Markás 14
14
Issáay koshagay pandal
(Mattá 26:1–5; Luká 22:1–2; Yuhanná 11:45–54)
1Sargwaz#14:1 Eshiá Sargwazay Aid paméshká gwashant ke cha Mesriáni chérdastiá Esráiliáni ázátiay wahdá markay préshtag cha Esráili chokkáni koshagá sar gwast. o Béhomirén Naganay Aidá#14:1 Béhomirén Naganay Aid, Sargwazay Aidá rand hapt róchay tahá geraga bit. do róch pasht kaptagat. Mazanén dini péshwá o Sharyatay zánóger ráh o daré shóház kanagá atant ke gón repk o honar Issáyá begerant o bekoshant. 2Bale gwashtesh: “Aiday róchán na, chó mabit ke mardom áshóp bekanant.”
Janéné Issáyá atra moshit
(Mattá 26:6–13; Yuhanná 12:1–8)
3Issá, Bayt-Anyáyá Shamun Garriay lógá mehmán at. Hamódá, yakk janéné gón albástaray#14:3 Albástar narmén sengé. atrdánéá Issáay gwará átk. Atrdáná Hendi sombolay#14:3 Sombol washbóén gol o pollé. zagr#14:3 Zagr, bezán asil, háles. o gránbaháén atr mán at. Áiá atrdán prósht o atr Issáay sará per rétkant. 4Ódá neshtagén lahtén mardom zahrá porr but o gwashtesh: “É atri chéá zawál kort? 5É atr, say sad dinárá#14:5 Say sad dinár kesás yakk sáléay mozz at. gésh bahá butagat. Baháesh kortén o zarresh garib o nézgáráná bedáténant.” Paméshká á nun janéná mayárig kanagá atant. 6Bale Issáyá gwasht: “Belléti, kári madárét. Shomá parchá eshiá paréshán kanagá ét? É janéná gón man nékié kortag. 7Garib o nézgár modám shomay kerrá ant o shomá harwahd ke belóthét, gón áyán néki korta kanét, bale man harwahd gón shomá gón naán. 8Harché ke é janénay dastá butagat korti. Maná atri per rétk ke cha pésará maná pa kabr kanagá tayár bekant. 9Shomárá rásténa gwashán, sajjahén donyáyá, har jáh ke wasshén mestágay jár janaga bit, é janén o eshiay kár ham yát kanaga bant.”
Yahudá Eskáryutiay badén erádah
(Mattá 26:14–16; Luká 22:3–6)
10Yahudá Eskaryuti ke cha Issáay dwázdahén kásedán yakké at, mazanén dini péshwáyáni kerrá shot ke Issáyá áyáni dastá bedant. 11Péshwá cha Yahudáay habaray eshkonagá gal butant o labzesh kort ke tará zarra dayén. Nun Yahudá sharrén móhéay shóházá at ke Issáyá áyáni dastá bedant.
Sargwazay shámay tayári
(Mattá 26:17–30; Luká 22:7–23)
12Béhomirén Naganay Aiday awali róchá ke Sargwazay gwarándhay korbánig kanagay róch at, moridán cha Issáyá jost kort: “Sargwazay Aiday shámá kojá kanay? Taw ché gwashay, kojá shámay tayáriá bekanén?” 13Gorhá, Issáyá cha moridán do kas dém dát o gwashti: “Shahrá berawét. Ódá mardé gendét ke ápi kunzagé gón enti, áiay poshtá rawán bét. 14Hamá lógá ke á rawt, shomá ham berawét o lógay wáhondá begwashét: ‘Ostád jostá ent ke mehmánhánah kojá ent ke man gón wati moridán Sargwazay shámá hamódá bekanán?’ 15Á mard shomárá wati lógay borzi tabakká mazanén báné pésha dárit ke ódá har chizz hast o barábar ent, pa má shámay tayáriá hamódá bekanét.” 16Morid dar átk o shahrá shotant. Ódá, áyán har chizz hamá paymá dist ke Issáyá gwashtagat o Sargwazay shámesh tayár kort.
17Shap ke but, Issá gón dwázdahén kásedán hamódá átk. 18Wahdé parzónagay sará neshtag o shám kanagá atant, Issáyá gwasht: “Shomárá rásténa gwashán, cha shomá yakké ke annun gón man warák waragá ent, maná dróhit o dozhmenáni dastá dant.” 19Á paréshán butant o yakk yakká jostesh kort: “Man wa naán, na?” 20Issáyá passaw dát: “Cha shomá dwázdahénán yakké, hamá ke gón man yakkén kásagá nagan per janagá ent. 21Chéá ke hamá dhawlá ke nebisag butag, Ensánay Chokk cha é donyáyá rawagi ent, bale bazhn o apsóz pa hamáiá ke Ensánay Chokká dróhit. Pa áiá sharter at ke hechbar pédá mabutén.”
Goddhi shám
22Wahdé shám kanagá atant, Issáyá nagané zort, Hodáay shogri gept, nagani chondh chondh kort o moridáná dát. Gwashti: “Bezurét! É mani badan ent.” 23Padá pyálahé zorti, Hodáay shogri gept, moridáná dáti o sajjahénán cha hamé pyálahá nóshet. 24Nun gwashti: “É mani hón ent, ahd o paymánay hón ke pa bázénéá réchaga bit. 25Shomárá rásténa gwashán, nun dega baré anguray ápá nawarán, hamá róchá ke Hodáay bádsháhia kayt, waráni.”
26Hamday#14:26 Bezán Zabur 113–118. janagá rand dém pa Zaytunay Kóhá shotant.
Petrosay enkáray péshgói
(Mattá 26:31–35; Luká 22:31–34; Yuhanná 13:36–38)
27Issáyá gón moridán gwasht: “Shomá sajjahén thagala warét o maná yalaha dayét. Chéá ke nebisag butag: Man shepánká janán o pas sheng o shánga bant.#14:27 Zakaryá Nabiay Ketáb 13:7. 28Bale dobar zendag bayagá rand, cha shomá pésar Jalilá rawán.” 29Petrosá darráént: “Agan sajjahén thagal bwarant o tará yalah bedayant, man hechbar thagala nawarán.” 30Issáyá gwasht: “Tará rásténa gwashán, hamé maróchi, haw enshapi, taw cha korósay domi bángá pésar, mani pajjáh áragá say randá enkára kanay.” 31Petrosá pa deljami gwasht: “Tai pajjáh áragá hechbar enkára nakanán, bell toré tai hamráhiá mani sáh ham berawt.” É dega sajjahén moridán ham anchó gwasht.
Issáay dwá
(Mattá 26:36–46; Luká 22:39–46)
32Issá o áiay morid, Jetsimáni námén jágahéá shotant. Gón áyán gwashti: “Hamedá benendét, mana rawán o dwá kanán.” 33Áiá Petros o Ákub o Yuhanná hamráh kortant. Á sakk paréshán o bétáhir#14:33 Bétáhir, bezán béárám, békarár. at. 34Gón áyán gwashti: “Mani del sakk paréshán ent o andóhán maná markig kortag, shomá hamedá bedárét, mawapsét o hozzhár bét.”
35Cha ódá kammé démterá shot, dém pa chér kapt o dwá kanagá lagget ke agan buta kant, é sáhat cha mani sará bethagalit. 36Gwashti: “Abbá, oo mani Pet! Tai dastá har chizz buta kant. Sakkiáni é pyálahá cha man dur kan, bale mani wáhagay sará na, hamá paymá ke tai razá ent.” 37Issá ke per tarret, disti ke morid wáb ant. Gorhá gón Shamun-Petrosá gwashti: “Shamun! Wáb ay? Pa yakk sáhatéá ham taw ágah but nakort? 38Hozzhár bét o dwá kanét ke ázmáesh o chakkásá#14:38 Chakkás, bezán ázmáesh, emtehán. makapét. Ruh tayár ent, bale jesm nezór ent.” 39Yakk baré padá shot o hamá dwái kort. 40Wahdé per tarret, disti morid padá wáb ant o chammesh pacha nabant. Áyán nazánt ke áiá ché passaw bedayant. 41Sayomi randá ke moridáni kerrá átk, gwashti: “Angat waptag o wáb ét? Bass ent! Á wahd o sáhat rasetag. Becháret, nun Ensánay Chokk dróhag o gonahkáráni dastá dayaga bit. 42Pád áét ke rawén! Á ke maná dróhit, pédák ent.”
Issáay dazgir bayag
(Mattá 26:47–56; Luká 22:47–53; Yuhanná 18:3–12)
43Issá angat habará at ke cha dwázdahén kásedán yakké, bezán Yahudá átk o raset. Rombé mardomi hamráh at. Mardomán zahm o latth gón at. É mardom cha mazanén dini péshwá o Sharyatay zánóger o kawmay kamásháni némagá ráh dayag butagatant o 44Issáay dróhók#14:44 Dróhók, bezán hamá ke wati hamráhá rada dant o bahá kant. Yahudáyá é nesháni dátagat: “Hamáiá ke mana chokkán, Issá hamá ent. Áiá dazgir kanét, mohr bedárét o bebarét.”
45Gorhá, Yahudá tachká tachk Issáay kerrá átk o gwashti: “Oo ostád!” Nun Issái chokket. 46Yahudáay hamráhán Issá gept o dazgir kort. 47Cha Issáay hamráhán yakkéá wati zahm kasshet o masterén dini péshwáay nawkaray sará hamlahi kort o áiay góshi sest.
48Issáyá gón rombay mardomán gwasht: “Záná man dozz o dhongé án ke shomá zahm o latth zortag o mani geragá átkagét? 49Man har róch, shomay démá mazanén parasteshgáhá tálim dátag o shomá maná nageptag. Bale Pákén Ketábay habar báyad ent rást o sarjam bebant.”
50Sajjahén moridán Issá yalah dát o tatkant. 51Warnáé ke bass lilomén#14:51 Lilom, goday tahré ke Engréziá “linen” gwashaga bit. jámagé gwará ati, Issáay randá kapt. Áesh ham gept. 52Bale dazgir kanagay wahdá jámag dar lakosht o warná jándará tatk.
Issá, Sarókáni Diwáná
(Mattá 26:57–68; Luká 22:54–55, 63–71; Yuhanná 18:13–14, 19–24)
53Issáay dazgir kanókán Issá masterén dini péshwáay kerrá bort. É dega mazanén dini péshwá, kawmay kamásh o Sharyatay zánóger hamódá mocch atant. 54Petros ham dur durá Issáay randá rawán at, masterén dini péshwáay lógay péshgáhá#14:54 Péshgáh, bezán péshjáh, pézhgáh, lógay chárdiwál, sahn. potert o sepáhigáni#14:54 Sepahig, bezán pawji, arteshi, lashkari. kerrá nesht o ásá watá tápagá lagget. 55Mazanén dini péshwá o Sarókáni Diwánay sajjahén básk#14:55 Básk, bezán ozw, membar. Issáay helápá sháhediay shóházá atant ke Issáyá markay sezá bedayant, bale hecchesh dast nakapt. 56Bázénéá drógén sháhedi dát, bale áyáni habar gón yakdomiá yakk o hamdap naatant. 57Dega lahtén pa drógén sháhedi dayagá pád átk o gwashtesh: 58“É mardá may démá gwasht o má eshkot: ‘Man ensáni dastay addh kortagén é mazanén parasteshgáhá karóján#14:58 Karójag, bezán harójag, addh kortagén chizzéay próshag. o padá say róchay tahá yakké bandán ke ensáni dastay addh kortagéné nabit.’” 59Bale é sháhedáni habar ham yakk dhawlá naatant.
60Masterén dini péshwá pád átk o sajjahénáni démá cha Issáyá josti kort: “Genday é mardom tai helápá chónén sháhedi dayagá ant? Esháni passawá heccha nagwashay?” 61Bale Issá bétawár at o hecch passawi nadát. Masterén dini péshwáyá padá cha áiá jost kort: “Taw hamá Masih ay, mazanshánén Hodáay Chokk ay?” 62Issáyá passaw dát: “Man hamá án o shomá yakk róché gendét ke Ensánay Chokk, zórmandén Hodáay rástén kashá neshtag o é ham gendét ke gón ásmánay jambarána kayt.” 63Nun masterén dini péshwáyá wati gwaray pocch dertant o gwasht: “Márá angat dega sháhedé pakár ent? 64Shomá wat eshiay kopr eshkot. Nun shomay shawr o saláh ché ent?” Sajjahénán darráént: “Eshiay sezá mark ent.” 65Cha áyán lahténá Issáay dap o démá tokk jat,#14:65 Tokk janag, bezán toh janag. áiay chammesh bastant, mosht o shahmátesh jat o gwashtesh: “Wati gaybi zántá kár band!” Padá sepáhigán á gept o jat.
Petrosay enkár
(Mattá 26:69–75; Luká 22:56–62; Yuhanná 18:15–18, 25–27)
66Petros jahlá péshgáhá at ke masterén dini péshwáay móledé átk. 67Wahdé Petrosi dist ke ásay démá watá tápagá ent, rók róká cháret o gwashti: “Taw ham hamé Issá Náseriay hamráh butagay!” 68Bale Petrosá enkár kort, gwashti: “Mana nazánán o hecch sarpada nabán taw ché gwashagá ay.” Gón é habará, dém pa darwázagá rahádag but. Hamé damáná korósá báng dát.#14:68 Lahtén daznebeshtá “hamé damáná korósá báng dát” nést. 69Á móledá yakk baré padá Petros dist o gón óshtátagén mardomán gwashti: “É mard cha hamáyán ent!” 70Bale Petrosá padá enkár kort. Kammé randterá, ódá óshtátagén mardomán padá gón Petrosá gwasht: “Pakká taw cha hamáyán ay, chéá ke taw ham Jalilié ay.” 71Bale Petrosá sawgend wárt o gwasht: “Hodá maná nálat bekanát agan dróg bebandán. É marday bárawá ke shomá habará ét, mania nazánán.” 72Hamé damáná korósá padá#14:72 Lahtén daznebeshtá “padá” nést. báng dát. Nun Petros Issáay hamá habaray yátá kapt ke gwashtagati: “Cha korósay domi#14:72 Lahtén daznebeshtá “domi” nést. bángá pésar, taw say randá mani pajjáh áragá enkára kanay.” Nun donyá áiay chammán tahár but o zár zárá gréti.
Currently Selected:
Markás 14: HPKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2015-2022, Wycliffe Bible Translators, Inc. and the Balochi Bible Translation Team. All rights reserved.