LUK 22
22
Yisu tü Mongkhemtsün
(Mat 26:1-5; Mrk 14:1-2; Yhn 11:45-53)
1Aasan Sümai ta jontsün phoplao tsüthiokün Themtsai Sümai heao atao shimkü noiküla. 2Atengting mesonhoi nou Ngiokhem tsandetsünso hau apa titi akao ai ean-i-e ta ayam yam, tititenai ngüso khaiuniahoi lon hat.
Yihudaüh Yisu Janheao Thaloutsün
(Mat 26:14-16; Mrk 14:10-11)
3Nai sahoi chekü nime ongko tsak nou, Yihuda Iskariot ta jontsün da Biya nap. 4Nungai Yihuda Iskariot khukü atengting mesonhoi naiuso amkham tsam ehü ahei nouko apa titi janhe-e ta ngemlou. 5Ngüso monglingkü, apa hao tangka kiuao thalou. 6Apaüh mongchio lüko hoi nouso tsünoikünai ngüso hao apa janthioao atao amei yam.
Yisuüh Apaou Sümai Heao Khemlouji
(Mat 26:17-25; Mrk 14:12-21; Yhn 13:21-30)
7Phoplao tsüthiokün Themtsai Sümai ajekhaiu, sübaoko Aasantsün Sümai thaiutha onnemok hoi chaithio luatao atao shisao. 8Yisuüh Peter si Yohan ne hongkü ngiom, “Khuküta sam thaiutha Aasantsün Sümai heao lükhemlou.”
9Ngüsoüh apa tü sangkü ngiom, “Ni sam hao nung Sümai tiai khemlou-iao aiuji?”
10Apaüh thashin, “Athaplu, tilai asam nokai nap-e, nungai khaiunia tsak khiam meng kankü asam ko phete-e. Apa sungtsün tsamai lühoilut. 11Küta asamüh tsampao tü lüngio, ‘Atsandetsün nou ni tü, Ngo jü sahoiko Aasantsün Sümai heao mesan tsampai tiai noin?’ ta ngioji. 12Apaüh asam hao asungthon tsampai asong nai jengtsaiu apem khemtaiukü han-e nungai lükhemlou.”
13Ngüso khunai apaüh ngüso tü ngiotsünli ep, naiuso ngüsoüh Aasantsün Sümai nou khemlou.
Apaou Sümai
(Mat 26:26-30; Mrk 14:22-26; 1 Kor 11:23-25)
14Tilai nung Aasan Sümai heau atao shisao, apa sahoi nousoko moknoi. 15Apaüh ngüso tü ngiom, “Ngo moangjakünai nung Aasantsün Sümai asamko heao thatü aium! 16Tititenai ngo asam tü ngioko, Goa nokshing moshikün lektso ngo tilaitso nung tsühe-e.”
17Nai apaüh thengkam tsak loukü nianlom kiukü ngiom, “Nung lülou küta asam ongko lüsonshiu; 18tititenai ngo asam tü ngioko, Lo yakü Goa nokshing moshikün lektso ngo nung theng tsüshiu-e.”
19Nai apaüh themtsai nou loukü nianlomkiukü nung lopek küta ngüso hau kiukü ngiom, “Asam thaiutha kiutsün nung jü pem. Ngo yangsankü nung lükankei.” 20Sümai heküta nungti apaüh thengkam loukü ngiom, “Nung thengkam jüshe ii thaolutkü taiutsün athalou-e ayan, asam thaiutha lopengtsün noin.”
21“Lüko athaplu! ngo shapthiotsün ngüko hakü nungko pou nai noin! 22Tititenai Goa nou thattaiutsünli, Khaiunia Thso atsüoting ean-e, lüko sauüh apa sapthio-iji, nung khaiunia thaiutha inyate!”
23Nai ngüso si ngüso sauüh nung chhi-e ta sang-eao yachu.
Asongting Thaiutha Tsüo-etsün
24Sahoi nouso ongko sau asongting ta tsüo-ejikan. 25Yisuüh ngüso tü ngiom, “Goa tsüngekünso nokpaohoi nou ngüso khako Apaou iula-iji, naiuso sauhai ngüso khako oukong noin, ‘Khaiuniahoi haimei’ ta jonji. 26Lüko asam to nungti tsüthe-e; lüko asam ongko sau asongting noin, apa niophi haili naiuso sau asongting noin apa ayathsüotsünli iula-ela. 27Tititenai chihetsün nai kamtsün süne tsüdekünai asonkiutsün song? Chih hetsün nai moknoitsünso tsüdeso? Nungti ngo asam ongko asonkiutsünli noin.
28“Lüko ngo angjatsün chikü nai asam ngoko noiha; 29jü poüh ngü hao nokshingao oukong kiutsünli, ngü lüko asam hao oukong kiu-e. 30Asamüh jü nokshing nai jüpo uai heshiu-e, naiuso asamüh nokpao noikham nai moknoikü Israel mele chekü nime nouso chiai nokshing shinge.
Peterüh Tsüthaloutsün Yisu Khapiam Ngio
(Mat 26:31-35; Mrk 14:27-31; Yhn 13:36-38)
31“Simon, Simon! Aanglu! Amei naiuso tsümei janthatau, eiu a-khaiunia tsaküh tsothsüo naiuso tsonyak janthattsünli janthatau Satan nou asam tü theluao ngiokhem epaniu. 32Lüko ni amonglam ashio tsüepkü tsüdekü hao, ngü misao sao-iu, naiuso ni tilai müjam mong nou phokle-e, adeisinioso ou lülokong.”
33Peterüh Yisu tü ngiom, “Apaou, ngo niko aikü akhou tsamai khuao naiuso eao lüko khemloukü noin!”
34Yisuüh ngiom, “Peter, ngo ni tü ngioko, ni ngo tsünge ta samjam mothaloukün lektso lüso waio nou tsükowe.”
Tangkatsop, Nekong naiuso Sah
35Yisuüh apa sahoi tü sang, “Tilai ngü asam nekong naiuso hokkhut tsükankü hong, nungai asam tsoüh tsüsaiukü noilümo?” Ngüsoüh ngiom, “Tsünoi.”
36Apaüh ngüso tü ngiom, “Lüko lo, sauüh nekong taim, nungso lükan. Naiuso sauüh titso tsütaiu, apaüh apa ne lüjan naiuso sah nou tsak lütuh. 37Tiautenai asiongio nai, ‘Apa ngiokhem lothetsünhoi akuo nai vethioha’ ta ngiotsün nung jü thaiutha sattaiutsün shinapji ta ngü asam tü ngioji.
38Ngüsoüh ngiom, “Apaou! athaplu! Nungko sah nime noin!” Naiuso apaüh thashin, “Nungüh saiu-e!”
Olip Kingai Yisuüh Misao saoji
(Mat 26:36-46; Mrk 14:32-42)
39Yisuüh noknio wankü apa saili Olip king ai khun; naiuso sahoiso apa phiai hoilut. 40Tilai apa nung athangai shisaom, apaüh ngüso tü ngiom, “Asam alilu nai tsüsaliao misao lüsao.”
41Nai apa ngüso ainou intso khukü, kaukü napkü misao saokü ngiom, 42“Jü po, ni mongchionai nung angja thengkam ngo ainou alouwan; nungti lüko jü mongchio tsüde amongchio lüthe.” 43Aünhong tsak sungkü apa oulokongkiu. 44Naiuso thatü angja noiphe apaüh thatü kongkü misao sao; apa lemlu goh ai she chan-itsün khekkü noiküla.
45Tilai apa misao saotsün ainou chu, apa sahoi dongai shinai ngüso amongsaiu nou sailakü ep. 46Apaüh ngüso tü ngiom, “Tiauta asam sailaji? Achu, naiuso asam alilu nai tsüsaliao misao lüsao.”
Yisu Thaloutsün
(Mat 26:47-56; Mrk 14:43-50; Yhn 18:3-11)
47Yisu ngio chitekü noinai, hoi asong tsak Yihuda ta jontsün sahoi chekü nime ongko tsak nou ngüso heikü shin. Nai apa Yisu shimkü shikü sonai chep. 48Lüko Yisuüh apa tü ngiom, “Yihuda, ni son nai cheptsün nou Khaiunia Thso shapthio-iji süne?”
