Apa 10
10
Pitaʼe Koniliyasiʼefeʼmo huʼniya gemae
1 #
Mt 8:5; Ap 27:1,3 Mago vekamo agiʼamo Koniliyasiʼa Sisaliya taonifiʼmo maiʼnenoʼaeʼmo ami ati vayaʼaiteʼmo yagaino apateʼniye. Ami ati vayaʼaifeʼmo apaki aeʼapaeʼmo Itali kotega vayane, huʼa apaki aeʼnae. 2Agaemo mono huno maiʼnigeʼa agaeʼe konaga vayaʼaʼeʼmo Gotifeʼmo koli huteʼa mono huʼa maiʼnae. Agaemo Yu vayaʼmo monimo apamige hapa maege huno maiʼnenoʼaeʼmo muki afinaʼmo Gotifeʼmo nunumuʼmo huno maiʼniye. 3#Ap 3:1Yegemo uno lamino falesiyafeʼmo nehigenoʼaeʼmo alagamuna agegekana huno ageyana Goti enisole vekaʼamo agaetega emineno, Koniliyasiyo, huno huʼnigenoʼaeʼmo, 4Ala kava nene, huno, na agufa yane, huno afi geʼnigenoʼaeʼmo, Nunumuʼmo huge kagemi yaʼapimo ohaneʼniya vayaʼmo hapa maeka apamige nehana kavakamo Goti aulagaleʼmo afole aiteno agesaleʼmo haneʼniye. 5Kagaemo mago vayaʼmo alika apategeʼapao Yopa taonifilagamo viyo. Uʼa mago vekamo agiʼamo Saimoniʼmo mago agiʼamo Pitafeʼmo ge hisageno eno. Agaemo hamoʼamo Saimoni nopiʼmo agaeʼeʼmo maiʼniye. 6#Ap 9:43Hamoʼamoʼmo afu agufaletiʼmo alu ya alu yaʼmo alo hisayafeʼmo heno kalo paeno alino api neʼaiya vekamo noʼamo ani haigifiʼmo haneʼniye. Agaemo hunoʼaeʼmo, ina kava huka maiyo, huno kaha paigiye, huno ha paitenoʼaeʼmo 7enisole vekamo ataleno uʼniye. Inagi Koniliyasiʼa noʼafiʼmo aliʼyaʼmo neʼaliʼa vekalaʼe ami ati vekamo mono nehiya vekamo agaeʼeʼmo muki afinaʼmo lokaeno neʼmaiya vekaʼefeʼmo ge huʼnigeʼa eʼnageno 8afole aiʼniya kavafeʼmo ava gemo huno hapa paiteno alino apateʼnigeʼa Yopa taonifiʼmo uʼnae. 9Egaʼamo Yopa haopalega kateʼmo neʼagenoʼaeʼmo Pitaʼa felugakukuʼmo nehavaeya noʼmo nokatoʼmuʼmo otu nokatoʼmumo haneʼnigeno nunumuʼmo hisiyafeʼmo uno haiʼniye. 10Lusi kava huno aga teʼnigeno neʼyaʼmo nesiyafeʼmo neʼyaʼmo nekaegenoʼaeʼmo alagamuna agegekana huno ageʼniye. 11#Ap 11:5-17Ageʼniyana kokuʼnaʼmo halo aiʼnigeno alopa latapa kenamo mopa afafaleʼmo emineʼniye. Loleʼe loleʼe atupaleʼmo nofi aeteno ataleʼnigeno emineʼniye. 12Ani kenafiʼmo muki alu afu alu afugi afela afugi nagaloʼyavegi namagi huʼa maiʼnae. 13Mago vekamoʼmo hunoʼaeʼmo, Pitao, huno, He tika amagika kaeka no, huno ha paiʼnigenoʼaeʼmo, 14#Mon 11:1-47; Iyi 4:14Ala kava nene, huno, Haʼao. Lagaefeʼmo Yu mono keʼaepa gemoʼa hunoʼaeʼmo, alu hosu afumo ameʼamo oʼneyo, huno huʼnigeʼna mosiʼnova yane, huno ha paiʼnigenoʼaeʼmo, 15#Mk 7:15,19Gotiʼa alino auleno apateʼniya yafeʼmo hosu yaʼmo haneʼniye, huka osuvo, huno ha paiʼniye. 16Loleʼe magoʼe afinaʼmo ani kavaʼmo afole aiʼnigeno agetegenoʼaeʼmo kokuʼnapiʼmo alino vayu hulino uno haiʼniye. 17Pitaʼa alagamuna agegekana huno ageʼniya kavaʼmo aepaʼaeʼmo agesa alaʼamo neʼafigeʼapaeʼmo Koniliyasiʼa alino apateʼnigeʼa eʼnaya vayaʼmo Saimoni nofeʼmo kahauya hume hume eʼa ageteʼa kegiʼya kipateʼmo he tiʼnae. 18Apakaemo huʼapaeʼmo, Saimoni Pitaʼa eno maiʼnifi oʼmaiʼniye, huʼa ge huʼa afi geʼnae.
19 #
Ap 11:12; 13:2 Pitaʼa hunoʼaeʼmo, Ageʼnova kavaʼmo aepaʼamo na agufa kavaʼmo ageʼnofi, huteno agesa alaʼamo neʼafigenoʼaeʼmo Goti Aunemeʼamoʼmo hunoʼaeʼmo, Afiyo, huno, Loleʼe magoʼe vayaʼmogi kagaefeʼmo kahauya huʼa kagesayafeʼmo neʼagi 20he tika uka lamiyo. Nagaemo aliʼna apateʼnogeʼa neʼagi lole kagesa oʼafika apakaeʼeʼmo afaʼa uvo, huno ha paiʼniye. 21Pitaʼa he tino uno lamino Koniliyasiʼa alino apateʼnigeʼa eʼnaya vayaʼaifeʼmo hunoʼaeʼmo, Lapakaemo nagaefeʼmo eta kahauya nehaya vekamo maiʼnove. Na agufa yafeʼmo nagaetegamo neʼae, huno apafi geʼnigeʼapaeʼmo, 22#Ap 10:1-2Ami ati vayaʼaiteʼmo yagaino neʼapateya vekamo agiʼamo Koniliyasiʼa kagaetegamo alino lateʼnigeta neʼone. Agaemo kanale vekamo Gotifeʼmo mono nehiya vekamo maiʼniye. Muki Yu vayaʼmogimo huʼapaeʼmo, kanale vekae, huʼa nehaya vekamo maiʼnigeno Goti enisole vekaʼamoʼmo agaefeʼmo hunoʼaeʼmo, Pitafeʼmo ge hugenoʼao eno kaha paisigeka geʼamo afigane, huno ha paiʼniye, huʼa ha paiʼnagenoʼaeʼmo, 23#Ap 10:45; 11:12Haitetapa mani nopiʼmo havaeyo afaʼa yagaiʼna lapategauvanagi, huno hapa paiʼniye.
Egaʼamo Pitaʼa he tino uʼnigeʼapaeʼmo agaeʼe mago Yopa taonifi konaga vayaʼaʼeʼmo magokepi uʼnae. 24Egaʼamo Sisaliya taonifiʼmo uʼa avaʼyi huʼnae. Koniliyasiʼa agaiʼa nofi vayaʼe ao vayaʼeʼmo ge huʼnigeʼa eʼa aliʼa anupa huʼa Pitafeʼmo agava maiʼnae. 25Pitaʼa eno nopiʼmo uno haisiyafeʼmo nehigenoʼaeʼmo Koniliyasiʼa eno aiyafiʼmo agoʼya faiteno ape huno maiʼneno agaefeʼmo mono nehigenoʼaeʼmo 26#Ap 14:13-15; Le 19:10Pitaʼa alino he tino atetenoʼaeʼmo, He tiyo, huno, nagaeʼe kagaeʼeʼmo vayalafatalaʼmo maiʼnoʼae, 27huno ha paitenoʼaeʼmo magokepi uʼa haiʼanaeʼmo Pitaʼa apakeyana asole vayaʼmo aliʼa anupa huʼa maiʼnageno apakeʼniye. 28Apaketenoʼaeʼmo, Lagae keʼaepa gemoʼa hunoʼaeʼmo, Yu vayaʼe alu nofi vayaʼeʼmo magokepi lokaetapa oʼmaiyo, huno huʼnigetapa ago afiʼnae. Huʼniyaʼmonanafa Gotiʼa hunoʼaeʼmo, Mago vekaeʼmo hukaeʼmo, hosu vekamo maiʼniyanageʼna agaeʼeʼmo magokepi lokaeʼna oʼmaiguve, huka osuvo, huno ago alino nave liʼniye. 