Luka 5
5
Jesụ ịkubabilikila abafụ̄ndịgwa bākwanda
(Mat. 4:18-22; Mali. 1:16-20)
1Lelo bo abāndu bịkupapātilana ukwịsa kumyake kukupilika ilịsyu lya Kyala, umwene ālyimịle kubupị̄pị ni nyanja ja Genesaletị. 2Alinkugabona amabōtị mabili kūmbali kunyanja; lolị abalobanswi bāfyukịle mmabōtị bālipakusụka īnyēlo syabo. 3Bo ịpakịle mwịbōtị limo ili lyali lya Sịmonị, alinkunsūma ukulisụ̄ngila nkāti mmīsi panāndi. Umwene alinkutūgala mwịbōtị alinkubamanyịsya abāndu bo ali mwịbōtị. 4Lelo bo amalịle ukujoba, alinkujoba na Sịmonị alinkuti: Amụsope īnyēlo nkāti mụnyanja mụsịsololosye mụlobēge ị̄swi. 5Po papo Sịmonị alinkwamụla alinkuti: Malafyale, twịjūlịle bukye lolị tukaloba nasịmo! Lolị lelo papo ujobịle ugwe ngusịsopaga. 6Lelo bo babōmbịle sịsịsị, bākolị̄le ị̄swi īnyị̄ngị fị̄jo, nīnyēlo syabo syalatukaga, 7balinkubakopa ababombanịsị bị̄nābo aba bāli mwịbōtị ilīngi ukuti bịsebabatūle. Balinkwịsa balinkwenda nukwịsusya amabōtị go mabili, galinkulōnda nukwịbila. 8Lolị lelo bo Sịmonị Petelị asịbwene sịsịsị, alinkwakunngwila mmafụ̄ndo Jesụ, alinkuti: Gwe NTWA sōkako kumyangu buno ndi mụ̄ndu ntulanōngwa. 9Namanga kyalimmwagịle ikīswigu pamopēne nāba bāli nagwe, kunōngwa ja nswi isị bālobịle; 10bope na Jakobụ na Johanị, abanya Sebetaị aba bali babōmbanịsị na Sịmonị balinkuswị̄ga. Jesụ ālimmbūlịle Sịmonị ātịle: Ungatetemaga ukufụma lilino kulobaga abāndu. 11Lelo bo bafyusịsye pị̄sīlya amabōtị gābo, balinkwenda nukufịleka fyosa balinkunkōnga Jūjo.
Jesụ ịkummbūmbulusya umụ̄ndu jumo
(Mat. 8:1-4; Mali. 1:40-45)
12Lumo Jesụ bo ali nkāja kamo, alinkwịsa umụ̄ndu jumo uju jalinkolịle fị̄jo īmbūngo ja bukoma; lelo bo ambwene Jesụ alinkubụ̄ngụlụka pāsi alinkulāmba kumyake alinkuti: Gwe NTWA, linga gwịganịle umēnye ukūmbūmbulusya. 13Po papo alinkugolosya ikiboko kyake, alinkumpalamāsya alinkuti: Nị̄ganịle, būmbulukaga. Po papo lulalula ịtolo īmbūngo ja bukoma jilinkusokamo mmụ̄ndu jula. 14Alinkunndagila ukuti angammbūlaga najumo; lolị abūke akị̄nāngịsye kumpụ̄tị nukusōsya ifyakwịkemēkesya kunōngwa ja kubūmbuluka kwake, ukukōngana na isị ālagị̄le Mose, ukuti abāndu mo basịmanyịlege ukuja syanalolị. 15Lolị īnōngwa syake sịsịsị sịlinkukindilila ukubalanịla; ifịlūndilo fya bāndu fịfịngị fịlinkubūngāna kukupilika īnōngwa na kukugāngulịgwa īndamwa syabo. 16Lolị umwene alinkujōngela ndukubo alinkwịpụ̄ta.
