Apa 8
8
Soloʼa siosi vayaʼmo lusi kava huno hanageke yaʼmo apamiʼniya gemae
1 #
Ap 7:58; 8:4; 11:19 Sitiveniʼa faliʼniya afinaʼmo Yulusalemu taonifiʼmo maiʼnaya siosi vayaʼmo lusi hanageke yaʼmo apamiʼnae. Apamiʼnageʼapaeʼmo muki siosi vayaʼmo atagu faeʼa apaune heʼa Yutiya kotegaʼe Sameliya kotegaʼeʼmo uʼeʼa huʼnageʼa apa vayaʼageʼmo Yulusalemu taonifiʼmo maiʼnae. 2Mago mono neʼafiya vayaʼmogi Sitiveniʼmo aliniʼuʼa kiʼa ateteʼapaeʼmo lusi kava huʼa yulagefa aiʼnae.
3 #
Ap 9:1,13; 22:4; 26:9-11 Inagi Soloʼa siosi vayaʼmo apamagino hano hisiyafeʼmo ina kavaʼmo huno uno haino noʼapifati noʼapifatiʼmo ve aʼnemo heno apavayu hulinuno kalavusi huno apatete apatete huʼniye.
Sameliya kotegamo uʼa Goti geʼamo aeʼa hakalo huʼa hapa paiʼnaya gemae
4 #
Ap 6:5
Ataleʼa atagu faeʼa uʼeʼa huʼnaya vayaʼmogimo muki haopalegamo Goti geʼamo aeʼa hakalo huʼa hapa paiʼnae. 5Filipiʼa Sameliya kotega taonifiʼmo uno Kalaisife ava gemo aeno hakalo huno hapa paiʼniye. 6Muki vayaʼmogimo geʼamo afige noʼagaya agufa lokiya aune kavaʼmo huʼnigeʼa agege huteʼapaeʼmo muki ve aʼnemogimo magoke apaipa apakesamo aliʼneʼa Filipiʼa huʼniya gemo alagepa huʼa afiʼnae. 7#Mt 10:1; Mk 16:17Agaemo lokiya kavaʼmo huʼnigeʼapaeʼmo hosu apaune vayaʼmo muki vayaʼai apaipafatiʼmo emiʼeʼapaeʼmo alopa gefatiʼmo ge hu maleʼa ataleʼa apaune heʼnae. Agaemo muki kanage kanaga osuʼa neʼmaiya vayaʼmo alino he tino apatege apaiyamo hosuʼniya vayaʼmo alino api aino apatege huʼnigeʼapaeʼmo 8muki Sameliya taonifi vayaʼmogimo ageteʼa lusi kava huʼa amuse huteʼa apamogaga aiʼnae. 9Mago ani taonifiʼmo maiʼniya vekamo agiʼamo Saimoniʼa hogoteno hapa painoʼaeʼmo, ala vekamo maiʼnove, huno hapa paiteno hosu apaune vayaʼai himamuʼapiletiʼmo noʼagaya aeto agufa aune kavaʼmo huge huge huno maiʼnigeʼapaeʼmo Sameliya vayaʼmogi hapau aiʼnae. 10Muki ala apaki vayaʼmogiʼe apaki ohaneʼniya vayaʼmogiʼeʼmo geʼamo alagepa huʼa afiteʼapaeʼmo, Vae, huʼa, ani vekamo lokiya vekamo gotiʼa maiʼniye, huʼa huʼnae. 11Yatala afinaʼmo hosu apaune vayaʼai himamuʼapiletiʼmo noʼagaya aeto agufa aune kavaʼmo huno alino apave liʼnigeʼapaeʼmo hapau aiteʼa alagepa huʼa geʼamo afiʼnae. 12Saimoni geʼamo afiʼnayaʼmonanafa Filipiʼa alagepa gemo Gotiʼa neʼyagaiya kavafeʼmo ava gemo huge Yesu Kalaisifeʼmo ava gemo huge huʼnigeʼa afiteʼapaeʼmo apakesamo afiʼa fatago huʼnaya ve aʼnemo aniʼmo faleno apateʼniye. 13Saimoniʼeʼmo agesamo afino fatago huʼnigeno aniʼmo faleno ateʼnigenoʼaeʼmo Filipiʼeʼmo lokaeno maiʼneno ageyana Filipiʼa noʼagaya agufa himamu kavaʼmo huʼnigeno agetenoʼaeʼmo lusi kava huno hau aiʼniye.
14Mago vayaʼmogi huʼapaeʼmo, Sameliya vayaʼmogimo Goti geʼamo alagepa huʼa afiteʼa aliʼnae, huʼa apava gemo huʼnageʼa apa vayaʼmogi afiteʼapaeʼmo Pitaʼe Yoniʼeʼmo aliʼa anateʼnageʼana apakaetegamo uʼnaʼae. 15Emiʼeʼana avaʼyi huteʼanaeʼmo apakesamo afiʼa fatago huʼnaya vayaʼmogimo Goti Aunemeʼamo alisayafeʼmo nunumuʼmo huʼnaʼae. 16Ala kava neʼmo Yesu agiʼalefeʼmo aniʼmo faleʼa apateʼnayaʼmonanafa Goti Aunemeʼamo oʼaliʼnae. 17#Ap 19:6Pitaʼe Yoniʼeʼmo anayaʼmo apakufaleʼmo maleʼneʼana nunumuʼmo huʼana apateʼnaʼageno Gotiʼa Aunemeʼamo apamiʼniye.
18Apa vekalaʼmoganimo apakufaleʼmo anayaʼmo maleʼnaʼageno Gotiʼa Aunemeʼamo apamiʼnigeno Saimoniʼa agetenoʼaeʼmo monimo anamisiyafeʼmo hunoʼaeʼmo, 19Ani himamuʼamo alitana namiʼageʼnao nayaʼmo vayaʼai apakufaleʼmo malesugeʼa Goti Aunemeʼamo aliyo, huno hana paiʼnigeno 20Pitaʼa hunoʼaeʼmo, Gotiʼa fikumo hapa maeno neʼapamiya yafeʼmo kagaemo, moniletiʼmo miya faiguve, huka kagesa neʼafinaʼmofeʼmo kagaeʼe monikaʼeʼmo ata kopiʼmo utana lamigaʼae. 21#Sam 78:37Goti aulagaleʼmo kaipamoʼmo kanale osuʼniyaʼmofeʼmo mani aliʼyaʼmo kagae aliʼyaʼmo ohaneʼniye. 22Kaipamo alika afe leteka hosu gemo huʼnove, huka huteka ataleka kakameʼyamo amiteka Gotifeʼmo hukaeʼmo, hosu nagesa afiteʼna hosu gemo huʼnovanagi alika atalo, huka nunumuʼmo huvo. Gotiʼa alino atalesifi alino oʼatalesifi huka amalageka huka ago. 23#Hi 12:15Kageʼnovana kaipa kafa nehanageno atuofa yakana yaʼmo kaipafiʼmo haneʼniye. Hosu kavakamoʼmo yagaino nekateyaʼmofeʼmae, huno ha paiʼniye. 24Saimoniʼa Pitaʼe Yoniʼefeʼmo hunoʼaeʼmo, huʼnaʼa kavaʼmo nagufaleʼmo afole oʼaisiyafeʼmo nunumuʼmo hutana nateʼao, huno hana paiʼniye. 25Anakaemo Yesu Kalaisiʼa huʼnigeʼana ageʼnaʼa kavaʼmo huge Ala kava neʼmo geʼamo aeʼana hakalo huʼana hapa paige huteʼanaeʼmo apataleʼana atagi neʼana Yulusalemu taonifiʼmo uʼnaʼae. Neʼuʼanaeʼmo Sameliya kotega alu taonifiʼe alu taonifiʼeʼmo alagepa faigoko gemo aeʼana hakalo huʼana hapa paimale hapa paimale huliʼana uʼnaʼae.
Filipiʼe Itiyopiya kotega vekaʼefeʼmo huʼniya gemae
26Mago Ala kava neʼmo enisole vekaʼamoʼa Filipifeʼmo, Kagaemo he tika Yulusalemu kotegatiʼmo mago kaʼmo uno lamino Gasa taoni haopalegamo kaʼme kotegamo vayaʼmo oʼmaiʼnaya kotega uno lamino uʼniya kateʼmo uvo, huno ha paiʼnigeno 27#Aiy 56:3-7Filipiʼa he tino uʼniye. Neʼvigenoʼaeʼmo mago alopa gamani vekamo meku vekamo Itiyopiya vayaʼmogi kuvini a kanomo monileʼmo neʼyagaiya vekamo noʼalega ugefeʼmo uʼniye. 28Agaemo Gotifeʼmo mono huteno Yulusalemu taonifatiʼmo eno aino atagi neno hosimoʼmo halaulino uʼniya talalafiʼmo uno haino maiteno neʼunoʼaeʼmo Goti Mukufiʼmo Aiyeyaʼa avoʼmo kae maleʼniya gemo lekana pailino uʼniye. 29Goti Aunemeʼamoʼmo Filipifeʼmo hunoʼaeʼmo, Uka talala haopaleʼmo lokaeka uvo, huno ha paiʼnigeno 30Filipiʼa nagu nagu hununo afiyana Aiyeya Mukufiʼmo lekana nepaigeno afitenoʼaeʼmo, lekana nepaina gemo aepaʼamo afiʼnapiye, huno afi geʼnigenoʼaeʼmo, 31#Yo 16:13Mago vekamoʼmo ani gemo aepaʼamo naha opaisiyana haiya kava huʼna afiguve. Eka haikeno, huno ha paiʼniye. 32#Aiy 53:7-8Goti Mukufiʼmo lekana paiʼniya gemoʼa hunoʼaeʼmo,
Sipisipigana huno maiʼnigeʼa avaleli eʼa amagiʼnae. Vayaʼmogimo aikeli sipisipimo ayokaʼmo lagauʼnagenoʼaeʼmo age noʼaiya sipisipigana huno maiʼnenoʼaeʼmo ge osuno afaʼa maiʼniye. 33Agiʼaleʼmo aliʼa afepi ateteʼa alagepa huʼa aliʼa fako huʼa agoti huʼa oʼateʼnae. Apakaemo huʼapaeʼmo, Ma mopafiʼmo afaʼa oʼmaigiye. Falitesigeʼapaeʼmo agae vayapatiʼmo magoʼe huʼa afole oʼaigae, huʼa huteʼa amagiʼnageno faliʼniye,
huno huʼniye.
34Meku vekamoʼmo Filipifeʼmo hunoʼaeʼmo, Naha paiyo, huno, Gotitegati gemo alinineno aeno hakalo huno hapa nepaiya vekamoʼmo agaiʼaeʼmo ava gemo huno avoʼmo kae maleʼnifi alu vekaeʼmo ava gemo huno avoʼmo kae maleʼniye, huno loka huno afi geʼnigenoʼaeʼmo 35Filipiʼa lekana paiʼniya gefatiʼmo Yesufeʼmo ava gemo aeno hakalo huno ha paiʼniye. 36#Ap 10:47Kategamo neʼuʼanaeʼmo mago ani kotuʼmo haneʼniya yateʼmo uʼana avaʼyi nehuʼanaeʼmo meku vekamoʼmo hunoʼaeʼmo, Manile ani kotuʼmo haneʼniye. Natafauno natesiya yaʼmo haneʼnifi afaʼa aniʼmo faleka nategane, huno afi geʼnigenoʼaeʼmo 37Filipiʼa hunoʼaeʼmo, Muki kaipa kagesafatiʼmo alagi kagesamo afika fatago nehisanaʼmoʼmo afaʼa aniʼmo faleʼna kategauve, huno ha paiʼnigenoʼaeʼmo, Ago ani gemo kaha nepauve, huno, Yesu Kalaisiʼmo Goti mafaʼneʼamo maiʼniye, huʼna nagesamo afiʼna fatago nehuve, huno ha paiʼniye.
38Gamani vekamoʼmo hosimo talalafiʼmo maiʼneno kaʼmo alino ho huno atelino uʼniya vekaeʼmo, Manile maigunanagi atafauka ategetao, huno ha paiʼnigeno atafauno ateʼnigeno meku vekaʼe Filipiʼeʼmo ani kotupiʼmo lamiʼana aniʼmo faleno ateʼniye. 39#1 Kin 18:12Anipatiʼmo ataleʼana hai eʼnaʼagenoʼaeʼmo Goti Aunemeʼamoʼmo Filipiʼmo avalelino uʼniye. Meku vekamoʼmo amogaga aime aime neʼunoʼaeʼmo Filipiʼmo magoʼe huno oʼageʼniye. 40#Ap 21:8Goti Aunemeʼamoʼmo Filipiʼmo avalelinuno ateʼnigenoʼaeʼmo, Asatoti taonifiʼmo maiʼnove, huno agetenoʼaeʼmo muki taoniʼafi taoniʼafiʼmo aeno hakalo huno hapa paimale hapa paimale hulinuno Sisaliya taonifiʼmo uno avaʼyi huʼniye.
Currently Selected:
Apa 8: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.