29Alino nave liʼniyaʼmofeʼmo nagaefeʼmo eno hutapa ge huʼnageʼnaeʼmo mago gemo osuʼna afaʼa eʼnove. Nagaefeʼmo na agufa yafeʼmo ge huʼnae, huno apafi geʼnigenoʼaeʼmo 30#Ap 3:1; 1:10Koniliyasiʼa hunoʼaeʼmo, Ega olagamo neʼyaʼmo oʼneʼna mosiʼna maime maime neʼeʼnaeʼmo yegemo uno lamino nefaleya agufa kanaleʼmo noʼnifiʼmo nunumuʼmo huʼna maiʼnogeno malage huno mago vekamo alave alaveʼage nehiya kukenamo vailiʼniya vekamo naulagaleʼmo afole aitenoʼaeʼmo, 31Koniliyasiyo, huno, Nunumuʼmo huge kagemi yaʼapimo ohaneʼniya vayaʼmo hapa maeka apamige nehana kavakamo Goti aulagaleʼmo afole aiteno agesaleʼmo haneʼniye. 32Kagaemo mago vayaʼmo alika apategeʼa Yopa taonifilagamo viyo. Mago vekamo agiʼamo Saimoniʼa mago alu agiʼamo Pitafeʼmo ge hisageno eno. Agaemo hamoʼamo Saimoni nopiʼmo agaeʼeʼmo lokaeno maiʼniye. Hamoʼamoʼmo afu agufaletiʼmo alu ya alu yaʼmo alo nehiya vekamo noʼamo ani haigileʼmo haneʼniye. Enoʼaeʼmo kaha paigiye, huno naha paiʼniyaʼmofeʼmo 33malage huʼna kagaefeʼmo ge huʼnogeka alagepa kava huka nagaetegamo eʼnane. Gotiʼa ani gemo hapa paiyo, huno kaha paiʼniya gemo laha paisanageta afisunafeʼmo hemenimo Goti aulagaleʼmo eta alita anupa huta maiʼnone, huno ha paiʼniye.
Pitaʼa Koniliyasi nopiʼmo alino apaya maleʼniya gemae
34 #
1 Sam 16:7; Lo 2:11; Ga 2:6 Pitaʼa aepa faino hapa painoʼaeʼmo, Hemenimo ago afiʼnovana Gotiʼa amega apakufaleʼmo apaketeno hapa noʼmaefa muki haopalega maiʼnaya vayaʼaitegamo magoke agufa kavaʼmo huno hapa neʼmae, huʼna ago afiʼnove. 35#Yo 9:31Gotiʼa alu nofi vaya alu nofi vayapatiʼmo agaefeʼmo koli huteʼa alagepa kavaʼmo nehaya vayaʼaifeʼmo hapao keʼmo nehe. 36#Sam 107:20; Aiy 52:7; Le 17:14Gotiʼa mago alagepa gemo Yu vayaʼmogitalegamo alino ateʼnigeno emineʼniye, huʼa huʼnagetapa ago afiʼnae. Ani gemoʼmo hunoʼaeʼmo Yesu Kalaisiʼa muki ma mopafi vayaʼaiteʼmo yagaino neʼapateya vekamoʼmo ma mopafi vayaʼe Gotiʼeʼmo alino nanu aeno apateteno alino magoke apaipamo kalino apateʼniye. 37#Mt 4:12-17Ani alagepa gemo Yoniʼa aniʼmo faleno apateʼniya afinatetiʼmo Galeliya kotegamo afole aiteno muki Yutiya kotegaʼeʼmo aino atagu faeno uneno huʼniye. 38#Mt 3:16; Lu 4:17-20Lapakaemo Yesuʼa Nasalasa taonifi vekamo ava gemo ago afiʼnae. Gotiʼa uvelimo lakino atetenoʼaeʼmo Aunemeʼamo amitenoʼaeʼmo ayamufa huno ateʼniye. Agaemo muki haopalega umenitata nehunoʼaeʼmo alagepa kavaʼmo huno vayaʼmo hapa maeteno Sataniʼa yagaino apateʼnigeʼa kana yaʼmo aliʼa maiʼnaya vayaʼmo alino alagepa huno apateʼniye. Gotiʼa agaeʼeʼmo lokaeno maiʼniyaʼmofeʼmo ani kavaʼmo huʼniye. 