49Yisuko hakü noitsün sahoi nousoüh ti thawaoao noin nung ep, nai ngüsoüh sang, “Apaou, samüh sah nou kankeiko sai?” 50Ngüso ongko tsaküh Akhengting Meson tsamki da sah nou hekü apa noukhan uai nou heankiu.
51Lüko Yisuüh thalakü ngiom, “Nungtitso athean!” Nai Yisuüh tsamki noukhan nai thankü lomeikiu.
52Nai Yisuüh apa thako shitsün atengting mesonhoi Yihudahai ashehoi naiuso petchehoi tü ngiom, “Asam ngiokhem lothetsün thako shitsünli sah naiuso paiyan kankü shijiso? 53Tilai ngo asamko amkham tsamai ajekhaiu pungkü noiküla, asamüh ngo da pha tsüpou; lüko nung asam atao naiuso anyakhem oukong nou shingtsün atao.”
Peterüh Yisu Tsüthalouji
(Mat 26:57-58,69-75; Mrk 14:53-54,66-72; Yhn 18:12-18,25-27)
54Ngüsoüh Yisu thalouküta nialoukü khukü Akhengting Meson tsamai kankü shin. Lüko Peterüh apa phiai kumaikü hoilut. 55Tilai ngüsoüh kewem nai in nou ja naiuso aikü kam, Peter ngüso ongko moknoi. 56Meson tsamki tsaküh apa nungai moknoikü epkü Peter tü thapkü ngiom, “Nung khaiunia nou Yisuko noiküla!”
57Lüko Peterüh tsüthaloukü ngiom, “Nyiuhai ngü apa angetso tsünge!”
58Entso noiküta, amaohai tsaküh Peter epkü ngiom, “Ni lüko ngüso ongko tsak!” Lüko Peterüh ngiom, “Khaiunia, ngo tsüde!”
59Naiuso ghontao tsak thatso noiküta, amaohai tsaküh tsangsheikü ngekü ngiom, “Atsüoting nung khaiunia nou Yisuko noiküla, tititenai apa lüko Galil hai!”
60Lüko Peterüh ngiom, “Khaiunia, ni ti ngioji, ngü tsünge!” Nungko apa chitekü noi taoko waio nou ko. 61Apaou nou lapkü shikü Peter tü thap. Nai Peterüh apa tü titi Apaou nou “lüso waio nou mokokünai ni ngo samjam tsüthalou-e” ta ngiotsün yangsan. 62Apa soikü khuküta thatü thsüokü shap.
Yisu Lutsaotsün naiuso Shiutsün
(Mat 26:67-68; Mrk 14:65)
63Yisu thaloutsün hoi nou apa lochi naiuso shiuh. 64Ngüsoüh apa niovei kepokkiu, naiuso apa tü sangkü ngiom, “Ni tü shiutsün sau? Angesan!” 65Naiuso amao ngio piakü ngüsoüh apa lochikü ngiom.
Achosanhoi Dongko Yisu
(Mat 26:59-66; Mrk 14:55-64; Yhn 18:19-24)
66Tilai ahom shin petche nouso ajeiai nou atengting mesonhoi si ngiokhem tsandetsünso kamshi. Ngüsoüh apa ngüso ngiokam nai nialoukü shikü ngiom, 67“Ni Khrista süne? sam tü angio.” Lüko apaüh ngüso tü ngiom, “Ngo asam tü ngionai asamüh mong tsülam-e. 68Naiuso ngo asam tü sangnai asamüh tsüthala-e. 69Lüko lo yakü Khaiunia Thso Goa oukong uai moknoi-e.”
70Ngüso apem nou ngiom, “Naito ni Goa Thso süne?” apaüh ngüso tü ngiom, “Asamüh ngo apa ta ngioji.”
71Ngüsoüh ngiom, “Samüh amao mitha ti yamshiao tsünoi! Tititenai samüh sam chija apa son ainou lula-iu!”
Currently Selected:
LUK 22: KHIABSI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.