Isauyedi 19
19
Iave taunina ivekaiveveneni Koya Sainai waineye
2Me Isileli Lepidimu ikiaweni inaqo ilekwa Sainai Pwayapwayamaiqe Koya Sainai lamuneye ivebaekwa. 3Matautauda Mosese ilaga koya waineye Yaubada taiauda inavesipupu.
We Iave iveqole Mosese waineye koya waineye'eqa ivo, “Me Isileli Iakobo tubuleleleqinavo kuvonedi:
4“Kunavo, ‘Komi kaisemi kwayagovi vakai avalabubuni me Itipita waidie, we wete kwanuani akewami mesaida menaki papeneye natuna idodoqi iyaveyaveqeni imaiemi dede waineye waigue. 5Kago komi kwaivekimatana-vekavekaiegu wete guvonadabadaba kwaivekimataneni komi Yau gutomo'otoqavo vesivesinuami. We pwayapwaya matatabuna Yau gukabaloina we tomo'otoqa matatabudi waidie'eqa komi gutomo'otoqa nuapougu. 6Komi kwaivetovelomu we kwailituqa paipaigu, mikabaloina ayatokeni kaisegu waigue. Me Isileli waidie vonanidiavo kuvesipupuyedi.”
7Beqa Mosese koya waineye'eqa iobuma me Isileli tomoqovo bwaigidi iqolekauqidi, we loinanidiavo matatabudi Iave iveleni ivesipupuyedi waidie. 8We tomo'otoqa matatabudi bonadi tamoqanaeqa ibaivila ivo, “E'e, vakai matatabuna Iave ivesipupuyedi kaivalabubunidi.” Matautauda Mosese tomo'otoqa dibaivila inaweni ivesipupuyeni Iave waineye.
9Iave Mosese waineye ivesipupu ivo, “Yau aimai waumana badubaduna naqeneye, beqa tomo'otoqa bonagu inanoqai taiauda taesipupu beqa tutuya matatabuna inaetumaqanemu.”
Tutuyanina Mosese tomo'otoqa dibaivila ivesipupuyedi Iave waineye. 10Iave ivesipupu waineye ivo, “Kuobu tomo'otoqa waidie kuvonedi inavalabubuna deqoina wete kawaie, beqa taunidi inagiavemaqetadi inasobwanu waigue. Kadikaleko inalegwadi 11wete inavalabubuna kaiata kanavetonu paipaina. Kaiatanina waineye Yau Iave aiobuma Koya Sainai waineye, beqa tomo'otoqa matatabudi inakisegu. 12We ketoava Koya waineye kuyatoi inavelauvivila tomo'otoqa ge inabala. Kuloinapakaledi kunavo, ‘Kwavekisabodebodemi! Ge kwailaga koya tabwaneye o kanaketoava kwaiyoqopeleni. Kago aitoi koyanina inakavekavini kwailuvewapai. 13Kago tamo tomoqo o kaisaya ketoavanina inayoqopeleni ge kwaikavekavini we kaia kwaimwalaqi kibadi beqa o gileu beqa kwainigei kwailuvewapai. We tutuyanina naqekava bonana kaniakwanina kwainoqai, tomo'otoqa dibaekwa inabaileni inanaqo Koya lamuneye.”
14Matautauda Mosese iobuma koya waineye'eqa tomo'otoqa ivonedi taunidi inagiavemaqetadi Iave waineye inasobwanu. Beqa kadikaleko ilegwadi. 15We Mosese ivesipupu waidie ivo, “Kwavalabubuna kaiata kanavetonu paipaina. Dede kaiatanina waineye inaqonaqo kaiata kanavetonu waineye ge tamo kwainaqi.”
16Kaiata kanavetonu waineye kawakawaie namanamala, kanitala bwaigina wete waumana badubaduna ilausimatala Koya tabwana ipania, we inoqai naqekava bonana bwaigina. Tomo'otoqa matatabudi baekweye imiamia igololo ivelaudididiqa. 17We Mosese ikedagumetedi baekwanina waineye'eqa inaqo Koya lamuneye itovotovoi Iave taiauda inavekedabababana. 18Lupwa Koya Sainai matatabuna ikaiumai, paina Iave kai waineye iobuma. We lupwa ilaga mesaida kayalele bwaigina itunutunuya we koya matatabuna iyueyue. 19Tutuyanina naqekava bonana iebwaiga-otoqa, Mosese ivesipupu we Yaubada bonana bwaiginaeqa ibaivilai mesaida kanitala. 20We Iave Koya Sainai tabwaneye iobuma Mosese iqoleni inalaga, beqa Mosese ilaga Iave taiauda inavekedabababana.
Currently Selected:
Isauyedi 19: mzz
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023 (Active), Wycliffe Bible Translators, Inc. All rights reserved.