San Lucas 23
23
Caꞌmii síí cuꞌna̱j Pilató ga̱ Jesús a
1Dan me se queꞌe̱e̱ nij soꞌ, ne̱ naxuma̱a̱n ta̱ranꞌ nij soꞌ, ne̱ caꞌanj nica̱j nij soꞌ man Jesús rihaan síí cuꞌna̱j Pilató a. 2Ga̱a ne̱ cutaꞌ nij soꞌ cacunꞌ xráá soꞌ rihaan Pilató, ne̱ cataj nij soꞌ rihaan Pilató a:
―Síí nihánj roꞌ, me síí tucuꞌyón tucuáán ne̱ rihaan tuviꞌ núj si̱j israelitá a. Ne̱ cataj soꞌ se vaa se̱ goꞌ yuvii̱ impuestó rihaan síí nica̱j suun emperador cuꞌna̱j César, ne̱ taj soꞌ se vaa Si̱j Caꞌnéé Yaꞌanj gu̱un síí nica̱j suun rey me maꞌa̱n soꞌ, taj soꞌ ado̱nj ―taj nij soꞌ rihaan Pilató, niꞌya̱j nij soꞌ man Jesús a.
3Ga̱a ne̱ xnáꞌanj Pilató man Jesús a:
―So̱ꞌ me síí nica̱j suun rey uun chij rihaan nij yuvii̱ israelitá naꞌ ―taj soꞌ, xnáꞌanj soꞌ man Jesús a.
―Veé ya̱ nda̱a vaa cataj so̱ꞌ roꞌ, veé da̱nj vaa na̱nj á ―taj Jesús rihaan soꞌ a.
4Ga̱a ne̱ cataj Pilató rihaan nij xrej ata̱ suun noco̱o do̱ꞌ, rihaan nij yuvii̱ do̱ꞌ a:
―Nuviꞌ cacunꞌ tumé síí nihánj narij maꞌ ―taj soꞌ a.
5Tza̱j ne̱ nucua̱j doj caꞌmii nij soꞌ, cataj nij soꞌ a:
―Tza̱j ne̱ tinachej raa̱ soꞌ man nij yuvii̱ na̱nj á. Ne̱ va̱j soꞌ tucuꞌyón soꞌ snana̱ soꞌ nu̱ꞌ estadó Judea nihánj a. Guun cheꞌe̱ soꞌ tucuꞌyón soꞌ snana̱ soꞌ estadó Galilea, ne̱ ꞌnaꞌ soꞌ nda̱a nihánj tucuꞌyón soꞌ na̱nj ado̱nj ―taj nij soꞌ rihaan Pilató a.
6Dan me se cuno Pilató snana̱ nij soꞌ, ga̱a ne̱ xnáꞌanj Pilató man nij soꞌ sese si̱j cavii estadó Galilea me Jesús a. 7Ga̱a ne̱ queneꞌen soꞌ se vaa ya̱ cavii Jesús estadó Galilea rej uun chij síí cuꞌna̱j Herodes a. Cheꞌé dan cataj soꞌ se vaa caꞌa̱nj ni̱caj nij soꞌ man Jesús rihaan Herodes a. ꞌO̱ se güii dan me se nuû maꞌa̱n Herodes chumanꞌ Jerusalén a.
Caꞌmii síí cuꞌna̱j Herodes ga̱ Jesús a
8Ga̱a queneꞌen síí cuꞌna̱j Herodes man Jesús, ga̱a ne̱ guun niha̱ꞌ uxrá rá soꞌ a. ꞌO̱ se asi̱j rque̱ ndoꞌo me se guun rá soꞌ queneꞌe̱n soꞌ man Jesús, cheꞌé se a̱j cuchiꞌ ndoꞌo nana̱ rihaan soꞌ da̱j ꞌyaj Jesús a. Ne̱ guun rá soꞌ se vaa quiꞌya̱j Jesús ꞌo̱ suun sa̱ꞌ noco̱o ni̱ꞌyaj soꞌ a. 9Dan me se xnáꞌanj ndoꞌo soꞌ nana̱ man Jesús, tza̱j ne̱ a̱ ꞌó nana̱ ne cata̱j Jesús rihaan soꞌ a̱ maꞌ. 10Tza̱j ne̱ nicu̱nꞌ nij xrej ata̱ suun noco̱o nicu̱nꞌ nij síí naquiꞌyaj cu̱u stucua̱nj Moisés nicu̱nꞌ, ne̱ nucua̱j ndoꞌo cutaꞌ nij soꞌ cacunꞌ xráá Jesús a. 11Ga̱a ne̱ nachriꞌ Herodes do̱ꞌ, nij tanuu nu̱u̱ rihaan soꞌ do̱ꞌ, niꞌya̱j nij soꞌ man Jesús, ne̱ caꞌngaꞌ naco̱o̱ nij soꞌ niꞌya̱j nij soꞌ man Jesús a. Ga̱a ne̱ naꞌnéé nij soꞌ yatzíj sedá man Jesús quiꞌyaj Herodes, ne̱ veé dan naꞌnéé uún Herodes man soꞌ rihaan Pilató a. 12Ne̱ güii dan me se guun cheꞌe̱ Herodes ga̱ Pilató naꞌmii sa̱ꞌ ro̱j soꞌ ga̱ tuviꞌ ro̱j soꞌ a. ꞌO̱ se asi̱j rque̱ doj me se si̱j ta̱j riꞌyunj man tuviꞌ me ro̱j soꞌ a.
Cataj Pilató se vaa cavi̱ꞌ Jesús rihaan rcutze̱ a
13Dan me se canacúún síí cuꞌna̱j Pilató man nij xrej ata̱ suun noco̱o do̱ꞌ, man nij síí uun chij rihaan nij yuvii̱ israelitá do̱ꞌ, man maꞌa̱n nij yuvii̱ do̱ꞌ, se vaa caꞌna̱ꞌ nij soꞌ cunu̱u chre̱ꞌ nij soꞌ rihaan soꞌ a. 14Ga̱a ne̱ cataj Pilató rihaan nu̱ꞌ nij yuvii̱ a:
―Nica̱j soj man snóꞌo nihánj caꞌnaꞌ soj rihanj, ne̱ cataj soj se vaa soꞌ me síí ꞌyaj se vaa tucuáá yuvii̱ rihaan gobiernó a. Ne̱ ya̱ xnáꞌanj ꞌu̱nj man soꞌ cuno ta̱ranꞌ soj da̱j ꞌyaj soꞌ, ne̱ xa̱ꞌ cacunꞌ cutaꞌ soj xráá soꞌ, tza̱j ne̱ taj va̱j cacunꞌ vaa da̱nj tumé síí nihánj narij maꞌ. 15Ne̱ síí cuꞌna̱j Herodes roꞌ, ne nari̱ꞌ soꞌ cacunꞌ tumé síí nihánj a̱ maꞌ. Ma̱an se naꞌnéé u̱u̱n Herodes man síí nihánj rihaan níꞌ na̱nj á. Ne̱ xca̱j soj cuentá se vaa taj cacunꞌ quiꞌyaj síí nihánj, ne̱ ne nó xcúún soꞌ cavi̱ꞌ soꞌ maꞌ. 16Cheꞌé dan qui̱ꞌyáj do̱j sayuun man soꞌ, ne̱ caꞌa̱nj u̱u̱n soꞌ, quiꞌya̱j níꞌ na̱nj á ―taj Pilató rihaan ta̱ranꞌ nij yuvii̱ a.
17ꞌO̱ se ma̱an güii dan me se da̱j a̱ Chaꞌanj Pascuá naꞌnéé nij soꞌ man ꞌo̱ yuvii̱ ꞌni̱j tagaꞌ a.
18Ga̱a ne̱ caguáj cunuda̱nj nij soꞌ, cataj nij soꞌ a:
―Ticavi̱ꞌ soj man síí nihánj ei. Quiri̱i̱ so̱ꞌ man síí cuꞌna̱j Barrabás tagaꞌ cheꞌé núj á ―taj nij soꞌ, caguáj nij soꞌ rihaan Pilató a.
19Ne̱ xa̱ꞌ Barrabás, tza̱j ne̱ tucuáá soꞌ ga̱ taꞌa̱j nij yuvii̱ ma̱n Jerusalén rihaan tucuá suun gobiernó, ne̱ ticaviꞌ soꞌ man yuvii̱, ne̱ cheꞌé dan caxríj nii tagaꞌ man soꞌ a. 20Ga̱a ne̱ caꞌmii uún Pilató rihaan nij yuvii̱ a. ꞌO̱ se guun rá soꞌ quiri̱i̱ soꞌ man Jesús caꞌa̱nj u̱u̱n Jesús a. 21Tza̱j ne̱ ꞌo̱ caguáj nij yuvii̱, cataj nij soꞌ a:
―Cavi̱ꞌ soꞌ rihaan rcutze̱ qui̱ꞌyáá so̱ꞌ á. Cavi̱ꞌ soꞌ rihaan rcutze̱ qui̱ꞌyáá so̱ꞌ á ―taj nij yuvii̱, caguáj nij yuvii̱ a.
22Ga̱a ne̱ quisíj vaꞌnu̱j cataj soꞌ rihaan nij yuvii̱ a:
―Tza̱j ne̱ taj va̱j se chiꞌi̱i̱ quiꞌyaj soꞌ maꞌ. Taj va̱j a̱ ꞌó cacunꞌ tumé soꞌ naríꞌ ꞌu̱nj se vaa no̱ xcúún soꞌ cavi̱ꞌ soꞌ maꞌ. Dan me se qui̱ꞌyáj do̱j sayuun man soꞌ, ne̱ caꞌa̱nj u̱u̱n soꞌ qui̱ꞌyáj na̱nj á ―taj uún Pilató rihaan nij yuvii̱ a.
23Tza̱j ne̱ caguáj ndoꞌo nij yuvii̱, ne̱ uxrá caꞌneꞌ nij yuvii̱ suun rihaan Pilató se vaa ya̱ cavi̱ꞌ Jesús rihaan rcutze̱ quiꞌya̱j soꞌ, ne̱ quiꞌyaj canaán snana̱ nij yuvii̱ yoꞌ a. 24Ga̱a ne̱ guun ya̱ rá Pilató se vaa quiꞌya̱j soꞌ nda̱a vaa cataj nij yuvii̱ rihaan soꞌ a. 25Xa̱ꞌ síí ꞌni̱j tagaꞌ tumé cacunꞌ tucuáá rihaan tucuá suun gobiernó do̱ꞌ, ticaviꞌ man yuvii̱ do̱ꞌ, tza̱j ne̱ quirii Pilató man soꞌ ne̱ caꞌanj u̱u̱n soꞌ, nda̱a vaa cataj nij yuvii̱ a. Ne̱ Jesús roꞌ, caꞌvej rá Pilató quira̱nꞌ soꞌ nda̱a vaa guun rá nij yuvii̱ quira̱nꞌ soꞌ na̱nj ado̱nj.
Cachrón nij tanuu man Jesús rihaan rcutze̱ a
26Dan me se nica̱j nij tanuu man Jesús caꞌanj nij soꞌ, ga̱a ne̱ taꞌaa nij soꞌ man ꞌo̱ síí cuꞌna̱j Simón síí cavii chumanꞌ Cirene ga̱a ꞌnaꞌ nique soꞌ rej tacaan, ne̱ cutaꞌ nij tanuu rcutze̱ xráá soꞌ ata̱ soꞌ rcutze̱ ꞌnaꞌ soꞌ rej xco̱ Jesús a. 27Ne̱ nocoꞌ ri̱i̱ uxrá yuvii̱ man Jesús, ne̱ taꞌa̱j nij yuvii̱ me chana̱, ne̱ dan me se goꞌ nij chana̱ se‑cuxru̱ꞌ nij noꞌ rucua̱a̱ nij noꞌ, ne̱ taꞌvee ndoꞌo nij chana̱ niꞌya̱j nij chana̱ man Jesús a. 28Ga̱a ne̱ canica̱j Jesús, cataj Jesús rihaan nij chana̱ yoꞌ a:
―Cuno̱ soj cha̱na̱ taꞌni̱j chumanꞌ Jerusalén caꞌmi̱j á. Se̱ taꞌvee nij soj ni̱ꞌyaj soj mán ꞌu̱nj a̱ maꞌ. Tana̱nj taꞌve̱e soj ni̱ꞌyaj soj man maꞌa̱n soj do̱ꞌ, man taꞌníí soj do̱ꞌ á. 29Xca̱j soj cuentá se vaa vaa güii cata̱j nii se vaa a̱j cavii sa̱ꞌ doj nij chana̱ itu̱un do̱ꞌ, nij chana̱ ne nari̱ꞌ neꞌej do̱ꞌ, nij chana̱ ne tucutzi̱i neꞌej do̱ꞌ a. 30ꞌO̱ se güii dan me se gu̱un cheꞌe̱ yuvii̱ cata̱j yuvii̱ rihaan nij quij se vaa cane̱e̱ nij quij ne̱ ca̱ráán nij quij xráá maꞌa̱n nij soꞌ, ne̱ cata̱j nij yuvii̱ rihaan tacaan se vaa caxri̱i̱ yuve̱ yoꞌ man nij soꞌ a. 31ꞌO̱ se ase vaa chruun maree̱ vaa iꞌna̱ꞌ vaa ꞌu̱nj nihánj, tza̱j ne̱ da̱nj na̱nj ticavi̱ꞌ nii manj a. Táá a̱ nij síí ya̱nj chumanꞌ Jerusalén, ne̱ ase vaa chruun naco̱o̱ caviꞌ vaa nij síí tumé cacunꞌ ya̱nj chumanꞌ Jerusalén, ne̱ cheꞌé dan chiꞌi̱i̱ uxrá doj quira̱nꞌ nij soꞌ na̱nj ado̱nj ―taj Jesús rihaan nij chana̱ a.
32Ne̱ nica̱j nij tanuu man yavíj síí tumé cacunꞌ, caꞌanj nij soꞌ rej cavi̱ꞌ ro̱j soꞌ ga̱ Jesús a. 33Ne̱ ga̱a cuchiꞌ ta̱ranꞌ nij soꞌ rej cuꞌna̱j Tacaan Cúú Yave̱ Xnangá, ne̱ cachrón nij tanuu man Jesús ga̱ ro̱j síí tumé cacunꞌ rihaan vaꞌnu̱j rcutze̱, ne̱ dan me se ꞌo̱ soꞌ roꞌ, cachrón nij soꞌ rej nuva̱ꞌ Jesús, ne̱ ꞌó soꞌ roꞌ, cachrón nij soꞌ rej nichru̱un Jesús a. 34Ga̱a ne̱ cachíín niꞌya̱j Jesús rihaan Yaꞌanj, cataj soꞌ a:
―Ti̱navíí so̱ꞌ cacunꞌ tumé nij soꞌ, Ata̱j Chij. ꞌO̱ se ne neꞌen nij soꞌ da̱j ꞌyaj nij soꞌ maꞌ ―taj soꞌ, cachíín niꞌya̱j soꞌ rihaan Rej soꞌ Yaꞌanj a.
Ga̱a ne̱ tico tixaj nij tanuu cheꞌé saga̱nꞌ Jesús a. 35Ne̱ canicunꞌ queꞌe̱e̱ yuvii̱ niꞌya̱j da̱j quira̱nꞌ Jesús a. Dan me se caꞌngaꞌ naco̱o̱ nij síí uun chij, cataj nij soꞌ a:
―Tinanii soꞌ man ꞌó yuvii̱ rihaan sayuun, rá soꞌ á. Ti̱nanii soꞌ man maꞌa̱n soꞌ ya̱j vi̱j. Sese si̱j narii Yaꞌanj me soꞌ do̱ꞌ, sese Si̱j Caꞌnéé Yaꞌanj Ti̱nanii man Yuvii̱ rihaan Sayuun me soꞌ do̱ꞌ, ne̱ caꞌve̱e ti̱nanii soꞌ man maꞌa̱n soꞌ a ―taj nij síí uun chij niꞌya̱j nij soꞌ man Jesús a.
36Ne̱ nij tanuu me se caꞌngaꞌ naco̱o̱ uún nij tanuu niꞌya̱j nij tanuu man Jesús, ne̱ ruꞌmaan nij tanuu na vinó yu̱u̱ tuꞌva Jesús, 37ne̱ cataj nij soꞌ a:
―Sese so̱ꞌ me síí nica̱j suun rey uun chij rihaan nij yuvii̱ israelitá, ne̱ ti̱nanii so̱ꞌ man ma̱ꞌán so̱ꞌ rihaan sayuun ya̱j vi̱j ―taj nij tanuu rihaan Jesús a.
38Ne̱ vaa rcuchra̱ꞌ nó rihaan rcutze̱ yoꞌ, ne̱ nó nana̱ rihaan rcuchra̱ꞌ yoꞌ a: “Si̱j nica̱j suun rey uun chij rihaan nij yuvii̱ israelitá me síí nihánj a”, taj nana̱ yoꞌ a.
39Ne̱ ꞌo̱ ro̱j síí tumé cacunꞌ noco̱ꞌ rihaan rcutze̱ rej xꞌnu̱j Jesús roꞌ, nij caꞌmii soꞌ rihaan Jesús, cataj soꞌ a:
―Si̱j Caꞌnéé Yaꞌanj Ti̱nanii man Yuvii̱ rihaan Sayuun mé so̱ꞌ, rá so̱ꞌ naꞌ. Me cheꞌé ne tinanii so̱ꞌ man ta̱ranꞌ níꞌ ga̱ ―taj soꞌ rihaan Jesús a.
40Tza̱j ne̱ ꞌó síí tumé cacunꞌ roꞌ, cataj soꞌ rihaan tuviꞌ soꞌ a:
―Nihánj me se cuya̱a̱n vaa sayuun ranꞌ níꞌ ga̱ sayuun ranꞌ síí nihánj na̱nj á. Ne̱ me cheꞌé ne chuꞌvíꞌ so̱ꞌ a̱ doj niꞌya̱j so̱ꞌ Yaꞌanj ga̱. 41Dan me se xa̱ꞌ níꞌ, tza̱j ne̱ vaa cheꞌé cavi̱ꞌ níꞌ, ne̱ ranꞌ níꞌ sayuun cheꞌé cacunꞌ tumé níꞌ a. Tza̱j ne̱ síí nihánj me se taj va̱j a̱ doj se chiꞌi̱i̱ quiꞌyaj síí nihánj a̱ maꞌ ―taj ꞌó síí tumé cacunꞌ yoꞌ rihaan tuviꞌ soꞌ a.
42Ga̱a ne̱ cataj soꞌ rihaan Jesús a:
―Nanu̱j rá so̱ꞌ ra̱cuíj so̱ꞌ manj, asa̱ꞌ guun cheꞌe̱ so̱ꞌ guun chij so̱ꞌ á ―taj soꞌ rihaan Jesús a.
43Ga̱a ne̱ cataj Jesús rihaan soꞌ a:
―Ya̱ ya̱ cata̱j xnaꞌanj ꞌu̱nj rihaan so̱ꞌ cuano̱ se vaa güii cuanꞌ me se ca̱yáán so̱ꞌ ga̱ ꞌu̱nj rej niꞌndaj ya̱ veꞌé vaa ado̱nj ―taj Jesús rihaan soꞌ a.
44Veé dan, ne̱ caxu̱j me yoꞌ, ne̱ guun rmi̱ꞌ nu̱ꞌ rihaan yoꞌóó nda̱a quisíj agaꞌ vaꞌnu̱j rej anocoꞌ güii a. 45Ne̱ guun rmi̱ꞌ rihaan güii, ne̱ sinꞌ nu̱ꞌ yatzíj mantá cortiná noco̱ꞌ rá nuvií noco̱o a. 46Ga̱a ne̱ nucua̱j ndoꞌo caguáj Jesús, cataj soꞌ a:
―Naca̱j so̱ꞌ nimanj, Ata̱j Chij ―taj soꞌ a.
Ne̱ veé dan caviꞌ soꞌ a.
47Dan me se queneꞌen tanuu capitán romanó ꞌni̱j raꞌa cientó tanuu se vaa guun, ga̱a ne̱ veꞌé uxrá caꞌmii soꞌ cheꞌé Yaꞌanj, ne̱ cataj soꞌ a:
―Xa̱ꞌ síí nihánj, tza̱j ne̱ ya̱ ya̱ si̱j sa̱ꞌ me soꞌ na̱nj á ―taj tanuu capitán yoꞌ niꞌya̱j soꞌ man Jesús a.
48Dan me se queneꞌen ta̱ranꞌ nij yuvii̱ cunuu chre̱ꞌ rej yoꞌ se vaa guun, ga̱a ne̱ goꞌ nij soꞌ se‑cuxru̱ꞌ nij soꞌ rucua̱a̱ nij soꞌ cheꞌé se nanó ndoꞌo rá nij soꞌ a. Ga̱a ne̱ canica̱j nij soꞌ caꞌanj nij soꞌ chumanꞌ a. 49Ne̱ canicunꞌ cunuda̱nj nij tuviꞌ Jesús rej ga̱nꞌ doj, ne̱ taꞌa̱j nij soꞌ me chana̱ cuno snana̱ Jesús asi̱j cavii Jesús estadó Galilea a. Ne̱ niꞌya̱j ta̱ranꞌ nij soꞌ se vaa guun a.
Cachinꞌ nii man Jesús a
50Vaa ꞌo̱ síí cuꞌna̱j José, ne̱ síí sa̱ꞌ do̱ꞌ, síí nica̱ nimán do̱ꞌ, me soꞌ, ne̱ síí cavii chumanꞌ Arimatea ꞌo̱ chumanꞌ na̱j estadó Judea me soꞌ a. Ne̱ ꞌo̱ tuviꞌ Xꞌneꞌ Nij Síí Ata̱ Suun Noco̱o Doj rihaan nij yuvii̱ israelitá me soꞌ a. 51Ne̱ síí naꞌvi̱j gu̱un chij Yaꞌanj me uún soꞌ, ne̱ cheꞌé dan ne vaa rá soꞌ da̱j se vaa rá ꞌó nij síí uun chij rihaan nij yuvii̱ israelitá do̱ꞌ, da̱j se vaa quiꞌyaj nij soꞌ do̱ꞌ maꞌ.
52Dan me se caꞌanj soꞌ rihaan síí cuꞌna̱j Pilató, ne̱ cachíín niꞌya̱j soꞌ rihaan Pilató se vaa caꞌve̱j rá Pilató cachi̱nꞌ soꞌ man Jesús a. Dan me se caꞌvej rá Pilató, 53ga̱a ne̱ caꞌanj José, tinanij soꞌ man Jesús, ne̱ nacutáj soꞌ yatzíj mantá cúú man Jesús, ne̱ caxríj soꞌ man cúú man Jesús rque yuꞌuj yuvej rej nuviꞌ a̱ ꞌó xnangá naj a. 54Veé da̱nj quiꞌyaj nij soꞌ güii ꞌyaj chuvi̱i nij yuvii̱ israelitá cheꞌé güii nara̱a̱n rá nij soꞌ, ne̱ veé da̱nj quisíj güii naránj rá nij soꞌ a.
55Ne̱ canocoꞌ nij chana̱ cavii estadó Galilea ga̱ Jesús rej xco̱ José, ne̱ queneꞌen nij chana̱ yuꞌuj rej caxríj José cúú man Jesús do̱ꞌ, da̱j vaa cuchruj José cúú xnangá man Jesús do̱ꞌ a. 56Ga̱a ne̱ canica̱j nij chana̱ rej aranꞌ nij noꞌ, ne̱ quiꞌyaj chuvi̱i nij chana̱ yoꞌóó gunꞌ da̱j do̱ꞌ, squíí cuꞌna̱j “mirra” do̱ꞌ, caxri̱i̱ nij chana̱ man Jesús rá nij chana̱ a. Dan me se maꞌa̱n güii naránj rá nij yuvii̱ israelitá me se naránj rá nij chana̱ nda̱a vaa taj suun caꞌneꞌ Moisés a.
Currently Selected:
San Lucas 23: trc
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc. 2024 segunda versión electrónica