UPUTUKILO 1
1
1Ha uputukilo Zambi watangile malilu ni hashi. 2Hashi hapwile hahululu kanda hamokomoko mba helu lia jondo hapwile milima. Spiritu ya Zambi wapwile nikujingajinga helu lia meya.
3Zambi yamba ngwenyi, Kupwe pangu, mba yikupwa pangu. 4Zambi yamona pangu, ngwenyi, Linapeme, mba Zambi yahandununa hakachi ka pangu ni milima. 5Zambi yaluka pangu ngwenyi, Tangwa. Milima yayiluka ngwenyi, Ufuku. Yikupwa chingoloshi, yikupwa chimene, tangwa litangu.
6Mba Zambi yamba ngwenyi, Hakachi ka meya hapwe kuzazuluka chikahandunune meya ni meya. 7Zambi yatanga kuzazuluka, yahandununa meya a kushi lia kuzazuluka ni meya a helu lia kuzazuluka, yichipwa chocho. 8Zambi yaluka kuzazuluka ngwenyi, Lilu. Yikupwa chingoloshi, yikupwa chimene, tangwa liamuchiali.
9Zambi yamba ngwenyi, Meya aze ali kushi lia lilu aswile muma mumuwika, mavu omu asoloke. Yichipwa chocho. 10Zambi yaluka mavu omu ngwenyi, Hashi. Kuswila cha meya yachiluka ngwenyi, Kalunga-lwiji, mba Zambi yachimona ngwenyi, Chinapeme. 11Zambi yamba ngwenyi, Ha mavu hasoke mwambu, ni yiputa yakwima mbuto, ni mitondo ya mihuko yize yakwima mihuko nikulita ni milali yayo, yize yikwete mbuto yayo muchima ha mavu. Yichipwa chocho. 12Mba ha mavu hasokele mwambu, ni yiputa yakwima mbuto nikulita ni milali yayo, ni mitondo yakwima mihuko yikwete mbuto yayo muchima nikulita ni milali yayo. Mba Zambi yachimona ngwenyi, Chinapeme. 13Yikupwa chingoloshi, yikupwa chimene, tangwa liamuchitatu.
14Zambi yamba ngwenyi, Kupwe mapangu mwilu akahandunune mwalwa ni ufuku. Akapwe yilayi, ha tungonde, ni ha matangwa, ni ha miaka. 15Akapwe mapangu mwilu mukupangwisa hashi. Mba yichipwa chocho. 16Zambi yatanga e mapangu aali anene; pangu linene likayule mwalwa, pangu likepe likayule ufuku. Yatanga matongonoshi nawa. 17Zambi waasele mwilu mukupangwisa hashi. 18Akayule ha mwalwa ni ha ufuku, akahandunune hakachi ka pangu ni milima. Mba Zambi yachimona ngwenyi, Chinapeme. 19Yikupwa chingoloshi, yikupwa chimene, tangwa liamuchiwana.
20Zambi yamba ngwenyi, Meya akazale ni yizavu ya akwa mwono. Tujila akahumuke helu lia hashi mu kuzazuluka cha lilu. 21Zambi yatanga tushitu anene a mu kalunga-lwiji, ni akwa mwono eswe aze a kuliokesa mu meya nikulita ni mavungu jo, ni akwa mapulwa eswe nikulita ni mavungu jo. Mba Zambi yachimona ngwenyi, Chinapeme. 22Mba Zambi yaawahisa ngwenyi, Semenu nuliokese, nukazalise meya a mu kalunga-lwiji. Tujila aliokese hashi. 23Yikupwa chingoloshi, yikupwa chimene, tangwa liamuchitano.
24Zambi yamba ngwenyi, Hashi hazale ni akwa mwono nikulita ni mavungu jo, ni yimuna, ni akwa kukalala, ni tushitu a hashi nikulita ni mavungu jo. Mba yichipwa chocho. 25Zambi yalinga tushitu a hashi nikulita ni mavungu jo, ni yimuna nikulita ni mavungu jo, ni akwa kukalala eswe nikulita ni mavungu jo. Mba Zambi yachimona ngwenyi, Chinapeme.
26Zambi yamba ngwenyi, Tulingenu mutu mu chano chetu, mwe mu kulifwa chetu. Akapwe ni chiyulo helu lia yishi a mu kalunga-lwiji, ni helu lia tujila a mwilu, ni helu lia yimuna, ni helu lia hashi heswe, ni helu lia akwa kukalala eswe aze akukalala hashi. 27Mba Zambi yatanga mutu mu chano chenyi; mu chano cha Zambi yamutanga. Lunga ni pwo yaatanga. 28Mba Zambi yaawahisa. Zambi yamba kuli ayo ngwenyi, Semenu nuliokese, nukazalise hashi, nukazeyeseho. Nukapwe ni chiyulo helu lia yishi a mu kalunga-lwiji, ni helu lia tujila a mwilu, ni helu lia tushitu eswe akwenda hashi. 29Zambi yamba ngwenyi, Talenu hinanwaha yiputa yakwima mbuto yili hashi heswe, ni mitondo yeswe yize yikwete mihuko yakwima mbuto. Yeswe muyipwa ya kulia kuli yenu. 30Ni kuli tushitu eswe a hashi, ni tujila eswe a mwilu, ni eswe akukalala hashi akwete mwono, hinaaha yiputa ya wisu ya kulia. Mba yichipwa chocho. 31Mba Zambi yamona yuma yeswe yize halinga ngwenyi, Chinapeme chikolo. Yikupwa chingoloshi, yikupwa chimene, tangwa liamuchisambano.
Currently Selected:
UPUTUKILO 1: Csa
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Chokwe Bible © Bible Society in Angola, 1975.