Pula 21
21
In ci Kooh nakoh ŋ Heberi ñaami
1Nikiɗi taalndiɗta woyeeɗa na Musaa an : « Nakoh cii, ceɗ fu na hee degɗe Israayel ci :
2Ɓo' nu rom ñaami nik Heber ɗah, a pangkiɗan ɗe kiis yasna-yino. Ŋ kiis ka yasna-kanakɗoh, ñaameem pul nga te a wirndanɗi ali in. 3Nik ne a ƴaar, te wa a na romse, raak ɗe raakɗi ɓitiɓ ɗah, a pulan nga raakaaɗi ɓitiɓ. Wa raak ɗe raakeen ɓitiɓ ɗah, ɓitiice pulan na ɗe. 4Nik ne ɓoyi rom ɗe, a yi waakiɗ ɗe ɓitiɓ te ɓitɓeem raak na ɗe kuɓu ƴaar wala ɓitiɓ ɗah, ɓitɓi na kuɓuuci jen tasan na ɓoyi romee ɗe ; a yi dong pulan.
5Waaye a woo wooriɗ ne, a waaɗiɗ heɗ ce, na ɓitiice na kuɓuuciŋ ɗe po a waaɗɗi pul a raak haf ce ɗah, 6heɗ ce hey ɓaye Kooh#21:6 "heɗ ce hey ɓaye Kooh findi seede" : ini heber woo ndii, wa namiɗ min tokis "heɗ ce hey ɓaye kilifaaci findi seede". findi seede, a tikin nofiŋ ɗe ŋ yahndeeriŋ kahni, a oƴa, jaar a nik ñaamiŋ ɗe ŋ ini tas ŋ kipes kiŋ ɗe jen.
7Ɓo' nu toon kuɓkiŋ ɗe ɓitɓi findi ñaami kilooksan ɗah, yeem heyɗi pule findi puliŋ ñaam ci ɓinooɓi. 8Ƴaari rom ɗe, nik ne a waaɗee ɗe ɓitiɓ, kaɗ po a neɓisɗi ɗe ɗah, a hey yooɓɗiɗe ɓaah ciŋ ɓitɓeem ne ɓa romis ɗe. Ŋ wori a wor ɗe weem a faɗta ɗe, a minanɗi ɗe toon jaambur. 9Nik ne ƴaari rom, a romiɗ ɗe kuɓkiŋ ɗe ƴaari ɗah, a ambaat ɗe findi kuɓu ɓitiɓ na ambohse. 10Waa nu wa min nik nga ɗah, ɓayis ɓitiɓ wiiriis ɓaat nga ɗe tahanɗi po, in haawsu ŋ kañam kiŋ ɗe wala ɓekkaahiŋ ɗe wala ayiŋ ɗe. 11A tumɗuuɗi yino ŋ in ci kaahay ceem ɗah, a hey mine coot moɗoɗ te wa raakanɗi wirind.
In ci Kooh nakoh ŋ bakaaɗ ci joy tah ɓo' apu
12Ɓo' laɓ ɓo' po a ap ɗe ɗah, a apsan apu. 13Raak ɗe tiiɗaa, waaye wa taamb taamb ŋ yaah ciŋ ɗe ɗah, ŋ hey ɗa teeɓe ɗiski a joy naafkoh. 14Nik ne a aƴaaruk ɓek ɗe nga po a ñaañohha ɗe a appa ɗe ɗah, ali a naafuk ŋ seeƴkohaaniŋ ngo sah, kooɗohaat ɗe nga ne a apu.
15Ɓo' laɓ yaayiŋ ɗe wala baabiŋ ɗe ɗah, a apsan apu.
16Ɓo' rok ɓo', a ambu na ɗe wala raak ɗe tooniɗ ɗe ɗah, a apsan apu.
17Ɓo' nu kiimiɗ yaay ɓa wala baab ɓa moɗaaɗi ɗah, a apsan apu.