Jesụ ịkunngāngula ugwa mbūngo ja bukokonyale
(Mat. 9:1-8; Mali. 2:1-12)
17Pị̄sịku limo mmasịku amatasị gala, bo ali pakulūmbilila, bālipo Abafalịsaị na bamanyandagilo ndagilo bātūgēle pabupị̄pị nagwe, bāfụmịle ntwaja tōsa twa mụ Galịlaị, mụ Jụtaị na mụ Jelụsalemụ; amaka ga NTWA ga kubūmbulukisya ububịne gāli nagwe. 18Po papo balinkunyomoka abāndu bampīmbịle palutato umụ̄ndu gwa mbūngo ja bukokonyale, balinkulōnda ukummwingisya nukunndambalika nkyenị mwa Jesụ; 19lelo bo bāgịle bakajaga najimo injila jakummwịngikisya, kunōngwa ja bwịngị bwa bāndu, balinkufyuka pamwanya pa nyụ̄mba balinkupāngula amapamba, balinkunsololokesya nkāti mbāndu pamopēne nulutato lwake alinkuja nkyenị mwa Jesụ. 20Bo Jesụ alubwene ulwịtiko lwabo ātịle: Gwe Mụ̄ndu ugwe uswegị̄gwe īmbị̄bị syako. 21Po papo abamanya ndagilo na Bafalịsaị balinkwanda ukwịlusanịa mụ̄nda mmyabo balinkuti: Jwanị jujuju jo āti ajobēge isyakunhelula Kyala? Kyala mwene lolị jo abagị̄le ukuswa īmbị̄bị. 22Lelo bo Jesụ asyagēnịe isị bịnogonaga, alinkubāmbilila alinkuti: Mụkwịlūsanịa fịkị mụndụmbụla syinụ? 23Lyo ịpepe liliku, ukuti uswegị̄gwe īmbị̄bị syako nukuti: Sụmụka gwendege? 24Lolị mbōmbịle sịsịsị ukuti umwe mụmanyege ukuti Nnyamūndu kummbagị̄le ukuswa īmbị̄bị pakị̄su. Po papo alinkujoba nugwa bukokonyale jula alinkuti: Ngukubula nguti sụmụka, pīmba ulutato lwako ubūkege kukāja kāko. 25Nakalīnga ịtolo alinkusụmụka nkyenị mmyabo, alinkupīmba ulutato lwake ulu ālambalelepo, alinkubūka kukāja kāke bo ịkuntụ̄fya Kyala. 26Po papo ikīswigu kilinkubāga bōsa, balinkuntụ̄fya Kyala, lulinkubāga ulutēnde ulwịngị balinkuti: Tusịbwene isyakuswịgisya umụsyugu.
Jesụ ịkummbilikila Lebị
(Mat. 9:9-13; Mali. 2:13-17)
27Panyuma pali sịsịsị bo asōkịle, alinkummbona unsōngesyasōngo, uju ali jo Lēbị īngamụ, atūgēle pabusōngelo īsōngo; alinkummbūla alinkuti: Ngongaga. 28Po papo umwene alinkufịleka fyosa, alinkusụmụka alinkunkōnga.
29Lelo po papo Lebị alinkuntendekekesya Jesụ ulusekelo lwa kulya ifị̄ndu nnyụ̄mba jake; balinkujamo na basōngesyasōngo abị̄ngị na bāngi ịtolo aba bātūgasēnịe nabo pakulya. 30Abafalịsaị na bamanyandagilo balinkwịbụnēsya kubafụ̄ndịgwa bāke balinkuti: Fịkị mụkulya nukunwa nabasōngesya sōngo, abatulanōngwa? 31Jesụ alinkubāmbilila alinkuti: Abakafụ ịtolo batịkunndōnda unngānga, lolị ababịne bo bịkunndōnda; 32ngị̄sa kukubabilikila abagolofụ, lolị abatulanōngwa ukuti bapīndukege.
Īnōngwa ja kufịpīka ifị̄ndu
(Mat. 9:14-17; Mali. 2:18-22)
33Bamo abāndu balinkujoba na Jesụ balinkuti: Abafụ̄ndịgwa ba Johanị kabili kabili bịkufịpīka ifị̄ndu nukwịpụ̄ta, bope abafụ̄ndịgwa ba Bafalịsaị bịkubōmba bo sịsịsị; lolị abafụ̄ndịgwa bako bịkulya bịkunwa. 34Ābāmwịle ātịle: Mụbagīle ukubapelela ukufịpīka ifị̄ndu abahēsya bapabwegị bo tāsị umwegankị̄kulu alịpo bāli nagwe? 35Gịkwịsaga amasịku apa umwegankị̄kulu ịsakusōsịgwangamo mmyabo, po lolị po bịsakufịpīkaga ifị̄ndu nkabalilo kalakala. 36Po papo kangi Jesụ alinkubabūla ikifwanịkisyo kya kubalilamo alinkuti: Najumo atịkulengako umwenda umpya ukuja kigamba kya kukātika pa mwenda unkūlu. Linga ạ̄tigi bo mbōmbe bunobuno, po angali ịkwaga umpya gōpe gukufwa, ngali ịkwaga umwenda unkūlu gutịkwịtikana ni kigamba kya mwenda umpya. 37Kangi najumo ātikubīka ubwalwa bwa māfị̄lu ubuteta (umpịpye) mụnyāmbi īngūlu sya bwalwa bwa māfị̄lu; linga bo ịkubōmba bunobuno, ubwalwa bwa māfị̄lu ubupya bwịsakupafụla īnyāmbi; po ubwene bwịsakōneka, īnyāmbi sịsakōnāngikaga. 38Lolị fịkuti umpịpye gukūsịgwege mụnyāmbi īmbya. 39Kangi najumo atịkunwa ubuteta bo afụmịle pakunwa ubwalwa bwa māfị̄lu ubu bukomịle; umwene ịkuti: Ubukomụ bo bunụnụ.
Currently Selected:
Luka 5: NYB96
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Nyakyusa Bible © Bible Society of Tanzania, 1996.