Luka 6
6
Īnōngwa sya sabāti
(Mat. 12:1-8; Mali. 2:23-28)
1Lelo bo Jesụ ịkwenda mmịgūnda gya nganụ nabafụ̄ndịgwa bāke, abafụ̄ndịgwa bāke balinkupulula ifịsāsa fya nganụ balinkulya bo bafịgị̄se mmaboko gābo. 2Lolị Abafalịsaị bamo balinkulālūsya balinkuti: Nōngwa jafịkị mụkubōmba isị sịli mwịko ukubōmba pa sabāti? 3Jesụ ālyamwịle atịle: Mụkabalamo isị ābōmbịle Ndabitị bo īnjala jịkunnduma, jūjo nāba bāli nagwe; 4apa ị̄ngilege nnyụ̄mba ja Kyala apa ālyegịle nukulya ikisyesye ikị̄kemo, iki kyali mwịko ukulya umụ̄ndu gwesa lolị bēne abapụ̄tị, alinkubapa bope nāba bāli nagwe? 5Kangi alinkujoba nabo alinkuti: Nnyamụ̄ndu jo ntwa gwa sabāti.
Umụ̄ndu gwa kiboko ikilale
(Mat. 12:9-14; Mali. 3:1-6)
6Pa sabāti ujūngi bo ị̄ngị̄le nnyụ̄mba ja kwịpụ̄tilamo nkumanyịsya, ālimo umụ̄ndu jumo uju ikiboko kyake kya kukị̄līlo kyalalịle. 7Po papo abamanyandagilo na Bafalịsaị balinkuntegelela, ukuti bakēte linga ịkummbūmbulusya pa sabāti, ukuti mo basyagịle isyakunndōnga. 8Lolị āsị̄mēnye īnyịnogono syabo, alinkujoba nugwa kiboko ikilale alinkuti: Ịsaga gwime apa. Alinkusụmụka ajakwima palapala. 9Jesụ alinkubabūla alinkuti: Ngubalālūsya, bule mụkaja mwịko ukubōmba sịmo īnụnụ pamo īmbị̄bị pa Sabāti, ukupoka ubūmị pamo ukubupyuta? 10Alinkubakēta bōsa īmbafụ syosa, alinkummbūla alinkuti: Golosya ikiboko kyako. Ēnda nukugolosya, ikiboko kyake kilinkwenda nukupona. 11Lolị abēne bakālēle fị̄jo balinkujobesanịa isya kummbōmbela Jesụ.
Jesụ ịkubasala abafụ̄ndịgwa mụlōngo
(Mat. 10:1-4; Mali. 3:13-19)
12Pakabalilo kalakala Jesụ alinkufyuka pakyamba pakwịpụ̄ta, alinkwịpụ̄ta kwa Kyala ikilo kyosa. 13Bo bukị̄le kilābo alinkubabilikila abafụ̄ndịgwa bāke alinkubasalapo kalōngo na babili aba ābajobaga ija batumịgwa: 14Sịmonị uju bạ̄tigi Petelị nugwamyabo Andeleja: Jakobụ na Johanị, Fịlịpụ na Balitolomaị, 15Mataị na Tomasị, Jakobụ unnya Alịfajo, na Sịmonị uju bātigi Selotị. 16Jụ̄ta umwana gwa Jakobụ na Jụ̄ta gwa mụ Kalyotị uju pānyụma āli gwa kummbīka Jesụ mmaboko ga balugu.
Jesụ ịkumanyịsya nukubūmbulusya ababịne
17Alinkusụlụka nabo balinkwima pabujo ubutēngāmụ nikilūndilo ikikulūmba kya bafụ̄ndịgwa bāke, kangi nikilūndilo ikikulūmba kya bāndu aba bāfụmịle mụ Jụtaị na mụ Jelụsalemụ na mụmbali mụnyanja ja Tịlị na Sịtonị, aba bālisịle kukumpilikisya na kukubūmbulusịgwa īmbūngo syabo; 18aba ubukoma bwabakufyaga balinkuponesịgwa. 19Lelo ikilūndilo kyosa kilinkulōnda ukumpalamāsya, namanga amaka gāfụmaga mmyake gababūmbulusyaga bōsa.
Ulusekelo nubusụlụmanịe
(Mat. 5:1-12)
20Jesụ alinkubakēta abafụ̄ndịgwa bāke alinkuti:
Mụli basangalufụ mwe balōndo,
namanga ikitāngālala kya Kyala kyinụ!
21Mụli basangalufụ mwe jịkubaluma īnjala
lilino, namanga mwịsakwịkutaga.
22Mụli basangalufụ linga abāndu bababēngịle, linga bịkubasōsya na nkipānga nukubatuka umwe, linga bịkusịnyasya īngamụ syinụ, kunōngwa ja Nnyamụ̄ndu. 23Po mwịsemụsekelege, mụkịnege, namanga ifịhōmbịgwa fyinụ kumwanya fịsakujaga fịkulūmba, buno abị̄sabo bo bātēndekaga buno buno ukubabōmbela abakụ̄ngụlụka.
24Lolị mụli bākị mwe mụli bakabị lilino;
buno mwambilị̄le ngānịla ulusūbisyo lwinụ.
25Mụli bākị mwe mwịkwịte lilino,
buno īnjala jịsakubalumaga.
Mụli bākị mwe mụkuseka lilino,
buno mwịsakusụlụmanịaga,
mwịsakulilaga.
26Mụli bākị mwe abāndu bịkubajoba ubunụnụ buno syo isị abị̄sabo bābōmbaga kubakụ̄ngụlụka bābutūngulu.
Ukubagana abalugu
(Mat. 5:38-48; 7:12)
27Lolị ngubabūla mwe mụkūmbilikisya nguti: Mụbaganege abalugu bīnụ, 28mụbasajege aba bịkubagụna. 29Uju linga ịkukukoma palusaja lumo umpege nulūngi lōpe akukomege; kangi uju linga ịkupoka ikilūndo kyako ungasị̄tilaga naliịkotị lyako. 30Gwesa uju ịkukusūma fịmo umpege; kangi uju ịkupoka fịmo ifyako ungammelelaga. 31Kangi isị kulōnda ukuti abāndu bakubōmbelege, syo nụngwe ubabōmbelege.
32Linga mụkubagana bābo babaganịle umwe po mụkubwagamo bunụnụ bukị? Namanga bope abatulanōngwa bịkubagana bābo bịkubagana abēne. 33Linga mụkubabōmbela īnụnụ bābo bịkubabōmbela īnụnụ umwe, po mụkubwagamo bunụnụ bukị? Namanga bope abatulanōngwa syo isị bịkubōmba. 34Linga mụkubakopesya bābo mụkusụ̄bila ukukabako fịmo kumyabo, po jwanị ịkubapālaga ubunụnụ umwe? Bope abatulanōngwa bịkubakopesya abatulanōngwa abị̄nābo ukuti bịsebabagomelelege bo mụmo fyajīlị̄le. 35Lolị umwe mụbaganege abalugu bīnụ, mụbōmbēge inụnụ, mụkopesyege kisịta kugụ̄lila ifyakubagomolela nafịmo; po ifyakubahōmba fịsakujaga fịngị, po mwịsakujaga bāna ba ju Nnkīnde; namanga umwene ali niịpyana na kuli aba bakaja na ndaga kumyake, nakubabị̄bị. 36Amụjege nikibabilisị bo mụno ugwịsēmwe ajīlị̄le ukuja nikibabilisị.
