Apa 7
7
Sitiveniʼa aeno hakalo huno hapa paiʼniya gemae
1Hogote vekamo mono huʼa neʼapataya vayaʼaiteʼmo yagaino neʼapateya vekamoʼmo Sitivenifeʼmo loka hunoʼaeʼmo, Kagaefeʼmo ina hosu gemo nehiye, huʼa huʼnaya gemo lama gemo nehafiye, huno ge huno afi geʼnigenoʼaeʼmo 2#Aep 11:31Sitiveniʼa hunoʼaeʼmo, Naganaʼnimogitapaʼe afoʼnimogitapaʼeʼmo afiyo, huno, Akeyaʼvilaga laginago vekamo Emalehamuʼa Mesopotemiya kotegamo maiʼnenoʼaeʼmo Helani kotegamo oʼuʼnigenoʼaeʼmo aulagaleʼmo ha le konali yaʼaʼe vekamo Gotiʼa afole aitenoʼaeʼmo, 3#Aep 12:1Konaga vayakamo apatalege kokamo atalege huteka aliʼna kave lisuva kotegamo uka maiyo, huno ha paiʼniye. 4#Aep 11:31–12:5Ha paiʼnigenoʼaeʼmo Emalehamuʼa Kalatiya kotegatiʼmo ataleno uno Helani kotegamo maiʼniye. Emalehamuʼa Helani kotegamo maiʼnigenoʼaeʼmo afoʼamoʼmo falitegeno Gotiʼa alino ateʼnigeno eno lagaemo maiʼnona koteʼmo maiʼniye. 5#Aep 12:7; 15:18; 17:8; Loa 2:5Gotiʼa mago hoyamo vaisiyafeʼmo aise mopamo oʼamiʼniyaʼmonanafa Emalehamuʼa anamo vekamo maiʼnigenoʼaeʼmo ani mopamo kamisugeʼapaeʼmo kaginago vayaʼmogimo aligae, huno ha paiʼniye. 6#Aep 15:13-14; Hat 12:40Gotiʼa ha painoʼaeʼmo, Kaginago vayaʼmogimo ani mopamo atale uʼa alu nofi vayaʼai mopaleʼmo kalaga hageʼa maigae. Maiʼnisageʼapaeʼmo ani alu nofi vayaʼmogimo apavaleʼa kalavusi aliʼyateʼmo apateteʼa lusi kana yaʼmo apamisageʼa fo hataletiʼa kafugamo kalavusi aliʼyaʼmo aliʼa maigae. 7#Hat 3:12Henagaʼamo nagaemo kalavusi huʼa apateʼneʼa apakaeteʼmo yagaiʼa neʼapataya vayaʼai kavaʼapimo aliʼna fako huʼna apateteʼna agoti huʼna apatesugeʼapaeʼmo kaginago vayaʼmo ani kotetiʼmo ataleʼeʼa mani koteʼmo maiʼneʼa nagaetefeʼmo mono hugae. 8#Aep 17:9-14; 21:4Mago kotalakemo hu maleʼnisugeno ani kotalakemo alagena kavaʼamo haneʼnisigeka ve mafaʼnekamo agufamo lagauvo, huno ha paiʼnigeno Emalehamuʼa Aisikiʼmo alino ateʼnigeno eitiʼa afinaʼmo utegenoʼaeʼmo agufamo lagauʼniye. Aisikiʼa Yekopuʼmo alino atetenoʼaeʼmo agufamo lagauʼnigeno ani kavaʼmo huno Yekopuʼa mafaʼne anagaʼamo tuolofuʼa nofi vayaʼmogi aepa vayaʼmo alino apateteno apakufamo lagaute lagaute huʼniye. 9#Aep 37:11,28; 39:1-3,21-23Henagaʼamo ani nofi vayaʼai aepa vayaʼmogimo Yosefefeʼmo apaipa kafamo haeteʼapaeʼmo avaleʼa maketi huʼa alu kotega vayaʼmo apamiʼnageʼa miya faiʼa avaleliʼuʼa Isipi kotegamo ateʼnageno afa aliʼyaʼmo alino maiʼniye. 10#Aep 41:37-44; Sam 105:21Maiʼniyaʼmonanafa Gotiʼa alagepa huno ha maeteno hosu kavategatiʼmo hatu maeno ateʼniye. Ha maeteno alagepa aipa agesamo amiʼnigeno Feloʼa Isipi kote kini vekamoʼmo agenoʼaeʼmo alagepa aipa agesa vekamo maiʼniye, huno agetenoʼaeʼmo, Isipi koteʼe muki yaʼnileʼeʼmo yagaino apategaiye, huno huteno lekana paino ateʼniye. 11#Aep 41:54Henagaʼamo neʼyafeʼmo lusi kava huʼa kafu huʼnaya afinaʼmo afole aiʼnigeno muki Isipi kotega vayaʼe Kenani kotega vayaʼeʼmo neʼyafeʼmo lusi kava huʼa kafu huteʼapaeʼmo laginago vayaʼmogimo neʼyafeʼmo kahauya huʼnayaʼmonanafa oʼageʼnae. 12#Aep 42:1-5Mago vayaʼmogimo huʼapaeʼmo, Isipi kotegamo neʼyaʼmo haneʼniye, huʼa Yekopufeʼmo ha paiʼnageno afitenoʼaeʼmo mafaʼne anagaʼamo laginago vayaʼmo alino apateʼnigeʼa hogote afinaʼmo uʼnae. 13#Aep 45:1-4,16Uteʼa aiʼa atagi neʼeʼa maiteʼa halate lole afinaʼmo uʼnagenoʼaeʼmo Yosefeʼa nepuʼamogifeʼmo hunoʼaeʼmo, nagaemo Yosefeʼnamo maiʼnove, huno hapa paiʼnigeno Feloʼa Yosefe nepuʼamogimo apakeʼniye. 14#Aep 45:9-11; 46:27Yosefeʼa nepuʼamogifeʼmo hunoʼaeʼmo, utapa Afotimofeʼmo ha paitapaeʼmo, Kagaeʼe vayakaʼeʼmo Isipi kotegamo nagaetegamo emiteyo, hutapa ha paiyo, huno hapa paiʼniye. Yekopuʼeʼmo Isipi kotegamo eʼnaya vayaʼmo seveti faefuʼa vayaʼmo eʼa maiʼnae. 15#Aep 46:1-7; 49:33Ani kavaʼmo huʼa Yekopuʼe laginago vayaʼeʼmo eʼa Isipi kotegamo maiʼneʼa faliʼnae. 16#Aep 23:2-20; 33:19; Yas 24:32Faliʼnageʼapaeʼmo apakufaʼamo aliniʼuʼa Sekemi kotegamo kiʼa apateʼnae. Emalehamuʼa Hamo nofi vayaʼai mopamo miya faiʼniya mopafiʼmo kiʼa apateʼnae.
17 #
Hat 1:7
Gotiʼa Emalehamufeʼmo hunoʼaeʼmo, kaginago vayaʼmo hatu maeʼna apategauve, huno ha paiʼniya afinaʼmo ago eno hogo huʼniye. Hogo nehigeʼapaeʼmo Isipi kotega maiʼnaya laginago vayaʼmogimo asole vayaʼmo kaeʼa aiʼa atagu faeʼa maiʼnae. 18#Hat 1:8Maiʼnagenoʼaeʼmo alu vekamo Yosefeʼmo oʼageʼniya vekamoʼmo Isipi kotegamo kini vekamo maiʼneno yagaino apateʼniye. 19#Hat 1:10-22Agaemo laginago vayaʼaifeʼmo humi apateteno ve mafaʼneʼapimo apatalesageʼa falisayafeʼmo aini huno apateʼniye. 20#Hat 2:2; Hi 11:23Aini huno neʼapategenoʼaeʼmo Moseseʼa afole aiʼniye. Gotiʼa Mosesefeʼmo hunoʼaeʼmo, Alagi kanale mafaʼnemo maiʼniye, huno amuse huno ateʼniye. Itaʼafoʼalaʼmoganimo loleʼe magoʼe kaimo noʼanifiʼmo fala kiʼana ateʼneʼana yagaiʼana ateʼana maiʼneʼana kumateʼmo avaleliʼuʼana lamiʼana ateʼnaʼae. 21#Hat 2:3-10Ateʼnaʼageno Felo aʼmafaʼnemoʼmo eno agetenoʼaeʼmo noʼalegamo avalelinuno, nagaiʼni mafaʼnemo maigiye, huno huteno yagaino ateʼniye. 22Isipi vayaʼmogimo muki nehaya kavaʼapimo Moseseʼmo aliʼa aya maleʼnageno ageteno himamuʼaletiʼmo ge huge lokiya kavaʼmo huge huno maiʼniye. 23Moseseʼa ko sino alopa vekamo fotiʼa kafugamo maitenoʼaeʼmo, Nagaemo Isaleli vayaʼnimo uʼna haiya kava huʼa maiʼnafi huʼna apaketeʼna hapa maegauve, huno agesamo afiʼniye. 24#Hat 2:11-15Felo notegatiʼmo ataleno uno ageyana mago Isipi vekamoʼmo Isaleli vekamo neʼamagigeno agetenoʼaeʼmo Isaleli vekamo ha maeno anonale Isipi vekamo amagiʼnigeno faliʼniye. 25Moseseʼa hunoʼaeʼmo, vayaʼnimogimo nageteʼapaeʼmo Gotiʼa Moseseʼmo lekana paino ateʼniyanageno laha maeno hatu maeno latesigeta afaʼa ugune, huʼa apakesa afigae, huno agesamo afiʼniyaʼmonanafa ani kavaʼmo huʼa apakesa oʼafiʼnae. 26Egaʼamo Moseseʼa uno anakeyana lole Isaleli vekalaʼmo kaveta nehaʼageno anaketenoʼaeʼmo alino kugu huteno alino nanu aeno anatesiyafeʼmo hunoʼaeʼmo, Mani vekalana afiʼao, huno, Lanakaemo konagalaʼmo maiʼnaʼana na kava higetanaeʼmo kaveta nehaʼae, huno anafi geʼnigeno 27konagaʼamoʼeʼmo kaveta huʼniya vekamoʼmo eno Moseseʼa alino agoʼya faino ataletenoʼaeʼmo, Ina laʼmo lagaeteʼmo yagaiʼneka agoti getimo afiteka alika fako huka latesana vekamo maigane, huno lekana paino kateʼniye. 28Egamo Isipi vekamo ago kamitimo amagiʼnanageno faliʼniya kava huka nagaemo namagigapiye, huno afi geʼniye. 29#Hat 2:21-22; 18:3-4Moseseʼa ani gemo afitenoʼaeʼmo Isipi kotegatiʼmo aune hetaleno Mitiyani kotegamo uno noʼmo kiteno maiʼnenoʼaeʼmo lole mafaʼnelaʼmo alino anateʼniye.
30 #
Hat 3:1-10
Fotiʼa kafugamo utegeno Moseseʼa mago avemo agiʼamo Sainai avefiʼmo kaʼme kotega maiʼnigeno aise yosafatiʼmo atamo nelegenoʼaeʼmo Ala kava neʼmo enisole vekamo ani ata vaipiʼmo afole aiʼniye. 31Moseseʼa ani atamo ageno hau aitenoʼaeʼmo ageno alagepa hisiyafeʼmo yosa aepamo haopaʼaleʼmo uno maiʼnigeno Ala kava neʼmoʼa ha painoʼaeʼmo, 32Kaginago vayaʼmo Emalehamuʼagi Aisikiʼagi Yekopuʼagi huʼna Gotiʼapimoʼnamo maiʼnove, huno ha paiʼnigeno Moseseʼa atete hauʼnigeno magoʼe huno agesiyafeʼmo koli huʼniye 33Ala kava neʼmoʼa hunoʼaeʼmo, Manile maiʼnovaʼmofeʼmo he tika maiʼnana mopamo aote mopamo haneʼnigi sukamo asagika ataleka maiyo. 34Apakeʼnovana Isipi vayaʼmogimo vayaʼnilegamo asole hosu kavaʼmo nehageʼna apakeʼnove. Kage kage nehageʼna afiteʼna apakufamo aliʼna katiʼna apatesuvafeʼmo emiʼneʼnove. Eka afiyo, huno, Isipi kotegamo aliʼna katesugeka ugane, huno ha paiʼniye. 35Ani gemo ha paiʼniyaʼmonanafa Isaleli vayaʼmogimo Mosesefeʼmo huʼapaeʼmo, Ina laʼmo lagaeteʼmo yagaika lateʼneka agoti getimo afiteka alika fako huka latesana vekamo maigane, huno lekana paino kateʼniye, huʼa ha paiteʼa huʼniya geeʼmo ohapauʼniye. Huʼnayaʼmonanafa Gotiʼa ata vaipatiʼmo enisole vekamo avayafatiʼmo hunoʼaeʼmo, yagaika apateteka hapau vaisana vekamae, huno lekana paino ateʼniye. 36#Hat 7:3; 14:21; Nap 14:33Agaemo noʼagaya agufa lokiya aune kavaʼmo Isipi kotegagi Haesa anitenagi kaʼme kotegagi huno fotiʼa kafugamo hutenoʼaeʼmo Yu vayaʼmo Isipi kotegatiʼmo apavalelino uʼniye. 37#Ap 3:22Ani vekamo Moseseʼa Isaleli vayaʼaifeʼmo hunoʼaeʼmo, Ala kava neʼmo Gotitapimoʼmo mago vekamo agaetegati gemo alinineno aeno hakalo huno lapa paisiya vekamo nagaekana huno maisiya vekamo alino atesigeno lapakaetegamo eminegaiye. Lapakaemo ani vekamoʼmo muki hisiya geʼamo alagepa hutapa afiyo, huno hapa paiʼniye. 38#Hat 19:3; Loa 5:5; 9:10; Ap 7:53Ani vekamo Moseseʼa Isaleli vayaʼeʼmo kaʼme kotega aliʼa anupa huʼa maiʼnae. Moseseʼa Sainai avefiʼmo uno haino maiʼnigeno mago enisole vekamoʼmo apauneʼapameʼmo neʼapamiya gemo ha paiʼnigeno afiteno emineno laginago vayaʼaifeʼmo hapa paiʼnigeʼa lagaefeʼmo laha paiʼnae. 39#Nap 14:3Huno hapa paiʼniyaʼmonanafa huʼniya geeʼmo ohapauʼnigeʼapaeʼmo, halate atagi neta Isipi kotegamo ugune, huʼa apakesamo afiʼnae. 40#Hat 32:1,23Apakaemo mono huno neʼapateya vekamo Elonifeʼmo huʼapaeʼmo, Ani vekamo Moseseʼa Isipi kotegatiʼmo lavalelineʼniya vekamo haiyategamo uno maiʼnifi huta oʼageʼnone. Mago gotitimoʼmo alo higetao uʼa hogoteteʼa lavaleliʼa visayafeʼmae, huʼa ha paiteʼa 41#Hat 32:2-6aikeli pulumakamo auneʼamo alo huteʼa yuna afumo avaleli eʼa amagiʼa amiteʼa apayatetiʼmo alo huʼnaya yatefekeʼmo apamogaga aiʼnae. 42#Yel 19:13; Emo 5:25-27Gotiʼa hunoʼaeʼmo, apatalesugeʼa kanefitefenagi kailefenagi yegelefenagi huʼa mono hugae, huno huʼniye. Ani kavafeʼmo Gotiʼa akeyaʼvilaga agaetegati gemo alinineno aeno hakalo huno hapa paiʼniya vekaeʼmo ha paiʼnigeno avoʼmo kae maleʼniye. Avoʼmo kae maleʼniya gemoʼmo hunoʼaeʼmo,
Isaleli vayaʼmogitapae, huno, kaʼme kotega fotiʼa kafugamo maiʼnetapaeʼmo pulumakaʼe sipisipiʼeʼmo amagitapa nagaefekeʼmo mono hutetapa ofalinimo oʼnamigafa aigofe gotitapimogigeʼmo ofalinimo apamiʼnae. 43Mago aigofe gotiʼa agiʼamo Moloki seli noʼamo alinitapa uge mago aigofe gotiʼa kanefiʼmo auneʼamo agiʼamo Lefaniʼa alinitapa uge hutetapa mono huʼnae. Ani kava huʼnayaʼmofeʼmo aliʼna lapa faitalesugetapa afagi kotega Mamiloni kotegamo ugae,
huno hapa paiʼniye.
44 #
Hat 25:40
Gotiʼa Mosesefeʼmo hunoʼaeʼmo, Mago seli nofeʼmo kaha paisugekaeʼmo ina kavaʼmo huka kiyo, huno ha paiʼnigeʼa ani gemo akame huʼa kiʼnae. Gotiʼa apakaeʼeʼmo magokepi lokaeno maiʼniya seli noʼmo kaʼme kotegamo ki maleʼnae. 45#Yas 3:14-17; 23:9; 18:1Henagaʼamo Yasuvaʼe laginago vayaʼmogiʼeʼmo ani seli noʼmo aliʼniʼuʼa alu nofi vayaʼmo aliʼa hapa faiʼa apataleteʼa mopaʼapimo aliteʼa maiʼnae. Ani seli noʼmo haneme haneme neʼegenoʼaeʼmo Neviniʼa afole aiʼniye. 46#2 Sam 7:1-16; Sam 132:1-5Nevinifeʼmo Gotiʼa hao ke heʼniya vekamoʼmo Gotifeʼmo hunoʼaeʼmo, Mago noʼmo kiʼna kategesugi kanalepiye, huno ge huno afi geʼnigenoʼaeʼmo, Haʼao, huno ha paiʼnigenoʼaeʼmo 47#1 Kin 6:1Salomoniʼa Nevini mafaʼnemoʼmo kiʼniye. 48#Aiy 66:1-2Ki maleʼniyaʼmonanafa anaga hogote vekamoʼmo ma mopafi vayaʼmogi nekiya nopiʼmo noʼmaiye. Mago vekamo Gotitegati gemo alinineno aeno hakalo huno hapa nepaiya vekamoʼmo ani kavafeʼmo hunoʼaeʼmo,
49Kokuʼnapiʼmo yagaiʼna neʼapatova siyakana huno haneʼnigeʼna fai maiʼneʼna naiyamo mopafiʼmo aeʼna neʼmauve. Na agufa noʼmo kitapa nategae. Havaesuva noʼmo haiyategamo haneʼniye. 50Nagaiʼnigeʼmo muki yaʼamo alo huʼnove, huno huʼniye,
huno avoʼmo kae maleʼniye. 51#Hat 32:9; Yel 9:26; Aiy 63:10Lapaipa lapakesamo akaniʼniya vayaʼmogitapae, huno, Goti geʼamo noʼafiya nofi vayakana hutapa maiʼnageno Goti geʼamo afisayafeʼmo lapaipa lapakesamo aino halo noʼaiye. Lapakinago vayaʼmogi huʼnaya kava hutapa muki afinaʼmo Goti Aunemeʼamoʼmo lapakaefeʼmo ge nehiya gemo ataletapa maitapa halove nehae. 52#2 Sit 36:16; Mt 23:31Lapakinago vayaʼmogi Gotitegati gemo alini eʼa aeʼa hakalo huʼa hapa nepaiya vayaʼaifeʼmo muki vayaʼmogi apaini huʼa apateʼnae. Goti aliʼyaʼamo neʼaliya vayaʼmogi, Alagepa kavaʼageʼmo nehiya vekamo eminegaiye, huʼa huʼnageʼapaeʼmo lapakinago vayaʼmogi apamagiʼnageʼa ago faliʼnae. Hemenimo lapakaeʼeʼmo kutulu yaʼmo alitetapa ava gemo huʼnaya vekamo ago amagiʼnageno faliʼniye. 53#Ap 7:38; Ga 3:19; Hi 2:2Enisole vayaʼmogimo Goti keʼaepa geʼamo alini emiʼeʼa lapamiʼnayana akame osuʼnae, huno hapa paiʼniye.
Sitiveniʼa yafa kayotetiʼmo amagiʼnageno faliʼniya gemae
54 #
Ap 5:33
Kanisole vayaʼmogimo ani gemo afiʼnagenoʼaeʼmo apaipafiʼmo faiʼnigeno lusi kava huno apaipamo leʼnigeʼapaeʼmo apavepiʼmo haniʼa alagi huʼnae. 55#Mt 22:44; Ap 2:33-34; 5:31Goti Aunemeʼamoʼmo Sitiveni aipafiʼmo haino havai teʼnigenoʼaeʼmo Sitiveniʼa kokuʼnapiʼmo aulu heno ageyana Goti ha le konali yaʼamoʼmo aeno ha leʼnigeno Yesuʼa Goti lamaga haopaleʼmo he tino maiʼnigeno ageʼniye. 56#Kl 3:1Agetenoʼaeʼmo, Ageyo, huno, Kokuʼnaʼmo halo aiʼnigeʼna ageʼnovana Vemo Mafaʼnemo Goti lamaga haopaleʼmo he tino maiʼnigeʼna ageʼnove, huno hapa paiʼniye. 57Apakaemo alopa gefatiʼmo huteʼa apakesaleʼmo aliʼa akaniliʼa Sitivenitegamo nagu nagu huʼa uʼa 58#Ap 22:20taonifatiʼmo heʼa halauliʼuʼa yafa kayotetiʼmo amagiʼnae. Agoti huʼa ateʼnaya vayaʼmogi kukenaʼapimo asagiʼa neya vekamo Soloʼmo yagaino maisiyafeʼmo aiyafiʼmo maleʼnae. 59#Sam 31:5; Lu 23:46Apakaemo yafa kayotetiʼmo Sitiveniʼa neʼamagigenoʼaeʼmo Ala kava nefeʼmo hunoʼaeʼmo, Ala kava neʼmo Yesuo, huno, nauneʼnameʼaleʼmo aliyo, huno ha paiʼniye. 60#Lu 23:34Neʼamagigenoʼaeʼmo aleʼya faiʼneno alopa gefatiʼmo hunoʼaeʼmo, Ala kava nene, huno, mani hosu kavaʼapimo anonaʼapileʼmo apamisanafeʼmo kagesamo oʼafiyo, huno huteno au kaleʼniye.
Soloʼa amagiʼnageno faliʼniya kavafeʼmo aipafiʼmo kanalene, huno agesamo afiʼniye.
Currently Selected:
Apa 7: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.