Pula 28
28
Kulɓaaciŋ seeƴkiɗohi
1Fu Musaa, fu hey ɓeeɗke yakak fu Aaruna na kuɓuuciŋ ɗe ƴaar ci : Nadab na Abihu na Elasaar na Itamaar. Fu hey ɓa kooɗohe ŋ Israayel ci, ɓa pangkiɗee so findi seeƴkiɗoh. 2Fu haɓɗohana an : Fu hey haɓɗiɗe yakak fu Aaruna kulɓa moɗiɗ, hooliɗ wuu Kooh, wi na teeɓohe yaki a yak.
3Fu nak pangkoh ci ŋ baahiɗ yaah ciŋ ɓa ŋ panguk, ɓa haɓɗiɗ Aaruna kulɓaaci a ɓekkan ne a tufkiɗassee findi seeƴkiɗoh wuu so ɗah.
4Kulɓaaci nikan : Efood, na kulɓa hutiɗ yakiɗ na kulɓa mbaseñ adginkoha na mbahne na seentur. Efoodi mandan na taaɓalye hun na nafa ŋ fikiiri. Kulɓaaceem, ceɗ ɓa haɓɗiɗan taambɗoh fu Aaruna na kuɓuuciŋ ɗe. Ca nikan kulɓa hooliɗ ne ɓa min ndo pangkiɗ findi seeƴkiɗoh.
5Ɓa haɓɗee ca ɗah, ɓa ɓayan leeŋ, na fiil urus, na ooy bulo na ruumind eɗfiɗ na ruumind coy.
Efoodi
6 Efoodi, wa haɓɗohsan leeŋ eɗfiɗ ndengɗuuɗ ambsohuuɗ na fiil urus, na ooy bulo na ruumind eɗfiɗ na ruumind coy. Wa nikan panguk feroh keeh-keeh. 7Wa hey suptiɗasse ngalla kanak ŋ lecem ci ŋ ɗafki ne wa min ɓekku. 8Wa hey raake tokɗukoha ŋ kinoh ki, wa na efoodi, ceɗ hunan, ca nikan piis yino.
9Fu hey ɓaye atoh peme kanak, wa nikaat pemeeni na woyse sooham#28:9 sooham : marka ini fiisu ŋ aaya 17., te ngaŋ pemeeceem, fu fiis tiik ciŋ kuɓuuci ƴaar ciŋ caac ɗu Israayel nga ca. 10Tiik ci yasna-yinooci fiisuusa ŋ pemeeni winoori ɗah, yasna-yinooci tas fiisu ŋ pemeeni tas ; ca ñaakɗoh findi kuɓuuci raakohu. 11Fu fiisohan ca findi ñaas na ñaasohse, fu ɓay fiil urus, fu teɗiɗ ca ɗisik ci ca ɓeksan.
12Atoh ci kanak ci tumsan ŋ ngallaaciŋ efoodi ne ca naandsohee cuuɓ ciŋ Israayel ; Aaruna hayya nga so ɗah, tiik ci hey nike ŋ fikiiso mi yi Nikiɗi, te ŋ alkohanɗi ɗu. 13Fu hey teɗe ɓekohaaca na fiil urus. 14Fu nam haɓiɗ ceen kanak ; ceen ci mondohsan fiil urus koceet findi niy, ca ambɗu ŋ ɓekohaaciŋ pemeeci.
Nafaani
15Fu hey haɓɗe nafa tumoha markiskohaaci, wa nikan panguk feroh keeh-keeh. Fu haɓɗohana leeŋ eɗfiɗ ndengiɗ, na fiil urus na ooy bulo na ruumind eɗfiɗ na ruumind coy, findi efoodi. 16Wa nikan kaare ne wa lemu kanak ɗah, ɓak nu nga nik santimeetar ndaŋkiyaah-kanak na yatuus (25).
17Fu hey wa moɗsine na raŋalɗoh atoh peme nikiis : raŋalɗohi koc raakan atoh ci moɗohngaan ci na woyse#28:17 Pemeecii, e peɗeem heber eɗ ca tiik cii. Ca atoh moɗoh na moɗoh, ca miniɗ pesu po ca muuy, ca melciɗee melciɗ. Marka ini woyu ŋ "pemeeciŋ efoodi" ŋ tiik ci inhassaaɗiici. :
odem na pitdaah na baareket.
18Wi kanakɗoh raak nopek na safiir na yaahalom.
19Wi kaahayɗoh raak lesem na saboo na ahlamaa.
20Wi nikiisɗoh raak tarsiis na sooham na yaspeeh.
Peme nu nga ɗah teɗɗu ɗiski wa ɓeksan na fiil urus, wa ɓeku nga. 21Tiik ciŋ kuɓuuci ƴaar ciŋ caac ɗu Israayel fiissan ŋ atoh ci ndaŋkiyaah ci na kanak ceem (12), ca fiisohsan findi ñaas na ñaasohse. Peme nu nga ɗah nikiɗ tiik cuuɓ yino.
22-25Fu hey ɓaye ceen ci urus koceet ci teɗuuɗ ci ambɗu ŋ ɓekohaaciŋ pemeeci kanak ci nik ŋ efoodi. Fu haɓɗiɗ ca koroha urus kanak haa kiñi ŋ koñ ciŋ nafaani ŋ ɗafki. Fu kor ceen ci ŋ kiñiiceem po nafaani min nik ŋ fikiiri.
26-27Fu haɓɗis koroha urus nikiis haa kiñi. Kanak ci, ɓeksan ŋ koñ ciŋ nafaani ŋ kehƴi, ŋ ɓakiŋ ɗooƴi, ca laalee efoodi ; kanak ci tas ɓeku ŋ ngallaaciŋ efoodi ŋ kehƴi, ngaŋ fikiiri, ŋ sero ɗiski ca suptu, ŋ ɗafkiŋ tokɗukohaaniŋ kinoh ki. 28Kiñiiciŋ nafaani na ciŋ efoodi hey tokɗohse na niy bulo, ne nafaani amb ŋ tokɗukohaaniŋ kinoh ki, wa sang yoond, wa ris ŋ ɗafuk efoodi.
29Ŋ ineem, Aaruna aassa ŋ Ɗiski Hooliɗi ɗah, nafaani tuman markiskohaaci hey nike ŋ fisaariŋ ɗe na tiik ciŋ kuɓuuci ƴaar ciŋ caac ɗu Israayel fiisu nga te mi yi Nikiɗi, ŋ alkohanɗi ɗu muk.
30Fu hey ɓeke Uriimi na Tumiimi na markisohse ŋ ɗooƴ nafaani, ca nik ŋ fisaariŋ Aaruna ne a aase ne a hay ŋ fikiiso ɗah, ca genan gen ŋ fisaariŋ ɗe ne Israayel ci meekissa so ini ɓa joy haɓiɗ ɗah, ɓa inah lofiŋ ngo mi yi Nikiɗi.
Kulɓaaki hutiɗi yakiɗi
31Fu hey name haɓɗiɗ Aaruna kulɓa hutiɗ yakiɗ, wi hunan na efoodi ; haɓɗohaata jen leeŋ bulo. 32Mbooh kiŋ wa nikan ŋ leerni daamina'u po wa ndeng, ne wa faarkuu. 33Fu moɗsin kehƴiŋ kulɓaaki hutiɗi yakki na rim garnaat, fu haɓɗohan ca ooy bulo, na ruumind eɗfiɗ na ruumind coy po wa wil. Fu hey ɗooke ŋ harmban ca ɓi joolooli urus ; 34fu haɓiɗta rim garnaat yino ɗah, fu ɗook joolooli urus yino po sereendiŋ kulɓaaki jen wil.
35Aaruna ɓekkan kulɓaakeem ne a pangkee findi seeƴkiɗoh ɗah. Joolooliici hey kerhasse ne a aasee ŋ Ɗiski Hooliɗi ŋ fikiiso mi yi Nikiɗi ɗah, wala a pulee ɗah, a lafkuu kaan.
Tokkaahi nikan ŋ puki
36Fu hey haɓɗe na urus koceet tokkaah ŋ puk, wa mandan na pos kidig, fu fiis woo kii nga : "Wuu Nikiɗi". Fu fiisohana findi ñaas na ñaasohse. 37Fu toka na tokɗoha bulo ŋ fiki mbahneeri. 38Tokkaaheem genan pukiŋ ɗe ne a hayee ŋ fikiiso mi yi Nikiɗi ɗah, ŋ min teyɗuk onoh ci Israayel ci eɗohan wuu so jen ; ali ɓa ɗal ŋ eɗohiŋ ca sah, Aaruna heya mine gaduk.
Kulɓaaci tas na mbahneeri na seenturi
39Fu hey teɗɗe Aaruna kulɓa mbaseñ adginkoha ; wa teɗohsan leeŋ. Fu haɓɗiɗ ɗe mbahne na leeŋ, fu nam ɗe haɓɗiɗ seentur, wa borode'u.
40Fu hey name teɗiɗ kuɓuuciŋ ɗe kulɓa moɗiɗ, ca hun na seentur ciŋ ca, na mbahne, ca teeɓoh yaki ɓa yak.
Tufkiɗiŋ Aaruna na kuɓuuciŋ ɗe
41Fu Musaa, fu hey ɓekɗe yakak fu Aaruna na kuɓuuciŋ ɗe kulɓaaceem, fu yiif haf ciŋ ɓa diwi na hoolɗohse, fu dengkoh ɓa pangki, fu tum ɓa ɓo' hooliɗ, ɓa pangkiɗee so findi seeƴkiɗoh.
Jataaci
42Fu hey ɓa haɓɗiɗe jata, ca nikan leeŋ, ca ambohan kinoh ki po ŋ ramb ci, ɓa nikuu tas-ɓarang. 43Aaruna na kuɓuuciŋ ɗe ɓekuk ca ne ɓa aasee Ɗiipi-na-Cohohse wala ɓa reɓee ŋ seeƴkohaani ne ɓa pangkiɗ to ŋ Ɗiski Hooliɗi ɗah. Ŋ ineem, ɓa teeɓkanɗi so tas ɓarang te ɓa lafkanɗi kaan sagu ineem. Wa nakohi Aaruna na kuɓuuciŋ ɗe na set ciŋ ɗe taambɗan po faw. »
Currently Selected:
Pula 28: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc