iZenzo 10:24-48

Ngengomsomnye bangena eKesareya. Waye ke uKorneli ebalindile; wayebizele ndawonye imizalwane yakhe, nezihlobo ezisondeleyo. Uthe ke akungena uPetros, uKorneli wamhlangabeza, wawa ezinyaweni zakhe, waqubuda kuye. uPetros ke wamvusa, esithi: “Phakama! nam ngokwam ndingumntu. Wangena ethetha naye, wabafumana bebuthelene bebaninzi; Uthe ke kubo, Niyazi kakuhle nina, ukuba akusesikweni ukuthi indoda engumYuda inamathele isondele kowolunye uhlanga; ke yena uThixo undibonisile, ukuba ndingabizi mntu ngokuthi uyinqambi, ungongcolileyo. Kungoko ke ndizileyo ndingaphikanga ndakubizwa. Ndiyabuza ngoko, ukuba nindibize ngandawoni na? uKorneli wathi, Kuse kuntsuku ne ndizila ukudla, kwada kwaleli lixa lemini. Ngelixa lesithoba ke bendithandaza endlwini yam, kwesuka kwathi gqi indoda, yema phambi kwam, inengubo eqaqambileyo; Yathi, Korneli, umthandazo wakho uviwe, namalizo akho akhunjulwe phambi koThixo. Thumela ngoko eYopa, ubize eze uSimon, ogama limbi linguPetros; yena ulundwendwe endlwini kaSimon, umsuki wezikhumba ngaselwandle; oya kuthi akufika athethe nawe. Ndithumele ngoko kwaoko kuwe; wenze kakuhle ngokufika kwakho. Ke ngoko sikho sonke apha phambi koThixo, ukuze sive zonke izinto ozimiselweyo nguThixo. Wawuvula ke uPetros umlomo wakhe, wathi, Ndiyaqiqa okwenyaniso ukuba uThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye. Ilizwi elo walithumelayo koonyana bakaSirayeli, eshumayela iindaba ezilungileyo zoxolo ngoYesu Kristu, (nguye iNkosi yabo bonke); Elo lizwi lavakala kulo lonke elakwaJuda, elaqalwa kwelaseGalili, emva kobhaptizo awayelushumayela ngoYohane: okokuba uThixo wamthambisa njani uYesu waseNazarete ngoMoya oyiNgcwele nangamandla, owatyhutyha ilizwe, esenza okulungileyo, ephilisa bonke ababecinezelwe nguMtyholi; ngokuba uThixo ubenaye. Thina singamangqina azo zonke izinto awazenzayo ezweni lamaYuda, kwanaseYerusalem; abambulalayo, bamxhoma emthini; Lowo uThixo wamvusa ngomhla wesithathu, wambeka ekuhleni; kungekhona kubo bonke abantu, kodwa kumangqina awayenyulwe ngenxa engaphambili nguThixo: kuthi ke thina, sadlayo sasela naye emveni kokuvuka kwakhe kwabafileyo. Wasiyalela ke, ukuba sishumayele ebantwini, singqine ukuba yena nguye omisiweyo nguThixo, ukuba abe ngumgwebi wabaphilileyo nabafileyo. Ngaye bonke abaprofeti bangqina ngaye ukuba ngegama lakhe bonke abakholwayo kuye bofumana uxolelo lwezono. Kwathi, esathetha uPetros la mazwi, wasuka wabawela uMoya oyiNgcwele bonke ababeliva ilizwi. Bamangaliswa ke abolwaluko, ababeze noPetros, ngokuba isipho soMoya oyiNgcwele sathululwa naphezu kweentlanga; kuba aziva zithetha ngalwimi zimbi, zimenza mkhulu uThixo. Waphendula ke uPetros wathi, Kukho unako yini na ukuthintela amanzi, ukuba bangabhaptizwa aba bamamkeleyo uMoya oyiNgcwele, kwanjengathi nje? Waza ke wabayalela ukuba babhaptizwe egameni leNkosi. Bamcela ngoko ukuba akhe ahlale iintsuku ezithile.