Markə 16
16
Zezu car mbə mara
(Mat 28.1-8; Luk 24.1-12; Zaŋ 20.1-10)
1Kəri məni fəta pemây sôwâ Zuwif pâ si, Mari mə so Magdala, kə Salome ɓay Mari mə ya Zakə coɓ kuni urdi kədan handay wu' wa mar Zezu. 2Fəta pemây, kə bəka ceɗ, handay wə də ri məni handay no' mar Zezu wə hana. 3Kəri məni handay wə vari ɓo, handay ci vun mbok nji: «Sa nə də ɓuru gway' mə vun zra mar mba ne də rəka su?» 4Ama kəri məni handay tle i kar ri, handay we gway' mə toŋ nə ɓuru ta kə hay'i. 5Zə rum, handay cok ta rawti zra mar, ɓay handay za' vay jiɗ məni ge mbraw mə ɓu suk han ga' ɓa funu. Kwa rum gi wəlok ne nday juku. 6Ama mum la' ne ndaya: «I ne wəlok mi. Hi wə keɓ Zezu mə so Nazaret, məni handay ke gay' num wa gu gay'i: Mum cu ti za' mi. Ifray par num mbə mar si. I kar ri', ri məni handay ke no' num han nə ni na. 7I də ye, ɓay i də in ne kə sum ta zə rum məsin ɓay kə Piyer: "Mum dle də nya Galile cop ri. Hi də um we wə han, ce' ndə məni mum ke in ne ni#Mat 26.32; Mak 14.28."»
8Kəri məni handay mun dan in Zezu, tu nday par nyen kə ne wəlok, handay wur mbə zra rum, pik ne dle seŋe. Zə handay ne wəlok juk, handay cu in dan rum ne kə swə ɗaw mi.
Zezu ta' tu rum ne kə Mari mə so Magdala
(Mat 28.9-10; Zaŋ 20.11-18)
[9Fəta pemây kə bəka ceɗ, Ifray par Zezu mbə mara. Kəki rum, mum ta' tu rum ne kə Mari mə so Magdala copo. Ta ma məti Zezu ke 'way gam seɗa' wa sə ra#16.9 Ri ɗerwa rum cu wə du ɗerwa məni wây' cem cem məsin kuni mi..] 10Ta 'ya ta in dan rum ne kə sôwâ məni ke kə Zezu, məni gay' wə ɗik dan kə ci'i. 11Ama kəri məni handay mun i ta in i Zezu kəta' kə i, ɓay i ta we num si, handay cu ve dan sə mi.
Zezu ta' tu rum ne kə sum ta zə rum mə hoɓo
(Luk 24.13-35)
12Kəki rum, Zezu ta' tu rum kə vari məsin ne kə sum ta zə rum mə hoɓ wə vari mə də so mə rəka. 13Handay faŋ gewa mbə in dan rum ne kə sum ta zə rum məsin, ama handay cu ve dan nday məta'a.
Zezu ta' tu rum ne kə sum ta zə rum mə guɓ wa ɗawa
(Mat 28.16-20; Luk 24.36-49; Zaŋ 20.19-23; Sin 1.6-8)
14Ndo' vun rum, Zezu ta' tu rum ne kə sum ta zə rum mə guɓ wa ɗaw, kəri məni handay wə ti kwati. Mum mgbor nday zə handay ve num kî, zə wa nday ɓokrok, ɓay zə handay cu ve dan sôwâ məsin məni in i handay we num kəta' kə i si nə mi. 15Ɓay mum faŋ la' ne ndaya: «I də wə nya daŋ', i də ka' Dan mə Kəɗam ne kə sôwâ daŋ'ŋ#Sin 1.8. 16Swə məni də ve dan rum ɓay də ve baptem, mum də fe siɗ, ama swə məni la' cu ve dan rum mi si, dan ɓok də ke wa bə rumu. 17Na də ne gbəgboŋ ne kə sôwâ məni ve dan man kədan handay gi yew məni kuna: Kə semɗe rin, handay də 'way gam, ɓay handay də dan vun mə mbrew, 18ko handay la' ra' wu' kə ɓa, ko handay la' ce kwa mar tu, kwa rum cu də gi kwa məsin tu nday mi. Handay də njay ɓa wa sum gaɓ, ɓay sum gaɓ də cara.»
Ifray tle Zezu ta wafraya
(Luk 24.50-53; Sin 1.9-11)
19Kəki məni Bârî Zezu in dan ne nday ndəna', Ifray tle num ta wafray, ɓay mum ta suk ɓa fun Ifraya#Sin 1.9-11. 20Sum ta zə rum dle kə ka' Dan mə Kəɗam wə nya daŋ'ŋ: Bârî gi sin kə nday ɓay jeŋ dan ka' nday kə yew cem cem məni handay wə gi.
Currently Selected:
Markə 16: KMN
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Le Nouveau Testament et Psaumes en Peve © Alliance Biblique du Tchad, 2014.