39Agaemo Yulusalemu taonifiʼe muki Yu vayaʼai kotegaʼeʼmo huʼniya kavaʼmo agetetaeʼmo aeta hakalo huta hapa nepauna vayaʼmo maiʼnone. Apakaemo malipu yosaleʼmo nili aiʼnageno faliʼniyaʼmonanafa 40#1 Ko 15:4-7loleʼe magoʼe afinaʼmo utegeno Gotiʼa ago alino he tino ateteno lagae laulagaleʼmo alino afole aino ateʼniye. 41#Yo 14:19,22-24; 15:27; Ap 1:8; Lu 24:42-43Agaemo muki vayaʼai apaulagaleʼmo afole oʼaiʼnifa ageteta aeta hakalo huta hapa paisunafeʼmo Gotiʼa lekana paino lateʼniya vayaʼmogita laulagalekeʼmo afole aiʼniye. He tino maiʼnigetaeʼmo agaeʼeʼmo aniʼmo nege neʼyaʼmo nege huta maiʼnone. 42#Ap 17:31; 2 Ti 4:1; 1 Pi 4:5Agaemo hunoʼaeʼmo, Nagaefeʼmo nava gemo hutapa hapa paitapaeʼmo Gotiʼa afaʼa maiʼnaya vayaʼe faliʼnaya vayaʼeʼmo agoti huno apatesiya vekae, huno huteno lekana paino ateʼniye, hutapa aeta hakalo hutapa hapa paiyo, huno laha paiʼniye. 43#Aiy 33:24; 53:5-6; Yel 31:34; Nen 9:24Muki laginago vayaʼmogi Gotitegati gemo alini eʼa aeʼa hakalo huʼa hapa nepaiya vayaʼmogimo ava gemo huʼapaeʼmo, Gotiʼa ani vekamo agiʼaletiʼmo agaefeʼmo apakesamo afiʼa fatago nehaya vayaʼai hosu kavaʼapimo alino atalegaiye, huʼa avoʼmo kae maleʼnae, huno hapa paiʼniye.
Gotiʼa alu nofi vayaʼmo Koniliyasiʼe vayaʼaʼeʼmo Aunemeʼamo apamiʼniya gemae
44 #
Ap 11:15; 15:8 Pitaʼa ani gemo hapa nepaigenoʼaeʼmo Goti Aunemeʼamo aote Aunemeʼamoʼmo muki ani gemo afiʼnaya vayaʼaiteʼmo emineʼniye. 45-46#Ap 2:4; 19:6Yu vayaʼmo apakesamo afiʼa fatago huʼnaya vayaʼmo Pitaʼeʼmo Yopa taonifatiʼmo eʼa maiʼnaya vayaʼmogimo ani kavaʼmo ageteʼapaeʼmo hapau aiʼnae. Alu apake alu apakemo aiteʼapaeʼmo Goti agiʼaleʼmo aliʼa asaga huʼnageʼa afiʼnae. Afiteʼapaeʼmo Gotiʼa fiku hapa maeno neʼapamiya Aunemeʼamo alu nofi vayaʼmo apamiʼniyaʼmofeʼmo hapau aiʼnae. 47#Ap 8:36Pitaʼa hunoʼaeʼmo, Lagaemo Gotiʼa Aunemeʼamo ago lamiʼniya kava huno mani vayaʼmo ago apamiʼniyaʼmofeʼmo aniʼmo faleta apatesuna kavateʼmo mago vekamoʼmo ka akanino oʼategaiye. 48#Ap 2:38Yesu agiʼalefeʼmo aniʼmo faletapa apateyo, huno hapa paiʼniye. Aniʼmo faleʼa apatetageʼapaeʼmo Pitafeʼmo huʼapaeʼmo, Magoʼe afinaʼmo lagaeʼeʼmo lokaeka maiyo, huʼa ha paiʼnae.
Currently Selected:
Apa 10: kyg2013
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2013, Wycliffe Bible Translators, Inc. All rights reserved.