Mata 16
16
Gà *Farisa duwa nda gà *Saduki, ta wiz
dukw mene aà mburma aà Yesuw
Mata 12:38-39; Markus 8:11-13; Luka 12:54-56
1Aləka gà Farisa duwa nda gà Saduki, tə dara a təv Yesuw a, aɗaba a sàs a tar maslàlà à ŋgat i yam a. Ta wiz aà ŋgat dukw mene aà mburma. Ta gwaɗar: «Ge dukw mene aà mburma yak ana Mbulum a slər dərra kər a, dite na mìi sir a dər ka, ndzer kaɗəŋ a.» 2Yesuw a gwaɗa a tar aaka: «Ama kurum ka, kàa fə̀rum, pat aka dəɗ, hulɓukw a riŋ aà mbulum tsəka, ki gweɗwim a, ndidwe ka, yam à dze a tsa. 3I mèkwède, bəla àvùkw a ge a ùmùkùkkwa hulɓukw aà mbulum hinne ka, ki gweɗwim a, mbakum ka, yam à dzìŋa. Taŋa kurum ka, ka sərum ikaba à gà dukw ana ika gər ahəɗ a tserdze ana, dite aàla na ka sərum ikaba à gà dukw ana kinehe i ge a ika magər kurum a tsiye?» 4Ama a gwaɗa a tar asa: «Kurum gà mburma ana kinehe kurum riŋ nda are ya ka, gəzləŋ kurum manəsa ŋa. A sàs a kurum Mbulum tsa, tsəna, ki wizwim a dukw mene aà mburma dze ana, meme? Ama ka, ki ŋgetwim a tsa, say dukw mene aà mburma ka, biy Yunas, mala məma à guma Mbulum ana akahər ata ya ilik pəra.» I dəba ŋa ya, Yesuw a tsik a tar aba ya kataya ka, a miyak à tar a fata, a daba.
Yesuw a ndzikiɗ ba à bazlam gà *Farisa nda biy gà *Saduki
kamala giɗe ana a kwasawa à duwa ya
Markus 8:14-21; Luka 12:1
5I dəba ŋa ya, gà Yesuw nda gà ɓəzla mazazama ŋgat tə tsala a slə̀làh yam, ti de a dər aka lìdè gìgìze ŋgiɗ. Ta mah ba, tə da. I təv ana ti de a ya, gà mburma ŋgar ata ta fə̀r ikaba i slə̀làh yam a ka, tàa zla dərra dukw mezime aà ahər a tsa, aka məts a tarra gər i təv ana tə dara iɗəm a ya. 6Yesuw a gwaɗa a tar: «Gwim metsehe lele, agəra giɗe gà Farisa nda biy gà Saduki ana a kwasawa à duwa ya.» 7Gà ɓəzla mazazama ŋgat ata tə tsaraka kataya ka, ta mà akaba à bazlam ika magər tar. Ta gwa: «A tsik kataya ana, agəra ana kàa sə̀kəmakwa dərra dukw mezime aà ahər a tsiye ya?» 8Ama Yesuw ka, a sər a taraha aka dukw ana ti tsik ahər a. A tsam aà tar, a gwaɗa a tar: «Aàla na kà dzalum ka, agəra dukw mezime ana a riŋ aà kurum tsiye ya?» A gwaɗa a tar asa: «Kurum dze ana, kàa gəsum iye a gəzləŋ kurum lele tsiye? 9Wànà hiywe metsehe kurum a riŋ tsa pəra ya? Kà dzalum gà gər aka ɗaf ata tapa ə̀zləm, i sasaba a gà mburma ana ti sle dəbuw ə̀zləm a ti tsiye? Dite mezehe ŋana kà yahumar gər ana, tàkwasa ndaw seyiŋ a?» 10A gwaɗa a tar asa: «Dite kà dzalum gà gər aka ɗaf ŋgiɗ ana tapa təsəla ka, i sasaba a gà mburma ana ti sle dəbuw faɗ a ti tsiye? A zeha dze ana, tàkwasa ndaw na kà yahumar gər a? 11Aɗaba la na kà sərum tsiye? I gwaɗa a kurum ka, kaslum gà gər kurum i təv giɗe gà Farisa ana nda biy gà Saduki a kwasawa à duwa ya, tsəka, agəra ana dukw mezime aà kurum tsiye tsa.» 12I dəba bazlam ŋgar ata ya tsara ka, gà ɓəzla mazazama ŋgat aaha pìɗek tàa tsaraka dukw ana a tsik a tar a kuɗa. Aɗaba tə sər, a tsik a tar ka, agəra giɗe ana a kwasawa à duwa ya tsa. Ama a gwaɗa a tar ka, ta ge metsehe i təv bazlam gà Farisa nda biy gà Saduki ana ti tsikewa a mburma pampam ŋgwala tsiye.
Piyer a ɗe à zləm Yesuw, a gwa, ŋgat ka, *Kiristi
Markus 8:27-30; Luka 9:18-21; Yuhana 6:67-71
13I dəba ŋa ya, gà Yesuw nda gà ɓəzla mazazama ŋgat, tə da aka ahəɗ Kaysariya Filip. Ti ndzeha a fata ka, Yesuw a gwaɗa a tar: «Gà mburma ata ta gwa aà iye, kəla mburma dze ana, iye ana, weke?» 14Gà ɓəzla mazazama ŋgat aaha ta gwaɗar aaka: «Gà mìsle ŋgiɗ ta gwa, kər ka, Yuhana metsìlwìɓè à mburma a yam. Gà mìsle ŋgiɗ asa ta gwa, kər ka, Iliya. Gà mìsle ŋgiɗ pam asa ta gwa, kər ka, Yeremiya, kige tsa mìsle ŋgiɗ ilik i liwiŋ gà ɓəzla məma à guma Mbulum ana akahər ata ya.»
15I dəba ŋa ya, Yesuw a wiz aà tar, a gwaɗa a tar: «Dite kurum a gè, kù gwaɗum i kurum dze ana, iye ana, weke?» 16Simun Piyer a gwaɗar aaka: «Kər ka, Kiristi, mala məmbə̀là à mburma ana Mbulum a gwa, i slir a kurumaha a ya, Kəla Mbulum ana a riŋ nda gà mesife aà biybiy a.» 17Yesuw a gwaɗar: «Kər ka, maŋgayaba i təv yak, Simun kəla Yunas, aɗaba kà sər taŋa ka, mburma na a tsikik a tsa. Ama Tsir gà Mbulum ana i gər ŋa ya na a ɗifek dər a. 18Iye ihər i gweɗekiŋa: Kər ka, Piyer, kamala megweɗe ya ka, kuvəl. Ama i ti yehe a gər a gà mburma gà aka kuvəl ata kamala kur ana tì zlèzl a dər ga ya. Taŋa, gà ɓəzla mene are tar ka, ti sle a aà medzeye à tar tsa, ku mege ndzəɗa məməta tekeɗe, a sle a aà mimbè aà tar tsa mbaŋa. 19I vilek a lèkilè mahə̀ndə̀kà a vatwa mada a mekwere Əbay Mbulum ka, a ahər yak. Dukw ana kàa pala ahər ɗa ahəm ika gər ahəɗ a, Mbulum tekeɗe, a pele ahər a ahəm i mbulum i gər ŋa mbaŋa. Dite dukw ana kàa vəl ahər vatwa ika gər ahəɗ a ka, ŋgat tekeɗe, a vile ahər a vatwa i mbulum kataya mbaŋa asa.» 20I dəba ŋa ya, Yesuw a gwaɗa a gà ɓəzla mazazama ŋgat: «Kurum kàa sərum, iye ka, Kiristi, mala məmbə̀là à mburma ana Mbulum a gwa, i slir a kurumaha a ya. Ama ka, ka ti tsikwim a wura ilik tsidze kəla.»
Yesuw a ɗif à məməta ŋgar ana a ta mbilere a i biye ya,
malahalah ŋa
Markus 8:31-33; Luka 9:22
21I dəba ŋa ya, Yesuw a dza ba aà metsìkè dukw ana a ti le a aà ŋgat aka miɗ mba ya, a gà ɓəzla mazazama ŋgat, i təv are tar tserdze. A gwaɗa a tar: «Iye ka, bàlaarì i ti de a a Yeruzalem mba, dite gà bàba gà mburma ana ta kwere a gà Yahuda ya, nda gà Əbay gà ɓəzla mandəva kuɗa a Mbulum, nda gà ɓəzla medzeŋge məpala ahəm Mbulum tserdze, ti ti sèwèriŋ a are hinne i fata. Dite ta kiɗ a iye. Ama i huɗ mehinne makər a ka, i mbilere a i məməta ya asa.» 22I dəba bazlam ŋgar ata ya ka, Piyer a daha, a gəs ŋgat a zlawak, dite a dza ba aà məpàlàr ahəm. A gwaɗar: «Kataya tsa, Əbay ga, Mbulum mə pala ahəm aà maslàlà medzibe dukw ata ma ta gik ba a gər tsidze.» 23I dəba ŋa ya, Yesuw ə̀ba a fə̀r ahər, a gwaɗar: «Kər Piyer, madzala gà gər yak ata ka, mà da i təv ga ya, aɗaba kər kà ne ika miɗ gà ka, kamala Əbay sitene ya. Kər ka, a sàsak medzeye à iye ika vatwa ya. Aɗaba madzala gà gər yak ata kà dzala ya ka, biy mburma, tsəka, biy Mbulum tsa.»
Wur ana a zezem a Yesuw ka, ma dzala ba ŋgar asa tsa
Markus 8:34—9:1; Luka 9:23-27; Yuhana 12:25-26
24Aləka i dəba ŋa ya asa, Yesuw a gwaɗa a gà ɓəzla mazazama ŋgat: «Na aka sàs a wura aà medìɗè aka iye ka, ma dzala ba ŋgar asa tsa, ma zla dizl magə̀làwà ŋana kəla pat, kamala ana iye i ti zle a mba ya, dite ma dara, ma zazam iye kuɗa. 25Aɗaba wur ana aka sasar məmbə̀là à mesife ŋgar ɗa ika gər ahəɗ ka, a dzeye a dər seyiŋ ivaɗ. Ama wur ana a dzeye a à mesife ŋgar aɗaba iye ya ka, a ŋget a ivaɗ asa.» 26A gwaɗa a tar asa: «Na wura aka ŋgat ka, dukw gər ahəɗ tserdze, a ŋgayar ba i gəzləŋ, dite a dzeye a dər à mesife ŋgar ana, duwa a riŋ a ger a ŋgulum a? Awaŋ. Tsəna, duwa a riŋ na mburma à mbìrwìɗ a dərra mesife ŋgar a təv Mbulum a ya? Awaŋ. 27Taŋa iye, *wur ana a dara i təv Mbulum a, i mère a ka, nda ndzəɗa Tsir gà ana ti zlibe a dər a ndzer, dite nda gà gawla ŋgar a. Na Yàa dara ka, ku weke a ŋget a dukw mayaba ŋgar kalkal kamala megemir ŋgar ana a ge ya mbaŋa. 28Iye ihər i gweɗe a kurum a nda ndzer: Gà mìsle ŋgiɗ ɗa ika magər kurum aaha kinehe ya ka, ta mete a zukw tsa, say ta ŋgetiŋ a, a iye, wur ana i dara i təv Mbulum a, i mère a ka, kamala Əbay a dzekwiŋ.»
Currently Selected:
Mata 16: gnd
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc. All rights reserved.