Pula 13
13
In ci naandsan Israayel ca pulohaŋ ɓa Misra
1Wa Nikiɗi puliɗ Israayel ca, a woosa Musaa ne : 2« Waɗaat to saawiŋ ɓitiɓ nu nik ŋ Israayel ɗah ; ñam raak ɓiŋ ɓo' ci na ciŋ ɗoopaat ci. »
3Musaa kaɗta ŋ mboolnda a woosa ɓa ne : « Naandsukaat mbehi woti, wi Nikiɗi na pulɗohee ɗu na hatiliŋ yaahiŋ ɗe ŋ Misra, kur kiŋ kiñaamkiŋ ɗu, kinaat ñam mbuuru raakiɗ lawiir. 4Ɗu hot nga, woti, ɗu pul ŋ caɓniŋ Aabiib#13:4 Aabiib : marka ini fiisu ŋ saar 12, aaya 2.. 5Nikiɗi ɓay ɗu, a ɓek ɗu ŋ kur ka a giñee ne a hey wa one caacuuciŋ ɗu ɗah, ɗu hey naandsuke ineem kiis nu ree ɗah ŋ caɓnii. Kur keem nikka kur kaŋ ɓi Kanaan, Hit ci, Amoor ci, Hiw ci na Yebuus ci, weɗ kur ka riifiɗ na miis na kuum.
6Neeh yasna-kanak, ɗu na hee ñame mbuuru raakaaɗi lawiir. Ŋ neehi yasna-kanakɗoh, ɗu haɓiɗ feet wuu Nikiɗi. 7Ŋ neeh ceem ɗu ñaman mbuuru raakaaɗi lawiir. In nu raak lawiir ɗah, joyɗi hotu, te sah, ɗisik nu nik ŋ kur ka ɗah wa joyɗi raak lawiir.
8Ɗu haɓɗee feeteem ɗah, yaa nu nga ɗu ɗah teeɓaat kuɓkiŋ ɗe ini tah a haɓɗee wa ; wa in ci Nikiɗi haɓɗiɗee ɓoo wa a pulɗee ɓoo Misra. 9Feeteem nikan nik ini naandsan ɗu ineem. Wa nik findi mandarga ŋ yaah ciŋ ɗu na puk ciŋ ɗu, ne woo ngaŋ waasiŋ Nikiɗi nik ini genan gen nguɓ ciŋ ɗu. Laam a yi pulɗoh ɗu Misra na hatiliŋ yaahiŋ ɗe. 10Kiis nu hay ɗah, ɗu hey haɓɗe nakoheem ŋ mbehiŋ wa. »
11Musaa taalndiɗta, a woosa mboolnda ne : « Nikiɗi ɓay ɗu kur kaŋ Kanaan, a eɗ ɗu kur ka a gapee caacuuciŋ ɗu na ɗu ɗah, 12ɗu hey ɗe waɗe saaw ci ƴaar ciŋ ɓitiɓ ci jen, ciŋ ɗoopaat ci ɗu raakan sah, ca wuu ce. 13Ini kaɗ ŋ yiŋ mbaami, ɗu na hee ɗe hey romkohe na kuy wala suket, wala ɗu weer mbooh kiŋ ɗe. Ɗu na hee hey name romkoh saaw ciŋ ɓo' ci.
14Wa kaɗ po kim kuɓuuciŋ ɗu meekis ɗu ne : “ Wa ye tah ɗu haɓɗee inii ? ” ɗah, lofaat ɓa ne : “ Nikiɗi a yi pulɗoh ɓoo Misra, kur ka ɓoo nikohee ñaam, na hatiliŋ yaahiŋ ɗe. 15Firawna sangee sang tic ne a heyɗi faɗe ɓoo ne ɓoo coot. Ŋ ineem Nikiɗi appa saaw caŋ ɓi Misra jen, ɓaŋ ɓooɓa na caŋ ɗoopaat ca. Ineem weɗ tah ɓoo waɗee Nikiɗi saaw ƴaar ɗoopaat nu nik te ɓoo romkohee saaw ci ƴaar ciŋ ɓo' ci. ” 16Tumohaaɗeem na hee hey nike ini na hee ɗu naandse ineem, wa nikan mandarga ŋ yaah ciŋ ɗu na puk ciŋ ɗu. Wa hey ɗu naandse pulɗi Nikiɗi pulɗoh ɗu Misra na hatiliŋ yaahiŋ ɗe. »
Kooh ɓendiɗ cuuɓiŋ ɗe
17Wa Firawna faɗis Israayel ca ne ɓa coot, Kooh woyee ne : « Israayel ci miniɗ raak hiñoh ŋ waasi, inwaaso amb ɓa nga, ɓa gurid Misra. » Weɗ tah a yurhiɗɗi ɓa ŋ waasa kaɗ ŋ kur kaŋ Filistiica ŋ ina wa uupe reɓ jen. 18A wilaatkiɗ ɓa ŋ waasaŋ kehƴa hulanga, ŋ ɓak Cookmaŋ-Hapeel-ca. Israayel ca puloh Misra ɗaa, ɓa hunnda rung rung, ɓa kaɗeeɗa.
19Musaa ɓayndohha ƴoh ciŋ Yuusufa sagu ne yeem giñɗukoheen kuɓuuciŋ Israayel, a woosa ɓa ne : « Mbeh, Kooh hey ɗu ambohe po a puliɗ ɗu ndii, ɗu kaɗee ɗah, giñɗaat to ne ɗu hey ɓayndohe ƴoh ciŋ ngo. » 20Israayel ca pulohha Sukkoot, ɓa kaɗta, ɓa yippa ɗiip caŋ ɓa ŋ Etam, ŋ sero kehƴa hulanga.
21Noh reesa ɗah, Nikiɗi nik ngaŋ eel yakak yipiɗ findi kumbin ŋ fikiiɓa ne a teeɓ ɓa ɗiski ɓa taamban. Wek reesa ɗah, a nik ngaŋ jaal yongkaah ŋ fikiiɓa ne a ñiinɗiɗ ɓa, tahha po ɓa mineen tiind noh na wek. 22Eela yipee haa kumbin na noh na jaalaŋ yongkaaha haa kumbin nikee nga na wek, kurkangeeɗi ŋ fikiiɓa.
Currently Selected:
Pula 13: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc