Pula 20
20
Nakoh-ci-Ndaŋkiyaah-ci
1Mbaɗi, Kooh woyiɗ Israayel ci woo cii jen an :
2« Ñam Nikiɗi, ñam Koohiŋ ɗa, mi yi pulɗoh ɗa Misra, ŋ ɗiska fu nikee ñaam.
3Fu raakanɗi kooh wiiriis ɗal mi.
4Fu haɓɗanɗi nataal fu ñaamkee ca. Ca nik ŋ in ci ŋ ɗafki, wala ca nik ciŋ kehƴi, wala sah ciŋ masmi ŋ ooɓ kehƴi. 5Te fu heyɗi ca ƴekɗe, fu heyɗi ca ñaamke. Laam mi yi Nikiɗi Koohiŋ ɗa, ŋ teyɗukɗi ɓaah ɗa na in, ñam na mbugale kuɓuuciŋ baab ci sang ngo, na kuɓuuciŋ ɓeem, po ŋ set ca na setaat ca. 6Ŋ teeɓohee keeñkohiŋ ngo po ŋ gomal junni (1000) ŋ ɓi waaɗ to, te ɓa haɓɗee in ci ŋ nakoh.
7Fu heyɗi njirñiɗkohe tiikiŋ Nikiɗi Koohiŋ ɗa ŋ woo ɓarang ɓarang ; mi yi Nikiɗi, ŋ faɗanɗi ɓo' a njirñiɗkohee tiikiŋ ngo ŋ woo ɓarang ɓarang.
8Ɗaakkoha nof mbehi na iɗsiɗkohse ne fu tuma mbeh hooliɗ wuu so. 9Fu raakiɗ neeh yasna-yino ne fu haɓiɗ pangkiŋ ɗa nga jen. 10Waaye mbehi yasna-kanakɗoh, weɗ wi na iɗsiɗkohse, yakɗoha Nikiɗi Koohiŋ ɗa. Fu heyɗi pangke nga, fu na kuɓuuciŋ ɗa, ƴaar na ɓitiɓ ; na ñaam ciŋ ɗa, ƴaar na ɓitiɓ ; na ɗoopaat ciŋ ɗa po ŋ jaambri gen kahan fu sah. 11Laam, ngaŋ neeh yasna-yino, ŋ haɓɗiɗ eel ci na kehƴi na cookmi na in ci nik nga ca jen, ŋ faɗta mbehi yasna-kanakɗoh ŋ iɗsiɗukka nga, weɗ tah ŋ barke'iɗta mbeheem, ŋ tummbaa wuu so.
12Eɗa yaay ɗu na baab ɗu cir ne fu min raak kipes hutiɗ ŋ kehƴa ŋ eɗan ɗa, mi yi Nikiɗi Koohiŋ ɗa.
13Fu apanɗi ɓo'.
14Fu njaaloo'anɗi.
15Fu rokanɗi.
16Fu woyɗanɗi morom fu ini a tumɗi.
17Fu waaɗɗanɗi haf fu iniŋ morom fu, a kahan ce haa, ɓitiice haa, a ñaamiŋ ɗe ƴaar mbaa ɓitiɓ haa, a inoh fiŋ ɗe haa te a mbaamiŋ ɗe haa. »
18Ŋ ndeem Israayel ca jen kerheeɗa inding ca na kuluɓ ka, ɓa nammba hot meleñ ca na findi tangoora ɗuukohe, ɓa saakɗoheeɗa sagu neƴƴoh ŋ ɗiska ɓa cangtiɗke.
19Ɓa woosa Musaa ne : « Fu, woya na ɓoo, ɓoo hey ɗa sikɗuke, waaye Kooh kinaat woo na ɓoo jahran, ndaa ɓoo hey kaane. » 20Musaa loffa ɓa ne : « Kinaat neƴƴoh, ini tah Kooh reɓ ndii, a na markiskee ɗu ne ɗu nup ɗe, ɗu bakaaɗuu. » 21Israayel ca rissa ŋ ɗiska ɓa cangtiɗke, waaye Musaa reɓpa ŋ eela, ŋ ɗiska Kooh nike.
In ci Kooh nakoh ŋ seeƴkohaani
22Wa Musaa reɓ, Nikiɗi woosa na ɗe woo cii, an : « Inii weɗ fu na hee woye Israayel ci : “ Ɗu hotootiɗ nga, ŋ woyoh na ɗu ŋ eel ci. 23Ɗu heyɗi haɓɗe ali in wiiriis ñaamkaah ɓaat nga so, findi kooh ci nataal ci haɓɗohu urus wala haalis.
24Ɗu na hee ɓaye merhey, ɗu haɓɗiɗ to seeƴkoha. Ɗu degan pe' ci, mbaal ci na inoh ci nga, ci hoomɗassan na ci seeƴkohsan wuu jam harmban ndo na ɗu. Te mi, ŋ hey haye ŋ barke'iɗ ɗu ŋ ɗisik ci ŋ teeɓohan jen ne mi yii nga. 25Ɗu haɓɗiɗee so seeƴkoha na atoh ɗah, wa kinaat nik atoh pestuuɗ, ini ɗu na hee ca pestohe na ɓekee ca hoolaaɗi. 26Kinaat to haɓɗiɗ seeƴkoha njooliɗ po ɓo' kee nga ɗah rapan rap, ineem na tahe tas-ɓarngiŋ ɗe hotuk. ” »
Currently Selected:
Pula 20: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc