ЛукӀа 24
24
Исадал чан хтун
(МатӀай 28:1-8; Марк 16:1-8; Ягья 20:1-8)
1 Пакамахъ фад, гьафтедин сад лагьай юкъуз#24:1 Чувудри гьафтедин сад лагьай югъ гьяд яз гьисабзава., папар атир галай гъери гваз а кьветӀ авай чкадал атана. 2КьветӀен сив кӀевнавай къван алуднаваз акурла, 3абур къенез гьахьна, амма анай абуруз Ребби Исадин Беден жагъанач. 4Абур серсер хьана акъвазнавайла, садлагьана абурун вилик цӀарцӀар гузвай пекер алай кьве итим пайда хьана. 5Папариз кичӀе хьана, абурувай кьил хкажиз жезвачир. И гьал акурла, кьветӀевайбуру папариз лагьана:
– Куьн чан алайдахъ кьейибурун арада вучиз къекъвезва? 6Ам ина амач: Адал чан хтанва. Галилейда авайла, Ада квез лагьай гафар рикӀел хкваш. 7Ада лагьанай хьи, Инсандин Хва гунагькаррин гъиле твада, Ам абуру хашуниз яда ва пуд лагьай юкъузни Адал чан хквервал я.
8Папарин рикӀел Исади лагьай гафар хтана. 9Абуру, кьветӀяй хъфена, цӀусад илчидиз ва амай тилмизриз хабарна. (10Илчийриз хабар гайибур Маждалдай тир Майрам, Ягьна, Якьубан диде Майрам ва абурухъ галай маса папар тир.) 11Абуру лугьузвай гафар гьакӀанбур хьиз хьана, илчияр папарин чӀалахъ жезвачир. 12Амма Петруди къарагъна кьветӀ галайвал чукурна. Элкъвена кьветӀез килигайла, адаз анжах Иса кутур кафан акуна. Хьайи кардал мягьтелвал ийиз, ам элкъвена хъфена.
Эмагьусдай тир тилмизар
13Гьа и юкъуз Исадин тилмизрикай кьвед Ярусалимдилай кьве сятдин рехъ авай Эмагьус лугьудай хуьруьз физвай. 14Абур чеб чпихъ галаз хьайи и вири агьвалатрикай рахазвай. 15ГьакӀ рахаз-рахаз абур физвайла, Иса Вич абурун мукьув атана, абурухъ галаз санал фена. 16Амма тилмизрин вилерин экв тӀимил хьанвай хьиз тир, абуруз Иса чир хъжезвачир.
17Исади абурувай жузуна:
– Рекье куьн куькай рахазвай?
Абур чинар пашман яз акъвазна.
18Абурукай КӀелпӀас лугьудай сада лагьана:
– И йикъара Ярусалимда хьайи кардикай, аниз атай кьван инсанрикай хабар авачирди анжах са Вун яз тахьуй гьа?
19– Вуч хабар? – жузуна Исади.
– Назаретви Исадикай хабар – жаваб гана абуру. – Ам Аллагьдин ва халкьдин вилик кардани ва лагьай гафуна къудрат авай пайгъамбар тир. 20Чи чӀехи хахамрини кьилевайбуру Ам, кьиниз лайих я лугьуз, хашуниз ягъиз туна. 21Амма чна, Исраил Хиласдайди атанва лугьуз, умуд кутазвай. Абуру Ам кьейи йикъалай инихъ пуд югъ алатнава. 22Чи папарикай са бязибуру чун мягьтеларни авуна: абур экуьнахъ фад Исадин мейит эцигай кьветӀез фенай, 23амма абуруз Исадин мейит жагъанач. Чпиз акур малаикри Адал чан хтана лугьузвалдай. 24Чибурукай са бязибур Адан мейит эцигай кьветӀел фейила, абуруз акурди гьа папари лагьайвал я, амма абуруз Ам ана аваз акунач.
25Гьа чӀавуз Исади абуруз лагьана:
– Куьн вуч акьул кьери ксар тушни! Пайгъамбарри лагьайдан чӀалахъ хьун гьакьван четин кар хьанани квез? 26Вичин баркалладив агакьун патал, Месигьди вири и азабар чӀугун лазим тирдакай Пайгъамбарри лагьаначирни кьван?
27 Мусади Тавратда кхьенвайдалай эгечӀна пайгъамбаррин ктабра кхьенвай гафарал къведалди Исади Каламда Вичикай вуч лагьанватӀа, тилмизар гьадан гъавурда туна.
28Абур чеб физвай хуьруьз мукьва хьана. Исади Вич гьа хуьрелай анихъ физвайди хьиз къалурна. 29Амма абуру Ам чӀалал гъиз хьана:
– Югъ алатна няни хьанва. Вун чахъ галаз амукь.
Исани абурухъ галаз кӀвализ гьахьна ва ана амукьна. 30Ам абурун суфрадихъ атайла, Ада къачуна фу атӀана, хийир-дуьа авуна, абуруз пайна. 31Гьа чӀавуз абурун вилер ахъа хьана, абуруз Иса чир хъхьана. Амма Ам акуна-такуна квахьна. 32Абуру сада-садаз лагьана:
– Ада рекье чун Каламдин гъавурда твадайла, чи хура кудай рикӀер авачирни кьван?
33Абур тадиз къарагъна Ярусалимдиз хтайла, абуруз цӀусад тилмиз ва абурухъ галайбур саналлаз жагъана. 34Анал алайбуру атайбуруз лагьана:
– Реббидал гьакъикъатда чан хтанва! Ам Симуназ акуна.
35Ахпа кьве тилмизди рекье чпин кьилел атайдакай ва абуруз, фу атӀудайла, Иса гьикӀ чир хьанатӀа, гьадакай ахъайна.
Тилмизриз Иса акун
(Ягья 20:19-23)
36Абуру а кардикай ихтилатдайла, Иса Вич атана абурун юкьваз акъатна ва абуруз лагьана:
– Хийирар хьуй!
37Абуру, чеб чпивай квахьна, кичӀе хьана, чпин вилерикай Иса карагзава лагьана фикирна.
38Амма Исади лагьана:
– Куьн акӀ вучиз ава? Вучиз куьн кьве рикӀин хьанва? 39Зи Гъилеризни килиг, Зи кӀвачеризни. Зун гьа жув я, Зак гъил кяна килиг: карагунихъ Захъ хьиз як-кӀараб жедач.
40ИкӀ лагьана, Ада абуруз Вичин гъилерни кӀвачер къалурна.
41Абуру шадвиляй, гьеле чӀалахъ тахьана, мягьтелвилер ийизвайла, Ада лагьана:
– Ина квехъ недай затӀ авачни?
42Абуру Адаз чранвай гъетрен са пай гана. 43Къачуна Ада абурун вилик тӀуьна.
44– Гьеле Зун квехъ галамайла, За квез лагьанай хьи, Зи кьилел Мусадин Къанунда, пайгъамбаррин кхьинра ва Забурда кхьенвайвал вири атун лазим я, – лагьана Ада.
45Ахпа Исади Вичин тилмизриз Каламда кхьенвайдан гъавурда гьатдай акьул гана.
46– Каламда кхьенва, – лагьана Ада, – Месигьди азабар чӀугуна, кьейи пуд лагьай юкъуз Адал чан хквервал я. 47Ярусалимдилай эгечӀна вири халкьариз чпин гунагьрилай гъил къахчун патал, Аллагьдин рекьел ша лагьайди Месигьдин ТӀварцӀелай малумардайвал я. 48Куьн хьанвай кардин шагьидар я, 49Зани квез Зи Бубади хиве кьурди ракъурда. Квез цаварай гудай къуват квек акатдалди куьн Ярусалим шегьерда акъваз.
Иса цаварал хъфин
50Исади тилмизар Ярусалимдай Бетандиз кьван гъана, гъилер цавуз хкажна, абуруз хийир-дуьа авуна. 51Ада абуруз хийир-дуьа ийидайла, Ам абурукай чара хьана, цавариз хкаж жез эгечӀна. 52Абур, Адаз икрам авуна, зурба шадвилелди элкъвена Ярусалимдиз хтана. 53Аллагьдиз хийир-дуьа ийиз, абур датӀана Аллагьдин КӀвале жез хьана.
Currently Selected:
ЛукӀа 24: ЛезПК
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2010-2024