In ci Kooh nakoh ŋ laɓoh na gaañoh
18Ƴaar nu ngaskohee na morom ce po a tap ɗe kurpañ wala atoh, a kaanɗi waaye wa faan ɗe, 19a mirndoh kuruk, po a pul a tiindsukee na ndooɗ ɗah, ƴaari tapoh heyɗi tumse in, a wirndan wirind neeh ci yeem joyee panguk dong, te a paƴ ɗe po a wir.
20Ɓo' nu ɓay ndooɗ a laɓ ñaamiŋ ɗe ƴaar wala ɓitiɓ po a ap ɗe ɗah, ñaameem hey wirndukɗasse. 21Waaye wa deg neeh yino wala kanak, a kurkiɗuk ɗah, cari a car koporiŋ ɗe hey tahe po, a heyɗi wirndukɗasse.
22Ɓi ɓo' hiñohee po ɓa tapuk ɓitiɓ rook, a taamboh nga, a ar raak kuɓu te wa ɓekɗi ɗe in ɗah, ɓoyi tapkoh wirndan wirind ƴaar ɓitɓeem ini a meeksohan te a wirndana ŋ fiki atte'oh ci. 23Waaye in wiiriis raak nga ɗah, kiñin wirndohsan kiñin ; 24has wirndohu has ; sis wirndohu sis ; yaah wirndohu yaah ; kot wirndohu kot ; 25doh wirndohu doh ; gaañ wirndohu gaañ ; ɓuur wirndohu ɓuur.
26Ɓo' nu laɓ ñaamiŋ ɗe ƴaar wala ɓitiɓ po a eɗ hasiŋ ɗe ɗah, a hey ɗe faɗe a raak haf ce, wa nik wirndiŋ hasi a aam. 27A cal sis ɗah, a hey ɗe faɗe a raak haf ce, wa nik wirndiŋ sisi a cal.
In ci Kooh nakoh ŋ ɗoopaat ci
28Inoh nu maang ɓo' po a ap ɗe ɗah, a tapsan tapu atoh po a kaan, septi sah ñamsanɗi, waaye heɗ ce heyɗaa ambohse. 29Nik ne a saahee saah po heɗ ce woyuusaa te a niiɗɗi ɗe po a appa ɓo' ɗah, inoh feem tapsan tapu atoh po a kaan, heɗ ce nam apu. 30Heɗ ce woyu ne a wirndan wirind ne a pes ɗah, a wirndan in nu a meeksu ɗah. 31Nik ne a maang komaaki ƴaar wala ɓitiɓ ɗah, a naman tumu ɗaa. 32Nik ne a ap ñaam ƴaar wala ɓitiɓ ɗah, heɗ ce joy wirind heɗ ñaami ƴel haalis ndaŋkiyaah-kaahay (30) te inoh fi tapu atoh po a kaan.
33Ɓo' nu kunis ngurtut wala a ac naac, a faɗa kunsaaɗi po inoh wala mbaam jaambur keen nga ɗah, 34heɗ wa hey wirnde candoomiŋ ɗoopti kaanɗi, a raak ɗe.
35Inoh nu maang inoh wiiriis, a gaañ ɗe po a kaan, raak ca ɓaahɗi heɗ ɗah, inoh fi maangoh hey toonse, ɓi raak ca paysoh haalsi na inoh fi kaan. 36Waaye nik ne wa inhasseen ne inoh fi apoh maañiɗ na saah kiŋ ɗe po heɗ ce woyuusaa te a niiɗɗi ɗe ɗah, a hey kooɗe inoh fi kaan, a wirndoh ɗe inoh wiiriis.
37Ɓo' nu rok inoh wala mbaal, a ap ɗe wala a toon ɗe ɗah, a na hee wirndohe inoh yatuus nik ne a rok inoh ɗah, wala mbaal nikiis nik ne a rok mbaal ɗah.
Currently Selected:
Pula 21: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc