne̱ ta̱cuachén soꞌ man Jesús rihaan nij soꞌ a. 5Ga̱a ne̱ guun niha̱ꞌ rá nij soꞌ ga̱a cuno nij soꞌ snana̱ Judas, ne̱ guun ya̱ caꞌmii nij soꞌ ga̱ Judas se vaa rque̱ nij soꞌ saꞌanj man Judas a. 6Dan me se cataꞌ tuꞌva Judas se vaa ta̱cuachén soꞌ man Jesús rihaan nij soꞌ, ga̱a ne̱ nuchruj ra̱a̱ Judas aman caꞌve̱e ta̱cuachén soꞌ man Jesús rihaan nij soꞌ, ga̱a ne̱ se̱ gaa na̱nj queneꞌe̱n nij yuvii̱ a.
Rqué Jesús rachrúún cha̱ nij síí tucuꞌyón snana̱ soꞌ do̱ꞌ, na vinó coꞌo̱ nij soꞌ do̱ꞌ a
7Dan me se quisíj güii canuû Chaꞌanj Pascuá ga̱a chá nij yuvii̱ israelitá rachrúún ne atúj levadura, ne̱ güii dan me güii ticaviꞌ nij yuvii̱ israelitá matzinj leꞌe̱j rihaan Yaꞌanj cheꞌé Pascuá a. 8Dan me se caꞌnéé Jesús man Pedró ga̱ Juan, ne̱ cataj soꞌ rihaan ro̱j soꞌ a:
―Caꞌa̱nj ro̱j so̱j quiꞌya̱j chuvi̱i ro̱j so̱j cha̱ níꞌ ne̱ navi̱j rá níꞌ Chaꞌanj Pascuá á ―taj soꞌ rihaan ro̱j soꞌ a.
9Ga̱a ne̱ xnáꞌanj ro̱j soꞌ man Jesús a:
―Me rej quiꞌya̱j chuvi̱i núj cha̱ níꞌ ga̱ ―taj ro̱j soꞌ a.
10Ga̱a ne̱ cataj Jesús rihaan ro̱j soꞌ a:
―Cuno̱ ro̱j so̱j caꞌmi̱j á. Asa̱ꞌ catúj ro̱j so̱j chumanꞌ yoꞌ, ne̱ nari̱ꞌ tuviꞌ ro̱j so̱j ga̱ ꞌo̱ síí táá chiha̱ ꞌo̱ cacuaj na, ne̱ canoco̱ꞌ ro̱j so̱j man soꞌ, catu̱u̱ ro̱j so̱j rá veꞌ catu̱u̱ soꞌ a. 11Ne̱ cata̱j ro̱j so̱j rihaan síí tucua̱ veꞌ yoꞌ a: “Xnáꞌanj maestró mán so̱ꞌ me rej yáán cuartó cha̱ xtiꞌno̱ maestró ga̱ nij síí tucuꞌyón snana̱ soꞌ cheꞌé Chaꞌanj Pascuá, taj soꞌ a”, cata̱j ro̱j so̱j rihaan síí tucua̱ veꞌ yoꞌ a. 12Ga̱a ne̱ ti̱haa̱n soꞌ ꞌo̱ cuartó xi̱j vaa rej xta̱ꞌ rque veꞌ nataꞌ yoꞌ rihaan ro̱j so̱j, ne̱ a̱j vaa chuvi̱i rá veꞌ yoꞌ, ne̱ ma̱n chruun mesá ma̱n chruun xlá ma̱n rá veꞌ yoꞌ a. Yoꞌ me rej quiꞌya̱j chuvi̱i ro̱j so̱j á ―taj Jesús rihaan ro̱j soꞌ a.
13Dan me se cavii ro̱j soꞌ caꞌanj ro̱j soꞌ, ne̱ nariꞌ ro̱j soꞌ nu̱ꞌ nda̱a vaa cataj xnaꞌanj Jesús rihaan ro̱j soꞌ, ga̱a ne̱ quiꞌyaj chuvi̱i ro̱j soꞌ cha̱ xtiꞌno̱ nij soꞌ cheꞌé Chaꞌanj Pascuá a.
