Markás 15
15
Issá o Pilátus
(Mattá 27:1–2, 11–26; Luká 23:1–7, 13–25; Yuhanná 18:28–40)
1Sabáhá máhallah mazanén dini péshwá o kawmay kamásh o Sharyatay zánóger o Sarókáni Diwánay sajjahén báskán wati shawr yakk kort. Issáesh bast o bort o Pilátusay dastá dát. 2Pilátusá cha áiá jost kort: “Taw Yahudiáni bádsháh ay?” Issáyá passaw dát: “Taw wat gwashagá ay.” 3Mazanén dini péshwá áiay sará bázén bohtámé janagá atant. 4Pilátusá padá jost kort: “Parchá passawa nadayay? Bechár, tai sará chinchok bohtám janagá ant.” 5Issáyá hecch passaw nadát. Pilátus hayrán at.
6Pilátusá har sál aiday wahdá cha Yahudi bandigán yakké, hamá ke mardomán lóthetagat, ázáta kort. 7Bandigáni tahá Barabbás námén mardé hastat. Gón hamá yágián gerag butagat ke shóreshay wahdá kosht o kóshesh kortagat. 8Mardom Pilátusay kerrá átkant o dazbandiesh kort ke anchó ke taw har wahdá kortag, é randi ham hamá paymá bekan. 9Pilátusá jost kort: “Shomá lóthét ke Yahudiáni bádsháhá pa shomá ázát bekanán?” 10Áiá zánt ke dini péshwáyán pa hasadd Issá áiay dastá dátag. Paméshká choshi gwasht. 11Bale mazanén dini péshwáyán mardom shóréntant ke cha Pilátusá, Issáay badalá Barabbásay ázátiá belóthét. 12Pilátusá padá jost kort: “Gorhá é mardá ke shomá Yahudiáni bádsháha gwashét, eshiá chón bekanán?” 13Mardomán kukkár kort: “Salibi kassh!” 14Pilátusá jost kort: “Chéá bárén? Mayári ché ent?” Bale áyán géshter kukkár kort: “Salibi kassh!” 15Gorhá Pilátusá Barabbás ázát kort o Issá shallák o hayzarán janáént o dáti ke salib kasshag bebit, chéá ke áiá lóthet ke mardom cha man razá bebant.
Sepáhig Issáyá kalága zurant
(Mattá 27:27–31; Yuhanná 19:1–3)
16Sepáhigán Issá wáliay kalátay péshgáhá bort o sajjahén lashkaresh lótháént o mocch kort. 17Áyán jamurangén#15:17 Jamu, rangé ke Pársiá banafsh o Orduá banafshi gwashanti. kabáhé Issáay gwará dát o cha dhangar o konthagán tájé addh kort o áiay sará dát. 18Salámesha dát o gwashtesh: “Salám o drót, oo Yahudiáni bádsháh!” 19Sará latth o jendá tokkesha jat o sojdahesha kort. 20Wahdé kalág bandagesh bass kort, gwaray jamurangén kabáhesh kasshet o áiay jenday godesh padá gwará dátant. Randá, pa salib kasshagá bortesh.
Issáyá saliba kasshant
(Mattá 27:32–44; Luká 23:26–43; Yuhanná 19:17–27)
21Keriniay shahray#15:21 Keriniay shahr annugén zamánagay Libiáay molká ent. Shamun námén mardé, ke Sekandar o Ruposay pet at, cha dhagárán pédák at. Sepáhigán pa bigári gept o Issáay salibesh Shamunay baddhá dát. 22Issáesh hamá jágahá áwort ke námi “Joljotá” ent bezán “Kámpólay Jágah”. 23Morr mán kortagén sharábesh dát bale Issáyá nawártant. 24Gorhá salibesh kasshet o pa láthari o korakasshi#15:24 Láthari o korakasshi, bezán chek o posht, tar o hoshk. pocchesh watmánwatá bahr kortant ke bárén kayá ché rasit.
25Sohbay noh at#15:25 Asligén Yunáni nebeshtánka gwashit: “sayomi sáhat”, bezán sáhat nohá. Yahudiáni róchay hesáb, sáhat sohbay shashá bongéja but. ke Issáesh salib kasshet. 26Mayárnámagéay#15:26 Mayárnámag, bezán nebeshtah kortagén mayár. sará áiay mayár é paymá nebeshtagat: “Yahudiáni bádsháh.” 27Issáay hamráhiá do dhongesh ham salib kasshet, yakké áiay rástén kashá o domi chappéná. 28É dhawlá, Pákén Ketábay hamá péshgói rást o sarjam but ke gwashit: Á mán gonahkárán hesáb kanag but.#15:28 Eshayá Nabiay Ketáb 53:12. Lahtén daznebeshtá band 28 nést. 29Rahgwazán dozhmán dát, wati saresh chandhént o gwashtesh: “Hán bárén! Taw gwasht ke man mazanén parasteshgáhá karóján o say róchá padá addhia kanán, 30nun watá berakkén o cha salibá ér á.”
31Hamé paymá mazanén dini péshwá o Sharyatay zánóger watmánwatá Issáay bárawá pa kalág o rishkand gwashagá atant: “Á dega mardomi rakkéntant, bale watá rakkénta nakant. 32Esráilay bádsháh Masih nun cha salibá ér bekapit ke má begendén o báwar bekanén.” Á doén ke gón Issáyá salib kasshag butant, á ham Issáyá bad o rad gwashagá atant.
Issáay mark
(Mattá 27:45–56; Luká 23:44–49; Yuhanná 19:28–30)
33Némróchá sajjahén molká taháriá mán shánt o é taháriá tán bégáhay sáhat sayá#15:33 Asligén Yunáni nebeshtánka gwashit: “shashomi sáhatá beger tán nohomi sáhatá”, bezán maróchigén sáhatáni hesábá, némróchay dwázdahá beger tán bégáhay sayá. dásht. 34Sáhat sayá,#15:34 Asligén Yunáni nebeshtánka gwashit: “nohomi sáhatá”. Issáyá kukkár kort: “Elui, Elui, lemá sabaktani?” Bezán: Oo mani Hodá, oo mani Hodá! Taw chéá maná yalah dát?#15:34 Zabur 22:1. 35Ódá nazzikká óshtátagén lahtén mardomá ke eshkot, gwashtesh: “Bechárét, Elyásá tawár kanagá ent.” 36Cha áyán yakké tacháná shot, espanjé zort o tropshén sharábá missénti. Espanji dáréay sará bast o pa chussagá Issáay némagá shahárt o gwashti: “Sabr kanét, chárén bárén Elyás eshiay jahlá ér kanagá kayt yá na?” 37Gorhá, Issáyá peryáté jat o sáhi dát. 38Hamé wahdá mazanén parasteshgáhay pardah sará beger tán boná dert o do ném but. 39Hamá pawji apsar ke Issáay dém pa démá óshtátagat, wahdé disti ke Issáyá chón sáh dát, gwashti: “Béshakk é mard Hodáay Chokk at.”
40Lahtén janén dur óshtátag o cháragá at. Maryam Magdalini, kasterén Ákub o Yusháay mát Maryam o Sálumah ham gón atant. 41Wahdé Issá Jalilá at, é janén áiay hamráh atant o áiay hayáldáriesha kort. Abéd cha eshán dega bázén janéné ham hamódá at ke áiay hamráhiá Urshalimá átkagatant.
Issáay kabr o kapan
(Mattá 27:57–61; Luká 23:50–56; Yuhanná 19:38–42)
42Jomahay róch at o mardom Shabbatay tayáriá kanagá atant. Shap ke but 43Issop námén mardé ke Arimátiáay shahray nendók o Sarókáni Diwánay sharapmandén báské at o wat ham Hodáay bádsháhiay wadárig#15:43 Wadárig, bezán rahchár, entezár kanók. at, Pilátusay kerrá shot o pa natorsi dazbandii kort ke Issáay jóná maná beday.
44Pilátus hayrán but ke Issá damáná mortag. Pawji apsari lótháént o josti kort ke bárén Issáyá sáh dátag yá na? 45Pawji apsaray sajjahén hál o habaráni eshkonagá rand, Pilatusá Issáay jón Issopárá dát. 46Issopá lilomén godé bahá zort, Issáay jóni cha salibá ér gétk o hamé goday tahá patát o kabréay tahá éri kort ke kóhéay tahá janag butagat. Padá dhóké léthi dát o kabray dapá dáti. 47Maryam Magdalini o Yusháay mát Maryam, har doénán dist ke Issáesh kojá kall kort.
Currently Selected:
Markás 15: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.