Pula 14
14
Firawna ñaakɗiɗ Israayel ca
1Wa ɓaa hee pule Etam, Nikiɗi woosa Musaa ne : 2« Woya Israayel ci ne ɓa welaat, ɓa yip ɗiip ciŋ ɓa ŋ sero Pi-Ayrot, ŋ harmban Migdol na cookma. Yipaat ɗiip ciŋ ɗu ndaam, yurhiɗkoh na Ba'al-Sefon ŋ sero cookma. 3Firawna hey woye ne : “ Israayel ci muuƴiɗ ŋ bilaf fa ; kehƴa hulanga rangiɗ ɓa. ” 4Ŋ hey ndengɗe keeñiŋ ɗe po a taambiɗ ɗu. Teemb ndeem, ŋ hey teeɓohe yaki ŋ yak, ŋ in ci ŋ tuman ɗe, a yi na hiñohoh ciŋ ɗe, te ɓi Misra hey inhe ne ñam Nikiɗi. » Israayel ca tumohha in ceem jen ɗaa.
5Wa Firawna woyu ne Israayel ca saandohiɗ, a yi na ɓooɓaŋ ɗe ɓoƴsohha liiɓohaaɗ ŋ ini kaɗ ngaŋ Israayel ca. Ɓa woosa ne : « Ɓoo haɓiɗ ye cii ? Wa ye tah ɓoo faɗee Israayel ci ɓa cootee, ɓoo raakissuu ñaam ci na hee ɓoo pangkiɗisse ? » 6Firawna nakohha tokɗiɗu wotiiraŋ ɗe, a hunnda na hiñohoh caŋ ɗe, 7a ɓayya wotiir caŋ Misra jen po ca teemet-yasna-yinooca (600) uupee baah nga ; waa nu nga ɗah, ɓayya hiñohoh kaahay. 8Nikiɗi ndengiɗta keeñiŋ Firawna, buuraŋ Misra. Yeem taambiɗta Israayel ca, raak ɓeem puleeɗa na ndeng fit. 9Hiñohoh caŋ Misra jen taambiɗta ɓa, ɓum tiindeeɗa, ɓinooɓi rappa panis, ɓi tas aassa ŋ wotiir caŋ Firawna, ɓa ñaakɗeeɗa ɓa po ɓa rahsohha ɓa ŋ sero Pi-Ayrot, yurhiɗkoh na Ba'al-Sefon, ɗiska ɓa yipee ɗiip caŋ ɓa ŋ sero cookma.
10Wa Firawna kaɗ po a heeɗa rahse Israayel ca, ɓeem marakka, hotta ne ɓi Misra ɓii hay nga ɓa. Ɓa neƴƴohha lool, ɓa leehkeeɗa naafu ŋ Nikiɗi. 11Ɓa woosa Musaa ne : « Misra raakɗi raakɗi ruy-ruy po fu ɓayya ɓoo ŋ bilaf fii ne ɓoo kaanoh nga e ? Fu haɓiɗ ɓoo ye cii, wee tah fu kooɗohha ɓoo Misra ? 12Inii weɗ ɓoo woyee ɗa wa ɓoo nik ŋ kur ka haa e ? Ne “ Faɗa ɓoo moɗoɗ, ɓoo nik ñaam ciŋ ɓi Misra. ” Weɗ ngisoh kaan ŋ bilaf fii. » 13Musaa loffa ɓa ne : « Kinaat neƴƴoh, tufkaat ɗu marak findi Nikiɗi mucɗohan ɗu woti. Ɓi Misra ɓi ɗu na hote ɓii, ɗu hotissanɗi ɓa muk. 14Yeeɓkaat rek. Nikiɗi a yi na hee ɗu hiñohɗe. »
Taambaŋ Israayel ci ŋ ɗooƴ cookma
