Luku 8
8
Yɛrɛmɛŋ bi yemɛ Yisɔs na beŋ
1Naa daŋande malɔkɔ manɔndi, Yisɔs kaande ka mɛtiŋ babukuyuwɛ baŋ iŋ mɛtiŋ bamɛɛsuwɛ baŋ, kaŋ kaa kaŋ niya kɛwandi Huseri Huyɔhɔy haŋ ba Hugbakine hu ka Masaala haŋ. Bakarandeni kɔhi iŋ biye beŋ yeme niŋ, 2iŋ yɛrɛmɛŋ binɔndi bi kanthe wundɛ mbayiŋ binɛnɔy iŋ nthoonani kihakuwande: Mariyama wo ka mɛti ba ka Makadala, wo kantho mbayiŋ bisɔŋ-biye, 3Yoana wo yento iŋ Kusa wo nde bayaha ka banka ba ka Hɛrɔdi baŋ woŋ, iŋ Susana, iŋ yɛrɛmɛŋ bibɔyɛ, bi nde mase Yisɔs na iŋ bakarandeni nama beŋ ŋaye ka mu iŋ bindɛ muŋ.#Math 27:55-56; Maki 15:40-41; Luku 23:49
Mbɔrɔ ki ka bapayi woŋ kɔŋ
(Mathiyu 13:1-9; Maki 4:1-9)
4Naa bohe biya bibɔyɛ saa ka Yisɔs ŋaye ka mɛti makey ka mɛti, sɛthɛ bamandiŋ see kɔmande ka tha banthe; Yisɔs tepe bindɛ mbɔrɔ kɔŋ kɔŋ:
5na “Malɔkɔ manthe bapayi wunthe na fuŋɛ nde ba kaa kaŋ paya paka nama. Naa wundɛ key kaŋ paya, banɔndi ŋɔti ka gboŋa baŋ. Bɛŋ see yathuwa, awa bɛtiŋ beŋ see hɛlɛŋ bɛŋ thuu. 6Banɔndi baŋ ŋɔti ka kuthara koŋ. Naa bɔɔti bɛŋ, bɛŋ see thithi, babiyɛ bɛŋ ka iŋ mandi matɛŋɛ. 7Banɔndi ŋɔti ka thaka haŋ. Naa see bɛŋ muku, bɛŋ mukutande iŋ thaka haŋ, awa thaka haŋ see bɛŋ pɔthitinande. 8Banɔndi ŋɔti ka kuyɛkɛŋ kuyɔhɔy koŋ. Bɛŋ see muku wuyɔhɔy, bɛŋ see fuŋuŋ humo huma kɛmɛ wunthe.”
Huna tepe Yisɔs, na “Ponaŋ kuiha, yindo ba pona kuiha!”
Kolo ba ka thabɔrɔ tha ka Yisɔs thaŋ
(Mathiyu 13:10-17; Maki 4:10-12)
9Bakarandeni beŋ thɔnthɔŋɔŋ Yisɔs, na “Mbɛ kolo ba ka mbɔrɔ kɔŋ kɔŋ?” 10Yisɔs tepe bindɛ, na “Beŋ dunkuno hɛɛra ba kɔthɔ gbundu ba ka Hugbakine hu ka Masaala haŋ, kɛrɛ ka biya bihɛna beŋ, yɔkɔŋ ka thabɔrɔ na bindɛ kothiye,
‘hali na amayaŋ thaaya nabanthuŋ, bindɛ sa kutu;
hali na apoŋ kuiha, bindɛ sa metho.’
Yisɔs mɛthɛŋ mbɔrɔ ki ka bapayi woŋ kɔŋ
(Mathiyu 13:18-23; Maki 4:13-20)
11“Kolo ba ka mbɔrɔ ki ka bapayi woŋ kɔŋ baŋ bɛna baŋ baŋ: 12Paka ba ŋɔtɛ ka gboŋa baŋ baŋ bɛna thɔyande iŋ bi yuyɛ thampa tha ka Masaala thaŋ beŋ, kɛrɛ Wayi Womandiŋ woŋ Sithani see. Wundɛ see fuŋuŋ thampa thabɛina ŋaye ka thathukuma namɛŋ thaŋ, ba haliko na sa bindɛ niye lanɛya e niyo kisi. 13Ba ŋɔtɛ ka kuthara koŋ baŋ bɛna thɔyande iŋ biya bi yuyɛ thampa thaŋ beŋ e bindɛ thɛŋ yɛrɔkɔ iŋ mayehitɔkɔ, kɛrɛ thɛŋ tha thɔɔ wusunŋɔy ka thathukuma namɛŋ thaŋ. Bindɛ ni hɔkɔŋ lanɛya ba malɔkɔ mathurɔy, kɛrɛ naa lɔkɔ ba kugbɛrɛŋɛŋ koŋ baŋ tɛŋ nthɔŋ, bindɛ ŋɔti. 14Ba ŋɔtɛ ka thaka haŋ baŋ, bɛna thɔyande iŋ biya bi yuyɛ thampa tha ka Masaala thaŋ beŋ, kɛrɛ yaagbani beŋ ndo, dethuwa nanhulu baŋ haŋ ndo, wuthimɔy wu ka huwɔmɛtiya haŋ wuŋ ndo see niŋ thɔɔ ka thukuma, awa biya bibɛina sa punku fuŋuna munahaŋ. 15Ba ŋɔtɛ ka kuyɛkɛŋ kuyɔhɔy koŋ baŋ, bɛna thɔyande iŋ biya bi yuyɛ thampa thaŋ beŋ e bindɛ huŋ putiyɔ, e bindɛ huŋ kɔsina ka thathukuma thakɛnamɛŋ, e niya kuthithi haaŋ e fuŋuna munahaŋ.
Mumɔɔli muŋ pututo kuma
(Maki 4:21-25)
16“Wɔ yo wɔ ka wo mɔɔli mumɔɔli ba muŋ pututa kuma, maa ba muŋ nɔra ka kuhinsi ka pothi, kɛrɛ mɛnɛ wɔ mɔɔli mumɔɔli ndɛ kɔŋ ba muŋ tuta ka thinthi,#Math 5:15; Luku 11:33 ba haliko wɔ yo wɔ wo biyande ka banka ka, ndɛ be kutu waŋ babɛina.
17“Bɛyi na ka ba nunɔkɔy ba sa nɔŋ kuta nagberekethe; bɛyi na ka ba gbundu ba sa nɔŋ biya kɔthɔ, maa ba sa nɔŋ kiya ka waŋ.#Math 10:26; Luku 12:2
18“Niyaŋ kuthɛgbɛ na beŋ yuye, baa wo iŋ wuyete, wundɛ na ndintiya, kɛrɛ wo ka iŋ wuyete woŋ, wundɛ kɔŋ kanita hali wu simeke wundɛ wu iŋ wundɛ.”#Math 25:29; Luku 19:26
Binanda bi ka Yisɔs iŋ mbɛndama
(Mathiyu 12:46-50; Maki 3:31-35)
19Nanda ka Yisɔs iŋ mbɛndama see ka Yisɔs, kɛrɛ na biya beŋ bibɔyɛ, bindɛ tha niŋ punku thuriye. 20Huna yele wɔ wunthe Yisɔs na thampa, na “Nanda iŋ mbɛnda bi kooyeŋ ka gbada ka ka yumba yina; bi thimoŋ ba yina kuta.”
21Huna tepe Yisɔs, na “Biya beŋ beŋ, bindɛ bina binandaŋ iŋ mbɛndaŋ bi yuyɛ thampa tha ka Masaala thaŋ beŋ, e bindɛ thɛŋ putiyɔ.”
Yisɔs thɛbɛŋ huru haŋ
(Mathiyu 8:23-27; Maki 4:35-41)
22Ka lɔkɔ banthe Yisɔs iŋ bakarandeni nama beŋ thɔɔyɛ ka gbe, huna tepe wundɛ bakarandeni nama beŋ, na “Miŋ kaayɛŋ thuhaŋ mankɔ maŋ.” Kɛna fuŋ bindɛ ba kaa. 23Kɛrɛ naa bindɛ key, Yisɔs bohe nine ka gbe baŋ. Ka wuthurɔy wubɛina huru humandiŋ see bindɛ pɛnki ka mankɔ maŋ. Kɛna bohe gbe baŋ thiŋo mandi, e bindɛ bɔha mula ka mandi maŋ. 24Kɛna key bakarandeni beŋ ka Yisɔs ka e niŋ ka thɔhina, e tɛpa, na “Karimɔkɔ, karimɔkɔ, miŋ bohe muluto?”
Kɛna ŋayinɔkɔy Yisɔs. Wundɛ pinde huru haŋ iŋ thamunkulu thabukuyuwɛ thaŋ, na “Thɛbaŋ,” kɛna thebe muŋ nayeŋ. 25Huna tepe Yisɔs ka bakarandeni nama beŋ, na “Mbɛ ba sa beŋ niye lanɛya?”
Kɛrɛ bindɛ fooma ni kukabanɛ ka payɔ ka tete, e tɛpiyande, na “Mbɛ woŋ, wo ni yamari huru haŋ woŋ iŋ thamunkulu thaŋ, e thɛŋ niŋ putiyɔ?”
Yisɔs puyi hati lamgba wo iŋ mbayiŋ binɛnɔy
(Mathiyu 8:28-34; Maki 5:1-20)
26Yisɔs iŋ bakarandeni nama beŋ thuhande mankɔ maŋ e kaa ka bompi wo ka Kɛrasa ba dethande iŋ ka Kalili baŋ. 27Naa fuŋ nthɔŋ Yisɔs ka gbe baŋ, kɛna see niŋ hati lamgba wo boho iŋ mbayiŋ binɛnɔy pɛnki ŋaye ka thayoma ka. Wundɛ thooyeta nɔŋ nda yaba. Wundɛ ka nɔŋ nda ka banka nama, yikiya bakɛnama nɔŋ nda ka thayoma ka. 28Naa kute wundɛ Yisɔs na, wundɛ bereŋ wutɔɔkɛ, e hɔrande ka ŋathaki ŋa ka Yisɔs, e yɛla thampa, na “Yisɔs, yindo Hati ka Masaala wo ka thinthi woŋ nthɔŋ nda fooma, mbɛ ba thimo yi yama ba niye? Yaŋ theteke yina. Ba yama gbasaŋati!” 29Wundɛgbonkoynɛŋ baa Yisɔs ni wayi wonɛnɔy woŋ yamari ba fuŋa kɛnama. Timo tima nde, hali na adeŋitoko na wundɛ e thɛnkɔ nama thaŋ iŋ ŋathaki nama ŋaŋ loŋo yɔlɔnkɔiŋ, wundɛ kɔŋ muŋ thenki, e wundɛ thiyo ka wula ka iŋ wayi wonɛnɔy woŋ.
30Huna thonthiŋine niŋ Yisɔs, na “Mbɛ keŋ nda?”
Huna dome wundɛ, na “Keŋ niŋ kuna dɔma Sɛthɛ,” baa wundɛ kɔŋ iŋ mbayiŋ bibɔyɛ bihɛna. 31Mbayiŋ binɛnɔy beŋ theteke Yisɔs na ba wundɛ be tha bindɛ yɛli ka tha ka tha kuyɛkɛŋ koŋ mankande kɛ.
32Ka lɔkɔ babɛina kɔsɛŋ bitɔlɔy bibɔyɛ bi kɔŋ nde kɛndɛ thɛri ka ŋasɛri ŋaŋ. Kɛna theteke mbayiŋ binɛnɔy beŋ Yisɔs na ba ndɛ bindɛ dunkune hɛɛra ba ka thɔɔ ka kɔsɛŋ beŋ. Yisɔs yɛrɔkɔy. 33Mbayiŋ binɛnɔy beŋ fuŋ ka hati lamgba woŋ. Bindɛ key thɔɔ ka kɔsɛŋ beŋ. Kɔsɛŋ beŋ thare fooma. Bindɛ key yɛlɔkɔ ka kudunku ku ka mankɔ maŋ koŋ, kɛna tuukuwe bindɛ fooma.
34Naa kute batɔliŋ kɔsɛŋ beŋ ba thankɛ niyɔ baŋ, bindɛ key kaŋ thara e kaa kaŋ pankitinuwande bɛyiniŋ baŋ baŋ ka mɛti ka iŋ ka dumgbuiŋ baŋ fooma. 35Biya bibɔyɛ key ba ka kuta ba thankɛ niyɔ baŋ. Naa see bindɛ pɛnki Yisɔs na, iŋ hati lamgba wo kanthe wundɛ mbayiŋ binɛnɔy beŋ woŋ doŋe ka ŋathaki ŋa ka Yisɔs wo thɔɔyɛ nda munki nama, wo kele nda nagberere, bindɛ fooma thooyo payɔ. 36Biya bi kutiyɔkɔy beŋ tepe biya bihɛna nɔŋ na puyo hati lamgba woŋ baŋ wo boho nde iŋ mbayiŋ beŋ woŋ. 37Bindɛ fooma thooyo payɔ. Huna biyɛ biya beŋ fooma ŋaye ka bompi wobɛina ka tepe Yisɔs na ba wundɛ kɛndɛ fuŋa. Huna thooye Yisɔs ka gbe e wundɛ fuŋa kɛndɛ. 38Kɛrɛ saanuŋ Yisɔs ba fuŋa, hati lamgba wo kanthe ndɛ mbayiŋ binɛnɔy beŋ woŋ theteke Yisɔs na ba diŋo ka kaa.
Kɛrɛ Yisɔs duutu niŋ e tepe niŋ, 39na “Kaa ka madoŋe makɛnda e yi ka tepe biya beŋ fooma ba niyiyɛ yina Masaala baŋ.”
Hati lamgba woŋ duu kaŋ tɛpuwa ka mɛtiŋ baŋ fooma ba niyiyɛ niŋ Yisɔs baŋ.
Hati yɛrɛmɛ wo ka Yairɔsi iŋ wɔ yɛrɛmɛ wo boheke yaba ba ka Yisɔs baŋ woŋ
(Mathiyu 9:18-26; Maki 5:21-43)
40Naa duu Yisɔs ka thuhaŋ ka, biya beŋ yɛritɔy niŋ wumandiŋ, baa bi nde nda niŋ yumbu. 41Kɛna see wɔ wunthe wo dɔma na Yairɔsi, wo nde bakɛrɛŋ wo ka banka bathuŋuyande ba ka biYusu beŋ baŋ, e ŋɔta ka ŋathaki ŋa ka Yisɔs ŋaŋ e theteke niŋ ba ndɛ be key ka banka nama ka. 42Hati nama woyɛrɛmɛ wo bɛrɛ ba thanina kɔhi iŋ thaye, wo thankɛ niŋ nape, wundɛ ŋoyeŋ ba tuka.
Naa Yisɔs key, biya beŋ pɛnkande niŋ kufɛŋ ndo kufɛŋ, e bindɛ niŋ kɔ nɔthita. 43Ka mateete makɛnamɛŋ wɔ yɛrɛmɛ wunthe kɔŋ nde kɛndɛ wo nde iŋ nthoonaŋ ki ka yɛrɛmɛŋ ba thanina kɔhi iŋ thaye. Wɔ ka wo punkɛ ba niŋ puya. 44Kɛna see wundɛ kaŋ funkande biya beŋ. Wundɛ kɔɔyɛ mahɛŋ ma Yisɔs e wundɛ boheke kulɛmpi-lɛmpi ku ka yaba nama baŋ koŋ. Ka wuthurɔy wubɛina wasi baŋ pɛyi niŋ fuŋa haŋ. 45Huna thonthiŋine Yisɔs, na “Nkaana boheke yaba niŋ baŋ?”
Wɔ yo wɔ thanthiye, huna tepe Pita, na “Karimɔkɔ, biya beŋ fooma yina pɛnkande e bindɛ yina kɔ nɔthita.”
46Kɛrɛ Yisɔs tepe, na “Wɔ boheke yama, baa yaŋ kutɔkɔy wuŋ naa fuŋ yama sɛmbɛ.” 47Naa kute hati yɛrɛmɛ woŋ ba dɔma na ndɛ kothiyo, wundɛ see kaŋ thɛna e si ŋɔta ka ŋathaki ŋa ka Yisɔs. Kɛna gbonkoy wundɛ ka kupɛnkintiyande ku ka biya fooma mu dɔmɛ haaŋ wundɛ boheke Yisɔs na, iŋ nɔŋ na pethiye wundɛ kɔɔ hanthe. 48Huna tepe Yisɔs, na “Hatiŋ woŋ, lanɛya bakɛnda petheŋ yina; kaa iŋ mathɛbɛ.”
49Saanuŋ wundɛ ba thanka gbonkiya, baseri tɛŋ ŋaye ka banka ba ka bayaha woŋ baŋ, ba dɔma, na “Hati nda woyɛrɛmɛ woŋ tuku; ba nda ni karimɔkɔ na thɔrɔ.”
50Kɛrɛ naa yuye huŋ Yisɔs, wundɛ tepe Yairɔsi na, na “Ba payɔ; niya nthuŋ lanɛya, awa hati nda woŋ kɔŋ pethɔ.”
51Naa biyande Yisɔs ka banka ba ka Yairɔsi baŋ, wundɛ tha mɛyi ba wɔ yo wɔ wohɛna biyande iŋ wundɛ, yɔkɔŋ Pita, Yɔni, Yemisi, iŋ fanda ka hati woŋ mɛnɛ nanda ka hati woŋ. 52Wɔ yo wɔ abereŋ, aboki ba hati woŋ, huna tepe Yisɔs, na “Baŋ bereŋ, hati woŋ tuketa; nine huna hɔkɔŋ wundɛ nine!”
53Biya beŋ fooma ahɛthi Yisɔs na, baa bindɛ fooma kɔthɛŋ ba dɔma na hati woŋ tuku hɛ nda wuthɔɔkitɛ. 54Kɛrɛ Yisɔs bohe niŋ kugbeke; wundɛ yentheŋeŋ niŋ, e thiya niŋ wuŋatɛ, na “Hatiŋ woŋ, ŋayi ka kɔɔ!” 55Kɛna duu yina wokɛnama woŋ e hɛma, e ŋayi ka kɔɔ kɔɔ hanthe. Yisɔs tepe bindɛ ba bindɛ niŋ dunkune muthɔma. 56Komisɛŋ beŋ ni kukabanɛ, kɛrɛ Yisɔs yeli bindɛ ba bi be tha huŋ tepe wɔ ba bɛyiniŋ ba niyɔy baŋ.
Currently Selected:
Luku 8: LMBNT
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society of Sierra Leone, 2011