प्रेरितों के काम 4
4
पतरस एठा यूहन्ना गा जेलेन केखेट
1जब पतरस एठा यूहन्ना कुरकू टे इनी मंडी लक्के डा, मेटे यहूदी याजक एठा यरूशलेम गा मंदिर गा मुख्या एठा सदूकी कुरकू दिया लिंजेन खावलातिंजे। 2दिकु भेबाव खिजोएन कि पतरस एठा यूहन्ना यीशु गा बारेन इथू डा एठा कुरकू के इथू डा कि जो गोएन होय परमेश्वर दिकुके डाबोलटे जीटाकुवा। जैसा डीचनी यीशु के गोएन मिठाच जाटे जीटाकेनेच। 3दिकुनी दिकुके जेलेन येंडाटे दूसरा दिन टाएन हावालत गेन डोकेकु चोयाकी सिंगुरूपजे डा। 4पेनो वचन गा आजोम मिंकू तलाटे घोनेचकुनी यीशु लिंजेन विश्वास डोके एठा दिकुगा गिनती नी मेटे देटेन कुल बेल्लाटे अंदजोटे मोनाई हजार कोरोकु गा डा जो यीशु गेन विश्वास दडामिंकू आरोएन।
पतरस एठा यूहन्ना यहूदी चावळी गा सम्मान
5दूसरा दिन दिकुगा अगुवाकु, यहूदी जुना सनाकु एठा मूसा गा नियम इथूमिंकू यरूशलेम शहर गेन घोलाएन। 6डी कुरकू जो चावळी गेन बेल्लाके डा, दिकु तलान हन्ना एठा कैफा एठा यूहन्ना एठा सिकन्दर एठा जोभी खाटयाजक गा उरामिंकू डा। सेबाईकु देटेन घोलाएन होय। 7पतरस एठा यूहन्ना तलान टेंगेंटे कोकाम्बरा लज्जे, “इनी कोरो के ससाजा घल्जी आपेनी तुनी शक्ती एठा हाक गा इस्तमाल डाके?” 8मेटे पतरस नी पवित्र आत्मा गेन भेट्टिटे यहूदी जुना सनाकु टे मंडीके, 9“हे कुरकू गा मुख्याकु एठा जुना सनाकु, आलेनी लोकोम्के कोरो गा भलाई डाके होय एठा टैंज आलेटे कोकाम्बरा लक्के होय कि देटेन टोनोगो साजाएन। 10इनिघल्जी नका आपे सेबाईकु एठा सेबाई इस्राएली कुरकू चिनायाकी कि येटेन नासरत पूरा गा यीशु मसीह गा जीमू टे डाके मेना होय। डीका यीशु के आपे कुरकू नी क्रूस लिंजेन पेळेच्केनेच, पेनो परमेश्वर नी गोएन मिठाच जाटे जीटाकेनेच। एठा टैंज दियागा का जीमू गा द्वारा इनी कोरो आपेगा सम्मान भला सजाका टेंगेनके होय। 11मसीह यीशु डीका चट्टान होय, डीचके आपे राजमिस्री कुनी बेकार मेंके लेकिन देटेन पैय्या गा ईटा गा घोटा आरोएन। 12यीशु गा अलावा तुनिका दूसरा गा द्वारा उध्दार बाने। चोयाकी बदळा गा इटान कुरकून एठा तुनिका दूसरा जीमू बान जिडुका मेना, डेगा उध्दार द्वारा आलेन घाटायु होना।”
यीशु गा जीमू गा घल्जी चेलाकूके धमकी
13जब दिकुनी पतरस एठा यूहन्ना गा हिम्मत डोके, एठा इनी चिनायेकी इनकींज आनपाळ एठा साधराण कोरो किंज होय, मेटे अचम्बो डाके। डाबोलटे चिनायेकिंज कि इनकींज यीशु गा सेंग्गोन थंदळके होय। 14पेनो डी कोरो के जो सजाएन डा, पतरस एठा यूहन्ना गा सेंग्गोन टेंगेंटे धोटे, चावळी अगुवाकु दिकु खिलाफबेन चोचकाभी बान मंडीडुका। 15पेनो दिकुके खाटसभा टे बल्लान सेने गा हुकूम जीटे दिकु इकुका बिचार लज्जे मेना, 16“आले इनी कोरो गा गेल्ला चोच डाए सकतावा? चोयाकी यरूशलेम शहर गा मेरान सेबाई थंदळ मिंकू लिंजेन ओटके होय, कि इंकुगा द्वारा म्या पक्काटे डाऊ लक्के चिन्हा टिपीके होय। आले दियागा इन्कार बान दडा। 17पेनो कुरकून इनी खाबोर के येठाभी ठायका फैलातिंज डाए डुका, डीच दिकुके धमकातिंजकु डा, कि डीच इनी जीमू टे डाबोलटे तुनिका कोरो टे बातो बाकी होना।” 18मेटे पतरस एठा यूहन्ना के हाकोलेकिंज एठा धमकी जीटे इनी मंडीके, “यीशु गा जीमू टे चोचकाभी बाकी मंडी, एठा न इथूकु।” 19पेनो पतरस एठा यूहन्ना नी दिकुके जवाब जीके, “आपेका न्याय डाए, कि चोच येटेन परमेश्वर गा मेरान भला होय, कि आले परमेश्वर गा बातो टे खट्टे आपेगा बातो मनतिंजे? 20चोयाकी येटेन मेटे आलेटेका डाऊ बान साकता, कि जो आलेनी डोके एठा आजुम्के होय, डी बाकी मंडी।” 21मेटे दिकुनी दिकुके एठा धमकातिंजटे आराकेकु, चोयाकी कुरकू गा वोजीटे दिकुके दण्डो जिऊ गा तुनिका वाजा बान घाटाडुका, इनिघल्जी कि जो घाटना डायेन डा, डेगा वोजीटे सेबाई कुरकू परमेश्वर गा महिमा दडा डा। 22चोयाकी जो कोरो अचम्बो कामय रुपोटे सजाएन मेना डा, देटेन चालीसो साल टे जाद उमर गा डा।
चेलाकू गा प्रार्थना
23पतरस एठा यूहन्ना आराटे इकुगा सोप्तीकु गा मेरान हेन, एठा जो चोचकाभी मुख्यायाजक एठा यहूदी जुना सनाकु नी दिकुटे मंडीके डा, दिकुके घल्के। 24इनी आजुमटे, दिकुनी म्या मन आरुटे खाट्टेका परमेश्वर टे मंडीके, “हे प्रभु, आम डीचका होय डीचनी बदळा एठा पृथ्वी एठा समुद्र एठा जो चोचकाभी दिकुन होय आरुके। 25आमनी पवित्र आत्मा गा द्वारा अमागा सेवाक आलेगा आजा दादा दाऊद गा चभुटे मंडीके, ‘अलग्गो जाटोकु खिजोऊ चोया लक्के मेना? एठा देशो-देशो गा कुरकू नी चोया वोया बातो सोचातिंजके? 26प्रभु एठा दियागा सुनूम लेमेट गा खिलाफबेन पृथ्वी गा राजा टेंगेंजे, एठा हाकिम म्या सेंग्गोन घोलाएन।’ 27चोयाकी सच्चोका अमा चोखरा सेवक यीशु गा खिलाफबेन, डीचके आमनी सुनूम लेमेट डाके, हेरोदेस एठा पुन्तियुस पिलातुस भी अलग्गो जाटो गा कुरकू एठा इस्राएली कुरकू गा सेंग्गोन इनी पुरान घोलाएन। 28दिकुनी डीका डाके जो अमा शक्ती एठा इच्छाटे पेलाका ठहरातिंज्के डा कि डाऊ होना। 29नका हे प्रभु, दिकुगा धमकीनौर के आजुमे एठा अमा भाग्यकु के इनी वरदान जे कि अमा वचन खाट हिम्मत घालेवा। 30ससाजा गा घल्जी अमा टी बाळातिंजे एठा चोखरा सेवक यीशु गा जीमू टे अचम्बो कामय चिन्हा एठा अचम्बो डाकी।” 31जब दिकु प्रार्थना डायेन, मेटे डी जगान देटेन दिकु घोलाएन डा ओखेंजे एठा दिकु सेबाई पवित्र आत्मा टे भेट्टेन एठा परमेश्वर गा वचन हिम्मत टे घाले लज्जे।
विश्वासीकु गा सेंग्गोजिऊ
32विश्वास दडामिठाच गा मंडली म्या चित्तो एठा म्या मन गा डा, येटे टाएन कि जेकाभी हेजा संपत्ति हेजा बान मेना डा, पेनो सेबाईका बेल्ला गा डा। 33कलामके मिंकू चेलाकू खाट शक्तीटे प्रभु यीशु गा गोएन मिठाच जाटे जीटाएन गा गवाही जिऊ लज्जे एठा दिकु सेबाईकु लिंजेन खाट कृपा डा। 34दिकु तलान जेकाभी गिरबो बान डा, चोयाकी जेगा मेरान ओटे या उरा डा, दिकु डीके किजि-किजीटे, किजीके मिनी चीजो गा डामा सेगेवा एठा कलामके मिंकू चेलाकूके जिकी डा। 35एठा जैसा जेन जरुरत होना डा, डेगा रोंगो हर म्याखोम के खातिंजे डा। 36यूसुफ जीमू म्या कोरो डा। देटेन लेवी कोंकूटे डा एठा साइप्रस द्वीप टे डा। कलामके मिंकू चेलाकूनी डीचके बरनबास मंडीके, डेगा मतलब होय म्या येनेगो कोरो दूसराकु गा मदत दडावा होय। 37दियागा थोळासा ओटे डा डीके डीचनी किजीके एठा भाव गा डामा साटे कलामके मिंकू चेलाकूके जीके।
Currently Selected:
प्रेरितों के काम 4: GOKNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Gowli (गवली) Bible by The Love Fellowship is licensed under Creative Commons Attribution-ShareAlike 4.0 License.