Pula 19
19
Kooh ambtiɗohiɗ na Israayel ci
1-2Mbeha koc ŋ caɓna kaahayɗoh ŋ finho pulohaŋ ɓa Misra, Israayel ca kurkohha Refidim, ɓa kaɗta kehƴa hulangaŋ Sinaay ; ɓa yippa ɗiip caŋ ɓa nga ŋ sero tangoora. 3Musaa rapeeɗa ŋ tangoora ne a coha na Nikiɗi Kooh. Weɗ Nikiɗi ɓeeɗkoh ɗe ŋ ɗafuk tangoora, a woosa ɗe ne : « Inii weɗ fu na hee woye kuɓuuciŋ Yaŋhooɓa, Israayel ci : Nikiɗi woo ne : 4“ Ɗu hotootiɗ findi ŋ tumoh na ɓi Misra, ŋ ɓayya ɗu nga so findi caango#19:4 caango : a yi uupiɗ hatil ŋ sel ci na punde. Ca laayisɗi woti. na raɗsohe paɓ ciŋ ɗe, a deg ƴiil ciŋ ɗe nga. 5Markaat, kehƴi jen ñam raaka, ɗu kerah woo kiŋ ngo te ɗu taambiɗ ambtiɗohiŋ ngo na ɗu ɗah, ŋ cuuɓ ci jen, a ɗu nikan cuuɓiŋ ngo. 6Ɗu hey nike cuuɓ hooliɗ wuu so, ɗu nik seeƴkiɗoh ci na hee nike ŋ harmban ndo na cuuɓ ci cinooci. ” Inii weɗ fu na hee woye Israayel ci. »
7Musaa kaɗta ŋ mboolnda, a cohɗohha yakak ca, a woosa ɓa ini Nikiɗi nak ɗe jen. 8Mboolnda jen hunnda woosa ɗe ne ɓa hey haɓɗe in ci Nikiɗi nakoh jen. A kaɗta, a woosa Nikiɗi ineem. 9Nikiɗi woosa Musaa ne : « Marka ŋ hey haye po nga ɗa, ŋ ɗooƴ eel ñuusiɗ, Israayel ci hey yo kerhe woyee na ɗa, ɓa ooluk ɗa po faw. »
Nikiɗi yipkiɗ ŋ tangooraŋ Sinaay
Wa Musaa wik Nikiɗi woo kaŋ mboolnda, 10Nikiɗi woosa ɗe ne : « Dokka ŋ mboolnda, woyaa ɓa ne, woti na kim, ɓa ɓoktukaat, ɓa naaw kulɓaaciŋ ɓa. 11Mbehi kaahayɗoh, wa raakaat ɓa ƴutiɗ, mbaɗi ŋ hey yipke ŋ tangooriŋ Sinaay, ŋ fikiiɓa jen. 12Fu hey ɓa teeɓe ɗiski ɓa topan ŋ sereendiŋ tangoori. Te fu woo ɓa ne ɓa wortukaat, ɓa kinaat ree ŋ tangoori, ɓa kinaata laal. Ɓo' nu laala ɗah, a hey apse. 13A nik ɓo', a nik ɗoopaat, ali ɓo' joyɗi ɗe laal. A tapsan tapu atoh wala ɓis. Kaɗ po ɗu kerah kuluɓ ɗah, raak ɓi han min rap ŋ tangoori. »
14Musaa ruhussa ŋ mboolnda, a tummba po ɓa ɓoktukka, ɓa naawwa kulɓaacaŋ ɓa. 15A woosa ɓa ne : « Faaha kim raakaat ɗu ƴutiɗ, te kinaat faanuk na ɓitiɓ ciŋ ɗu. »
16Ŋ neeha kaahayɗoh ŋ wiisaaɗiina, wa melñeeɗa, wa indngeeɗa, eel ñuusiɗ nikka ŋ ɗafuk tangoora, ɓa kerahha kuluɓ roofiɗ nga ; ɓooɓa, ŋ ɗiska ɓa nikee ŋ dala, ɓa tiitta jen po ɓa saakɗoheeɗa. 17Musaa puliɗta ɓa ŋ dala, a ɓayya ɓa ŋ sereendaŋ tangoora ne ɓa tufuk ŋ fiki Kooh. 18Nikiɗi yipkeen nga ŋ ɗooƴ jaal yongkaah, tahha po tangooraŋ Sinaay nikee ɗuukeeɗa, ɗuukra kurkeeɗa jututut findi ɗuuku puur ; tangoora jen yoondeeɗa yoond keeh-keeh. 19Kuluɓ ka uupeeɗa nga uup roof, Musaa woyeeɗa, a kerheeɗa hoosooriŋ Kooh lofeeɗa ɗe ŋ indnga.
20Nikiɗi yipukka ŋ tangoora ŋ suunaŋ wa, a ɓeeɗukka Musaa ; yeem rappa. 21Nikiɗi woosa ɗe ne : « Ruhsa fu woya na mboolnda, waaɗ to hot kinaat ɓa ɓek ŋ cootuk ɗiski ɓa topɗu wala laayiɗ nga ɓa hey kaane. 22Te sah seeƴkiɗoh ci joy hay nga so, ɓa joyiɗ farsuk, bala ŋ keenan ɓa ɗah. » 23Musaa loffa ɗe ne : « A fu woyee ne ŋ haɓɗaat ɗiski ɓooɓi na hee tope ŋ sereendiŋ tangoori, ŋ tuma ɗisik hooliɗ wuu fu, weɗ tah po mboolndi minanɗi rap ŋ ɗafuk tangoori. » 24Ŋ ineem Nikiɗi woosa Musaa ne : « Ruhsa, fu hayee ɗah, fu hun na Aaruna. Waaye ŋ ini kaɗ ŋ mboolndi na seeƴkiɗoh ci, waaɗ rap ŋ ɗiskiŋ ngo kinaat ɓa ɓek ŋ cootuk ɗiski ɓa topɗu, bala ŋ keenan ɓa ɗah. » 25Musaa yipukka ŋ mboolnda, a woosa na ɓa.
Currently Selected:
Pula 19: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc