Pula 31
31
Pangkoh ci kooɗu na in ci ɓa haɓɗan
1Nikiɗi woyissa Musaa ne : 2« Marka, ŋ taniɗ Betsalel, kuɓu Uri, a setiŋ Hur, a ɓaah ŋ cuuɓiŋ Yudaa. 3Ŋ ɓekiɗ Fuuɗsiŋ ngo nga ɗe po a raakiɗ min-min, a ñaañiɗ, a raakiɗ inah-inah ŋ panguk nu nik ; 4a miniɗ marak po a inah findi a joy haɓɗoh in moɗiɗ ngaŋ urus, haalis wala moos. 5A miniɗ pes atoh peme, a namiɗ min ɓek peme ŋ ɓekoha, a miniɗ pes kidig, a miniɗ haɓiɗ panguk nu nik.
6Ɓaat nga, ŋ eɗiɗ ɗe Oholiyaab kuɓu Ahisamaak yi ɓaah ŋ cuuɓiŋ Daan, ne a ɓaatɗoh ɗe, te ɓooɓi herñiɗ ci jen, ŋ namiɗ ɓa on min-min ne ɓa min haɓiɗ in ci ŋ nak ɗa cii jen :
7Ɓeɗ haɓɗan Ɗiipi-na-Cohohse, na Wahndeeni ɗaak in ci na teeɓohe Ambtiɗohi na kunohaaniŋ wa na tosohse, na tumohaaci nik ŋ ɗiipi jen.
8Ɓa haɓiɗ taaɓli na tumohaaci hunan naa, na degohaaniŋ laampaaci haɓɗohsan urus koceet na in ci hunan naa jen, na seeƴkohaani suusohsan cuuraay ci.
9Ɓa haɓiɗ seeƴkohaani na hee dohohse hoosuuɗ ci na tumohaaci hunan naa jen, na beñwaari na degohaaniŋ wa.
10Ɓa haɓiɗ kulɓaaci ɓekkassan ŋ hew, ca nikka kulɓaaci hooliɗ ciŋ Aaruna seeƴkiɗohi, na kulɓaaciŋ kuɓuuciŋ ɗe ƴaar ci, ne ɓa pangkiɗee so findi seeƴkiɗoh ɗah.
11Ɓa haɓiɗ diwi hoolɗohsan hoolɗuuɗ ci wuu so, na cuuraayi eeñiɗi tumsan ŋ Ɗiski Hooliɗi.
Pangkoh ci hey ca haɓɗe findi ŋ nakoh ɗa ca jok. »
Iɗsiɗki ŋ pangki
12Nikiɗi woyissa Musaa ne : 13« Woytoha Israayel ci, woyaa ɓa ne : “ Nikiɗi woo ne : ‘Ŋ pangkeem jen, ɗu hey eɗe mbeh ciŋ ngo na iɗsiɗkohse cir, laam, ca na hee nike ini na hee teeɓohe ŋ harmban ndo na ɗu na ɓi na hee rimkohe nga ɗu ne ñam Nikiɗi, yi hooliɗ ɗu wuu so. 14Ɗu hey iɗsiɗke ŋ mbehi na iɗsiɗkohse, wa na hee nike nga ɗu in hooliɗ wuu so. Ɓo' nu tumɗaa mbeh hooliɗ ɗah, a hey apse, te ɓo' nu panguk nga ɗah, a hey pulɗasse ŋ cuuɓi a ɓaahoh.
15Mbeh yasna-yino ceɗ na hee pangkohse, mbehi yasna-kanakɗoh weɗ wi na iɗsiɗkohse, wi hoolɗu wuu so mi yi Nikiɗi. Ɓo' nu panguk ŋ mbehi na iɗsiɗkohse ɗah, a hey apse. 16Israayel ci hey eɗe mbehi na iɗsiɗkohse cir, ɓa yakɗee wa, ɓeɗ na ɓi na hee rimkohe nga ɓa, wa nikan ambtiɗoh ŋ harmban ɓoo te wa genan gen. 17Wa na hee nike mandarga, wi genan gen ŋ harmban ndo na Israayel ci, laam ŋ neeh yasna-yino, ŋ feriɗ eel ci na kehƴi, mi yi Nikiɗi, ŋ faɗta neeha yasna-kanakɗoh, ŋ iɗsiɗukka.’ ” »
18Wa Nikiɗi ƴut woo na Musaa ŋ ɗafuk tangooraŋ Sinaay, a eɗta ɗe atoh ca kanak ca ɗapas ca woo ciŋ Ambtiɗohi fiisohse, atoh ca fu inah ne a Kooh fiisootee ca.
Currently Selected:
Pula 31: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc