Genesis 4
4
Kain nge Abel
1Me par Adam nge le’engin, me diyen le’engin. Me gargeleg bochi pagel me ga’ar, “I SOMOL e ayuw rok make yag bochi pagel gufakay.” Me tunguy Kain#4:1 KAIN: Re ngachal ney e gowa fare bugithin ni Hebrew ni “ke yagnag.” ngak. 2Me migid me gargeleg Abel ni walagen Kain. Me par Abel ni ir reb e tachugol saf, ma Kain e par ni ir be’ nib tawoldug. 3Me munmun me fek Kain boch e tin kefel’ ko woldug rok me pi’ ni maligach ngak SOMOL. 4Me munmun me fek Abel e bin som’on i pifak e saf rok nge li’, me pi’ e yungin felel’ riy ni maligach. Me SOMOL e fel’ Abel nge maligach rok u wan’, 5ma de fel’ Kain nge maligach rok u wan’. Me ri damumuw Kain nge thilpariy owchen. 6Me ga’ar SOMOL ngak Kain, “Mang ni kam damumuw? Mang ni kam thilpariy owchem? 7Fa’an mang e mu ngongliy e tin ni bfel’, ma be m’ug u owchem ni gab felfelan’; machane bochan e kam ngongliy e tin nib kireb, ma aram e be son nigem e denen u langan e mab rom ni nge og ngom. Ba’adag ni nge gagiyeg nigem, machane thingar mu gel ngak.”
8Me ga’ar Kain ngak Abel ni walagen, “Mu un ngog nga darow nga milay’.” Fa’anra tawgow nga milay’, me cheal Kain ngak walagen nge li’ ngem’.#Mat 23:35; Luk 11:51; 1 Jn 3:12
9Me fith SOMOL Kain ni ga’ar, “Bu uw Abel ni walagem?” Me fulweg ni ga’ar, “Da gu nang. I gag e matanag rok walageg?” 10Me ga’ar SOMOL, “Mang ni kam ngongliy e binir e pa’ ni rib gel e kireb riy? Racha’en walagem e be tolul ngog u fithik’ e but’, ni bod ba lam ni be pong ni ngan fulweg taban e kireb ni kan rin’ ngak.#Heb 12:24 11Kan tem nib buch wa’atham ni dabkiyag ni ngam wolduguy e but’. Ya ke wanum racha’en walagem nga fithik’ ni gowa i fal l’ugun ni nge unum ko fangiyal’ nim thang e fan rok walagem. 12Fa’an ga ra muruwliy e but’ ngam yung e woldug ngay, ma dabi pi’ e but’ e ggan ngom, bay mu par ni dariy e naun rom ma ga be malethay u fayleng i yan.”
13Me ga’ar Kain ngak SOMOL, “Biney e gechig ni kam pi’ e kayigi gel ngog. 14Chiney e ngam chuwegeg ko re gi but’ ney ngu p’eowchem. Bay gu par ni dariy e naun rog mu ug malethay u fayleng i yan, ma demturug be’ nra mada’ nigeg me li’eg nggum’.” 15Machane me fulweg SOMOL ngak ni ga’ar, “Danga’. Fa’anra li’em be’ ngamum’ ma medlip e pogofan ni yira thang ni nge yan nga puluwon.” Me tay SOMOL e pow nga daken Kain ni be ning chiylen ngak e en nra mada’nag ni dabi li’ ngem’. 16Me chuw Kain rok SOMOL nge yan i par nga bangi nam ni Nod#4:16 NOD: Fan e re bugithin ney ni Hebrew e “Yanyan”. fithingan, ni bay ko ngek u Eden.
Pi’in ni owchen Kain
17Me par Kain nge le’engin, me diyen le’engin, nge gargeleg bochi pagel min tunguy fithingan ni Enok. Me yan i ngongliy bangi ban’en nge ngal’ ni reb e binaw ni ba ga’, me tunguy yu Enok ngay, ni ngachalen fachi cha’ ni fak. 18Mi ni gargeleg bochi pagel ni fak Enok, min tunguy fithingan ni Irad, ni ir e chitamngin Mehujael, me Mehujael e chitamngin Methushael, me Methushael e chitamngin Lamek. 19Me le’engiy Lamek l’agruw i ppin; bagayow e Adah fithingan ma bagayow e Zillah. 20Me gargeleg Adah Jabal, ni ir e mang chitamngin e pi’in ni ur chugol garbawgad ma pi tent e kemang naun ngorad. 21Mi Jubal fithingan walagen ni pumo’on ni ir e chitamngin urngin e pi’in yad manang e musik ni yad ma chubeg e harp ma yad ma thoy e ngal. 22Me gargel Zillah ni Tubal Kain, ni ir e mang chitamngin urngin e pi’in yad ma maruwel ko wasey ma yad ma ngongliy ban’en ko wasey ni bronze nge iron. Mi Naamah e be’ ni bpin ni walagen Tubal Kain. 23Me non Lamek ngak gal le’engin ni ga’ar,
“Adah nge Zillah, mu telmew ngog:
Kug li’ be’ ni kab pagel kem’ ni bochan e i pirdi’iyeg.
24Fa’anra medlip e pogofan e yira thang ni ngan falbiyen Kain,
ma gag e medlipi ragag nge medlip e yira thang ni fa’anra li’eg be’ nggum’.”
Seth nge Enosh
25Miki par Adam nge le’engin bayay, min gargeleg bochi pagel. Me ga’ar le’engin, “Ke pi’ Got ngog e re tir ney nib pumo’on ni nge yan nga luwan Abel, ni fa’ani Kain e li’ ngem’”; me tunguy fithingan ni Seth.#4:25 SETH: Lingan e re ngachal ney ni Hebrew e gowa fare bugithin ni “ke pi’.” 26Mi ni gargeleg bochi pagel rok Seth, me tunguy fithingan ni Enosh. Ireram e re ngiyal’ i n’en ni tabab e girdi’ i pining fithingan SOMOL, nib thothup ko meybil rorad.
Currently Selected:
Genesis 4: YAP
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2007 Bible Society of Micronesia. Released under the Creative Commons CC-BY-SA license 4.0.