ЛукӀа 23
23
Иса ПилатӀан вилик гъун
(МатӀай 27:11-14; Мрк. 15:1-5; Ягь. 18:28-37)
1Дуванда авайбур вири къарагъна, Иса ПилатӀан патав тухвана. 2Абур Адак тахсирар кутаз эгечӀна:
– Чаз тайинарна хьи, Вич Месигь-Пачагь я лугьуз, Римдин пачагьдиз харж гун къадагъа ийиз, Ада халкь рекьяй акъудзава.
3ПилатӀа Исадивай хабар кьуна:
– Вун чувудрин Пачагь яни?
– Вуна гьакӀ я лугьузва, – жаваб гана Исади.
4ПилатӀа чӀехи хахамризни халкьдиз лагьана:
– Заз и инсандик тахсир кваз жагъизвач.
5Амма абуру, Ада Вичин чирвилералди Ягьудатда, Галилейдай эгечӀна и чкадал къведалди халкьдик футфа кутазва лугьуз кӀевивал ийизвай.
Иса Гьирудан вилик
6Галилейдикай ван хьайила, ПилатӀа жузуна:
– Ам Галилейдай яни мегер?
7Иса Гьируд бегдин вилаятдай тирди чир хьайила, ада Ам и йикъара Ярусалимдиз атанвай Гьирудан патав ракъурна. 8Иса акурла, Гьируд гзаф шад хьана. Адаз ам фадлай акуна кӀанзавай, адаз Исадикай пара ванер атанвай. Идалайни гъейри ада вичиз Исадин керемат-ишараяр аквада лугьуз умуд авунвай. 9Гьируда Исадиз гзаф суалар гана, амма Ада Гьирудаз са жавабни ганач. 10ЧӀехи хахамрини тавратдарри Адак кӀевелай тахсирар кутузвай. 11Амма Гьирудани адан аскерри Исадихъ хукӀуриз, чпиз кӀандай кьван рахшандар авурдалай кьулухъ, Адал зарафат патал чӀагай либасарни алукӀна, Ам элкъуьрна ПилатӀан патав рахкурна. 12Гьа и юкъуз ПилатӀни Гьируд чеб чпихъ галаз дуст хъхьана, идалай вилик абур душманар тир.
Иса ПилатӀан вилик
(МатӀай 27:15-26; Мрк. 15:6-15; Ягь. 18:39–19:16)
13ПилатӀа чӀехи хахамар, гьакимар, халкь кӀватӀна, 14абуруз лагьана:
– Куьне и Инсан халкь рекьяй акъудзавайди я лугьуз зи патав гъанва. Ингье, за куь вилик ам силисна, амма заз и инсандик куьне лугьузвай тахсирар кваз жагъизвач. 15Гьирудазни и касдик тахсирар кваз акунач. Ада Ам чи патав рахкурнава. Квез аквазвайвал, вич кьена кӀандай хьтин гьич са затӀни и Касди авунвач. 16-17ГьакӀ хьайила, за Ам, гатана, ахъай хъийида.
18Амма вири халкьди гьарайиз эгечӀна:
– Ам йикь! Чаз Бараб азад ая!
19Бараб, шегьерда кьиникьар галай гъулгъула туниз килигна, къазаматнавайди тир. 20Иса азад авун патал, ПилатӀа мад вичин ван хкажна. 21Амма кӀватӀ хьанвайбуру гьарайзавай:
– Ам хашуниз ягъ! Хашуниз ягъ!
22ПилатӀа абуруз пуд лагьай гъилера лагьана:
– Ада вуч пис кар авуна кьван? Заз Адак Ам рекьиз жедай хьтин тахсир кваз аквазвач. ГьакӀ хьайила, Адаз са-кьве къамчи вегьена ахъая лагьана эмирда за.
23Амма халкьди Ам хашуниз ягъун тӀалабзавай. Абурун гьарайри чпин кар авуна.
24ПилатӀа абурун тӀалабун кьилиз акъудун кьетӀна. 25Анал алай инсанрин тӀалабуниз килигна, къазаматда ацукьарнавай Бараб азадна, амма Иса, рекьин патал, анал алайбурун ихтиярда туна.
Иса хашуниз ягъун
(МатӀай 27:32-44; Мрк. 15:21-32; Ягь. 19:17-29)
26Иса хашуниз ягъиз тухузвайбуруз никӀяй шегьердиз хквезвай Киринейдай тир Симун лугьудай са кас акуна. Абуру Симунан кӀулаз хаш яна, ам Исадин гуьгъуьна аваз финиз мажбурна. 27Исадин гуьгъуьна аваз халкьдин са зурба кӀеретӀ къвезвай, абурун арада дерт чӀугваз, Адахъ шеларзавай папарни авай. 28Абурухъ элкъвена, Исади лагьана:
– Эй, Ярусалим шегьердин папар! Захъ ваъ, квехъ ва куь балайрихъ шехьа. 29Ингье, инсанри «Аялар тежезвайбур, хун тавурбур ва хуру тагузвайбур бахтавар я» лугьудай йикъар алукьзава. 30Гьа чӀавуз инсанри дагъларихъ элкъвена лугьуда: «Ацахьна чал ават!» Тепейризни лугьуда: «Атана чун кӀаник кутур!» 31Мижедай ацӀанвай ицӀи тар икӀ тергзаватӀа, кьурай тарцин гьал гьикӀ хьурай?
32Адахъ галаз санал кьиникьиз акъуднавай кьве тахсиркарни тухузвай. 33«Келле» лугьудай чкадал агакьайла, Амни кьве тахсиркар, сад Адан эрчӀи патай, муькуьдини чапла патай хашуниз яна. 34Исади Вич хашуниз язавайбур патал Аллагьдиз дуьа авуна:
– Эй Буба! Вуна ибурулай гъил къахчу, ибур чпи ийизвай кардин гъавурда авач.
Нуькерри Исадин пекер чип вегьена чпин арада пайна. 35Халкь акъвазна килигзавай. Абурухъ галаз санал гьакимри рахшандар ийизвай.
– Ам Аллагьди хкянавай Месигь яз, масадбур Ада хиласзавайтӀа, гила Вичи Вич хиласрай! – лугьуз хьана абуру.
36Аскеррини Адаз гьинавачир гафар лугьузвай. Адан патав атана, Адаз хъухъ лугьуз цуру чехир теклифзавай. Адан сивив цуру чехир авай къаб агудна, 37Адаз лагьана:
– Вун чувудрин Пачагь ятӀа, Жува Жув хиласа.
38Адан кьилихъай кхьенвай: «Им чувудрин Пачагь я».
39Адахъ галаз санал патав гвай хашуниз янавай тахсиркаррикай сада Адаз пис экъуьгъунар авуна:
– Вун Месигь ятӀа, Вуна Вунни хиласа, чунни.
40Муькуьда адаз туьгьметдив лагьана:
– Ваз Аллагьдихъай кичӀедачни, бес вазни гьа жаза ганвачни? 41Чаз атана кӀанзавай жаза чаз ганва; чна авур кардай чав чи эвез агакьнава, амма и касдик гьич са тахсирни квач.
42Исадизни ада лагьана:
– Я Иса! Вун Пачагь хьайила, Вуна зун рикӀел хкваш!
43– За ваз рикӀивай лугьузва хьи, къемаз вун Захъ галаз женнетда жеда, – лагьана Исади.
Исадин кьиникь
(МатӀай 27:45-56; Мрк. 15:33-41; Ягь. 19:30)
44Нисинилай сятдин пудалди вири чилел мичӀ акьалтнай: 45ракъинин экуьвал зайиф хьана. Аллагьдин КӀвале авай перде юкьвайгъуз пад хьана. 46Исади ван алаз гьарайна, лагьана:
– Я Буба! Зи Руьгь За Вав вугузва.
ГьакӀ лагьана Ада чан гана.
47И крар акур аскеррин кьилевай сада Аллагьдиз шукур авуна, лагьана:
– Ам гьакъикъи гьахъ-михьи Инсан тир.
48Тамашиз анал алтӀушнавай вири инсанар инал хьайи кар акурла, чпин хур гатаз-гатаз, чкӀиз эгечӀна. 49Ам чидай кьван вирибуруз, Галилейдай Адан гуьгъуьна аваз атай папаризни, яргъал акъвазна, вири кьиляй-кьилиз акунай.
Иса рага атӀанвай сура тун
(МатӀай 27:57-61; Мрк. 15:42-47; Ягь. 19:38-42)
50-51 Ягьудатдин АриматӀай шегьердай тир Юсуф лугьудай регьим авай ва гьахъ-михьи са кас Меслягьатдин векил тиртӀани, ам дуванди кьабулай къарардихъни адан крарихъ галаз рази тушир. Адан вилни Аллагьди пачагьвалдай вахтунал алай. 52Ада, ПилатӀан патав атана, адавай Исадин мейит къахчудай ихтияр тӀалабна. 53Ада Исадин мейит хашунилай эляна, кетендин кафандик кутуна ва рага атӀанвай гьеле са мейитни тун тавунвай кьветӀе-сура эцигна. 54А югъ жуьмядин няни тир, Киш югъ алукьзавай. 55Юсуфан гуьгъуьна аваз Галилейдай Исадихъ галаз атай папарни фенай. Ам кьветӀе гьикӀ эцигнатӀа, гьикӀ кучукнатӀа, абур килигна. 56Ахпа абур кӀвализ хъфена. КӀвале абуру атир галай гъери гьазурна. Киш юкъуз, Аллагьдин тагькимрив кьазвайвал, абуру ял яна.
Currently Selected:
ЛукӀа 23: ЛезПК
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Институт перевода Библии, 2010-2024