14Ne̱ quisíj orá cha̱ xtiꞌno̱ nij soꞌ, ne̱ caꞌnaꞌ Jesús ga̱ nij síí cuneꞌ soꞌ caꞌa̱nj nata̱ꞌ snana̱ soꞌ, ga̱a ne̱ caꞌanj ca̱yáán ta̱ranꞌ nij soꞌ rihaan mesá a. 15Ga̱a ne̱ cataj Jesús rihaan nij soꞌ a:
―Guun ndoꞌo raj cha̱ xtiꞌno̱ ꞌu̱nj cheꞌé Chaꞌanj Pascuá nihánj ga̱ nij soj cuano̱ nihánj ga̱a ataa qui̱ránꞌ ꞌu̱nj sayuun a. 16ꞌO̱ se cata̱j xnaꞌanj ꞌu̱nj rihaan soj cuano̱ se vaa se̱ chá xtiꞌno̱ uún ꞌu̱nj ga̱ soj a̱ ꞌó chaꞌanj nihánj nda̱a se quisi̱j güii ca̱nuû Chaꞌanj Pascuá naca̱ asa̱ꞌ guun chij Yaꞌanj a̱ maan ado̱nj ―taj Jesús rihaan nij soꞌ a.
17Ga̱a ne̱ nica̱j soꞌ ꞌo̱ agaꞌ tazá na vinó, ne̱ cataj soꞌ guun niꞌya̱j níꞌ rihaan Yaꞌanj, ga̱a ne̱ cataj soꞌ a:
―Ta̱ꞌaa soj na nihánj, cuxra̱ꞌ taꞌa̱j soj, ne̱ coꞌo̱ cunuda̱nj soj á. 18ꞌO̱ se cata̱j xnaꞌanj ꞌu̱nj rihaan soj cuano̱ se vaa se̱ coꞌo uún ꞌu̱nj na vinó nihánj nda̱a quisi̱j güii gu̱un chij Yaꞌanj ado̱nj ―taj Jesús rihaan nij soꞌ a.
19Ga̱a ne̱ nica̱j soꞌ rachrúún, ne̱ cataj soꞌ guun niꞌya̱j níꞌ rihaan Yaꞌanj, ga̱a ne̱ cuxraꞌ taꞌa̱j soꞌ rachrúún, ne̱ rqué soꞌ man nij soꞌ, ne̱ cataj soꞌ a:
―Nee̱ manj me rachrúún nihánj na̱nj á. Caꞌve̱j rá ꞌu̱nj cavi̱ꞌ nee̱ manj cheꞌé soj ado̱nj. Cha̱ soj man nihánj, cheꞌé yan nanu̱j rá soj manj ado̱nj ―taj soꞌ rihaan nij síí cuneꞌ soꞌ a.
20Ga̱a ne̱ ase vaa quiꞌyaj soꞌ ga̱ rachrúún roꞌ, da̱nj quiꞌyaj uún soꞌ ga̱ agaꞌ nu̱u̱ na vinó ga̱a quisíj chá xtiꞌno̱ nij soꞌ, ne̱ cataj soꞌ a:
―Na vinó nihánj roꞌ, me ton manj a. Cheꞌé ton manj roꞌ, cataꞌ tuꞌva Yaꞌanj rihaan soj da̱j quiꞌya̱j Yaꞌanj ga̱ soj a. Dan me se cheꞌé se caya̱nj ton manj roꞌ, cheꞌé dan me tinavi̱j Yaꞌanj cacunꞌ tumé yuvii̱ na̱nj ado̱nj ―taj Jesús rihaan nij soꞌ a.
Cataj Jesús se vaa ta̱cuachén ꞌo̱ síí tucuꞌyón snana̱ soꞌ man soꞌ rihaan nij síí ta̱j riꞌyunj man soꞌ a
21Ne̱ cataj uún Jesús a:
―Tza̱j ne̱ xca̱j soj cuentá se vaa vaa ꞌo̱ síí ta̱cuachén manj rihaan nij síí ta̱j riꞌyunj manj, ne̱ táá soꞌ rihaan chruun mesá ga̱ ꞌu̱nj cuano̱ ado̱nj. 22ꞌO̱ se xa̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, tza̱j ne̱ caꞌa̱nj ꞌu̱nj cavi̱ꞌ ꞌu̱nj nda̱a vaa cataj xnaꞌanj maꞌa̱n Yaꞌanj a. Tza̱j ne̱ nique̱ ndoꞌo síí ta̱cuachén manj rihaan nij síí ta̱j riꞌyunj manj na̱nj á. Quira̱nꞌ uxrá soꞌ sayuun ado̱nj ―taj Jesús rihaan nij soꞌ a.
23Ga̱a ne̱ guun cheꞌe̱ nij síí tucuꞌyón snana̱ Jesús nuchruj ra̱a̱ nij soꞌ ga̱ tuviꞌ nij soꞌ me nij soꞌ me síí quiꞌya̱j da̱nj man Jesús, rá nij soꞌ a.
Nataꞌ Jesús cheꞌé da̱j quiꞌya̱j níꞌ sese me rá níꞌ gu̱un chij níꞌ a
24Ga̱a ne̱ caꞌmii cunuꞌ cunuda̱nj nij síí tucuꞌyón snana̱ Jesús me nij soꞌ me síí gu̱un chij doj a. 25Ga̱a ne̱ cataj Jesús rihaan nij soꞌ a:
―Nij síí nica̱j suun rey uun chij rihaan nij yuvii̱ yaníj roꞌ, rii taꞌngaꞌ uxrá nij soꞌ rihaan tuviꞌ nij soꞌ, ne̱ tucuꞌnáj nii “síí nica̱j yuꞌunj man níꞌ” man nij soꞌ na̱nj á. 26Tza̱j ne̱ se̱ guun soj síí vaa da̱nj maꞌ. Ma̱an se tuviꞌ soj síí guun rá se vaa gu̱un chij soꞌ doj rihaan soj roꞌ, vaa cheꞌé gu̱un soꞌ síí noco̱ꞌ doj rihaan soj, ne̱ gu̱un soꞌ ase vaa ꞌo̱ se‑mo̱zó soj a. 27Dan me se me síí me síí uun chij doj, rá soj ga̱: síí anica̱j coꞌoo rihaan mesá naꞌ, ase síí ya̱nj rihaan mesá xa̱ꞌ. Veé síí ya̱nj rihaan mesá me síí uun chij doj, rá soj a. Tza̱j ne̱ nihánj me se va̱j ma̱ꞌán ꞌu̱nj scaꞌnúj nij soj, ne̱ a̱j guún ꞌu̱nj mozó rihaan soj vaa na̱nj ado̱nj.
28’Ne̱ xa̱ꞌ soj, tza̱j ne̱ nij soj me nij síí cachéé ga̱ ꞌu̱nj ga̱a ránꞌ ꞌu̱nj sayuun, 29ne̱ ase vaa cuneꞌ Réj Yaꞌanj manj se vaa gu̱un chij ꞌu̱nj roꞌ, da̱nj ga̱a̱ cune̱ꞌ ꞌu̱nj man soj cuano̱ 30se vaa ca̱yáán soj rihaan xrúún ꞌu̱nj chruun mesá asa̱ꞌ guun chij ma̱ꞌanj, ne̱ cha̱ soj ne̱ coꞌo̱ soj na ga̱ ꞌu̱nj ado̱nj. Ne̱ quita̱j soj chruun xlá sa̱ꞌ ndoꞌo, ne̱ caꞌne̱ꞌ soj cacunꞌ cheꞌé chuvi̱j nij xꞌneꞌ yuvii̱ israelitá ado̱nj ―taj Jesús rihaan nij síí tucuꞌyón snana̱ soꞌ a.
Cataj Jesús se vaa cata̱j Pedró se vaa né si̱j noco̱ꞌ man Jesús me soꞌ a
31Ga̱a ne̱ cataj Jesús rihaan síí cuꞌna̱j Simón Pedró a:
―Cu̱nó so̱ꞌ nana̱ nihánj caꞌmi̱j rihaan so̱ꞌ, Simón. ꞌO̱ se a̱j cachíín niꞌya̱j Síí Chre̱e rihaan Yaꞌanj se vaa caꞌve̱j rá Yaꞌanj quiꞌya̱j soꞌ sayuun man nij soj a. Dan me se ase vaa ꞌyaj nii man ꞌnúú trigó ga̱a tichinꞌ nii ꞌnúú trigó rihaan rcuaa roꞌ, da̱nj quiꞌya̱j Síí Chre̱e man soj, cheꞌé se guun rá soꞌ quiri̱ꞌ soj ado̱nj. 32Tza̱j ne̱ a̱j cachíín ni̱ꞌyáá ꞌu̱nj rihaan Yaꞌanj cheꞌé so̱ꞌ, se vaa se̱ caꞌneꞌ rá so̱ꞌ ga̱ suun amán rá niꞌya̱j manj a̱ maꞌ. Ga̱a ne̱ asa̱ꞌ nanica̱j nimán so̱ꞌ canoco̱ꞌ uún so̱ꞌ manj roꞌ, ga̱a ne̱ ra̱cuíj so̱ꞌ man nij tinúú so̱ꞌ se vaa cunu̱u sca̱ꞌ doj nimán nij soꞌ uún na̱nj á ―taj Jesús rihaan Simón Pedró a.
33Ga̱a ne̱ cataj soꞌ rihaan Jesús a:
―Tza̱j ne̱ a̱j caꞌnéé nimanj ꞌo̱ cache̱e̱ ꞌu̱nj ga̱ so̱ꞌ, Señor. Caꞌve̱e se caxri̱i̱ nii tagaꞌ mán so̱ꞌ caꞌve̱e se ticavi̱ꞌ nii mán so̱ꞌ caꞌve̱e se, tza̱j ne̱ se̱ tanáj xco̱ ꞌu̱nj mán so̱ꞌ maꞌ ―taj soꞌ rihaan Jesús a.
34Tza̱j ne̱ cataj Jesús rihaan Pedró a:
―Nihánj me cata̱j ꞌu̱nj rihaan so̱ꞌ da̱j qui̱ꞌyáá so̱ꞌ, Pedro. Neꞌén ꞌu̱nj se vaa asa̱ꞌ ataa cagua̱j taꞌloo nii̱ corá, ne̱ vaꞌnu̱j cata̱j so̱ꞌ se vaa ne neꞌén so̱ꞌ manj maꞌ ―taj Jesús rihaan Pedró a.
Cataj Jesús se vaa quira̱nꞌ nij síí tucuꞌyón snana̱ soꞌ sayuun a
35Ga̱a ne̱ cataj Jesús rihaan nij síí tucuꞌyón snana̱ soꞌ a:
―Ga̱a caꞌnéé ꞌu̱nj man soj caꞌmi̱i̱ natáj soj snana̱j rihaan nij yuvii̱ israelitá ne̱ taj nanj taj vitó nu̱u̱ saꞌanj taj canj taj nica̱j soj ga̱a caꞌanj soj, tza̱j ne̱ taj va̱j rasu̱u̱n cachiin man soj ga̱a caꞌanj soj, rá ꞌu̱nj a ―taj Jesús rihaan nij soꞌ a.
Ga̱a ne̱ cataj nij soꞌ a:
―Taj va̱j a̱ doj rasu̱u̱n ne cachi̱in man núj maꞌ ―taj nij soꞌ rihaan Jesús a.
36Ga̱a ne̱ cataj Jesús rihaan nij soꞌ a:
―Ya̱j me se sese vaa xnánj soj do̱ꞌ, se‑vito̱ soj do̱ꞌ, ne̱ ni̱caj soj caꞌa̱nj soj á. Ne̱ sese taj yan vaj neê espadá rihaan soj, ne̱ quira̱a̱n soj ꞌo̱ taneê soj neê espadá á. Ne̱ sese nuviꞌ saꞌanj rihaan ꞌo̱ nij soj, ne̱ vaa cheꞌé cutuꞌve̱e̱ soꞌ se‑ro̱to̱ soꞌ, ne̱ quira̱a̱n soꞌ neê espadá ado̱nj. 37ꞌO̱ se vaa nana̱ no̱ rihaan Danj Yaꞌanj taj a: “Cataj nii se vaa si̱j ꞌyaj cacunꞌ me soꞌ a”, taj Danj Yaꞌanj cheꞌé ꞌu̱nj, ne̱ vaa cheꞌé quisi̱j ya̱ nu̱ꞌ nana̱ cheꞌej a. ꞌO̱ se da̱j doj quisi̱j se vaa ꞌyáá ꞌu̱nj rihaan chumii̱ nihánj na̱nj ado̱nj ―taj Jesús rihaan nij soꞌ a.
38Ga̱a ne̱ cataj nij soꞌ rihaan Jesús a:
―Ni̱ꞌyaj so̱ꞌ á. Vaa vi̱j neê espadá rihaan níꞌ nihánj, Señor ―taj nij soꞌ a.
Ga̱a ne̱ cataj Jesús a:
―Veé da̱nj me tza̱j na̱nj á ―taj Jesús rihaan nij soꞌ a.
Caꞌanj Jesús Tacaan ma̱n Chruun Olivó ne̱ cachíín niꞌya̱j soꞌ rihaan Yaꞌanj a
39Ga̱a ne̱ cavii soꞌ rque chumanꞌ caꞌanj soꞌ tacaan cuꞌna̱j Tacaan ma̱n Chruun Olivó, nda̱a vaa uꞌyón ina̱nj soꞌ ꞌyaj soꞌ a. Ne̱ canocoꞌ nij síí tucuꞌyón snana̱ soꞌ rej xco̱ soꞌ a. 40Ne̱ ga̱a cuchiꞌ nij soꞌ rej yoꞌ, ne̱ cataj Jesús rihaan nij soꞌ a:
―Cachi̱nj niꞌya̱j soj rihaan Yaꞌanj se vaa ca̱ráán Yaꞌanj chrej rihaan Síí Chre̱e se̱ gaa na̱nj gu̱un rá soj quiꞌya̱j soj cacunꞌ quiꞌya̱j Síí Chre̱e á ―taj Jesús rihaan nij síí tucuꞌyón snana̱ soꞌ a.
41Ga̱a ne̱ naxuun soꞌ man soꞌ rihaan nij síí tucuꞌyón snana̱ soꞌ, ne̱ caꞌanj soꞌ rej yaníj do̱j, ne̱ cayáán ru̱j soꞌ, ne̱ cachíín niꞌya̱j soꞌ rihaan Yaꞌanj, 42ne̱ cataj soꞌ rihaan Yaꞌanj a:
―Sese caꞌve̱e, ne̱ ca̱ráán raꞌá so̱ꞌ xráj, se̱ gaa na̱nj quira̱nꞌ uxrá ꞌu̱nj sayuun maꞌ. Tza̱j ne̱ sese ma̱ꞌán so̱ꞌ me rá qui̱ránꞌ ꞌu̱nj sayuun, ne̱ qui̱ꞌyáá so̱ꞌ nda̱a vaa me rá ma̱ꞌán so̱ꞌ, ne̱ se̱ quiꞌyáá so̱ꞌ nda̱a vaa me rá ma̱ꞌanj maꞌ ―taj Jesús, cachíín niꞌya̱j soꞌ rihaan Yaꞌanj a.
43Ga̱a ne̱ curuviꞌ ꞌo̱ se‑mo̱zó Yaꞌanj cavii rej xta̱ꞌ rihaan soꞌ, ne̱ nariꞌ nucuaj nimán soꞌ, quiꞌyaj se‑mo̱zó Yaꞌanj yoꞌ a. 44Ne̱ nanó ndoꞌo rá nimán soꞌ, ne̱ nucua̱j ndoꞌo cachíín niꞌya̱j soꞌ rihaan Yaꞌanj, ne̱ cavii ndoꞌo nihaa̱ rihaan soꞌ, ne̱ ase vaa ton vaa nihaa̱ cavii rihaan soꞌ cayanj rihaan yoꞌóó a. 45Ne̱ canicunꞌ caya̱ soꞌ, ne̱ caꞌanj soꞌ rej ma̱n nij síí tucuꞌyón snana̱ soꞌ, tza̱j ne̱ queneꞌen soꞌ se vaa cotoj nu̱ꞌ nij soꞌ, cheꞌé se nanó ndoꞌo rá nij soꞌ a. 46Ga̱a ne̱ cataj Jesús rihaan nij soꞌ a:
―Me cheꞌé otoj soj ga̱. Na̱xuma̱a̱n soj cachi̱nj niꞌya̱j soj rihaan Yaꞌanj se̱ gaa na̱nj gu̱un rá soj quiꞌya̱j soj cacunꞌ quiꞌya̱j Síí Chre̱e á ―taj soꞌ rihaan nij síí tucuꞌyón snana̱ soꞌ a.
Taꞌaa nii man Jesús a
47Dan me se nicu̱nꞌ Jesús caꞌmii soꞌ, ne̱ nu̱ꞌ caꞌnaꞌ uxrá yuvii̱, ne̱ síí cuꞌna̱j Judas ꞌo̱ tuviꞌ chuvi̱j nij síí tucuꞌyón snana̱ Jesús me síí táá ya̱a̱n rihaan nij yuvii̱ a. Ne̱ nichrunꞌ Judas rihaan Jesús, cheꞌé rej cachro̱n tuꞌva̱ soꞌ xruu̱ Jesús a. 48Ga̱a ne̱ cataj Jesús rihaan Judas a:
―Ne chiha̱nꞌ uxrá ꞌyáá so̱ꞌ, se vaa tacuachén so̱ꞌ manj Si̱j Caꞌnéé Yaꞌanj Ni̱caj Yuꞌunj man Yuvii̱ ga̱a cachro̱n tu̱ꞌvá so̱ꞌ xruj, maan Judas ―taj soꞌ rihaan Judas a.
49Dan me se queneꞌen nij síí nicu̱nꞌ ga̱ Jesús da̱j quiꞌya̱j nij yuvii̱ man Jesús, ne̱ cheꞌé dan xnáꞌanj nij soꞌ man Jesús a:
―Go̱ꞌ núj neê espadá raa̱ nij soꞌ, rá so̱ꞌ naꞌ ―taj nij soꞌ rihaan Jesús a.
50Ne̱ ꞌo̱ nij soꞌ roꞌ, goꞌ neê espadá raa̱ se‑mo̱zó xrej ata̱ suun noco̱o doj, ne̱ güéj nu̱ꞌ xréé yoꞌ rej nuva̱ꞌ yoꞌ, quiꞌyaj soꞌ a. 51Ga̱a ne̱ cataj Jesús rihaan soꞌ a:
―Caꞌne̱ꞌ rá soj ga̱ suun ꞌyaj da̱nj á ―taj Jesús rihaan nij soꞌ a.
Ga̱a ne̱ cutaꞌ Jesús raꞌa Jesús rej quiranꞌ chiꞌii̱ xréé mozó yoꞌ, ne̱ ma̱an orá dan nahuun sa̱ꞌ xréé mozó yoꞌ, quiꞌyaj Jesús a. 52Xa̱ꞌ nij xrej ata̱ suun noco̱o do̱ꞌ, tanuu uun chij rihaan nij tanuu israelitá tumé nuvií do̱ꞌ, nij síí uun chij rihaan nij yuvii̱ israelitá do̱ꞌ, tza̱j ne̱ síí caꞌnaꞌ ta̱ꞌaa man Jesús me nij soꞌ, ne̱ cataj Jesús rihaan nij soꞌ a:
―Me cheꞌé ꞌnaꞌ neê espadá ꞌnaꞌ chruun ꞌnaꞌ ga̱ soj ga̱. Síí itu̱u̱ mé ꞌu̱nj, rá soj naꞌ. 53ꞌO̱ se da̱j a̱ güii yáán ꞌu̱nj ga̱ nij soj rihaan rej ya̱nj nuvií noco̱o, tza̱j ne̱ ne ta̱ꞌaa soj mán ꞌu̱nj maꞌ. Tza̱j ne̱ cuano̱ nihánj me orá ꞌyaj canaán soj, orá uun chij rej rmi̱ꞌ a ―taj Jesús rihaan nij soꞌ a.
Cataj Pedró se vaa né si̱j noco̱ꞌ man Jesús me soꞌ a
54Dan me se taꞌaa nij soꞌ man Jesús, ne̱ caꞌanj nica̱j nij soꞌ man Jesús rá veꞌ tucuá xrej ata̱ suun noco̱o doj, ne̱ ga̱nꞌ ga̱nꞌ canocoꞌ síí cuꞌna̱j Pedró rej xco̱ Jesús, ꞌnaꞌ soꞌ a. 55Dan me se naranꞌ nii yaꞌan rihaan veꞌ, ne̱ yáán tacuachriin ta̱ranꞌ nii rihaan yaꞌan, ne̱ yáán Pedró scaꞌnúj nij soꞌ a. 56Dan me se yáán soꞌ rej chuguu̱n yaꞌan rihaan nij tuviꞌ xrej, ne̱ queneꞌen ꞌo̱ mozó cha̱na̱ man soꞌ, ne̱ niꞌya̱j uxrá chana̱ yoꞌ man soꞌ a. Ga̱a ne̱ cataj mozó cha̱na̱ yoꞌ rihaan tuviꞌ noꞌ síí ma̱n ga̱ noꞌ a:
―Síí nihánj roꞌ, me ꞌo̱ síí cachéé ga̱ Jesús a ―taj chana̱ yoꞌ, niꞌya̱j yoꞌ man Pedró a.
57Ga̱a ne̱ cataj Pedró rihaan chana̱ yoꞌ a:
―Ne neꞌén ꞌu̱nj man soꞌ, maan nocoj ―taj soꞌ a.
58Ne̱ ꞌó orá nii me se queneꞌen ꞌó soꞌ man Pedró ne̱ cataj soꞌ a:
―ꞌO̱ nij síí chéé ga̱ soꞌ mé so̱ꞌ chugua̱nj ―taj soꞌ rihaan Pedró a.
―Taj maꞌ. Né si̱j chéé ga̱ soꞌ mé ꞌu̱nj, maan tinu̱j ―taj Pedró a.
59Dan me se cachén ꞌó orá uún, ga̱a ne̱ nucua̱j caꞌmii ꞌó soꞌ a:
―Ya̱ uxrá si̱j cachéé ga̱ Jesús me síí nihánj na̱nj ado̱nj. ꞌO̱ se si̱j cavii estadó Galilea me ro̱j soꞌ ga̱ Jesús chugua̱nj ―taj ꞌó soꞌ a.
60Ga̱a ne̱ cataj Pedró rihaan síí tuꞌva da̱nj a:
―Ne neꞌen uxraj me taj so̱ꞌ, maan tinu̱j ―taj soꞌ a.
Ne̱ dan me se nu̱ꞌ caꞌmii soꞌ da̱nj, ne̱ nu̱ꞌ caguáj taꞌloo a. 61Ga̱a ne̱ canica̱j Jesús Si̱j ꞌNi̱j Raꞌa man níꞌ, ne̱ niꞌya̱j soꞌ man Pedró, ga̱a ne̱ nanuj rá Pedró snana̱ soꞌ ga̱a cataj soꞌ rihaan Pedró a: “Neꞌén ꞌu̱nj se vaa asa̱ꞌ ataa cagua̱j taꞌloo nii̱ corá, ne̱ vaꞌnu̱j cata̱j so̱ꞌ se vaa ne neꞌén so̱ꞌ manj maꞌ”, cataj Síí ꞌNi̱j Raꞌa man níꞌ rihaan Pedró quii a. 62Ga̱a ne̱ curiha̱nj Pedró xeꞌ, ne̱ taꞌvee xru̱ꞌ soꞌ a.
Cutaꞌ nii cacunꞌ xráá Jesús a
63Ga̱a ne̱ nij síí taꞌaa man Jesús roꞌ, tihaꞌ ndoꞌo nij soꞌ man soꞌ, ne̱ goꞌ nij soꞌ xráá soꞌ a. 64Ne̱ ga̱a goꞌ nij soꞌ xráá soꞌ me se caráán nij soꞌ rihaan Jesús, ne̱ cataj nij soꞌ rihaan soꞌ a:
―Sese ya̱ síí nataꞌ snana̱ Yaꞌanj mé so̱ꞌ, ne̱ cata̱j so̱ꞌ rihaan núj me síí goꞌ mán so̱ꞌ á ―taj nij soꞌ a.
65Ne̱ queꞌe̱e̱ doj nana̱ nij aꞌmii uún nij soꞌ rihaan Jesús a.
66Ne̱ ga̱a ranga̱ꞌ me se cunuu chre̱ꞌ nij síí uun chij do̱ꞌ, nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, ne̱ caꞌanj nica̱j nij soꞌ man Jesús rihaan Xꞌneꞌ Nij Síí Ata̱ Suun Noco̱o Doj rihaan nij yuvii̱ israelitá a. Ga̱a ne̱ xnáꞌanj nij soꞌ man Jesús, ne̱ cataj nij soꞌ a:
67―Sese ya̱ Si̱j Caꞌnéé Yaꞌanj Ti̱nanii man Yuvii̱ rihaan Sayuun mé so̱ꞌ, rá so̱ꞌ, ne̱ cata̱j xnaꞌanj so̱ꞌ rihaan núj á ―taj nij soꞌ a.
Ga̱a ne̱ cataj Jesús rihaan nij soꞌ a:
―Caꞌve̱e se cata̱j xnaꞌanj ꞌu̱nj rihaan soj, tza̱j ne̱ se̱ cuchumán rá soj snana̱j maꞌ. 68Ne̱ sese xna̱ꞌanj ꞌu̱nj ꞌo̱ nana̱ man soj, tza̱j ne̱ se̱ cataj xnaꞌanj soj rihanj maꞌ. 69Tza̱j ne̱ rej rihaan níꞌ me se xa̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, tza̱j ne̱ quita̱j ꞌu̱nj rej nuva̱ꞌ Yaꞌanj ne̱ ni̱caj ꞌu̱nj se‑nucua̱j soꞌ gu̱un chij ꞌu̱nj a ―taj Jesús rihaan nij soꞌ a.
70Ga̱a ne̱ xnáꞌanj cunuda̱nj nij soꞌ man Jesús, cataj nij soꞌ a:
―Cheꞌé dan me Taꞌni̱j Yaꞌanj mé so̱ꞌ, rá so̱ꞌ naꞌ ―taj nij soꞌ rihaan soꞌ a.
Ga̱a ne̱ cataj Jesús rihaan nij soꞌ a:
―Veé ya̱ nda̱a vaa cataj soj roꞌ, veé da̱nj vaa na̱nj á ―taj soꞌ a.
71Ga̱a ne̱ cataj nij soꞌ rihaan tuviꞌ nij soꞌ a:
―Se̱ cachiin doj síí caꞌna̱ꞌ cata̱j xnaꞌanj rihaan níꞌ cheꞌé cacunꞌ tumé síí nihánj a̱ maꞌ. ꞌO̱ se maꞌa̱n níꞌ me síí cuno da̱j tuꞌva soꞌ nihánj na̱nj ado̱nj ―taj nij soꞌ rihaan tuviꞌ nij soꞌ a.
Currently Selected:
San Lucas 22: trc
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc. 2024 segunda versión electrónica