15Nikiɗi woosa Musaa ne : « Wa ye tah fu leehkee nga so ? Woya Israayel ci ɓa deguk ŋ waasi. 16Ɓaya ndooɗiŋ ɗa ŋ yaah, fu yurhiɗa ŋ cookmi. Fu paysoh cookmi kanak, Israayel ci min taamb nga te kot ciŋ ɗu iiri'uu. 17Ini kaɗ nga so, ŋ hey ndengɗe keeñ ciŋ ɓi Misra po ɓa taambiɗ ɗu ŋ ɗooƴ cookmi. Teemb ndeem, ŋ hey teeɓohe yaki ŋ yak, ŋ in ci ŋ tuman Firawna na hiñohoh ciŋ ɗe na wotiir ciŋ ɗe na ɓooɓi rap panis. 18Ŋ hey teeɓohe yaki ŋ yak ŋ in ci ŋ tuman ɓa, ɓi Misra inah ne ñam Nikiɗi. »
19Ƴutta, malaakaaniŋ Kooh, yi meeɗ adug ŋ fiki Israayel ca, kaɗta ŋ finhooɓa, eela yipee haa kumbin ŋ fikiiɓa nammba kaɗ ŋ finhooɓa. 20Wa nikka ŋ harmban dal ca kanak ca, dalaŋ Misra na waŋ Israayel. Eelaam nikka ñuus ŋ ɓaka winoora, waaye weka reesa, wa ñiiniɗta ɓaka tas ne cuuɓ ca kanak ca minuu reɓɗukoh na wek.
21Wa Musaa raɗis ndooɗaŋ ɗe ŋ ɗafuk cookma, Nikiɗi neehha puuɗis ŋ pulohaaɗ-noh, puuɗis raakiɗ hatil. A paysohha cookma kanak, merhey mi suyɗi nikka ŋ harmbana. 22Israayel ca taammba nga te ɓa iiriiɗi, raak masma ɗingkiɗ findi miir ŋ yaah-ñaahum na yaah-sing. 23Ɓi Misra ñaakɗeeɗa ɓa na panis caŋ ɓa na wotiir caŋ ɓa jen ŋ ɗooƴ cookma.
24Na wiisaaɗiina, Nikiɗi, yi nikee ŋ ɗooƴ kumbinaŋ yongkaaha na eela, marakka ŋ dalaŋ ɓi Misra, a saɓsohha ɓa na sagoocaŋ ɓa. 25A tummba po panuucaŋ wotiir caŋ ɓa minisɗi kaɗ kaɗ yurhiɗ, ineem tahha po ɓa minisɗi nupiɗ baahiɗ. Ɓa woosa ne : « Ɓoo saandohaat, Nikiɗi yii hiñohiɗ Israayel ci. »
26Nikiɗi woosa Musaa ne : « Raɗsa ndooɗiŋ ɗa ŋ cookmi ne masmi dokkis findi wa nikohe, wa on ɓi Misra, wotiir ci na ɓi rap panis ci. » 27Musaa tumohha ineem ɗaa.
Ŋ wiisaaɗiina, cookma dokukka findi wa mande, ɓi Misra saandoheeɗa, ɓa cohha na masma, Nikiɗi julla ɓa ŋ ɗooƴ cookma. 28Masma dokukka, wa onnda wotiir caŋ Firawna na ɓooɓa rapee panis ca jen. Hiñohoh ca dabee Israayel ca jen tassa ŋ cookma ; ali ɓo' pulɗi nga.
29Waaye Israayel ca taambeen ŋ cookma te ɓa iiriiɗi, raak masma ɗingkiɗ findi miir ŋ yaah-sing na yaah-ñaahum. 30Mbaɗi, Nikiɗi muciɗta ɓa ŋ yaah ciŋ ɓi Misra. Ɓa hotta fiɗaaf caŋ ɓi Misra ŋ sereendaŋ cookma. 31Israayel ca hotta hatili Nikiɗi mucɗoh ɓa nga ɓi Misra, ɓa neƴƴohha ɗe, ɓa kossa Nikiɗi na Musaa ñaamiŋ ɗe.
Currently Selected:
Pula 14: YM
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc