Apa 9
9
Soloʼa Goti mafaʼnemo hamaleʼniya kavafeʼmo huʼniya gemae
(Ap 22:4-16; 26:9-18)
1 #
Ap 8:3
Ani afinaʼmo Soloʼa Ala kava neʼmo geʼamo neʼafiya vayaʼaifeʼmo lokiya gemo hunoʼaeʼmo, apamagisugeʼa faligae, huno huteno lusi kava huno ha ha hulinuneno huno mono huʼa neʼapataya vayaʼaiteʼmo yagaino neʼapateya vekaeʼmo, 2mago avoʼmo kaeka namiyo. Nagaemo ani avoʼmo alininuʼna Namasakasi taonifiʼmo mono huʼa neʼapataya vayaʼaiteʼmo yagaiʼa neʼapataya vayaʼmo apamisugeʼa ageteʼa naha maesageʼna Yesu kateʼmo neʼvaya ve aʼneʼmo apakeʼna apavaleʼna kalavusi huʼna apateteʼna Yulusalemu taonifiʼmo apavaleliʼna egauve, huno ha paiʼniye.
3Soloʼa Namasakasi kateʼmo uno avaʼyi hugefeʼmo uno taoni haopaleʼmo hogo nehigenoʼaeʼmo kokuʼnapatiʼmo mago ha le yaʼmoʼa agufaleʼmo aeno ha leʼnigeno ageʼniye. 4Agetenoʼaeʼmo mopafiʼmo asagauno aino agoʼya faino maiʼnigenoʼaeʼmo, Solo, Solo, huno, Na kava higekaeʼmo nagaefeʼmo kaini huka neʼnatane, huno ha paiʼnigenoʼaeʼmo, 5#Ap 5:39; 1 Ko 15:8Ala kava nene, huno, kagaemo ina lagae, huno afi geʼnigenoʼaeʼmo, Nagaemo Yesuʼnamo kaini huka neʼnatana vekamo maiʼnove. 6Hosimoʼmo aeno fayopayo hiyategamo akoʼya kayoteʼmo aiyamo aeno lanu paiʼnigeno agafu nekiya agufa kavaʼmo nehane, huno ha paiʼnigeno afitenoʼaeʼmo hau aiteno atete nehunoʼaeʼmo, Ala kava nene, huno, na kava hisuvafeʼmo kahauʼniye, huno afi geʼnigeno Ala kava neʼmoʼa hunoʼaeʼmo, He tika taonifilagamo ugenoʼao mago vekamoʼmo hisana kavafeʼmo kaha paigiye, huno ha paiʼniye. 7Soloʼeʼmo lokaeʼa uʼnaya vayaʼmogi ani huʼniya gemo afiʼnayaʼmonanafa mago vekamo oʼageʼnayaʼmofeʼmo ge osuʼa afaʼa he tiʼa maiʼnae. 8Soloʼa mopafatiʼmo he tino aulagamo ageno ayakeʼniyana aulagafatiʼmo haniʼage huʼniye. Huʼnigeʼa vayaʼamogi ayate aliniʼa Namasakasi taonifiʼmo uʼnae. 9Soloʼa loleʼe magoʼe afinaʼmo mago yaʼmo oʼagege aniʼmo oʼnege neʼyaʼmo oʼnege huno maiʼniye. 10Mago vekamo agiʼamo Ananaiyasiʼa Yesu geʼamo neʼafiya vekamo Namasakasi taonifiʼmo maiʼniye. Agaemo alagamuna ageʼniyana Ala kava neʼmoʼa hunoʼaeʼmo, Ananaiyasiyo, huno huʼnigenoʼaeʼmo, Ala kava nene, huno, maiʼnove, huno ha paiʼnigenoʼaeʼmo, 11#Ap 21:39; 16:9Alo huka mago kaʼmo agiʼamo api kateʼmo uvo. Uka Yutasi nopiʼmo maiʼniya vekamo Tasasi taonifi vekamo agiʼamo Soloʼa kahauya huka ago. Afiyo, huno, agaemo nunumuʼmo nehiye. 12Alagamuna kageʼniyana Ananaiyasigageʼmo eka kayaʼmo agufaleʼmo maleʼneka alika ayakeka ateʼnanageno kageʼniye, huno ha paiʼniye. 13#Ap 8:3Ananaiyasiʼa hunoʼaeʼmo, Ala kava nene, huno, Muki vayaʼmogimo ani vekaeʼmo ava gemo ago huʼnageʼna afiʼnova vekamae. Agaemo Yulusalemu taonifi vayakamo lusi kava huno hanageke yaʼmo apamiʼniye, huʼa ava gemo huʼnageʼna afiʼnove. 14#Ap 9:1-2,21; 1 Ko 1:2Ani vekamoʼmo kagikalefeʼmo nunumuʼmo nehaya vayaʼmo kalavusi huno apatesiyafeʼmo mago avoʼmo mono huʼa neʼapataya vayaʼaiteʼmo yagaiʼa neʼapataya vayaʼaitetiʼmo aliteno mani taonifiʼmo eʼniye, huno ha paiʼnigenoʼaeʼmo 15#Ap 25:13; 27:24; Lo 1:5Ala kava neʼmoʼa hunoʼaeʼmo, Nagaemo aliʼyaʼnieʼmo uno nagiʼnimo alu nofi vayaʼaifenagi yagaiʼa neʼapataya vayaʼaifenagi Isaleli vayaʼaifenagi huno aeno hakalo huno hapa paisiyafeʼmo lekana paiʼna ateʼnovanagi afaʼa uvo. 16#2 Ko 11:23-28Nagiʼnilefeʼmo agafu kisiya kavaʼmo aliʼna ave lisugeno aliʼyaʼnimo aligiye, huno ha paiʼniye.
17Ha paiʼnigeno Ananaiyasiʼa uno ani nopiʼmo uno haino Solo agufaleʼmo ayaʼmo maleʼnenoʼaeʼmo, Solo konagaʼnimogae, huno, Ala kava neʼmo Yesuʼa kateʼmo neʼanageno kaulagaleʼmo afole aiʼnigeka ageʼnana vekamoʼmo nagaemo alino nateʼnigeʼna eʼnove. Nagaemo kaulagamo aliʼna ayakeʼna katesugeno Goti Aunemeʼamoʼmo kaipafiʼmo havai tesiyafeʼmo alino nateʼnigeʼna eʼnove, huno ha nepaigenoʼaeʼmo 18malage huno mago noyame hainanigana agufa yaʼmo aulagafatiʼmo asagauno aiʼnigenoʼaeʼmo aulagamo alagepa huno ageno ayakeʼniye. Agaemo he tiʼnigeno aniʼmo faleno ateʼniye. 19Aniʼmo faleno atetegenoʼaeʼmo neʼyaʼmo neʼnigeno lokiya vaino ateʼniye.
Soloʼa Namasakasi taonifiʼmo Goti geʼamo aepa faino aeno hakalo huno hapa paiʼniya gemae
20Soloʼa Goti geʼamo neʼafiya vayaʼeʼmo Namasakasi taonifiʼmo mago afinaʼmo maiʼniye. Malage huno Yu vayaʼai mono noʼale noʼaleʼmo uneno huno Kalaisifeʼmo hunoʼaeʼmo, Ani vekamo Goti mafaʼneʼamo maiʼniye, huno aeno hakalo huno hapa paiʼniye. 21#Ap 8:3Muki vayaʼmogimo ani gemo afiʼa hapau aiteʼapaeʼmo, Ani vekamoʼmo Kalaisi agiʼalefeʼmo nunumuʼmo nehaya vayaʼmo Yulusalemu taonifiʼmo maiʼnaya vayaʼmo apamagiʼniye. Hogoteno apamagitenoʼaeʼmo hemenimo kalavusi huno apateteno mono huʼa neʼapataya vayaʼaiteʼmo yagaiʼa neʼapataya vayaʼmo apavalelinuno apamisiyafeʼmo manileʼmo eʼniya vekamae, huʼa huʼnae. 22#Ap 17:3; 18:5,28Soloʼa magoʼe magoʼe huno lokiya gefatiʼmo huno aeno hakalo huno hapa painoʼaeʼmo, Yesuʼa Kalaisi vekamo maiʼniye, huno alino apave liʼniye. Alagepa huno alino apave liʼniyaʼmofeʼmo Namasakasi taonifiʼmo maiʼnaya Yu vayaʼmogimo geʼaleʼmo afaʼa aeʼa atagaina huʼa osuʼnae. 23#Ap 23:12Yatala afinaʼmo utegeʼapaeʼmo Yu vayaʼmo aliʼa anupa huʼa maiʼneʼapaeʼmo, Soloʼmo amagigune, huʼa huʼnayaʼmonanafa 24Soloʼa ani gemo ago afiʼniye. Apakaemo Soloʼmo amagisayafeʼmo felugaʼe haniʼilagaʼeʼmo ani taonifiʼmo muki lafi kipaʼaleʼmo yagaiʼa maiʼnae. 25#2 Ko 11:32-33Yagaiʼa maiʼnayaʼmonanafa Kalaisi geʼamo neʼafiya vayaʼmogi haniʼilagamo avaleli uʼa yafa kegiʼyaleʼmo uʼa haiʼa ateʼneʼa hona yuvapagana yapiʼmo aliʼa ateteʼa nofi aeteʼa aliʼneʼa ataleʼnageno Soloʼa uno lamino kegiʼya malaga mopafiʼmo asagauno aiteno uʼniye.
Soloʼa Yulusalemu kotegamo uno maiʼniya gemae
26 #
Ga 1:17-19
Soloʼa Yulusalemu taonifiʼmo Yesu geʼamo neʼafiya vayaʼeʼmo magokepi aliʼa anupa huʼa maisayafeʼmo eʼniyaʼmonanafa agaefeʼmo Kalaisi geʼamo noʼafiya vekamo maiʼniye, huʼa apakesamo afiʼnayaʼmofeʼmo agaefeʼmo koliʼamo huʼnae. 27#Ap 9:4,20; 1 Ko 9:1; 15:8Koli nehagenoʼaeʼmo Manamasiʼa eno ha maeno apa vayaʼaitegamo avalelino uʼniye. Manamasiʼa apa vayaʼaifeʼmo hunoʼaeʼmo, Soloʼa kategamo neʼunoʼaeʼmo Ala kava neʼmo ageʼnigeno Ala kava neʼmoʼa ha paiʼniye. Inagi Soloʼa uno Yesu agiʼalefeʼmo Namasakasi kotegamo lokiya himamuʼaletiʼmo aeno hakalo huno hapa paiʼniye, huno hapa paiʼniye. 28Hapa paiʼnigenoʼaeʼmo Soloʼa apakaeʼeʼmo magokepi lokaeno maiʼneno muki Yulusalemu haopalega apakaeʼeʼmo magokepi lokaeno uneno huʼniye. 29Soloʼa koli osuno lokiya gemo huno Ala kava neʼmo Yesu agiʼalefeʼmo aeno hakalo huno hapa paiʼniye. Galiki apakemo neʼaiya Yu vayaʼeʼmo ge huge afige huʼa maiʼneʼa hapa paiʼnigeʼapaeʼmo amagisayafeʼmo huʼnae. 30#Ap 11:25; Ga 1:21Konagaʼamogi ani gemo afiteʼapaeʼmo Sisaliya kotegatiʼmo avaleli uʼa Tasasi kotegamo aliʼa ateʼnageno uʼniye. 31Ani afinaʼmo Goti mafaʼneʼamo aliʼa anupa huʼa maiʼnaya vayaʼmo Yutiya kotegagi Galeliya kotegagi Sameliya kotegagi huʼa maiʼnaya siosi vayaʼmogimo apaipamoʼmo falu huʼnigeʼa apayamufa huʼa maiʼnae. Gotifeʼmo koli huʼa maiʼnagenoʼaeʼmo Goti Aunemeʼamoʼmo alagepa huno hapa maeʼnigeʼa alagepa huʼa maiʼnageʼapaeʼmo magoʼe magoʼe huʼa asole vayaʼmo Goti mafaʼneʼamo hamaleʼnae.
Pitaʼa Lita kotegaʼe Yopa kotegaʼeʼmo uno maiʼniya gemae
32Pitaʼa muki haopalega umenitata nehunoʼaeʼmo Lita kotega maiʼnaya Goti mafaʼneʼalegamo uʼniye. 33Lita kotega maiʼnenoʼaeʼmo ageyana mago vekamo agiʼamo Iniyasiʼa eitiʼa kafugamo kanage kanaga osuno muki afinaʼmo neʼmaiya vekamo hipaʼaleʼmo havaeno maiʼnigeno ageʼniye. 34Agetenoʼaeʼmo Iniyasiyo, huno, Yesu Kalaisiʼa alino kahageno kateʼnigi he tika yakaikonakamo alika alagepa huka maiyo, huno ha paiʼnigeno malage huno he tiʼniye. 35Muki Lita kotega maiʼnaya vayaʼe Saloni kotega maiʼnaya vayaʼmogiʼeʼmo agaemo ageteʼapaeʼmo apaipamo aliʼa afe leteʼa Ala kava netegamo uʼnae.
36Mago a kanomo agiʼamo Tamaitaʼa Yopa taonifiʼmo maiʼneno Goti geʼamo neʼafiya a kanomo maiʼniye. Galiki gefatiʼmo Nokasiʼae huʼa agi aeʼnae. Muki afinaʼmo alagepa kavaʼageʼmo huno kagemi yaʼapimo ohaneʼniya vayaʼmo hapa maeno apamige apamige huno maiʼniya a kanoe. 37Pitaʼa Lita taonifiʼmo maiʼnigenoʼaeʼmo ani a kanomo kaita hauʼnigeno ago faliʼniye. Faliʼnigeʼa agufaʼamo sese hutaleʼa anaga aeno hanagi maleʼniya nopiʼmo maleʼnae. 38Yopa taonimo Lita taonimo haopaleʼmo haneʼniyaʼmofeʼmo Pitaʼa Lita taonifiʼmo maiʼniye, huʼa huʼnaya gemo Yopa taonifiʼmo mago vayaʼmo geʼamo neʼafiya vayaʼmogi ani gemo afiteʼapaeʼmo lole vekalaʼmo aliʼa anateʼnageʼana uʼana Pitafeʼmo huʼanaeʼmo, Malage huka lagaetegamo eno, huʼana ha paiʼnaʼae. 39Pitaʼa ani gemo afitenoʼaeʼmo anakaeʼeʼmo uno avaʼyi huʼnigeʼapaeʼmo avaleliʼuʼa anaga aeno hanagi maleʼniya nopiʼmo uʼa haiʼnae. Muki kogu aʼne anagaʼmogimo eʼa Pita haopaleʼmo lokaeʼa maiʼneʼa aviʼyaʼmo nehuʼapaeʼmo Nokasiʼa apakaeʼeʼmo magokepi lokaeno maiʼniya afinaʼmo alo huʼniya siotiʼe kukenaʼeʼmo aliʼa ave liʼnae. 40#Mk 5:40-41Ave liʼnagenoʼaeʼmo Pitaʼa hunoʼaeʼmo, kumatega uta lamiyo, huno hapa paiʼnigeʼa uʼa lamiʼnageno aleʼya faino maiʼneno nunumuʼmo huteno aino afe leno agufaleʼmo ageʼnenoʼaeʼmo, Tamaitao, huno, he tiyo, huno nehigenoʼaeʼmo aulagamo ageno ayakeno Pitaʼmo agetenoʼaeʼmo he tino fai maiʼniye. 41Pitaʼa ayateʼmo alino he tino ateʼnigeno he tiʼniye. Pitaʼa apaote vayaʼe kogu aʼne anagaʼeʼmo ge huʼnigeʼa eʼa hai eʼa maiʼnagenoʼaeʼmo Pitaʼa hunoʼaeʼmo, afaʼa maiʼniye, huno alino apaveliʼnigeʼa ageʼnae. 42Ani kavafeʼmo ava gemo muki Yopa haopalegamo aino atagu faenuneno huʼnigeʼapaeʼmo asole vayaʼmogi Ala kava nefeʼmo apakesamo afiʼa fatago huʼnae. 43#Ap 10:6Pitaʼa yatala afinaʼmo Yopa taonifiʼmo mago vekamoʼmo afu agufaletiʼmo alu ya alu yaʼmo alo hisayafeʼmo heno kalo paeno alino api neʼaiya vekamo agiʼamo Saimoni nopiʼmo havaeno maiʼniye.
Currently Selected:
Apa 9: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.