Ukubalōnga abāngi
(Mat. 7:1-5)
37Mụngabalōngaga nabamo abāndu, po Kyala atịsakubalongaga umwe, mụngabajobaga ububị̄bị abāngi po nanụmwe mụtịsakujobịgwaga ububị̄bị, mụbaswege īnōngwa abāngi po nanụmwe mwịsakuswegịgwaga. 38Amụbapege ifyakubapa abāngi po nanụmwe mwịsakupegịgwaga; mwịsakwambililaga pakigelelo ikinụnụ, ikikanyịsye, ikisụkanịe, iki kị̄swile kịkulefụka, mwịsakwambaga pamwenda gwinụ. Buno ikigelelo kikyo mụkugelela pakubapa fịmo abāngi, kyokīkyo nanụmwe mwịsakugelelịgwaga.
39Kangi alinkubabụ̄la ikifwanịkisyo kyakubalilamo alinkuti: Umfwamāso kali abagị̄le ukunndōngosya umfwamāso unnịne? Batịsakwịbulukutila mbwịna bōsa? 40Ummanyilị akankīnda ummanyịsị gwake, lolị gwesa ịtolo uju amanyịsị̄gwe ukufịkapo jo ịkufwana nummanyịsị gwake. 41Nōngwa jafịkị kukēta akapātu aka kali nkisịge kya gwamyinụ, lolị utịkusịbikilako mōjo isya mpịkị ugu guli nkisịge kyako jujugwe? 42Pamo ubagị̄le bulebule ugwe ukujoba kugwamyinụ ukuti: Gwamyitu oko ngutị̄sye akapātu aka kali nkisịge kyako, bo ugwe utịkugubona umpịkị ugu guli nkisịge kyako jujugwe? Gwe ntūngulu ugwe, sōsya tāsị umpịkị ugu guli nkisịge kyako jujugwe napo kukētaga bunụnụ bo kutị̄sya akapātu aka kali nkisịge kya gwamyinụ.
Umpịkị nīseke syake
(Mat. 7:16-20; 12:33-35)
43Gukajako nagumo umpịkị unnụnụ ugu gụkupa īseke īmbị̄bị, kangi gōpe nagumo umpịkị ummbị̄bị ugu gụkupa īseke īnụnụ; 44umpịkị gōsa gula gụkumanyilịgwa mụseke gūgo. Īseke sya nkuju sịtịkutūngulịgwa mmị̄fwa, gōpe na māfị̄lu gatịkwapịgwa mmịtulatula. 45Umụ̄ndu unnụnụ ịkusōsya sịnụnụ ukufụma mụnụnụ isị sịlūndị̄le mụndụmbụla jake; jope umụ̄ndu ummbị̄bị ịkusōsya sịmbị̄bị ukufụma mụmbị̄bị isị alūndị̄ke; namanga isị sịkusōka bo ịkujoba syo isị sị̄swile mụndụmbụla jake.
Abajēnganyụmba babili
(Mat. 7:24-27)
46Fịkị mụkūnjoba mụkuti: NTWA, NTWA lolị mụtịkubōmba isị ngubalagila ukubōmba? 47Umụ̄ndu gwesa uju ịkwịsa kumyangu bo ịkugapilika amasyu gangu nukugabōmba, jo ngubanāngisyaga uju afwene nagwe; 48afwene nunjēnganyụ̄mba, uju ākūmbịle ubwịna ubusolofụ alinkwala ulwalo palwalabwe; lelo bo umwelesyo gutēkịle ulwisi lulinkōneka panyụ̄mba jijiji lolị lulinkusịta nukujijugānịa papo jalyalisị̄gwe palwalabwe. 49Lolị uju linga ịkupilika lolị atịkusịbōmba, jo afwene numụ̄ndu uju ājēngịle īnyụ̄mba pamfụ kisịta lwalo; lelo bo ulwisi lutēkịle īnyụ̄mba jilinkwenda nukugwa nakalīnga ịtolo, ukubụlụtụka kwake kwali kunywamụ.
Currently Selected:
Luka 6: NYB96
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Nyakyusa Bible © Bible Society of Tanzania, 1996.