UPUTUKILO 2
2
1Chocho mwilu ni hashi yayimanuna, ni chizavu chayo cheswe. 2Ha tangwa liamuchishimbiali Zambi yamanuna milimo yenyi yize alingile, mba ha tangwa liamuchishimbiali yahwima ku milimo yenyi yeswe yize alingile. 3Zambi yawahisa tangwa liamuchishimbiali, yalisela lisandu, mumu ha lienalio yahwima ku milimo yenyi yeswe yize Zambi atangile ni yize alingile.
4Yisemuko ya mwilu ni hashi yino ha tangwa lize Yehova Zambi yalinga mwilu ni hashi.
5Ni mitondo yeswe ya mu mavu shimbu kanda yipwa hashi, ni yiputa yeswe ya mu mavu shimbu kanda yisoka, mumu Yehova Zambi kanda anokesa vula hashi, chipwe mutu keshiko yoze machipa mavu. 6Alioze kwakakumukine mbundu hashi nikutuchikisa heswe ha mavu. 7Yehova Zambi yawumba mutu wa ku fufuta ya mavu, yahwima mu mazulu jenyi mwiku wa mwono mba mutu yapwa mukwa#2.7 Pundu, Alma ya mwono. mwono. 8Yehova Zambi yatumba munda ku chivumbuko, mu Endene, mwenamo asele mutu yoze awumbile. 9Mba ku mavu Yehova Zambi yasokesa mitondo yeswe yipema ku meso, ni yize yipema ya kulia; mutondo wa mwono nawa mukachi ka munda, ni mutondo wa chinyingi cha chipema ni chipi.
10Lwiji yakatuka ku Endene mukutuchikisa munda, mba ku kuze yalipula njiji jiwana. 11Jina lia lwiji mutangu Pishone, mwenawo wajingilika chifuchi cheswe cha Havila kuze kwatwama oru. 12Oru yize yipema chikolo. Kuli nawa ndeliume ni mawe a sardonica. 13Jina lia lwiji wamuchiali Ngehone, mwenawo wajingilika chifuchi cheswe cha Kushe. 14Jina lia lwiji wamuchitatu Hidekele, mwenawo wapalika ku Chivumbuko ku Asuria. Lwiji wamuchiwana Ufrateze.
15Mba Yehova Zambi yatwala mwe mutu, yamusa mu munda wa Endene mukuulima nikuufunga. 16Yehova Zambi yamba kuli mwe mutu ngwenyi, Ku mitondo yeswe ya mu munda muhasa kulia chawana, 17alioze ku mutondo wa chinyingi cha chipema ni chipi, kanda uliako, mumu ha tangwa muoliako kumukafwa lume.
18Mba Yehova Zambi yamba ngwenyi, Kuchapemene mutu akatwame ukawenyi, mungumulingila chikwashi yoze malita nenyi. 19Ku mavu Yehova Zambi yawumba tushitu eswe a mu yambu, ni tujila eswe a mu tetela, yaaneha kuli mwe mutu akamone chize maaluka. Lieswalio mutu alukile kashitu ni kashitu, lienalio jina lienyi. 20Mutu yaluka majina yimuna eswe, ni tujila a mu tetela, ni tushitu eswe a mu yambu, hindu hali mwe mutu kawanyine niumwe chikwashi yoze walita nenyi. 21Yehova Zambi yatuma tulo anji kuli mwe mutu akaye tulo, mba yanda umwe lupachi wenyi, yanungisa yifwo kumusalakana, 22mba mwe lupachi yoze Yehova Zambi yachiza kuli mutu yamulinga pwo, yamuneha kuli mwe mutu. 23Mba mutu yamba ngwenyi,
Yono chifwaha cha ku yifwaha yami; musunya wa ku musunya wami;
Yamuluka jina ngwenyi, Pwo, mumu yamuchiza kuli Lunga.
24Kashika lunga mahichika tato ni naye akalalaminye kuli mukwo-pwo, mba kumapwa musunya umuwika. 25O eswe aali apwile ni uselesele, ni lunga ni mukwo-pwo, hindu kevwile sonyi.
Currently Selected:
UPUTUKILO 2: Csa
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Chokwe Bible © Bible Society in Angola, 1975.