Pula 29
29
Findi Aaruna na kuɓuuciŋ ɗe tumohsan seeƴkiɗoh
1Nikiɗi woyissa Musaa ne : « Fu hoolɗee Aaruna na kuɓuuciŋ ɗe wuu so ne ɓa nik ŋ pangkiŋ ngo findi seeƴkiɗoh ɗah, fu na hee tumohe an : Fu ɓayan naar ƴin yino raakaaɗi sikka na kuy mbaal kanak raakaaɗi sikka, 2fu nam ɓay mun bele baahiɗ, fu haɓiɗ mbuuru raakaaɗi lawiir na ɗang raakaaɗi lawiir hiiñohuuɗ diwliin, fu nam haɓiɗ ɗambaañ raakaaɗi lawiir laalɗuuɗ diwliin. 3Fu tum ca ŋ pañe yino, fu eɗoh ca wuu so ŋ ɗiska hooliɗa, ceɗ, na naari, na kuy ci kanak ci.
4Fu ɓay Aaruna na kuɓuuciŋ ɗe po ŋ aasohaaniŋ Ɗiipi-na-Cohohse, fu ɓook ɓa na masuɓ. 5Fu ɓekiɗ Aaruna kulɓaakiŋ ɗe : kulɓaaki adginkohaani na wi hutiɗi yakki, na efoodi, na nafaani ŋ fikiiri. Fu tokiɗ ɗe efoodi na tokɗukohaaniŋ wa nik ŋ kinoh ki. 6Fu ɓekiɗ ɗe mbahne, fu pengu ŋ ɗafuk mbahneeri tokkaahiŋ puki na teeɓohe ne a wuu so.
7Fu ɓay diwi na hoolɗohse, fu yiifa ŋ hafiŋ ɗe, fu tufkiɗ ɗe, a nik seeƴkiɗoh. 8Fu nam woo kuɓuuciŋ ɗe ɓa reɓ, fu ɓekiɗ ɓa kulɓa. 9Fu tokiɗ [Aaruna na] kuɓuuciŋ ɗe seentur ŋ kinoh ciŋ ɓa, fu waakiɗ ɓa mbahne, jaar fu tufkiɗ ɓa, ɓa nik seeƴkiɗoh ci, wa nik nakohi genan gen.
10Fu ɓay naari ŋ nguɓu Ɗiipi-na-Cohohse, Aaruna na kuɓuuciŋ ɗe deg yaah ciŋ ɓa ŋ hafiŋ ɗe. 11Fu hoos ɗe nga ŋ fikiiso mi yi Nikiɗi. 12Fu ɓay ŋ ñif miŋ ɗe, fu reef na ndukniŋ ɗa ŋ wiic ciŋ keesi seeƴkohaani, fu yiif wi tas ŋ kehƴiŋ wa. 13Fu nam ɓay faymi ŋ soohi jen na yoorɗiŋ keeñi na iraak ci kanak ci na faymiŋ ca, fu doh ca ŋ ɗafuk seeƴkohaani. 14Waaye ini tas ŋ faani na undi na haɓit ci, fu na hee ca dohe ŋ bilaf fa. Seeƴkeem, weɗ seeƴki wuu bakaaɗ ci.
15Fu ɓay kuyiŋ mbaali yinoori, Aaruna na kuɓuuciŋ ɗe deg yaah ciŋ ɓa ŋ hafiŋ ɗe. 16Fu hoos ɗe, fu ɓay ñif miŋ ɗe, fu lisa ŋ ɓak ciŋ seeƴkohaani jen. 17Fu nguɗsoh ɗe, fu ɓook soohi na soongal ci, fu deg ca ŋ nguɗ ciŋ sepet ci na hafi. 18Fu doh ca jen ŋ ɗafuk seeƴkohaani. Seeƴkeem, weɗ seeƴki na hoomɗasse wuu so mi yi Nikiɗi, wa na hee hey dohse po wa eeñee so.
19Fu hay na kuyi tas, Aaruna na kuɓuuciŋ ɗe deg yaah ciŋ ɓa ŋ hafiŋ ɗe. 20Ƴut ɗah, fu hoos ɗe, fu ɓay ŋ ñif mi, fu reef ŋ yoorɗiŋ nofiŋ Aaruna ñaahmi na ciŋ kuɓuuciŋ ɗe. Fu nam reef ndukun ci yakak ci ŋ yaah ciŋ ɓa ñaahum ci na tukun ci yakak ci ŋ kot ciŋ ɓa ñaahum ci, fu lis ñif mi tas ŋ ɓak ciŋ seeƴkohaani jen.
21Fu ɓay ŋ ñif mi nik ŋ ɗafuk seeƴkohaani, fu ambsoha na diwi na hoolɗohse, fu lisa ŋ ɗafuk Aaruna na kulɓaaciŋ ɗe na ŋ ɗafuk kuɓuuciŋ ɗe na kulɓaaciŋ ɓa. Ŋ ineem, fu hooliɗ Aaruna na kulɓaaciŋ ɗe, na kuɓuuciŋ ɗe na kulɓaaciŋ ɓa.
22Fu ɓay faymiŋ kuyi, na koseekiŋ ɗe na faymiŋ wa, na faymiŋ soohi, na yoorɗiŋ keeñi, na iraak ci kanak ci na faymiŋ ca, fu ɓekndoh rambiŋ ɗe ñaahmi nga, laam a mbaali na tufkiɗohse. 23Fu nam ɓay in ci raakaaɗi lawiir cii : mbuuru ɗapas yino, na ɗang haɓɗohuuɗ diwliin, na ɗambaañ yino, ŋ pañeeni nik ŋ fikiiso.
24In ci fu ɓay ceem jen, fu deg ca ŋ yaah ciŋ Aaruna na kuɓuuciŋ ɗe, fu woo ɓa, ɓa raɗis so ca mi yi Nikiɗi. Eɗoheem weɗ eɗohi na raɗsasse. 25Ƴut ɗah, fu tey ca nga ɓa, fu doh ca ŋ ɗafuk seeƴkohaani po ca hoom ; wa nikan seeƴki dohsan ŋ fikiiso po wa eeñee so mi yi Nikiɗi.
26Fu Musaa, fu ɓay daɗiŋ kuyi kanakɗoh, yi Aaruna tufkiɗohse, fu raɗis so wa mi yi Nikiɗi findi eɗohi na raɗsasse, ƴut ɗah, wa nik wuu fu.
Waɗiŋ seeƴkiɗoh ci
27Findi ɗu raɗsoh ho daɗiŋ kuyi na tufkiɗohse, ɗu eɗta so rambiŋ ɗe ñaahmi, wa nikohaat ɗaa ŋ seeƴuk ci na haye. Ɓak ci kanak ceem, fu hey ca hoolɗe wuu so mi yi Nikiɗi, te ca nikan waɗiŋ Aaruna na ɓi na hee rimkohe nga ɗe. 28E Israayel ci eɗan ɓa ca ; wa nakohi genan gen, ca nikan in ci Israayel ci waɗan ndo ne ɓa seeƴkee seeƴuk wuu jam ɗah.
Lamuukiŋ kulɓaaci
29Aaruna kaan ɗah, kulɓaaci a meeɗ to nikiɗoh, e ɓi rimkoh nga ɗe eɗsan ca ne ɓa yiifsee diwi na hoolɗohse ɗah ŋ mbeha ɓa camban pangki. 30Kuɓkiŋ ɗe yi laman ɗe ŋ seeƴki, hey ca ɓekke neeh yasna-kanak, ne a aasee ŋ Ɗiipi-na-Cohohse ne a panguk ŋ Ɗiski Hooliɗi ɗah.
Findi seeƴkiɗoh ci ñamohan ŋ seeƴki
31Fu ƴut tufkiɗ Aaruna ɗah, fu ɓay sepet ciŋ kuyi tufkiɗohse, ca tiku ŋ ɗisik hooliɗ wuu so. 32Aaruna na kuɓuuciŋ ɗe hey ñame sepet ci ŋ nguɓu Ɗiipi-na-Cohohse na mbuuruuci nik ŋ pañeeni. 33E ɓeɗ dong ñaman nga ca, ca seeƴuk ci ɓa toskoh wi ɓa tufkiɗasse, ɓa nikka ɓo' hooliɗ. Ca in hoolɗuuɗ weɗ tah ali ɓo' wiiriis ñamanɗi nga ca. 34Te in tas ŋ sepet ci wala mbuuruuci po na ɓaaɓa ɗah, ca heyɗi ñamse ; dohaa ca doh, ca in hoolɗuuɗ.
Findi seeƴkohaani ɓoktohsan
35Findi ŋ nakoh ɗa wa jok, fu tumohan na Aaruna na kuɓuuciŋ ɗe ɗaa ; tufkiɗiŋ ɗa na ɓa raakan neeh yasna-kanak. 36Kooh-nu-wiis, fu hey seeƴkohe naar ƴin, wa nik seeƴki wuu bakaaɗ ci, waɗ fu tosohan seeƴkohaani, fu ɓokita ŋ bakaaɗ ; fu yiifa diwi na hoolɗohse ne fu hooliɗa wuu so. 37Ini ree neeh yasna-kanak, fu tosan seeƴkohaani, fu hooliɗa wuu so, wa nik in ye hoolan te in nu laala ɗah, wa jaaran nik wuu so. »
Seeƴki genan gen
38Nikiɗi woyissa Musaa ne : « In cii ceɗ fu na hee seeƴkohe ŋ ɗafuk seeƴkohaani : fu seeƴkan Kooh-nu-wiis na kuy kanak ci raak kiis yino, te wa genan gen. 39Fu seeƴkoh yii na ɓaaɓ ɗah, fu seeƴkoh yi tas na niin.
40Kuyi koc hunan na andaar mun kaahay hiiñuuɗ na liitar diwliin koceet na camban, a nam hun na liitar biiñ na camban. Biiñi nikan seeƴuk aamaah ŋ ɗisik wuu so. 41Kuyi kanakɗoh, fu na hee ɗe seeƴkohe na niina, a hunan na in ci fu hunɗee na ya na ɓaaɓa, wa nikan seeƴki dohsan ŋ fikiiso po wa eeñee so mi yi Nikiɗi.
42Wa na hee nike seeƴuk hoomɗaah, wa genan gen, gomal nu gomal. Ɗu na hee wa seeƴke ŋ aasohaaniŋ Ɗiipi-na-Cohohse, ŋ fikiiso mi yi Nikiɗi, ŋ cohan na ɗu ŋ ndeem ne ŋ woo na ɗa. 43Te ŋ naman coh na Israayel ci ndeem, ɗiski hey hoole sagu yaki ŋ yak. 44Ŋ hey hoolɗe Ɗiipi-na-Cohohse, ŋ hooliɗ seeƴkohaani, ca min nik wuu so. Ŋ hey tume Aaruna na kuɓuuciŋ ɗe ɓo' hooliɗ, ɓa pangkiɗee so findi seeƴkiɗoh.
45Ŋ genan na Israayel ci, ŋ nikan Koohiŋ ɓa. 46Ɓa hey inhe ne ñam Nikiɗi, Koohiŋ ɓa yi pulɗoh ɓa Misra ne ŋ gen ŋ ɗooƴ ɓa. Ñam Nikiɗi Koohiŋ ɓa. »
Currently Selected:
Pula 29: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc